SEBR B SẼN TOOL GALAT-RÃMBÃ

1 Maam a Poll sẽn yaa tẽn-tʋmdã n gʋlsd yãmba. Pa ninsaal n yãk maam tɩ m yaa tẽn-tʋmd ye. Yaa a Zeezi Kirist+ ne Wẽnnaam sẽn yaa Ba wã+ sẽn vʋʋg-a n yiis kũ-rãmb sʋkã. 2 Sɩd-sɩda, yaa maam a Poll ne saam-biis nins fãa sẽn be ne maamã n gʋls seb-kãngã n tool tigims nins sẽn be Galasi soolmẽ wã:

3 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba. 4 Kiristã kõo a meng tõnd yel-wẽnã+ yĩnga, sẽn na yɩl n fãag tõnd ne dũni-kãngã* sẽn yaa wẽngã,+ wa sẽn zems tõnd Wẽnnaamã sẽn yaa d Ba me wã raabã.+ 5 Bɩ Wẽnnaam paam ziir wakat sẽn kõn sa yĩnga. Ãmiina.

6 Yãmb sẽn yɩ tao-tao woto n bas* Soab ning sẽn bool yãmb Kirist barkã* maasem yĩngã, n sakd koe-noog buud a to wã linga maam wʋsgo.+ 7 Pa rat n yeel tɩ koe-noog a to n be ye. La neb kẽer n gaamd yãmba,+ la b rat n tek Kiristã koe-noogã. 8 La baa tõnd bɩ malɛk sã n yi saasẽ n wa togs yãmb koe-noog a to tɩ pa koe-noog ning tõnd sẽn moon yãmbã, bɩ kãab-wẽng zĩnd a soab zugu. 9 Masã, mam le yeta yãmb wa tõnd sẽn zoe n togsã: Ned ning fãa sẽn togsd yãmb koe-noog tɩ zʋʋg yãmb sẽn deeg a soabã, bɩ kãab-wẽng zĩnd a soab zugu.

10 Sɩd-sɩda, yaa ninsaalb yam la m modgd n dat n ta bɩ, bɩ yaa Wẽnnaam yam? Wall yaa ninsaalb sũur la m modgd n na n noog bɩ? Mam sã n da ket n noogda ninsaalb sũyã, mam da pa na n yɩẽ Kirist yamb ye. 11 Bala m saam-biisi, mam datame tɩ yãmb bãng tɩ koe-noog ning mam sẽn moon yãmbã pa yit ninsaal nengẽ ye.+ 12 Bala mam pa reeg-a ninsaal nengẽ, leb n pa ninsaal n zãms-a maam ye. La tũu ne vẽnegr a Zeezi Kirist sẽn vẽneg maam.

13 Sãmbg kae tɩ yãmb wʋma mam manesem sẽn da yaa to-to Zʋɩf-rãmbã tũudmã pʋgẽ wã.+ Yãmb wʋmame tɩ mam da namsda Wẽnnaam tigingã hal tɩ loog nugu, la m sãamd-a.+ 14 Mam da paamda pãng wʋsg Zʋɩf-rãmbã tũudmã pʋgẽ n yɩɩd mam dog-taasã wʋsg sẽn yaa mam buudã nebã, mam sẽn da tar yẽesem wʋsg n yɩɩd bãmb m ba-rãmbã minindã pʋsẽ wã yĩnga.+ 15 La Wẽnnaam sẽn yaa soab ning sẽn yiis maam m ma pʋgẽ, la a bool maam ne a barkã*+ maasmã sẽn wa n tags tɩ zemsame 16 t’a tũnug ne maam n wilg nebã a Biigã, tɩ m moon bu-zẽmsã a Biigã koe-noogã,+ mam pa yɩ tao-tao n sok ned* baa a yembr bũmb ye. 17 Mam leb n pa kẽng Zerizalɛm, neb nins sẽn deng maam n yɩ tẽn-tʋmdbã nengẽ ye. Mam kẽnga Arabi, la rẽ poore mam lebg n kẽnga Damaase.+

18 La yʋʋm a tãab loogr poore, mam kẽnga Zerizalɛm+ n tɩ kaag a Sefaase,*+ n pa ne-a rasem piig la a nu. 19 La mam pa yã tẽn-tʋmdb a taabã ned baa a yembre, sã n pa Zu-soabã ma-biig a Zak+ bala. 20 La sã n yaa ne bũmb nins mam sẽn gʋlsd yãmbã wɛɛngẽ, mam yeta Wẽnnaam taoor tɩ mam pa yagd ziri ye.

21 Rẽ poore, mam kẽnga Siiri ne Silisi soolmẽ wã.+ 22 La Kirist karen-biisã tigimsã sẽn be Zide wã ra pa mi mam mengã ye. 23 B ra wae n wʋmdame bal tɩ b yetẽ: “Rao ning sẽn da namsd tõndã+ moonda tẽeb ning a sẽn da sãamdã koe-noogã masã.”+ 24 La b sɩngame n pẽgd Wẽnnaam mam sẽn toeemã yĩnga.

2 Dẽ, yʋʋm piig la a naas poore, mam le kẽnga Zerizalɛm ne a Barnabaase.+ Mam peega a Tɩt me t’a tũ maam.+ 2 Yɩɩ vẽnegr m sẽn paam yĩng la m sẽn kẽng be wã. Mam tɩ wilg-b-la koe-noogã mam sẽn moond bu-zẽmsã sʋkã. La yɩɩ ne saam-biis nins b sẽn nand wʋsgã bal la m tigm-yã, sẽn na yɩl n tõog n kɩs sɩd tɩ m sẽn zoetã wall m sẽn zoe wã pa zaalem ye. 3 La baa a Tɩt+ sẽn da be ne maamã sẽn yaa Gɛrkã, b pa modg-a t’a kẽ bãong ye.+ 4 La zu-loe-kãngã waa zirẽ-be-saam-biisã sẽn soos n kẽ tigingã pʋgẽ wã yĩnga.+ B kẽe tigingã pʋgẽ tao-tao n na n gũus n ges lohorem+ ning tõnd sẽn tar Kirist Zeezi pʋgẽ wã, sẽn na yɩl n kẽes tõnd yembd pʋgẽ.+ 5 Tõnd pa sak b raabã baa wakat bilf* menga,+ sẽn na yɩl tɩ koe-noogã sɩdã kell n pa ne yãmba.

6 La sã n yaa ne neb nins sẽn wõnd b yaa nin-kãsemsã,+ b sẽn da yaa bũmb ning pĩndã pa tar yõod ne maam ye. Bala Wẽnnaam pa get ninsaal wa sẽn zems nif sẽn ne wã ye. Nin-kãensã b sẽn nand wʋsgã pa paas maam bõn-sãang baa a yembr ye. 7 La b sẽn yã tɩ Wẽnnaam kõo maam koe-noogã tɩ m taas neb nins sẽn pa kẽ bãongã+ wa b sẽn kõ a Pɩyɛɛr koe-noogã t’a taas neb nins sẽn kẽ bãongã, 8 (bala yaa soab ning sẽn kõ a Pɩyɛɛr pãng t’a yɩ tẽn-tʋmd sẽn kẽ-b bãongã yĩngã n kõ ma-me pãng tɩ m yɩ tẽn-tʋmd bu-zẽmsã yĩnga)+ 9 la b sẽn wa n bãng Wẽnnaam barkã* b sẽn kõ maamã,+ a Zak+ ne a Sefaas* la a Zã sẽn da wõnd ra-lugsã yõka maam ne a Barnabaas+ nug-rɩtgo, tɩ wilg tɩ lagem-n-taar* bee tõnd ne bãmb sʋka, sẽn na yɩl tɩ tõnd kẽng bu-zẽmsã neb nengẽ, tɩ bãmb kẽng sẽn kẽ-b bãongã nengẽ. 10 La b kosa tõnd bal tɩ d kell n tags naong rãmbã yelle. Yaa rẽ me la mam sẽn modg n maan ne m sũur fãa wã.+

11 La a Sefaas*+ sẽn wa n wa Ãntiyoosã,+ mam yaasa a taoor n gom-a,* sẽn da yaa vẽeneg t’a tudgame wã* yĩnga. 12 Bala nand tɩ neb kẽer yi a Zak+ nengẽ n wa, a ra wae n dɩta ne bu-zẽmsã nebã.+ La b sẽn wa n wa wã, a basa rẽ n welg a menga, a sẽn zoet sẽn kẽ-b bãongã sullã neb yĩngã.+ 13 Zʋɩf-rãmbã sẽn ketã me naag-a-la pʋ-lik tʋʋm-kãngã pʋgẽ, hal t’a Barnabaas meng kong n naag-b b pʋ-lik tʋʋmdã pʋgẽ. 14 La mam sẽn wa n yã tɩ b pa kẽnd wa sẽn zems koe-noogã sɩdã,+ mam yeela a Sefaas* b fãa taoor yaa: “Baa fo sẽn yaa Zʋɩfã, fo sã n vɩ wa bu-zẽmsã neb la pa wa Zʋɩf-rãmbã, fo na n yɩɩ wãn n modgd bu-zẽmsã neb n dat tɩ b tũ Zʋɩf-rãmb minundu?”+

15 Tõnd sẽn dog n yaa Zʋɩf-rãmb la d pa yel-wẽn-maandb sẽn yit bu-zẽmsã sʋkã, 16 d bãngame tɩ pa tõogã tʋʋm maasem yĩng la ned paamd tɩ Wẽnnaam yeel t’a yaa tɩrg ye. Yaa a sẽn tẽed+ a Zeezi Kiristã maasem yĩng bala.+ Woto, tõnd tẽe Kirist Zeezi, sẽn na yɩl n paam tɩ Wẽnnaam yeel tɩ d yaa tɩrs d sẽn tẽed Kiristã yĩnga, la pa tõogã tʋʋm yĩng ye. Bala ned* baa a ye pa na n paam tɩ Wẽnnaam yeel t’a yaa tɩrg tõogã tʋʋm yĩng ye.+ 17 La d sẽn baood n na n paam tɩ Wẽnnaam yeel tɩ d yaa tɩrs Kirist maasem yĩngã, nebã sã n mik tɩ tõnd me yaa yel-wẽn-maandba, rat n yeelame tɩ Kirist yaa yel-wẽnd tʋm-tʋmd bɩ? A bada! 18 Mam sã n lebs n met bũmb nins m sẽn da sãam pĩndã, mam wilgdame tɩ m yaa tõogã kɩɩsda. 19 Bala tõogã maasem yĩnga, mam kii tõogã+ yĩnga, sẽn na yɩl n lebg vɩɩg Wẽnnaam yĩnga. 20 B naaga maam ne Kirist n ka ra-lukã zugu.+ Pa le yaa maam n vɩ ye.+ Yaa Kiristã sẽn vɩ mam pʋgẽ wã. Sɩd me, vɩɩm ning mam sẽn vɩ yĩngã pʋgẽ masã wã, mam vɩɩ mam sẽn tẽed Wẽnnaam Bi-riblã maasem yĩnga,+ soab ning sẽn nong maam n kõ a meng mam yĩngã.+ 21 Mam pa zãgs Wẽnnaam barkã*+ ye.* Bala sã n mik tɩ tɩrlem wata tõogã maasem yĩnga, sɩd-sɩda Kiristã kii zaalem.+

3 Yãmb a Galasi neb sẽn yaa yam-koees rãmba! Yãmb a neb nins taoor b sẽn bilg a Zeezi Kirist vẽeneg n yeel tɩ b ka-a-la ra-luk zugã,+ ãnda n belg yãmba?+ 2 Ad bõn-yɛng ning mam sẽn dat n sok yãmbã:* Yãmb reega vʋʋsem sõngã tõogã tʋʋm maasem yĩng bɩ, bɩ yaa y sẽn tẽ bũmb nins y sẽn wʋmã yĩnga?+ 3 Yãmb yaa yam-koees rãmb woto fãa la? Yãmb sẽn sɩng ne vʋʋsem sõngã sakrã,* y baasda ne yĩngã sakr la?*+ 4 Yãmb saka namsg wʋsg woto fãa zaalem yĩng la? Mam kɩsa sɩd tɩ pa yɩ zaalem yĩng ye. 5 Woto wã, soab ning sẽn kõt yãmb vʋʋsem sõngã la a maand yel-soalem+ yãmb sʋkã maanda rẽ y tõogã tʋʋm yĩng bɩ, bɩ yaa y sẽn tẽ bũmb nins y sẽn wʋmã yĩnga? 6 Yaa wa a Abrahaam nengẽ wã. A “tẽe a Zeova,* la b geelga a tẽebã wa tɩrlem yẽ yĩnga.”+

7 Vẽenega, yãmb miime tɩ yaa neb nins sẽn tar tẽebã n yaa a Abrahaam kamba.+ 8 Gʋls-sõamyã reng n wilgame tɩ Wẽnnaam na n wa yeelame tɩ bu-zẽmsã neb yaa tɩrs tẽeb maasem yĩnga, n deng n togs a Abrahaam koe-noogã n yeele: “Fo maasem yĩnga, buud fãa neb na n paama barka.”+ 9 Rẽnd neb nins sẽn tar tẽebã naagda a Abrahaam sẽn tall tẽebã n paamd barka.+

10 Neb nins fãa sẽn teeg tõogã tʋʋmã, kãab-wẽng n be b zutu. Bala b gʋlsame: “Kãab-wẽng bee ned ning fãa sẽn pa tũud bũmb nins fãa sẽn gʋls Tõogã seb-pindmã pʋgẽ n paad b pʋsẽ wã zugu.”+ 11 Sẽn paase, yaa vẽeneg tɩ ned baa a ye pa na n paam tɩ Wẽnnaam yeel t’a yaa tɩrg tõogã maasem yĩng ye.+ Bala “nin-tɩrg na n vɩɩmda tẽeb yĩnga.”+ 12 Tõogã pa tik tẽeb zug ye. B gʋlsame yaa: “Ned ning fãa sẽn maand bõn-kãense, a na n vɩɩmda bãmb maasem yĩnga.”+ 13 Kiristã raa tõnd+ n fãag tõnd+ ne Tõogã kãab-wẽngã, a sẽn deeg tõnd zĩig n lebg kãab-wẽngã yĩnga. Bala b gʋlsame: “Kãab-wẽng bee ne ned ning fãa b sẽn luul ra-luk zugã.”+ 14 Yɩɩ woto sẽn na yɩl t’a Abrahaam barkã tõog n ta bu-zẽmsã neb Kirist Zeezi maasem yĩnga,+ tɩ d tõog n deeg vʋʋsem sõngã b sẽn pʋlmã,+ tõnd tẽebã maasem yĩnga.

15 M saam-biisi, mam na n dɩka makr n gom ninsaalb yɛl yelle: B sã n maan kaoola, baa yaa ninsaalb bal n maane, ned a to pa tõe n kɩt tɩ kaoolã lebg zaalem wall n paas-a bũmb ye. 16 La pʋlemsã yɩɩ a Abrahaam ne a yagengã+ la b pʋlm-yã. B pa yeel tɩ “ne fo yagensã,” tɩ yaa wa b gomda neb wʋsg yell ye. B yeelame tɩ “ne fo yagengã,” tɩ wilgdẽ tɩ yaa nin-yend yell la b gomda, rat n yeel tɩ Kiristã.+ 17 Sẽn paase, mam yetame: Tõogã b sẽn lugl yʋʋm kobs-naas la pis-tã loogr poorã+ pa sãam kaool ning Wẽnnaam sẽn da maan pĩndã, tɩ pʋlengã lebg zaalem ye. 18 Bala Wẽnnaam sã n kõta rogem-pʋɩɩrã tõogã maasem yĩnga, dẽnd pa le yaa pʋleng maasem yĩng ye. La Wẽnnaam kõo a Abrahaam rogem-pʋɩɩrã ne yamleoogo, pʋleng maasem yĩnga.+

19 La bõe yĩng tɩ b kõ Tõogã? B paas-a-la pʋlengã n na n kɩt tɩ yel-wẽnã lebg vẽenese,+ hal n tãag yagengã sẽn yaa soab ning b sẽn da pʋlem pʋlengã waoongo.+ La b tũnuga ne malɛgs+ n kõ Tõogã. Yɩɩ ne se-yõkd maasem.+ 20 Kaool sã n yaa nin-yend yelle, b pa baood se-yõkd ye. La Wẽnnaam yaa a yembr bala. 21 Woto wã, Tõogã kɩɩsda Wẽnnaam pʋlemsã bɩ? A bada! Bala b sã n da kõo tõog sẽn tõe n wa ne vɩɩm, sɩd-sɩda, tɩrlem ra na n waa tõogã maasem yĩnga. 22 La Gʋls-sõamyã ninga bũmb fãa yel-wẽndã yembdẽ, sẽn na yɩl tɩ neb nins sẽn tar tẽebã tõe n paam bõn-sõma nins b sẽn pʋlem sẽn tẽed-b a Zeezi Kiristã.

23 La nand tɩ tẽebã wa, b rɩka tõnd n gũnug tõogã, tɩ d be a nugẽ n gũud tẽeb ning b sẽn da na n vẽnegã.+ 24 Woto, Tõogã lebga tõnd gũud n na n tall tõnd n ta Kiristã nengẽ,+ sẽn na yɩl tɩ Wẽnnaam yeel tɩ d yaa tɩrs tẽebã maasem yĩnga.+ 25 La tẽebã sẽn wa masã wã, pa le yaa gũud n so tõnd ye.+

26 Sɩd-sɩda, yãmb fãa yaa Wẽnnaam kamba,+ y sẽn tẽed Kirist Zeezi wã yĩnga.+ 27 Bala yãmb fãa sẽn deeg lisg Kirist pʋgẽ wã yeelga Kiristã.+ 28 Zʋɩf wall Gɛrk pa le be ye.+ Yamb wall ned sẽn pa yamb pa le be ye.+ Pag wall rao me pa le be ye.+ Bala yãmb fãa yaa bũmb a yembr Kirist Zeezi pʋgẽ.+ 29 Sẽn paase, yãmb sã n yaa Kirist rẽnda, yãmb sɩd yaa a Abrahaam yagense,+ la yãmb na n paama rogem-pʋɩɩr+ wa sẽn zems Wẽnnaam sẽn pʋlmã.+

4 La mam yetame tɩ rogem-pʋɩɩrã soab sã n ket n yaa yãag fãa, baa a sẽn so bũmb fãa wã, a pa toor ne yamb ye. 2 La yaa gũudb ne yel-gɛtb n so-a hal n tãag wakat ning a ba wã sẽn pĩnd n yãkã. 3 Woto me, tõnd me sẽn wa n yaa kambã, d ra yaa dũniyã bũmb toor-toorã yembse. 4 La wakat sẽn wa n ta, Wẽnnaam tʋma a Bi-riblã tɩ pag rog-a,+ t’a vɩɩmd wa tõogã sẽn yetã+ 5 sẽn na yɩl n yao n fãag neb nins sẽn sakd tõogã,+ tɩ tõnd tõe n paam n lebg Wẽnnaam kom-dibli.+

6 La yãmb sẽn lebg Wẽnnaam kom-dibli masã wã, Wẽnnaam tʋma vʋʋsem sõngã+ a Bi-riblã sẽn tarã tõnd sũyã pʋsẽ,+ t’a zẽkd a koɛɛg n yetẽ: “Aba,* Ba!”+ 7 Woto, fo pa le yaa yamb ye. Fo yaa Wẽnnaam bi-ribla. La fo sã n yaa Wẽnnaam bi-ribla, rẽnd fo-me na n paama rogem-pʋɩɩr Wẽnnaam maasem yĩnga.+

8 La yãmb sẽn wa n nan pa mi Wẽnnaamã, yãmb da yaa wẽnnaam-dãmb sẽn pa wẽnnaam-dãmb sɩd-sɩd yembse. 9 La masã yãmb sẽn bãng Wẽnnaamã, wall y sẽn tõe n yeel tɩ Wẽnnaam mii yãmb masã wã, maana wãn tɩ y le wẽnemded n teesd bũmb nins sẽn ka võor+ la sẽn ka yõodã yɛsa, n dat n le tʋmd wa yembs n kõt-ba? 10 Yãmb yãka raya, kitu, wakat* la yʋʋm n maand tig n tagsdẽ tɩ b yɩɩda b taabã. 11 Mam maanda rabeem yãmb yĩnga, bala wõnda mam sẽn modg n na n sõng yãmbã yɩɩ zaalem.

12 M saam-biisi, mam kot-y lame tɩ y lebg wa mam sẽn yaa a soabã, bala ma-me ra yaa wa yãmb sẽn yaa b rãmbã.+ Yãmb pa beeg maam ye. 13 La yãmb miime tɩ mam sẽn na n paam weer n moon yãmb koe-noogã pipi wã, tũu ne bãag sababo. 14 Baa mam bãagã sẽn kɩt tɩ yɩ toog ne yãmbã, yãmb pa yaal maam wall y kisg maam* ye. Yãmb deega maam wa Wẽnnaam malɛka, la wa Kirist Zeezi. 15 Sũ-noog ning yãmb sẽn da tarã bee yɛ? Bala mam yeta yãmb tɩ sã n da tõe, y ra na n feoosa y ninã n kõ maam.+ 16 La woto wã, mam lebga yãmb bɛ, m sẽn togs yãmb sɩdã yĩng bɩ? 17 Neb kẽer modgda ne yẽesem n dat tɩ yãmb kẽ-ba, la pa ne yam-sõng ye. B rat n zãaga yãmb ne maam, sẽn na yɩl tɩ yãmb sak n pʋg-b ne y sũur fãa. 18 La ned sã n baood yãmb ne yẽesem la ne yam-sõng wakat fãa, la pa mam sẽn wat n be ne yãmb wakat bala, yaa sõma ne yẽ soabã. 19 Mam kom-bõonese,+ mam le tara toog yãmb yĩnga, wa pag sẽn kʋmd rogem sẽn tar toog ningã. La mam na n kell n talla to-kãng hal n tãag wakat ning yãmb sẽn na n wõneg Kiristã. 20 Mam nongẽ-la mam sẽn da na n beẽ ne yãmb masã menga, n toeem m sẽn gomd ne yãmb to-to wã, bala mam pa mi m sẽn na n maaneg ne yãmb ye.

21 Togs-y-m wɛ. Yãmb a neb nins sẽn dat n tũ tõogã, yãmb pa mi Tõogã sẽn yetã la? 22 Wala makre, b gʋlsame n yeel t’a Abrahaam da tara kom-dibli a yiibu. A yembr yɩɩ tʋm-tʋmd-poakã+ n doge, t’a to wã yɩ pag ning sẽn pa yambã+ n doge. 23 La tʋm-tʋmd-poakã sẽn dog a soabã rogem yɩɩ wa kamb a taabã,*+ t’a to wã sẽn yaa pag ning sẽn pa yambã n dogã rogem tũ ne pʋleng maasem.+ 24 Bõn-kãens tara võor a to. Bala pʋg-kãensã makda kaool a yiibu. B maana kaool a yembrã Sinayi tãngã+ zugu. Kaool-kãng rogda kamb yembd yĩnga, la a makda a Agaare. 25 La a Agaar makda Sinayi+ sẽn yaa tãng sẽn be Arabi wã. A kell n zemsa ne rũndã-rũndã Zerizalɛmmã, bala Zerizalɛm bee yembd pʋgẽ ne a kambã. 26 La yĩngr Zerizalɛmmã tara lohorem. Yẽ n yaa tõnd ma.

27 Bala b gʋlsame: “Foom a pag ning sẽn yaa kir n pa rogã, maan sũ-noogo. Foom a pag ning sẽn pa bãng rogem toogã, zẽk f koɛɛg n kaas ne sũ-noogo. Bala pag ning b sẽn basã kamb sõor yɩɩda pag ning sẽn tar sɩdã.”+ 28 La m saam-biisi, yãmb yaa pʋlengã kamb wa a Izaak sẽn da yaa a soabã.+ 29 Wakat kãnga, biig ning rogem sẽn yɩ wa kamb a taabã* sɩnga biig ning rogem sẽn tũ ne vʋʋsem sõng maasmã namsgo,+ la yaa woto me rũndã-rũndã.+ 30 Baasgo, bõe la Gʋls-sõamyã yeta? A yeelame: “Rig tʋm-tʋmd-poakã ne a biigã. Bala tʋm-tʋmd-poakã biigã pa na n naag pag ning sẽn pa yambã biig n deeg rogem-pʋɩɩr a bada.”+ 31 M saam-biisi, rẽnd tõnd pa tʋm-tʋmd-poak kamb ye. D yaa pag ning sẽn pa yambã kamba.

5 Yaa lohorem a woto yĩng la Kirist sẽn kɩt tɩ d paam d mensã. Woto wã, bɩ y yals kãn-kãe+ la y ra bas tɩ b le kẽes-y yembd pʋgẽ ye.+

2 Ade! Maam a Poll yeta yãmb tɩ y sã n tɩ kẽ bãongo, Kirist pa na n tall yõod ne yãmb baa bilf ye.+ 3 Mam le yeta ned ning fãa sẽn kẽed bãong tɩ yaa tɩlɛ ne-a t’a sak Tõogã tõre.+ 4 Yãmb a neb nins sẽn maood n dat tɩ Wẽnnaam yeel tɩ y yaa tɩrs tõogã maasem yĩngã+ welga ne Kiristã. Yãmb yiisa y mens a barkã* pʋgẽ. 5 Sã n yaa ne tõndo, d gũudame n na n wa lebg tɩrs Wẽnnaam nifẽ. La na n tũu ne vʋʋsem sõngã la ne tõnd tẽebã bala. 6 Bala Kirist Zeezi pʋgẽ, bãong kõom wall moonem pa tar yõod baa bilf ye.+ La yaa tẽeb sẽn womd biis nonglem maasem yĩngã n tar yõodo.

7 Yãmb da zoeta sõma.+ Ãnda n gɩdg yãmb tɩ y ra kell n sak sɩdã? 8 Tags-kãngã buud pa yit Soab ning sẽn boond yãmbã nengẽ ye. 9 Rabɩll bilf wukda zom-nagdgã tõre.+ 10 Mam kɩsa sɩd tɩ yãmb a neb nins sẽn be Zu-soabã pʋgẽ+ wã pa na n tall tagsg a to ye. La ned ning sẽn namsd yãmbã,+ baa a sẽn yaa ned ning fãa, a na n paama sɩbgr ning a sẽn segd ne wã. 11 M saam-biisi, sã n yaa ne maam, mam sã n ket n moonda bãongã kõom, bõe yĩng tɩ b ket n namsd maam? Mam sã n ket n moonda bãongã kõom, dẽnd namsg ra-lukã*+ pa le yaa bũmb sẽn kɩtd tɩ ned lak n lʋɩ ye. 12 Mam nongẽ-la neb nins sẽn baood n gaam yãmbã sẽn na n tolg n fiuug b raoolmã.*

13 M saam-biisi, b boola yãmb lohorem pʋgẽ. La y pa segd n kɩt tɩ lohorem-kãng lebg weer y sẽn paam n na n pʋg yĩngã ratem ye.+ Bɩ y bas tɩ nonglmã kɩt tɩ y tʋm wa yembs taab yĩnga.+ 14 Bala Tõogã fãa pidsa* noor a yembr pʋgẽ sẽn yete: “Fo segd n nonga f to wa f menga.”+ 15 La yãmb sã n dũmd taab la y wãbd taaba,+ bɩ y gũus tɩ y tõe n wa kʋʋ taaba.+

16 La mam yetame tɩ y kẽn wa vʋʋsem sõngã sẽn wilgd yãmb sor to-to wã,+ tɩ rẽ la y pa na n sak yĩngã ratem baa bilfu.+ 17 Bala yĩngã ratmã yĩnga, a kɩɩsda vʋʋsem sõngã, tɩ vʋʋsem sõngã me kɩɩsd-a. Bõn-kãensã kɩɩsda taaba, hal tɩ y pa maand bũmb nins y sẽn datã ye.+ 18 Sẽn paase, sã n yaa vʋʋsem sõngã n wilgd yãmb sore, tõogã pa so yãmb ye.

19 La yĩngã tʋʋm yaa vẽenese: B yaa yoobo,*+ rẽgdo, nin-yoolem,*+ 20 bõn-naands pʋʋsgo, zĩn-dãmb yɛl maanego,+ beem, zaba, sũ-kiiri, sũ-yikri, no-koɛɛma, welsgo, ninsaalb pʋgbo,* 21 to bũmb tʋlgre, rã-tɩgre,+ reem sẽn naag ne tʋʋm-yoodo,* la bũmb a taab sẽn wõnd bõn-kãensã.+ Mam pĩnd n keoogda yãmb bõn-kãensã wɛɛngẽ wa mam sẽn da zoe n keoog yãmbã. Neb nins sẽn maand bõn-kãensa wã pa na n paam Wẽnnaam Rĩungã ye.+

22 La vʋʋsem sõngã biis yaa nonglem, sũ-noogo, laafɩ, sũ-mare,* maan-neere, sõmblem,+ tẽebo, 23 sũ-bʋgsem, la yõk-m-menga.+ Tõog ka be n kɩɩsd bõn-kãensã ye. 24 Sẽn paase, neb nins sẽn yaa Kirist Zeezi rẽndã naaga yĩngã ne a tʋlsmã la a ratmã n ka ra-lukã zugu.+

25 Tõnd sã n basame tɩ vʋʋsem sõngã so tõnd vɩɩmã, bɩ d kell n kẽn sõma me wa vʋʋsem sõngã sẽn wilgd tõnd sor to-to wã.+ 26 Bɩ d ra lebg wuk-m-mens rãmba,+ n wagsd taab+ la d maand sũ-kiir ne taab ye.

6 M saam-biisi, baa ned sã n wa rɩk so-wẽng n pa miẽ, bɩ yãmb a neb nins tẽeb sẽn bɩ wã* bao n dems-a ne bʋgsem.+ La bɩ y gũus y mense,+ yãmb me sẽn tõe n wa paam makrã yĩnga.+ 2 Bɩ y ket n tʋkd taab zɩɩbo,+ tɩ rẽ la y na n pids Kiristã tõogã.+ 3 Bala ned sã n tagsdẽ t’a yaa bũmb n yaool n pa baa fʋɩ,+ a belgda a menga. 4 La bɩ ned kam fãa mak a meng tʋʋm n gese,+ tɩ rẽ la a na n paam bũmb a sẽn tõe n tik n maan sũ-noog a meng yĩng bala, la pa a sẽn na n mak a meng ne ned a to ye.+ 5 Bala ned kam fãa na n tʋka a meng zɩɩbo.+

6 Sẽn paase, bɩ ned ning b sẽn zãmsd Wẽnnaam gomdã pʋɩ bõn-sõma fãa ne sẽn zãmsd-a yẽ wã.+

7 Da belg-y y mens ye. Wẽnnaam pa sẽn na paoog ye. Bũmb ning fãa ned sẽn bʋte, yaa rẽ me la a na n kẽebe.+ 8 Bala sẽn bʋt-a a yĩngã nafr yĩng na n kẽeba sãoong a yĩngẽ wã, la sẽn bʋt-a vʋʋsem sõngã yĩng na n kẽeba vɩɩm sẽn ka sɛt vʋʋsem sõng pʋgẽ.+ 9 Woto wã, bɩ d ra koms raood n bas sẽn yaa sõma maaneg ye. Bala wakatã sã n ta n mik tɩ d pa koms raood n base,* d na n kẽeba bõn-kãens biisi.+ 10 Woto wã, d sã n paam weer* fãa, bɩ d maan nebã fãa neere, la sẽn yɩɩda, neb nins sẽn kĩ ne tõnd tẽebã pʋgẽ wã.

11 Yaa mam mengã nug n gʋls seb-kãngã n tool yãmba. Ges-y-yã a gʋls-biisã sẽn yaa bɛd to-to.

12 Yaa neb nins fãa sẽn dat n noog nebã sũyã* n modgd yãmb tɩ y kẽ bãongã. B maanda woto, b sẽn pa rat tɩ b nams-b Kirist namsg ra-lukã* yĩng bala. 13 Baa neb nins sẽn kɩtd tɩ b kẽesd-b bãongã mens pa tũud Tõogã ye.+ La b ratame tɩ yãmb kẽ bãongo, tɩ b paam bũmb b sẽn tõe n tik n wuk b mens yãmb yĩn-nemsã wɛɛngẽ. 14 La bɩ m da tol n wuk m menga, tɩ sã n pa tõnd Zu-soab a Zeezi Kirist namsg ra-lukã* poorẽ bal ye.+ Yẽ maasem yĩnga, dũniyã lebga kɩɩng* mam nifẽ, tɩ ma-me lebg kɩɩng dũniyã nifẽ. 15 Bala bãong kõom pa baa fʋɩ, tɩ moonem me pa baa fʋɩ.+ Yaa nin-paallã Wẽnnaam sẽn naanã n yaa bũmbu.+ 16 Sã n yaa ne neb nins fãa sẽn kẽnd sõma wa sẽn zems gom-kãnga wã, bɩ laafɩ la nimbãan-zoeer zĩnd b zutu, n-ye, Wẽnnaam Israyɛllã zugu.+

17 Masã tɛka, bɩ ned baa a ye ra bao goam n kõ-m ye. Bala mam tara bãn m yĩngã pʋgẽ sẽn wilgd tɩ m yaa a Zeezi yamba.+

18 M saam-biisi, bɩ tõnd Zu-soab a Zeezi Kirist barkã* zĩnd ne-yã, y sẽn wilgd tɩ y tara zʋg-sõma wã yĩnga. Ãmiina.