SEBR B SẼN TOOL EFƐƐZ RÃMBÃ

1 Maam a Poll sẽn yaa Kirist Zeezi tẽn-tʋmd Wẽnnaam daabã maasem yĩngã n gʋls seb-kãngã, n tool nin-sõamyã wã sẽn be Efɛɛz+ la sẽn maand sɩd Kirist Zeezi pʋgẽ wã:

2 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba.

3 Bɩ tõnd Zu-soab a Zeezi Kirist Wẽnnaamã sẽn yaa a Ba me wã paam pẽgre. Bala a zĩnda saasẽ n kõ tõnd sẽn be Kirist pʋgẽ wã bark buud fãa sẽn yit a nengẽ.+ 4 Wẽnnaam yãka tõnd sẽn deng dũniyã yẽbgr tɩ d segd n zĩnd Kirist pʋgẽ, n yɩ nin-sõamyã la neb sẽn ka tar zang+ yẽ taoor nonglem pʋgẽ. 5 A pĩnd n yãka tõnd+ tɩ d na n wa lebg a kamb+ a Zeezi Kirist maasem yĩnga, wa sẽn zems a raab la sẽn noom-a.+ 6 Yɩɩ woto sẽn na yɩl tɩ nebã pẽg Wẽnnaam a bark-kãsengã*+ yĩnga, bark a sẽn tũnug ne a Bi-nongrã n wilg tõndã.+ 7 A Biigã maasem yĩng la a Biigã zɩɩmã maasem yĩnga,+ tõnd paamame tɩ b yao n fãag tõndo, rat n yeel tɩ tõnd paama d yel-wẽnã sugr+ wa sẽn zems Wẽnnaam barkã* sẽn yaa wʋsgã.

8 A kɩtame tɩ bark-kãng* yɩ wʋsg tõnd yĩnga, la a paas tõnd yam la yam-vẽenem, 9 bala a kɩtame tɩ d bãng a raabã yel-soalgdgã sẽn yaa sõngã.+ Yel-soalgd-kãng zemsa sẽn noom-a. Leb n yaa rẽ yĩng me la a yãk yam 10 n na n wilg a sẽn dat tɩ yɛlã sigl to-to wã. La yaa wakat ning a sẽn yãkã sã n wa pid la a na n maan bõn-kãnga, n tigim bũmb nins fãa sẽn be saasẽ, la bũmb nins fãa sẽn be tẽngã zugã+ Kiristã pʋgẽ. 11 Yaa Kiristã pʋgẽ la tõnd sẽn be wã. Leb n yaa yẽ pʋgẽ la b yãk tõnd tɩ d yaa pʋɩt-n-taase.+ B pĩnd n yãka tõnd wa sẽn zems Wẽnnaam daabã. A pidsda bũmb fãa wa sẽn zems a sẽn yãkd yam tɩ zemsd a raabã, 12 sẽn na yɩl tɩ tõnd sẽn yaa neb nins sẽn yɩ pipi n tẽ Kiristã yɩ sabab tɩ nebã pẽg a* ziirã. 13 La yãmb sẽn wʋm sɩd koɛɛgã sẽn yaa yãmb fãagrã koe-noogã, yãmb me tẽ-a lame. Yãmb sẽn tẽ wã poore, Wẽnnaam ninga yãmb bãnd+ ne vʋʋsem sõngã, Kiristã maasem yĩnga. 14 Vʋʋsem sõngã yaa kaset sẽn wilgd tɩ tõnd na n paama bũmb ning b sẽn pʋlem tõndã,+ sẽn na yɩl tɩ ne yaood b sẽn yao maasem yĩnga,+ Wẽnnaam nebã+ na paam fãagr Wẽnnaam ziirã pẽgr yĩnga.

15 Yaa rẽ n so tɩ ma-me sẽn wʋm tẽeb ning yãmb sẽn tar Zu-soab a Zeezi pʋgẽ wã kibarã, n paas y sẽn wilg to-to tɩ y nonga nin-sõamyã wã fãa wã, 16 mam pa tol n bas Wẽnnaam bark pʋʋsg yãmb yĩng ye. Mam sã n wa pʋʋsdẽ, m gomda yãmb yell wakat fãa, 17 n kotẽ tɩ tõnd Zu-soab a Zeezi Kirist Wẽnnaamã sẽn yaa Ba sẽn tar ziirã kõ yãmb tõog tɩ y yɩ yam dãmba, la y wʋm bũmb nins a sẽn vẽnegã võore, tɩ rẽ kɩt tɩ y paam bãngr hakɩɩk yẽ zugu.+ 18 A puka yãmb sũyã nin sẽn na yɩl tɩ y bãng a sẽn bool yãmb tɩ y saagd n na n paam bũmb ningã, arzɛgs nins sẽn tar ziirã a sẽn bĩng nin-sõamyã wã yĩng tɩ yaa rogem-pʋɩɩrã,+ 19 n paas a pãn-kãsengã sẽn pa tar mak-n-taagã a sẽn kõ tõnd sẽn yaa tẽedbã.+ Rẽ zemsa ne a sẽn tʋmd ne a pãn-kãsengã to-to wã. 20 Yaa pãn-kãng la Wẽnnaam tall n vʋʋg Kiristã n yiis kũ-rãmb sʋka, la a zĩndg-a a nug-rɩtg+ saasẽ, 21 t’a yɩɩd naam buud fãa, pãn-soaad buud fãa, pãng buud fãa, zu-sobend buud fãa, la yʋʋr buud fãa.+ La pa dũni-kãngã* pʋgẽ bal ye. Yaa dũni ning sẽn watã pʋgẽ me. 22 Sẽn paase, Wẽnnaam ninga bũmb fãa a naoã tẽngre,+ la a kɩt t’a lebg bũmb fãa zu-soab tigingã pʋgẽ.+ 23 Tigingã yaa a yĩngã,+ la a pida a maasem yĩnga. Yaa yẽ la soab ning sẽn pidsd bũmb fãa, bũmb fãa pʋgẽ wã.

2 Sẽn paase, Wẽnnaam kɩtame tɩ yãmb lebg vɩɩse, baa yãmb sẽn da ki y beegrã la y yel-wẽnã pʋsẽ wã. 2 Pĩndã, yãmb da kẽnda bõn-kãens pʋsẽ wa sẽn zems dũni-kãngã nebã sẽn kẽnd to-to wã,+ la wa sẽn zems naab ning sẽn so pemsmã raabã.+ Pemsem-kãng yaa yam+ ning sẽn tʋmd kɩɩsdbã pʋsẽ rũndã-rũndã wã. 3 N-ye, tõnd fãa ra bee bãmb sʋk pĩndã n kẽnd wa sẽn zems d yĩngã ratem,+ n tũud d yĩngã raab la d tagsa wã.+ Tõnd rogame n da yaa sũ-puugr+ kamb wa neb a taabã. 4 La Wẽnnaam nimbãan-zoeerã+ sẽn yaa kãsengã yĩnga, n paas a sẽn nong tõnd+ ne nonglem-kãsengã yĩnga, 5 a kɩtame tɩ tõnd naag Kiristã n lebg vɩɩse, baa tõnd sẽn da ki d beegrã pʋgẽ wã. Yaa Wẽnnaam barkã* maasem yĩng la yãmb paam fãagre. 6 Sẽn paase, a naaga tõnd ne Kiristã n vʋʋge, la a naag tõnd ne Kirist n zĩndg saasẽ d sẽn be Kirist Zeezi pʋgẽ wã yĩnga,+ 7 sẽn na yɩl tɩ dũni* ning sẽn watã pʋgẽ, bɩ a tõog n wilg a barkã* sẽn yaa wʋsgã, a sã n wa maand bõn-sõma n kõt tõnd a neb nins sẽn be Kirist Zeezi pʋgẽ wã.

8 Yaa bark-kãng* yĩng la yãmb paam fãagr tẽebã yĩnga,+ pa y mensã tʋʋm yĩng ye. Yaa Wẽnnaam kũuni. 9 Fãag-kãng pa tũ ne yãmb tʋʋma,+ tɩ ned baa a ye ra wa paam bũmb a sẽn tõe n tik n wuk a meng ye. 10 Tõnd yaa Wẽnnaam nug tʋʋma,* la a naana+ tõnd Kirist Zeezi pʋgẽ,+ sẽn na yɩl tɩ d tʋm tʋʋm-sõma nins a sẽn deng n yãk tɩ d segd n tʋmã.

11 Woto yĩnga, bɩ y tẽeg tɩ pĩndã neb nins sẽn kẽ bãong b yĩnsã pʋsẽ tɩ yaa ninsaalb nus n kẽesã ra boonda yãmb a neb nins sẽn dog n yaa bu-zẽms nebã tɩ moose.* 12 Wakat kãnga, yãmb da pa mi Kiristã ye. Y ra zãra ne Israyɛll buudã, n da pa mi pʋlengã kaool toor-toorã ye.+ Yãmb da pa tẽed manegre, la y ra pa mi Wẽnnaam dũniyã pʋgẽ me ye.+ 13 La masã, Kirist Zeezi pʋgẽ, yãmb a neb nins sẽn da zãr ne Wẽnnaamã pẽneg-a lame, Kiristã zɩɩmã maasem yĩnga. 14 Bala a yaa tõnd laafɩ, soab ning sẽn kɩt tɩ sul a yiibã lebg sul-yɛnga, la sẽn sãam lalg ning sẽn da be b sʋk n welg-bã.+ 15 A yĩngã maasem yĩnga, a kɩtame tɩ beemã sa, rat n yeel tɩ Tõogã sẽn tar noyã. Yaa sẽn na n kɩt tɩ sul a yiibã sẽn be a pʋgẽ wã lebg bu-paan-yɛnga,+ la sẽn na n kɩt tɩ laafɩ zĩndi. 16 Leb n yaa sẽn na n sõng sul a yiibã tɩ b maneg b yell ne Wẽnnaam namsg ra-lukã*+ maasem yĩnga, tɩ sul a yiibã lebg yĩng a yembre, bala a kɩtame tɩ beemã+ sa a mengã maasem yĩnga. 17 Sẽn paase, a waame n moon yãmb a neb nins sẽn da zãr ne Wẽnnaamã ne neb nins sẽn pẽ-a wã laafɩ koe-noogã, 18 bala Kiristã maasem yĩnga, tõnd sẽn yaa sul a yiibã nebã tõe n kolga Ba wã vʋʋsem sõng yɛngã maasem yĩng tɩ gɩdgr kae ye.

19 Rẽnd yãmb pa le yaa sãamb la tẽns a taab neb ye.+ Yãmb ne nin-sõamyã wã yaa tẽng-n-bi-taase,+ n naag n yaa Wẽnnaam zakã neba.+ 20 B mee yãmb tẽn-tʋmdbã ne no-rɛɛsdbã+ yẽbgrã zugu, tɩ Kirist Zeezi yaa yẽbgrã pãng kugri.+ 21 Yẽ pʋgẽ, roogã tõr sẽn tong taab sõma wã, a zẽkdame n lebgd wẽnd-doog sẽn yaa sõng a Zeova* yĩnga.+ 22 Kirist pʋgẽ, b kɩtame tɩ yãmb naag taab n lebgd roog Wẽnnaam sẽn be a pʋgẽ, ne vʋʋsem sõngã maasem.+

3 Yaa woto yĩng la maam a Poll be bãens roogẽ+ Kirist Zeezi yĩnga, la yãmb a bu-zẽmsã neb nafr yĩnga, 2 sã n mikame tɩ yãmb sɩd wʋmame tɩ b kõo maam tʋʋmd+ sẽn yaa sõng yãmb tɩ y paam n dɩ Wẽnnaam barkã* yõodo, 3 la tɩ tũu ne vẽnegr me tɩ mam bãng yel-soalgdg sẽn yaa sõngã, wa mam sẽn zoe n gʋls n togs yãmb koɛɛg-koɛɛgã. 4 Woto, y sã n wa karem gom-kãense, y na n bãngame tɩ mam wʋmda Kiristã yel-soalgdgã+ sẽn yaa sõngã võore. 5 Zãmaan nins sẽn loogã pʋgẽ, b pa kɩt tɩ ninsaalbã bãng yel-soalgdgã, wa b sẽn vẽneg-a rũndã-rũndã tẽn-tʋmd-sõamyã wã la a no-rɛɛs-sõamyã ne vʋʋsem sõngã maasmã ye.+ 6 Yel-soalgdgã yaa tɩ bu-zẽmsã neb nins sẽn be Kirist Zeezi pʋgẽ wã segd n yɩɩ pʋɩt-n-taas la yĩng a yembr wila,+ la tɩ koe-noogã maasem yĩnga, b na n naaga tõnd n paam bũmb nins Wẽnnaam sẽn pʋlmã. 7 Mam lebga bõn-kãngã tʋm-tʋmd wa sẽn zems Wẽnnaam barkã* kũun a sẽn kõt zaalmã, kũun ning mam sẽn paam tɩ zems a pãngã sẽn tʋmd to-to wã.

8 Yaa maam a ned ning sẽn pa ta nin-sõamyã wã yao-zʋʋgã+ la b kõ bark-kãngã,*+ sẽn na yɩl tɩ m moon bu-zẽmsã koe-noogã n gom Kirist arzɛkã sẽn ka tɛkã yelle, 9 la m sõng ned buud fãa t’a bãng b sẽn vẽnegd yel-soalgdgã sẽn yaa sõngã to-to wã.+ Yel-soalgdgã ra solga Wẽnnaam sẽn yaa soab ning sẽn naan bũmb fãa wã nengẽ hal sẽn kaoose. 10 Rẽ yɩɩ woto sẽn na yɩl tɩ masã, ne tigingã maasem,+ b na kɩt tɩ nanambsã la pãn-soaadbã sẽn be saasẽ wã bãng Wẽnnaam yamã a sẽn wilgd ne manesem toor-toorã.+ 11 Rẽ zemsa ne Wẽnnaam daabã sẽn ka saabã a sẽn dat n pids ne Kirist+ Zeezi sẽn yaa tõnd Zu-soabã maasem yĩngã. 12 Yaa yẽ maasem yĩng la tõnd tõe n gom ne raood la d kolg Wẽnnaam ne bas-m-yam,+ d sẽn tẽed yẽ* wã yĩnga. 13 Woto wã, mam kota yãmb tɩ y ra koms raoodo, mam sẽn namsd yãmb yĩngã yĩng ye. Bala rẽ yaa yãmb ziir yĩnga.+

14 Woto yĩnga, mam yĩgimdida Ba wã taoore. 15 Yaa yẽ maasem yĩng la zak fãa sẽn be saasẽ, la sẽn be tẽngã zugã be-yã. 16 Mam kota Wẽnnaam sẽn yaa soab ning sẽn tar ziir wʋsgã t’a tall pãng ning vʋʋsem sõngã sẽn kõtã, n paas yãmb pãng y sũyã pʋsẽ la y yamã pʋsẽ,+ 17 la tɩ Kiristã n paas nonglem+ na zĩnd yãmb sũyã pʋsẽ y tẽebã maasem yĩnga. Bɩ y kɩ yẽg la y vigl sõma yẽbgrã zugu, 18 n naag nin-sõamyã wã fãa n tõog n bãng sɩdã yalem, a woglem, a zãntlem la a zulum sõma, 19 la y bãng Kirist nonglmã+ sẽn yɩɩd bãngrã, sẽn na yɩl n pid ne bõn-sõma nins fãa Wẽnnaam sẽn kõtã.

20 Masã, bɩ Wẽnnaam sẽn tõe n maan tɩ yɩɩg bũmb nins fãa tõnd sẽn kot wall d sẽn tagsdã hal zĩig sẽn zãrã,+ wa sẽn zems a pãngã sẽn tʋmd tõnd pʋsẽ wã 21 paam ziir tigingã maasem yĩnga, la Kirist Zeezi maasem yĩng zãmaan woo zãmaana, wakat sẽn kõn sa yĩnga. Ãmiina.

4 Woto wã, mam sẽn yaa ned sẽn be bãens roogẽ+ Zu-soabã yĩngã kota yãmb tɩ y kẽn sõma wa sẽn zems+ booll ning b sẽn bool yãmbã 2 ne sik-m-menga,+ ne sũ-bʋgsem, ne maag-m-menga,+ la y maand sũ-mar ne taab nonglem pʋgẽ.+ 3 Mao-y tɩ laafɩ kell n zĩnd yãmb ne taab sʋka, la tɩ zems-n-taar ning y sẽn paam vʋʋsem sõngã maasem yĩngã kell n zĩnd y sʋka.+ 4 Yĩng a yembr n be,+ tɩ vʋʋsem sõng a yembr me beẽ,+ wa sẽn zems bool-yɛng ning pʋgẽ b sẽn bool yãmbã.+ 5 Zu-soab a yembre,+ tẽeb a yembr la lisg a yembr n be. 6 Wẽnnaam-yɛng n be, n yaa fãa Ba. Yẽ n yaa soab ning sẽn so fãa, sẽn tũnugd ne fãa n tʋmdẽ, la sẽn tʋmd fãa pʋgẽ wã.

7 B kõo tõnd ned kam fãa Wẽnnaam barkã* wa sẽn zems Kiristã sẽn mak kũunã to-to n pʋɩ tõndã.+ 8 Bala b gʋlsame: “A sẽn wa n na n dʋ yĩngrã, a zãa yembse. A kõo kũun sẽn yaa rapa.”+ 9 La b sẽn yeel t’a ‘rʋʋ yĩngrã’ rat n yeelame tɩ bõe, tɩ sã n pa t’a reng n siga tẽngã zugu? 10 Yaa soab ning sẽn sigã la sẽn dʋ yĩngrã me,+ hal n zʋʋg saasã fãa,+ sẽn na yɩl n kɩt tɩ bũmb fãa pidsã.

11 La a kõo neb kẽer tɩ b yaa tẽn-tʋmdba,+ tɩ sãnda yaa no-rɛɛsdba,+ tɩ kẽer yaa koe-moondba,+ tɩ sãnda yaa pe-kɩɩmb la karen-saam-dãmba,+ 12 nin-sõamyã wã remsg* yĩng la neb a taabã sõngr yĩnga, sẽn na yɩl tɩ Kiristã yĩngã paam pãnga,*+ 13 hal tɩ d fãa wa lebg bũmb a yembr tẽebã pʋgẽ, la d paam bãngr hakɩɩk Wẽnnaam Biigã zugu, n lebg neb sẽn bɩ zãng+ wa Kiristã. 14 Woto, d pa na n le yɩ kamba, neb ko-pɛm sẽn tar n lengdẽ, la zãmsg buud fãa sẽn tar n kẽngd ka la ka,+ d sẽn kelgd neb sẽn tũnugd ne zãmb la sɩlem n tudgd tõnd yĩng ye. 15 La d sẽn togsd sɩdã, nonglmã maasem yĩng bɩ d bɩ bũmb fãa pʋgẽ, soab ning sẽn yaa zugã pʋgẽ, rat n yeel tɩ Kiristã.+ 16 Yẽ maasem yĩnga, yĩngã tõr+ soga taab sõma, n kɩt tɩ kõb-sugdsã sõngd taab n kõt bũmb ning sẽn yaa tɩlɛ wã. Yĩngã wil fãa sã n tʋmd sõma, sõngdame tɩ yĩngã bɩtẽ, a sẽn paamd pãng* nonglem pʋgẽ wã yĩnga.

17 Woto wã, ad bũmb ning mam sẽn yet yãmb la m sagend yãmb Zu-soabã taoorã: Ra le kẽn-y wa dũniyã nebã sẽn kẽnd to-to wã,+ bala b vɩɩ wa sẽn zems b tagsa wã sẽn ka barkã.*+ 18 B yamã bee lik pʋgẽ, tɩ b zãr ne vɩɩmã sẽn yit Wẽnnaam nengẽ wã, b zɩɩlmã la b sũyã sẽn diglmã yĩnga. 19 B basa b mens n na n tʋm nin-yoolem*+ tʋʋma, la b maan dẽgd buud fãa tɩ pa tol n sekd-ba, b sũur-kasetã sẽn diglmã yĩnga.

20 La b pa wilg yãmb tɩ Kiristã yaa woto, 21 sã n mikame tɩ y sɩd wʋma a goamã, la tɩ b zãmsa yãmb yẽ maasem yĩng wa sɩdã sẽn be a Zeezi pʋgẽ wã. 22 B zãmsa yãmb tɩ y yeeg nin-kʋdgã+ sẽn yaa yãmb pĩnd yel-manesmã, la sẽn sãamd wa sẽn zems a ratmã sẽn tudgd yãmbã.+ 23 La yãmb segd n ket n manegda y tagsa wã tɩ lebgd paalse,+ 24 la y segd n yeelga nin-paalgã sẽn naan tɩ zems Wẽnnaam daabã, tɩrlem hakɩɩk la kɩs-sɩd meng-meng pʋgẽ wã.

25 Woto wã, yãmb sẽn bas ziri masã wã, bɩ yãmb ned kam fãa togsd a to sɩda,+ bala d yaa yĩng a ye wila.+ 26 Yãmb sũur sã n wa yik bɩ y ra maan yel-wẽnd ye.+ Ra bas-y tɩ wĩndgã tɩ lʋɩ tɩ y sũurã ket n nan pa sig ye.+ 27 Ra kõ-y Sʋɩtãanã* weer ye.+ 28 Bɩ sẽn da zuud-a ra le zu, la bɩ a wɩsg a meng n tʋme, n tʋm tʋʋmd sẽn yaa sõma ne a nusã,+ sẽn na yɩl n paam bũmb n yãk n kõ sẽn dat-a sõngre.+ 29 Bɩ gom-põosg baa a ye ra yi y noorẽ,+ sã n zʋʋg gomd sẽn yaa sõma raood kengr yĩnga, sẽn na yɩl tɩ naf neb nins sẽn kelgdã. 30 Sẽn paase, ra sãam-y Wẽnnaam vʋʋsem sõngã sũuri,+ vʋʋsem sõng ning b sẽn tall n ning yãmb bãnd+ fãagr daarã yĩngã ye. Fãagrã na n tũu ne yaoodã b sẽn yao n na n fãag yãmbã.+

31 Lak-y y mens ne sũ-kẽk buud fãa,+ la sũ-puugri, ne sũ-yikri, la tãsga, ne tʋya, la ne wẽnem buud fãa.+ 32 La bɩ y maand taab neere, n kʋmd taab+ la y sakd n kõt taab sugr wa Wẽnnaam sẽn sak n kõ yãmb sugr Kirist maasem yĩngã.+

5 Woto wã, bɩ y yɩ Wẽnnaam togs-n-taas+ wa kom-nongdse, 2 la y kell n kẽn nonglem+ pʋg wa Kiristã me sẽn nong tõndo,*+ n kõ a meng tõnd* yĩng tɩ yɩ kũun la maoong sẽn tar yũ-noog Wẽnnaam nifẽ wã.+

3 B pa segd n pʋd yoob* la rẽgd buud baa a ye wall yão-beed yell yãmb sʋka,+ bala bõn-kãensã pa zems ne nin-sõamyã ye.+ 4 Yãn-tʋʋm wall yalem-goam bɩ kʋʋsem gom-yood me pa segd n zĩnd yãmb sʋk ye. Bõn-kãensã pa zems ye. La yaa Wẽnnaam bark pʋʋsg n segd n zĩnd yãmb sʋka.+ 5 Bala yãmb miime la y sak n deegame tɩ yoaad*+ baa a ye wall ned sẽn tʋmd tʋʋm-dẽgd bɩ yão-be-neda,+ rat n yeel tɩ bõn-naands pʋʋsd baa a ye pa na n paam pʋɩɩr Kiristã ne Wẽnnaam Rĩungã pʋgẽ ye.+

6 Bɩ ned baa a ye ra belg yãmb ne gom-vɩɩdo, bala yaa bõn-kãens yĩng la Wẽnnaam sũ-puugrã wat kɩɩsdbã zutu. 7 Woto wã, bɩ y ra maan wa bãmb ye.* 8 Bala pĩndã yãmb da bee lik pʋgẽ, la masã, yãmb bee vẽenem+ pʋgẽ y sẽn yaa Zu-soabã rẽndã yĩnga.+ Kell-y n kẽn-y wa vẽenem kamba, 9 bala vẽenemã biis yaa sõmblem buud fãa la tɩrlem la sɩda.+ 10 Bɩ y baood n bãngd bũmb nins sẽn tat Zu-soabã yamã,+ 11 la y ra le naag n tʋm tʋʋm nins sẽn pa womd biisã sẽn yaa lik tʋʋmã ye.+ La bɩ y wilg tɩ b pa sõma ye. 12 Bala bũmb nins b sẽn solgd n maandẽ wã yell goam meng yaa yãnde. 13 La yaa vẽenem n pukd bũmb fãa bãongo. Rẽnd bũmb ning fãa bãong sẽn puk lebga vẽenega. 14 Woto yĩnga, b yeelame: “Foom a ned ning sẽn gõe wã, neke, la f vʋʋg n yi kũ-rãmb sʋka,+ tɩ Kiristã na n kõo foo vẽenem.”+

15 Woto wã, bɩ y kell n gũus neer ne yãmb sẽn kẽnd to-to wã tɩ ra yɩ wa neb sẽn ka yam ye. Bɩ y yɩ wa yam dãmba. 16 Ra sãam-y y sẽkã ye.* Bala wakatã yaa wẽnga. 17 Woto yĩnga, bɩ y ra le yɩ yam-koees rãmb ye. La bɩ y kell n bao n bãng a Zeova* raabã sẽn yaa a soaba.+ 18 Sẽn paase, da yũ-y divẽ* n tɩge,+ bala rẽ wata ne tʋʋm-yoodo.* La bɩ y kell n pid ne vʋʋsem sõngo. 19 Gomd-y ne taab* ne yɩɩn-sõamyã, ne Wẽnnaam pẽgr goama, la ne Wẽnnaam yɩɩla. Bɩ y yɩɩl+ n pẽg a Zeova* ne y sũy fãa.+ 20 Wakat fãa, bɩ d pʋʋsd d Wẽnnaamã sẽn yaa d Ba wã bark+ bũmb fãa yĩnga, ne tõnd Zu-soab a Zeezi Kirist yʋʋre.

21 Bɩ y sulg y mens n sak taaba,+ y sẽn zoet Kiristã yĩnga. 22 Bɩ pagbã sulg b mens n sak b sɩdbã+ wa b sẽn sakd Zu-soabã, 23 bala sɩd yaa a pag zu-soab+ wa Kiristã sẽn yaa tigingã zu-soaba,+ n yaa yĩn-kãng fãagdã. 24 Sɩd-sɩda, pagbã segd n sulga b mens n sak b sɩdbã bũmb fãa pʋgẽ, wa tigingã sẽn sakd Kiristã. 25 Pʋg-sɩdba, kell-y n nong-y y pagbã,+ wa Kiristã me sẽn nong tigingã n kõ a meng a yĩngã,+ 26 sẽn na yɩl t’a lebg sõngo, n yɩlg-a ne Wẽnnaam gomdã tɩ yɩ wa b so-a-la koom,+ 27 tɩ tigingã lebg neer a nifẽ, n pa tar rẽok wall yõbd bɩ bũmb baa a ye sẽn wõnd woto,+ n yaa sõng n pa tar zang ye.+

28 Woto me, pʋg-sɩdbã segd n nonga b pagbã wa b mens yĩnsi. Rao sẽn nong a pag nonga a menga, 29 bala ned zɩ n kisg a meng* a bada. A rɩlgda a meng la a get a meng yell sõma, wa Kiristã sẽn maand to-to ne tigingã, 30 tõnd sẽn yaa a yĩngã wilã yĩnga.+ 31 “Yaa rẽ n kɩt tɩ rao na n bas a ba ne a ma n tɩ zĩnd ne a paga,* la b yiibã na n yɩɩ yĩng a yembre.”+ 32 Yel-soalgd-kãng+ sẽn yaa sõngã yaa kãsenga. La mam gomda Kiristã ne tigingã yelle.+ 33 Baasgo, yãmb ned kam fãa segd n nonga a pag wa a sẽn nong a meng to-to wã. La pagã me segd n waoogda a sɩdã ne a sũur fãa.+

6 Kamba, sak-y y ba-rãmbã la y ma-rãmbã+ Zu-soabã pʋgẽ, bala rẽ yaa tɩrga. 2 “Waoog f ba la f ma”+ wã n yaa pipi noore, n naag ne pʋleng sẽn yete: 3 “Tɩ fo yɛlã tõe n yɩ sõma,* la tɩ fo tõe n vɩɩmd n kaoos tẽngã zugu.” 4 Ba-rãmba, ra maand-y bũmb sẽn yikd y kambã sũy ye. La bɩ y kell n wub bãmb a Zeova* kiblgã+ la a saglsã* pʋsẽ.+

5 Yembse, sakd-y y zu-soben-dãmbã+ ne rabeem la rigbu, la ne pʋ-peelem wa y sẽn sakd Kiristã. 6 La pa segd n yɩ nebã nifẽ bala, y sẽn dat n noog ninsaalb sũur yĩng ye. Yãmb segd n yɩɩ sakdba, y sẽn yaa Kirist yembs n maand Wẽnnaam daabã ne y sɩɩg fãa wã yĩnga.*+ 7 Bɩ y wɩsg y mens n tʋm ne yam-sõng wa y sẽn tʋmd a Zeova*+ yĩnga, la pa ninsaalb yĩng ye. 8 Bala y miime tɩ ned sã n maan bõn-sõng fãa, a yaa yamb t’a pa yamba, a na n wa paama keoor sẽn yit a Zeova* nengẽ. 9 Yãmb a zu-soben-dãmbã me segd n ket n maanda woto ne y yembsã, n da kẽesd-b rabeem ye. Bala yãmb miime tɩ yãmb ne bãmb me Zu-soabã bee saasẽ,+ la t’a pa bakd ned ye.

10 Sẽn na n baase, bɩ y ket n paamd pãng+ Zu-soabã pʋgẽ, la a pãn-kãsengã pʋgẽ. 11 Bɩ y bob zab-teed+ nins Wẽnnaam sẽn kõtã fãa, sẽn na yɩl n tõog n yals kãn-kãe Sʋɩtãanã* sɩlem-tʋʋmã taoore. 12 Bala tõnd tara zabre,*+ la pa ne ninsaalb* ye. Yaa ne zĩn-dãmb+ sẽn be saasẽ n yaa nanambs la pãn-soaadba, n so dũniyã sẽn be lik pʋgẽ wã. 13 Woto yĩnga, bɩ y bob zab-teed nins Wẽnnaam sẽn kõtã fãa,+ n tõog n yals n zab wẽng wakate, tɩ y sã n maan bũmb fãa sõma poor bɩ y yals kãn-kãe.

14 Rẽ wã, bɩ y yals kãn-kãe, n sẽb y sɛɛgã ne sɩdã sẽbdga,+ la y yeelg tɩrlem kut fuugã,*+ 15 la y wid laafɩ koe-noogã y naoẽ, koe-noog ning y sẽn segl n sa n na n moonã.+ 16 Sẽn yɩɩd fãa, bɩ y rɩk tẽebã gãong sẽn yaa yalengã,+ y sẽn tõe n tall n kiis wẽng soabã pɛɛmã fãa sẽn wit bugmã.+ 17 Sẽn paase, fõgen-y fãagrã kut puglã,+ la y rɩk vʋʋsem sõngã sʋʋgã sẽn yaa Wẽnnaam gomdã,+ 18 la y wɩng ne pʋʋsg buud fãa la se-yõkre, n pʋʋsd sasa buud fãa ne vʋʋsem sõngã pãnga.+ Sẽn na yɩl n tõog n maan woto, bɩ y ra gũs ye. La bɩ y yõkd sɛɛg wakat fãa nin-sõamyã wã fãa yĩnga. 19 Pʋʋsd-y mam yĩng me tɩ m sã n wa na n gom fãa bɩ m paam goam sẽn zemse, n gom ne raood n kɩt tɩ nebã bãng koe-noogã yel-soalgdgã sẽn yaa sõngã. 20 Yaa koe-no-kãng yĩng la mam sẽn yaa Wẽnnaam koe-taasd+ b sẽn balg bãensã. Pʋʋsd-y mam yĩng tɩ m tõog n gom koe-noogã yell ne raood wa m sẽn segd n gomã.

21 A Tisik+ sẽn yaa tõnd saam-bi-nongr la Zu-soabã tʋm-tʋmd sẽn maand sɩdã na n wilga yãmb bũmb fãa, sẽn na yɩl tɩ y bãng m yɛlã sẽn yaa to-to la y bãng m keelem. 22 Yaa bõn-kãng yĩng la mam tʋmd-a yãmb nengẽ sẽn na yɩl tɩ y bãng d keelem, la a bels y sũyã.

23 Bɩ laafɩ ne nonglem la tẽeb sẽn yit Wẽnnaam sẽn yaa Ba wã nengẽ, la Zu-soab a Zeezi Kirist nengẽ zĩnd saam-biisã zutu. 24 Bɩ Wẽnnaam barkã* zĩnd neb nins fãa sẽn nong tõnd Zu-soab a Zeezi Kirist ne nonglem hakɩɩkã zutu.