SEBR B SẼN TOOL FILIP RÃMBÃ

1 Maam a Poll ne a Tɩmote sẽn yaa Kirist Zeezi yembsã n gʋls seb-kãngã n tool nin-sõamyã nins fãa sẽn be Kirist Zeezi pʋgẽ n be Filip tẽngã,+ n paas yel-gɛtbã ne kãsem-sõngdbã:+

2 Bɩ bark* la laafɩ sẽn yit Wẽnnaam sẽn yaa tõnd Ba wã nengẽ, la Zu-soab a Zeezi Kirist nengẽ zĩnd ne yãmba.

3 Mam pʋʋsda m Wẽnnaamã bark wakat fãa m sã n wa tẽeg yãmb yelle, 4 m sẽn wat n yõkd a sɛɛg yãmb fãa yĩngã. M sã n na n yõk Wẽnnaam sɛɛg fãa yaa ne sũ-noogo,+ 5 yãmb sẽn teend koe-noogã* hal sẽn sɩng pipi daarã n tãag masã wã yĩnga. 6 Bala mam kɩsa sɩd ne bõn-kãngã: Soab ning sẽn sɩng tʋʋm-sõng yãmb pʋsẽ wã na n kɩtame t’a pidi,+ hal n tãag Kirist Zeezi daarã.+ 7 Zemsame tɩ mam tags woto yãmb fãa zutu, mam sẽn nong yãmb ne m sũur fãa wã yĩnga. Bala yãmb naagda maam n paamd Wẽnnaam barkã,* tɩ yaa masã mam sẽn be bãens roogẽ wã,+ wall mam sẽn wat n gomd n teend koe-noogã, la m sẽn wat n gomd bʋ-kaoodb taoor sẽn na yɩl n paam sor n moon koe-noogã.+

8 Bala Wẽnnaam yaa mam kaset soab tɩ mam rat n yãa yãmb fãa ne m sũur fãa, la tɩ mam nonga yãmb fãa wʋsg ne nonglem ning Kirist Zeezi sẽn tarã. 9 La ad mam sẽn pʋʋsd wakat fãa n kot bũmb ningã: Yaa tɩ yãmb nonglmã na paas la a ket n tar paasg+ ne bãngr hakɩɩk+ la yam-vẽenem wʋsgo,+ 10 la tɩ yãmb na bãng bũmb nins sẽn tar yõod n yɩɩdã n bake,+ n yɩ neb sẽn pa tar taale, la neb sẽn pa na n kɩt tɩ b to lak n lʋɩ+ hal n tãag Kirist daarã, 11 la tɩ yãmb na tõog n pid ne tɩrlem biis sẽn wat Kirist Zeezi maasem yĩngã,+ Wẽnnaam waoogr la pẽgr yĩnga.

12 Masã, m saam-biisi, mam datame tɩ yãmb bãng tɩ mam yellã wẽneg n kɩtame tɩ koe-noogã paam pãnga, 13 hal tɩ lebg vẽeneg rĩmã Gũudbã fãa sʋka, la ne neb a taabã fãa+ tɩ yaa Kirist yĩng la b sẽn balg maam bãensã.+ 14 La saam-biisã fãa la bal sẽn be Zu-soabã pʋgẽ wã paama pɛl-kɛgeng mam balgrã yĩnga, n togsd Wẽnnaam goamã ne raood wʋsg n pa yɛɛsdẽ ye.

15 Yaa sɩd tɩ neb kẽer moonda Kirist koɛɛgã ne sũ-kiir la wags-taaba, la sãnda moond-a-la ne yam-sõngo. 16 Yaoolem dãmbã moonda Kirist koɛɛgã nonglem yĩnga, b sẽn mi tɩ b yãka maam tɩ m gom n teel koe-noogã yĩnga.+ 17 La pipi rãmbã maanda rẽ ne no-baoodem, la pa ne yam-sõng ye. Bala b rat n baoo yell n kõ maam bãensã roog pʋgẽ. 18 Rẽ waa ne bõe? Nebã wʋmda Kirist koɛɛgã, la mam sũur nooma ne rẽ, baa neb nins sẽn moondã sã n moond ne yam-sõng tɩ pa woto me. Sɩd-sɩda, mam na n ket n maanda sũ-noogo, 19 bala mam miime tɩ rẽ na n waa ne mam fãagr yãmb se-yõkrã+ maasem yĩnga, la ne vʋʋsem sõngã a Zeezi Kirist sẽn kõtã sõngre.+ 20 Rẽ zemsa ne m sẽn gũud bũmb ning ne m sũur fãa wã, la m sẽn saagd tɩ m pa na n paam yãnd baa fʋɩ wɛɛngẽ, la tɩ m na n gomame n pa yɛɛse, la tɩ sã n yaa ne vɩɩm maasem wall ne kũum maasem, Kiristã na n paama waoogr mam yĩngã pʋgẽ wa sẽn sɩng n yaa to-to wã.+

21 Bala sã n yaa ne maam, mam sã n vɩ, mam vɩɩ Kirist yĩnga,+ la mam sã n ki, yaa mam nafre.+ 22 La mam sã n kell n vɩɩmd yĩngã pʋgẽ, rẽ yaa mam tʋʋmdã biis paasg yĩnga. Baasgo, mam pa wilg bũmb ning mam sẽn na n yãkã ye. 23 Mam yamã yuusda bõn-kãensã b yiibã sʋka. Bala mam tʋll n paama m meng n zĩnd ne Kiristã,+ la yaa vẽeneg tɩ rẽ n yaa sõma n yɩɩda.+ 24 La yaa tɩlɛ ne maam n yɩɩd tɩ m pa yĩngã pʋgẽ yãmb nafr yĩnga. 25 Bõn-kãng yĩnga, mam kɩsa sɩd tɩ m na n kell n vɩɩmdame, n kell n pa ne yãmb fãa sẽn na yɩl tɩ y bɩ Wẽnnaam tʋʋmdã pʋgẽ, la y maan sũ-noog tẽebã pʋgẽ. 26 Woto, mam sã n lebg n wa yãmb nengẽ, yãmb sũ-noogã na paase, y sẽn yaa Kirist Zeezi karen-biisã yĩnga.

27 Sẽn be bala, zã-y y mens sõma* wa sẽn zems Kiristã koe-noogã,+ sẽn na yɩl tɩ m sã n wa yãmb nengẽ n yã yãmb wall m pa wa me, m na wʋm y kibare, la m bãng tɩ y yasa kãn-kãe ne yam a yembr la sɩɩg a yembre,*+ n naag taab n maood n na n paam tẽeb koe-noogã pʋgẽ, 28 la tɩ y pa yɛɛsd y bɛɛbã baa bilf ye. Rẽ yaa kaset sẽn wilgd tɩ b na n paama sãoongo,+ la tɩ yãmb na n paama fãagre.+ Sẽn paase, rẽ yita Wẽnnaam nengẽ. 29 B kõo yãmb zu-zẽkr Kirist yĩnga, la pa tɩ yãmb tẽ-a bal ye. Yaa tɩ y nams a yĩng me.+ 30 Bala yãmb zabda zabr ning yãmb sẽn yã maam tɩ m da zabdẽ wã,+ la y sẽn wʋmd tɩ mam ket n zabdame wã.

2 Yãmb sẽn kengd taab raood y sẽn be Kirist pʋgẽ wã yĩngã, y nonglmã sẽn kɩt tɩ y belsd taabã, y ned kam fãa sẽn wilgd t’a to yell pak-a lame wã, y sẽn nong taab wʋsg la y zoet taab nimbãanegã yĩngã, 2 bɩ y kɩt tɩ mam sũ-noogã pidi, y sẽn na n tall yam a yembre, n nong taaba, n zemsd taab sõma, la y tar tags-yɛnga.+ 3 Da maan-y baa fʋɩ ne no-baoodem+ wall ne wilg-m-meng ye.+ La bɩ y ned kam fãa sik a menga, n tagsdẽ t’a taabã yɩɩda yẽ.+ 4 Ra bao-y y mens nafr bal ye.+ Bao-y y taabã nafr me.+

5 Bɩ y kell n tall yam ning Kirist Zeezi me sẽn da tarã.+ 6 Baa a sẽn da wõnd Wẽnnaamã,+ a pa tags bao n zeng Wẽnnaam yell meng ye.+ 7 La a basa bũmb nins fãa a sẽn da tarã, n lebg wa yamb+ la ninsaala.+ 8 La sẽn yɩɩd rẽ, a sẽn wa n lebg ninsaalã, a sika a meng n lebg sakd n tãag kũum,+ hal n ki namsg ra-luk* zugu.+ 9 Bõn-kãng yĩnga, Wẽnnaam zẽk-a lame n kõ-a naam sẽn yaa kãsenga,+ la a kõ-a yʋʋr sẽn yɩɩd yʋy a taabã fãa ne yamleoogo,+ 10 sẽn na yɩl tɩ ne a Zeezi yʋʋre, rũmã fãa sẽn be saasẽ, tẽngã zug la tẽn-gãongã pʋgẽ* na yĩgimdi,+ 11 la tɩ zɩlmã fãa na togs vẽeneg t’a Zeezi Kirist yaa Zu-soaba,+ Wẽnnaam sẽn yaa Ba wã waoogr yĩnga.

12 Woto yĩnga, m nin-nongdse, wa yãmb sẽn sɩng n sakd wakat fãa la pa mam sẽn be yambẽ wakat balã, sẽn yɩɩda, yãmb sẽn maneg n sakd tao-tao masã mam sẽn pa be yambẽ wã, bɩ y kell n maan bũmb nins y sẽn segd n maan n wa paam fãagrã ne rabeem la rigbu. 13 Bala Wẽnnaam n yaa soab ning sẽn kõt yãmb pãnga, soab ning sẽn kõt yãmb raab la tõog sẽn na yɩl tɩ y maan sẽn noom-a wã. 14 Ket-y n maand-y bũmb fãa tɩ pa naag ne yẽgeng+ la no-koɛɛma,+ 15 n tõog n yɩ neb sẽn pa tar taal la sẽn pa tar yelle, n yɩ Wẽnnaam kamb+ sẽn pa tar rẽok baa bilfu, sẽn be zãmaanã neb sẽn yaa wẽns la sẽn pa maand sẽn yaa tɩrgã sʋka,+ neb nins sʋk y sẽn be n yãgd wa vẽenem dũniyã pʋgẽ,+ 16 la y ket n gãt vɩɩm koɛɛgã kãn-kãe wã.+ Woto, mam na paam bũmb m sẽn na n tik n kɩdem sũ-noog Kirist daarã, n miẽ tɩ m pa zoe zaalem, wall tɩ m pa tʋm wʋsg zaalem ye. 17 La baa b sã n pʋdgda maam wa divẽ b sẽn kõ+ tɩ b kiig maoong zug+ mam sẽn teend tʋʋmd ning sẽn yaa sõngã yĩnga, mam sũur nooma wʋsg ne yãmb fãa, bala yãmb tẽebã kɩtame tɩ yãmb me tʋmd tʋʋm-kãnga. 18 Woto me, yãmb me sũur segd n yɩɩ noogo, tɩ y naag maam n kɩdme.

19 Mam saagdame tɩ sã n zems Zu-soab a Zeezi raabo, m na n tʋma a Tɩmote+ yãmb nengẽ ka la bilfu, n paam yãmb kibar tɩ keng m raoodo. 20 Bala mam pa tar ned a to sẽn tar yam-sõng wa yẽ sẽn na n ges yãmb yell sõma ye. 21 Neb a taabã fãa baooda b mens nafre, la b pa baood a Zeezi Kirist nafr ye. 22 La yãmb miime t’a Tɩmote wilgame t’a pa woto ye. A wɩsga a meng n tʋm ne maam wa biig+ sẽn tʋmd ne a ba koe-noogã na kẽng taoor yĩnga. 23 Woto yĩnga, m saagdame tɩ m sã n wa bãng m yɛlã sẽn na n yɩ a soab bala, m na n tʋm-a-la yãmb nengẽ. 24 Sɩd me, m kɩsa sɩd Zu-soabã pʋgẽ tɩ mam mengã na n waa yãmb nengẽ ka la bilf me.+

25 La mam tagsdame tɩ yaa tɩlɛ tɩ m tʋm a Epafordit yãmb nengẽ. Yẽ yaa mam saam-biiga, m tʋmd-n-taag la m soda-taaga, n le yaa ned yãmb sẽn tʋm t’a wa sõng maam.+ 26 Bala a rat n yãa yãmb fãa ne a sũur fãa. Sẽn paase, a sũurã sãama wʋsgo, yãmb sẽn wʋm t’a ra lʋɩɩ bãagã yĩnga. 27 Sɩd me, a ra lʋɩɩ bãag hal n kolg kũum. La Wẽnnaam zoee a nimbãanega. Sɩd-sɩda, pa yẽ a ye bal nimbãaneg la a zoe ye. Yaa ma-me nimbãanega, sẽn na yɩl tɩ m sũur da wa sãam tɩ loog ye. 28 Woto yĩnga, mam tʋmd-a-la yãmb nengẽ ne yãgb wʋsgo, sẽn na yɩl tɩ y sã n yã-a bɩ y le kɩdem sũ-noogo, la tɩ m yɩɩrã me booge. 29 Bɩ y reeg-a ne sũ-noog wʋsg wa y sẽn minim n deegd sẽn tũud-b Zu-soabã, la y waoog neb a woto buudu,+ 30 bala a naan n kii Kirist tʋʋmdã* yĩnga. A gẽnega a yõor n tõog n sõng maam ne sõngr ning yãmb sẽn pa tõe n sõng maam y sẽn pa be ka wã yĩngã.+

3 Sẽn na n baase, m saam-biisi, bɩ y ket n kɩdemd sũ-noog Zu-soabã pʋgẽ.+ Pa toog ne maam tɩ m gʋls yãmb bũmb m sẽn da zoe n gʋls yãmb ye. La yaa yãmb koglg yĩnga.

2 Gũus-y ne neb nins sẽn maand wa baasã.* Gũus-y ne neb nins sẽn maand wẽngã. Gũus-y ne neb nins sẽn wãad yĩngã.*+ 3 Bala yaa tõnd n tar bãong meng-mengã,+ tõnd a neb nins sẽn waoogd Wẽnnaam ne d sũur fãa Wẽnnaam vʋʋsem sõngã maasem yĩngã, sẽn zẽkd d zut Kirist Zeezi pʋgẽ,+ la sẽn pa teegd yĩn-nemsã. 4 Ned sã n beẽ n tar bũmb a sẽn tõe n tik n teeg yĩn-nemsã, yaa vẽeneg tɩ yaa maam.

Ned a to sã n tagsdẽ t’a tara bũmb a sẽn tõe n tik n teeg yĩn-nemsã, maam n yɩɩda: 5 B kẽesa maam bãong m rogmã rasem a nii-n-soabã daare.+ Mam yaa Israyɛll neda, n yaa Bẽnzame buudã neda. Mam yaa Ebre tɩ m doagdbã me yaa Ebre-rãmba.+ Sã n yaa tõogã tũub wɛɛngẽ, mam da yaa Fariziyẽ.+ 6 Sã n yaa yẽesmã wɛɛngẽ, mam da namsda tigingã.+ Sã n yaa tɩrlem ning sẽn tũud ne tõogã sakrã wɛɛngẽ, mam wilgame tɩ m pa tar taal ye. 7 La bũmb nins mam sẽn da get tɩ tara yõod wʋsgã, Kiristã yĩnga, mam getame tɩ bõn-kãens pa le tar yõod ye.*+ 8 Sẽn yɩɩd menga, mam pʋd n getame tɩ bũmb fãa pa tar yõodo, mam sẽn bãng m Zu-soab a Kirist Zeezi tɩ rẽ yõod ka to wã yĩnga. Yẽ yĩnga, mam sak n bõna bũmb fãa, la m geta bõn-kãens wa sagdo, sẽn na yɩl n paam Kiristã, 9 la m paam n zĩnd yẽ pʋgẽ, la pa mam mengã tɩrlem yĩng m sẽn paam Tõogã tũub yĩng ye. Yaa tɩrlem ning sẽn tũud ne tẽeb+ ne Kiristã yĩnga,+ tɩrlem ning sẽn yit Wẽnnaam nengẽ la sẽn tik tẽeb zugã.+ 10 Mam daabã yaa m bãng-a, la m bãng a vʋʋgrã pãnga,+ n naag-a n namse,+ la m sak n ki a kũumã buudu,+ 11 n ges m sã n pa na n paam dẽenem kũum vʋʋgrã ne manesem buud bɩ a to.*+

12 Pa tɩ mam zoe n deega keoorã wall tɩ b zoe n kɩtame tɩ m zems zãng ye. La mam maoodame+ n na n ges m sã n pa na n tõog n gãd bũmb ning Kirist Zeezi sẽn yãk* maam tɩ m paamã.+ 13 M saam-biisi, mam pa tagsd tɩ m zoe n gãda bõn-kãng ye. La bũmb a ye n yaa vẽenega: Mam yĩmda bũmb nins sẽn be poorẽ wã,+ n nangd pãng n dat n paam bũmb nins sẽn be taoorã.+ 14 Mam modgdame n dat n wa paam Wẽnnaam saasẽ boollã+ keoorã+ Kirist Zeezi maasem yĩnga. 15 Woto wã, bɩ tõnd sʋkã neb nins sẽn bɩ wã+ tall yam-kãng buudu. La sẽn yaa bũmb ning fãa wɛɛngẽ la yãmb tar tagsg sẽn yaa toore, Wẽnnaam na n vẽnega yãmb yam ning sẽn segdã. 16 La baa d sẽn bɩ to-to fãa, bɩ d kell n kẽn sõma woto.

17 M saam-biisi, bɩ yãmb fãa yɩ mam togs-n-taase,+ la y get neb nins sẽn kẽnd wa sẽn zems mamsg ning tõnd sẽn bas ne yãmbã. 18 Bala neb wʋsg n be n kẽnd wa Kirist namsg ra-lukã* bɛɛba. Mam wae n gomda b yelle, la masã, mam le gomda b yell ne nintãm. 19 Bãmb baasg yaa sãoongo. B pʋsã n yaa b wẽnnaam. Sɩd-sɩda, b yãndã n yaa b ziiri. B yamã bee ne tẽngã zug yɛlã.+ 20 La tõnd yaa saasẽ tẽng-n-biisi.+ D gũuda fãagdã sẽn yaa Zu-soab a Zeezi Kiristã sẽn na n yi be n wa wã ne d sũur fãa.+ 21 Yẽ na n talla a pãn-kãsengã sẽn kɩtd t’a tõe tɩ bũmb fãa sakd-a wã,+ n toeem tõnd yĩngã sẽn ka pãngã t’a wõneg* a yĩngã sẽn tar ziirã.+

4 Woto yĩnga, m saam-biis m sẽn nong la m sẽn yãgd n dat n yã, yãmb sẽn yaa mam sũ-noog la m maanfã,+ yals-y kãn-kãe+ woto Zu-soabã pʋgẽ m nin-nongdse.

2 Mam sagenda a Evodi la m sagend a Sẽntiis me tɩ b tall yam a yembr Zu-soabã pʋgẽ.+ 3 Mam kota fo-me sẽn yaa mam tʋmd-n-taag meng-mengã tɩ f ket n sõngd pʋg-kãensã sẽn naag maam n mao wʋsg koɛɛgã mooneg pʋgẽ, la sẽn tʋm ne a Kelma la ne m tʋmd-n-taas a taabã yʋy sẽn be vɩɩm sebrã pʋgẽ wã.+

4 Kɩdm-y sũ-noog wakat fãa Zu-soabã pʋgẽ. Mam na n le yeelame: Kɩdm-y sũ-noogo!+ 5 Bɩ y kɩt tɩ nebã fãa yã tɩ y yaa neb sẽn pa dem-dem ye.+ Zu-soabã bee yambẽ. 6 Da maan-y yɩɩr baa fʋɩ poorẽ ye.+ La bũmb fãa pʋgẽ, bɩ y tũnug ne pʋʋsg la se-yõkr ne bark pʋʋsgo, n wilg Wẽnnaam bũmb nins y sẽn kotã,+ 7 tɩ rẽ la Wẽnnaam laafɩ+ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã la y tagsa wã,* Kirist Zeezi maasem yĩnga.

8 Sẽn na n baase, m saam-biisi, bũmb nins fãa sẽn yaa sɩda, bũmb nins fãa sẽn tar yõodo, bũmb nins fãa sẽn yaa tɩrse, bũmb nins fãa sẽn yaa yɩlma, bũmb nins fãa sẽn tog ne nonglem, bũmb nins fãa sẽn tar kaset-sõngo, bũmb nins fãa sẽn yaa sõma, la bũmb nins fãa sẽn tog ne pẽgre, bɩ y ket n tagsd bõn-kãens yelle.* 9 Bũmb nins yãmb sẽn zãmse, y sẽn deege, y sẽn wʋm la y yã mam nengẽ wã, tũ-y bõn-kãens+ tɩ rẽ la laafɩ Wẽnnaamã na n zĩnd ne yãmba.

10 Mam kɩdemda sũ-noog wʋsg Zu-soabã pʋgẽ, yãmb sẽn yaa n paam n le wilg tɩ mam yell paka yãmbã yĩnga.+ Baa mam yell sẽn da pak yãmbã, yãmb da pa tar segb n na n wilg rẽ ye. 11 Mam pa yet woto bũmb sẽn paoog maam yĩng ye. Bala mam zãmsa kɩt tɩ m sẽn tarã sek-ma, baa mam yɛlã sẽn wa n yaa a soaba.+ 12 Mam mii m sẽn na n vɩɩmd to-to ne bilfu,+ la m mi m sẽn na n vɩɩmd to-to ne wʋsg me. Bũmb fãa pʋgẽ la yell fãa pʋgẽ, mam zãmsa bũmb neb bilf bal sẽn mi: Mam tara rɩɩb wall m kẽnda ne kom me, pa rẽ bɩ m tara wʋsg tɩ m pa tar me, mam zãmsa kɩt tɩ m sẽn tarã sek-ma. 13 Bũmb fãa pʋgẽ, mam tara pãnga, sẽn kõt-a maam pãngã maasem yĩnga.+

14 Baasgo, yãmb maana neer y sẽn sõng maam m namsgã pʋgẽ wã. 15 Sɩd-sɩda, yãmb a Filip nebã miime me tɩ yãmb sẽn wʋm koe-noogã pipi wã poore, mam sẽn wa n yit Masedoannã, tiging baa a ye pa sõng maam wall a sak mam sõngre, sã n pa yãmb bala.+ 16 Bala mam sẽn wa n be Tesalonikã, yãmb toola bũmb mam sõngr yĩnga. La pa yɩ vugr bal ye. Yɩɩ naoor a yiibu. 17 Pa tɩ mam baooda kũun ye. La mam datame tɩ yãmb tʋm tʋʋm-sõma tɩ nafd yãmb n paasdẽ. 18 La mam tara bũmb nins fãa mam sẽn datã hal tɩ seke. Mam sẽn deeg bũmb ning y sẽn tool a Epaforditã,+ bũmb pa le paoog maam ye. Yãmb sẽn tool bũmb ningã yaa wa bũmb sẽn tar yũ-noogo,+ la maoong sẽn tat Wẽnnaam yam. 19 Mam Wẽnnaamã me na n kõo yãmb y sẽn datã fãa+ tɩ seke, wa sẽn zems a paoongã sẽn tar ziirã, Kirist Zeezi maasem yĩnga. 20 Bɩ tõnd Wẽnnaamã sẽn yaa d Ba me wã paam ziir wakat sẽn kõn sa yĩnga. Ãmiina.

21 Pʋʋs-y nin-sõamyã wã fãa sẽn be Kirist Zeezi pʋgẽ wã. Saam-biis nins sẽn be ne maamã toonda yãmb b pʋʋsem. 22 Nin-sõamyã wã fãa, la sẽn yɩɩda, nin-sõamyã nins sẽn be a Sezaar zakẽ wã+ toonda yãmb b pʋʋsem.

23 Bɩ tõnd Zu-soab a Zeezi Kirist barkã* zĩnd ne yãmba, y sẽn wilgd tɩ y tara zʋg-sõma wã yĩnga.