SEBR B SẼN TOOL KOLOS RÃMBÃ

1 Maam a Poll sẽn yaa Kirist Zeezi tẽn-tʋmd Wẽnnaam daabã maasem yĩngã, n paas d saam-biig a Tɩmote+ 2 n gʋls seb-kãngã n tool Kolos saam-biisã sẽn yaa nin-sõamyã la sẽn maand sɩda, n be Kirist pʋgẽ wã:

Bɩ bark* la laafɩ sẽn yit Wẽnnaam sẽn yaa tõnd Ba wã nengẽ zĩnd ne yãmba.

3 Tõnd pʋʋsda Wẽnnaam sẽn yaa tõnd Zu-soab a Zeezi Kirist Ba wã bark wakat fãa, d sã n wa pʋʋsd yãmb yĩnga. 4 Bala tõnd wʋma yãmb sẽn tẽed Kirist Zeezi to-to wã kibare, la y sẽn nong nin-sõamyã wã fãa to-to wã me kibare. 5 Yaa yãmb sẽn saagd n na n wa paam bũmb nins b sẽn bĩng yãmb saasẽ+ wã n kɩt tɩ y maand woto. Yãmb da wʋma saag-kãng kibare, la tũu ne koe-noogã koɛɛg sẽn yaa sɩdã 6 sẽn ta yãmbã. A womda biis la a paamd pãng dũniyã gill zugu,+ wa sẽn yaa to-to yãmb sʋk me hal sẽn sɩng daar ning yãmb sẽn wʋm la y bãng Wẽnnaam barkã* sẽn sɩd yaa a soabã. 7 Yaa rẽ la yãmb zãms a Epafras+ nengẽ. Yẽ yaa tõnd yem-taag d sẽn nonge, la Kirist tʋm-tʋmd sẽn maand sɩda, n tʋmd tõnd yĩnga. 8 Sẽn paase, a wilga tõnd nonglem ning yãmb sẽn bɩɩs ne vʋʋsem sõngã sõngrã.

9 Yaa rẽ n so me tɩ daar ning tõnd sẽn wʋm dẽ wã tɛka, d zɩ n bas n pa pʋʋs yãmb yĩng ye.+ D kotame tɩ y pid ne Wẽnnaam daabã bãngre,+ ne yam hakɩɩka, la ne bãngr ning Wẽnnaam vʋʋsem sõngã sẽn kõtã,+ 10 sẽn na yɩl tɩ y sẽn kẽnd to-to wã waoogd a Zeova,* tɩ y ta a yam zãnga, y sẽn womd biis tʋʋm-sõma buud fãa pʋgẽ la y paasd y bãngrã Wẽnnaam zugã yĩnga.+ 11 D kotame me tɩ Wẽnnaam tall a pãngã sẽn tar ziirã n kõ-y pãn-kãsenga,+ tɩ y tõog toog bũmb fãa pʋgẽ ne sũ-mar la ne sũ-noogo, 12 y sẽn pʋʋsd Ba wã barka, a sẽn yaa soab ning sẽn kɩt tɩ y zems ne naag nin-sõamyã wã sẽn be vẽenem pʋgẽ wã n paam pʋɩɩrã yĩnga.+

13 A yiisa tõnd likã tõog pʋgẽ,+ n kẽes-d a Bi-nongrã rĩungã pʋgẽ. 14 Yaa a Biigã maasem yĩng la tõnd paam tɩ b yao n fãag tõndo, rat n yeel tɩ d paama d yel-wẽnã sugri.+ 15 Biigã yaa Wẽnnaam ning ninsaal sẽn pa tõe n yã wã wõnego,+ la b sẽn deng n naan a soab* bõn-naandsã fãa sʋkã.+ 16 Bala tũu ne yẽ maasem tɩ b naan bũmb a taabã fãa sẽn be saasẽ la sẽn be tẽngã zugu, bũmb nins nif sẽn tõe n yã la sẽn pa tõe n yã wã,+ tɩ b yaa naam gɛy wall zu-sobend wall goosneem wall pãn-soaadba. Yaa yẽ maasem yĩng la b naan bũmb a taabã fãa,+ la yaa a yĩng la b naan-ba. 17 Sẽn paase, a renga bũmb a taabã fãa,+ la yaa a maasem yĩng la b naan bũmb a taabã fãa tɩ b beẽ. 18 Yẽ n yaa yĩngã zugu, rat n yeel tɩ tigingã zugu.+ Yẽ n leb n yaa sɩngre, la sẽn yɩ-a pipi n vʋʋg n yi kũ-rãmb sʋka,+ sẽn na yɩl n tõog n lebg soab ning sẽn yaa pipi bũmb fãa pʋgẽ wã. 19 Bala taa Wẽnnaam yam t’a kɩt tɩ bũmb fãa pid yẽ soabã pʋgẽ, 20 la a tũnug ne yẽ soabã n maneg yell ning sẽn da be Wẽnnaam ne bũmb a taabã fãa sʋkã,+ tɩ yaa bũmb nins sẽn be tẽngã zug wall bũmb nins sẽn be saasẽ wã, n kɩt tɩ laafɩ wa yẽ soabã zɩɩmã+ a sẽn daag namsg ra-lukã* zugã maasem yĩnga.

21 Sɩd me, pĩndã yãmb da zãra ne Wẽnnaam n da yaa a bɛɛba, y sẽn da tagsd tʋʋm-wẽns yellã yĩnga. 22 La masã, a kɩtame tɩ y paam n maneg yell ning sẽn da be yãmb ne yẽ sʋkã, soab ning sẽn sak n ki wã yĩn-nemsã maasem yĩnga, sẽn na yɩl tɩ y yals a taoor n yaa nin-sõamyã, neb sẽn pa tar zanga, la sẽn pa tar taale.+ 23 La yãmb segd n kell n paa tẽebã pʋgẽ,+ n kɩ yẽg yẽbgrã+ zug la y yals kãn-kãe,+ n da bas tɩ b zãag-y ne bũmb ning koe-noogã y sẽn wʋmã sẽn kɩt tɩ y saagd n na n wa paamã ye. B moona koe-no-kãng dũniyã gill zugu.+ Maam a Poll lebga koe-no-kãng tʋm-tʋmda.+

24 Mam kɩdemda sũ-noog masã, mam sẽn namsd yãmb yĩngã.+ Mam namsda wa Kiristã, la mam segd n kell n namsa Kirist yĩngã+ sẽn yaa tigingã yĩng tɩ pidi.+ 25 Mam lebga tigin-kãng tʋm-tʋmda, wa sẽn zems tʋʋmd+ ning Wẽnnaam sẽn kõ maam yãmb yĩng sẽn na yɩl tɩ m moon a koɛɛgã tɩ pidi, 26 rat n yeel tɩ m moon yel-soalgdg sẽn yaa sõngã.+ Dũni* ning sẽn zĩnd pĩndã+ ne neb nins sẽn vɩɩmd pĩndã ra pa mi yel-soalgdg-kãng ye. La masã, Wẽnnaam vẽneg-a-la a nin-sõamyã wã.+ 27 Sẽn paase, taa Wẽnnaam yam t’a kɩt tɩ nin-sõamyã wã bãng yel-soalgdgã sẽn yaa sõngã arzɛgsã sẽn tar ziirã. A kɩtdame tɩ nebã bãngd yel-soalgdgã+ bu-zẽmsã sʋka. A yaa Kirist sẽn be yãmb pʋsẽ wã, rat n yeel tɩ y sẽn saagd n na n wa naag-a n paam ziirã.+ 28 Yaa yẽ koɛɛgã la tõnd moonda, n keoogd ned buud fãa, la d zãmsd ned buud fãa ne yam hakɩɩka, sẽn na yɩl n sõng ned ning fãa sẽn be Kirist pʋgẽ t’a yɩ ned sẽn bɩ, tɩ d rɩk-a n wilg Wẽnnaam.+ 29 Sɩd me, yaa rẽ yĩng la mam sẽn tʋmd wʋsgo, n modgd ne a pãngã sẽn tʋmd ne tõog mam pʋgẽ wã.+

2 Bala mam datame tɩ yãmb bãng mam sẽn modgd wʋsg to-to yãmb yĩngã, neb nins sẽn be Laodise wã yĩngã, la neb nins fãa sẽn pa yã maamã* yĩngã. 2 Yaa sẽn na yɩl n bels b sũyã,+ la sẽn na yɩl tɩ b zems taab nonglem pʋgẽ. Woto, b na n paama arzɛgs nins sẽn tũud ne b sẽn na n kɩs sɩd zãng ne b sẽn wʋmd bũmb nins võorã, sẽn na yɩl n paam bãngr hakɩɩk Kiristã sẽn yaa Wẽnnaam yel-soalgdgã sẽn yaa sõngã zugu.+ 3 Yamã la bãngrã arzɛgsã fãa solga sõma yẽ pʋgẽ.+ 4 Mam yeta woto sẽn na yɩl tɩ ned baa a ye ra wa belg yãmb ne sɩlem goam ye. 5 Baa mam mengã sẽn ka be yãmb nengẽ wã, mam sũurã bee ne yãmba, tɩ m kɩdemd sũ-noog m sẽn ne yãmb sẽn sigl sõma,+ la yãmb tẽeb ne Kiristã sẽn yaa kãn-kãe wã.+

6 Woto wã, yãmb sẽn sak Zu-soab a Kirist Zeezi to-to wã, bɩ y kell n kẽn yẽ pʋgẽ, 7 n yɩ neb sẽn kɩ yẽg la sẽn me a zugu,+ la y yals kãn-kãe tẽebã pʋgẽ+ wa b sẽn zãms yãmbã, n pid ne bark pʋʋsgo.+

8 Gũus-y y mens tɩ ned ra wa tũnug ne dũniyã bãngr la ne belgr gom-vɩɩd+ n kɩt tɩ y lebg yembs* ye. Bõn-kãens zemsa ne ninsaalbã miningu, la b zems ne dũniyã bũmb toor-toorã, n pa zems ne Kiristã ye. 9 Bala bõn-sõma nins fãa Wẽnnaam sẽn tarã bee Kiristã pʋgẽ. 10 Rẽnd yãmb tara bũmb fãa Kiristã maasem yĩnga. Yẽ n yaa nanambsã fãa la pãn-soaadbã fãa zu-soaba.+ 11 Yãmb sẽn be Kirist pʋgẽ wã yĩnga, b kẽesa yãmb me bãongo, bãong sẽn pa nus n kẽese, n yiis yãmb yĩnsã tʋls-wẽnsã,+ bãong ning sẽn yaa yẽ rẽndã maasem yĩnga.+ 12 Bala b muma yãmb ne-a a lisgã pʋgẽ.+ La yãmb sẽn be a pʋgẽ wã, n paas yãmb sẽn tẽed bũmb nins Wẽnnaam sẽn yaa soab ning sẽn vʋʋg-a n yiis kũ-rãmb sʋkã+ sẽn maan ne a pãngã yĩnga, yãmb naag-a lame n vʋʋge.+

13 Sẽn paase, baa yãmb sẽn da ki y beegrã pʋgẽ la y moonemã pʋgẽ wã, Wẽnnaam kɩtame tɩ yãmb naag Kiristã n lebg vɩɩse.+ A kõo tõnd d beegrã fãa sugr ne yamleoogo,+ 14 la a yẽes tõogã sẽn da gʋls+ n wilgdẽ tɩ tõnd yaa koangdbã.+ Wẽnnaam menesa tõ-kãnga, a sẽn ka-a namsg ra-lukã* zugã yĩnga.+ 15 Namsg ra-lukã* maasem yĩnga, a yeesa nanambsã ne pãn-soaadbã bɛɛla, n dɩk-b n wilg nebã fãa sẽn na yɩl tɩ nebã bãng t’a tõog-b+ lame tɩ b lebg a yembse.

16 Woto wã, da bas-y tɩ ned kao y bʋʋd bũmb y sẽn dɩt la y sẽn yũud wɛɛngẽ,+ wall tigr bɩ ki-paalg tigr+ wall vʋʋsg daar wɛɛngẽ ye.+ 17 Bõn-kãens yaa bũmb nins sẽn watã maasem,+ la bũmbã meng-mengã yaa Kiristã.+ 18 Ra bas-y tɩ ned kɩt tɩ y ra paam keoorã,+ ned sẽn maand sũ-noog ne zirẽ-be-sik-m-meng la ne malɛgs pʋʋsgo,* n gãt bũmb nins a sẽn yã wã kãn-kãe, la sẽn wukd a meng ne a tags-vɩɩd ye. 19 Sẽn paase, a pa tabended a meng kãn-kãe ne zugã ye.+ Zugã n yaa soab ning sẽn kɩtd tɩ yĩngã tõr paamd bũmb nins fãa a sẽn datã, la a tong sõma a kõb-sugdsã la a gĩinã maasem yĩnga, n bɩt ne bɩʋʋng ning Wẽnnaam sẽn kõtã.+

20 Yãmb sã n naaga Kiristã n ki dũniyã bũmb toor-toorã wɛɛngẽ,+ yaa bõe yĩng tɩ y vɩ wa y ket n yaa dũniyã rẽnda, n le sakd noy sẽn yaa:+ 21 “Da rɩke, da lembe, da sɩɩse,” 22 sẽn yaa noy sẽn gomd bõn-sãamds yelle, b sẽn dɩt-b wall b sẽn yũud-bã yĩnga, n zems ne ninsaalb noy la b zãmsgo?+ 23 Baa no-kãensã sẽn wõnd b yaa yam bũmbã, b pa sõngd ned t’a mao ne a yĩngã tʋls-wẽnsã ye. Nebã sakda no-kãens b sẽn dat n yãk b sẽn na n tũ Wẽnnaam to-to b toorã yĩnga. B sɩbgda b mense,+ b sẽn dat tɩ nebã tags tɩ b yaa sik-m-mens rãmbã yĩnga.

3 La sã n mikame tɩ b naaga yãmb ne Kiristã n vʋʋge,+ bɩ y kell n bao bũmb nins sẽn be saasẽ, zĩig ning Kiristã sẽn zĩ Wẽnnaam nug-rɩtgã.+ 2 Kɩt-y tɩ y yamã zĩnd ne bũmb nins sẽn be saasẽ wã,+ la pa ne bũmb nins sẽn be tẽngã zugã ye.+ 3 Bala yãmb kiime, la b solga yãmb vɩɩmã ne Kiristã Wẽnnaam pʋgẽ. 4 Kiristã sẽn yaa tõnd vɩɩmã+ sã n wa puki, yãmb me na n naag-a lame n puk ne ziiri.+

5 Woto yĩnga, bɩ y kʋ y yĩngã wilã+ sẽn be tẽngã zugã sẽn na yɩl n da wa yo,* n da wa tʋm tʋʋm-dẽgdo, n da wa bas tɩ pag ne rao lageng tʋlsmã soog-yã,+ n da wa tall tʋls-wẽnse, la sẽn na yɩl n da wa lebg yão-be-neba, bala yão-beed ne bõn-naands pʋʋsg yaa a yembre. 6 Yaa bõn-kãens n wat ne Wẽnnaam sũ-puugrã. 7 Yãmb me ra wae n maanda bõn-kãensã* pĩndã.*+ 8 La masã yãmb segd n zãaga y mens ne sũ-puugri, sũ-yikri, wẽnem,+ tʋya,+ la gom-dẽgd+ sẽn yit yãmb noorẽ. 9 Ra yag-y taab ziri ye.+ Bɩ y yeeg nin-kʋdgã*+ ne a tʋʋmã, 10 la y yeelg nin-paalgã+ b sẽn tũnugd ne bãngr hakɩɩkã n kɩtdẽ t’a lebgd paalga, n zemsd Soab ning sẽn naan-a wã wõnegã.+ 11 Nin-paalgã pʋgẽ, Gɛrk bɩ Zʋɩf kae, bãong wall moonem kae, sãan kae, Sit* kae, yamb wall sẽn pa-a yamb me kae ye. La Kirist yaa bũmb fãa, fãa pʋgẽ.+

12 Woto wã, yãmb sẽn yaa Wẽnnaam nin-tũusdsã,+ nin-sõamyã la neb Wẽnnaam sẽn nongã yĩnga, bɩ y yeelg bʋgsem, nimbãan-zoeere,+ sõmblem, sik-m-menga,+ sũ-bʋgsem,+ la sũ-mare.+ 13 Bɩ y maand sũ-mar ne taaba, la y sakd n kõt taab sugr+ baa ned sã n wa tar yell ne a to.+ A Zeova* sẽn sak n kõ yãmb sugrã, yãmb me segd n maana woto.+ 14 La sẽn paas bõn-kãensã fãa, bɩ y yeelg nonglem,+ bala nonglem kɩtdame tɩ neb zemsd taab sõma.+

15 Sẽn paase, bɩ Kiristã laafɩ wã soog yãmb sũyã,*+ bala b boola yãmb laafɩ-kãng pʋgẽ sẽn na yɩl tɩ y yɩ yĩng a yembre. Wilg-y tɩ y yaa sõm-mitba. 16 Bɩ Kiristã gomdã pid yãmb sũyã zãnga, n kɩt tɩ y lebg yam dãmba. Ket-y n zãmsd-y taab la y kengd taab raood* ne yɩɩn-sõamyã,+ ne Wẽnnaam pẽgr yɩɩla, la ne Wẽnnaam yɩɩl sẽn yɩɩnd n pʋʋsd barka, n yɩɩnd y sũyã pʋsẽ a Zeova* yĩnga.+ 17 Yãmb sẽn maand bũmb ning fãa, sã n yaa gomd wall tʋʋmde, bɩ y maan bũmb fãa ne Zu-soab a Zeezi yʋʋre, n pʋʋsd Wẽnnaam sẽn yaa Ba wã bark a maasem yĩnga.+

18 Pagba, sulg-y y mens n sak y sɩdbã,+ bala rẽ zemsa Zu-soabã pʋgẽ. 19 Pʋg-sɩdba, kell-y n nong-y y pagbã+ la y ra yikd y sũur* ne bãmb ye.+ 20 Kamba, sakd-y y ba-rãmbã la y ma-rãmbã bũmb fãa pʋgẽ,+ bala rẽ nooma Zu-soabã. 21 Ba-rãmba, ra maand-y bũmb sẽn yikd y kambã sũyã+ tɩ b wa koms raood ye.* 22 Yembse, sakd-y y zu-soben-dãmbã+ bũmb fãa pʋgẽ. La pa segd n yɩ b nifẽ bala, y sẽn dat n noog ninsaalb sũur yĩng ye. Segd n yɩɩ ne pʋ-peelem, la ne a Zeova* zoeese. 23 Yãmb sẽn maand bũmb ning fãa, bɩ y maan ne y sɩɩg* fãa wa y sẽn maand a Zeova* yĩnga,+ la pa ninsaalb yĩng ye. 24 Bala yãmb miime tɩ y na n paama pʋɩɩr sẽn yit a Zeova* nengẽ tɩ yɩ keoore.+ Tʋm-y wa yembs n kõ Kirist sẽn yaa y Zu-soabã. 25 Vẽenega, ned ning sẽn maand wẽng na n paama wẽng ning a sẽn maanã keoore.+ Bala Wẽnnaam pa bakd ned ye.+

4 Yãmb a zu-soben-dãmbã, maan-y y yembsã sẽn yaa tɩrg la sẽn zemse, n miẽ tɩ yãmb me tara Zu-soab saasẽ.+

2 Wɩng-y ne pʋʋsgo.+ Ra gũs-y pʋʋsgã wɛɛngẽ, la y wɩng ne bark pʋʋsgo.+ 3 La bɩ y pʋʋsd tõnd yĩng me,+ n kotẽ tɩ Wẽnnaam pak rignoor koɛɛgã yĩnga, tɩ d tõog n moon Wẽnnaam yel-soalgdgã sẽn yaa sõngã sẽn gomd Kiristã yellã. Yaa yel-soalgdg-kãng yĩng la mam sẽn be bãens roogẽ wã.+ 4 Pʋʋs-y me n kos tɩ m tõog n moon-a vẽeneg wa m sẽn segd n moonã.

5 Yel-manesem ning y sẽn tar ne yɩng rãmbã wɛɛngẽ, kell-y n kẽn-y ne yam, n da sãam y sẽkã ye.+ 6 Bɩ y goamã tall yamleoog wakat fãa wa b yugla yamsem,+ sẽn na yɩl tɩ y bãng y sẽn segd n leok ned kam fãa to-to.+

7 A Tisik+ sẽn yaa m saam-bi-nongre, n yaa tʋm-tʋmd sẽn maand sɩd la tõnd yem-taag Zu-soabã pʋgẽ wã na n togsa yãmb bũmb fãa mam zugu. 8 Mam tʋmd-a-la yãmb nengẽ sẽn na yɩl tɩ y paam tõnd kibare, la a bels yãmb sũyã. 9 A wata ne a Onezɩm+ sẽn yaa mam saam-bi-nongr sẽn maand sɩdã, la sẽn yit yãmb babgẽ wã. B na n togsa yãmb bũmb nins fãa sẽn maand ka wã.

10 A Aristark+ sẽn be bãens roogẽ ne maamã toonda yãmb a pʋʋsem. Neb a taab me sẽn toond yãmb b pʋʋsem yaa a Mark+ sẽn kĩ ne a Barnabaasã (soab ning b sẽn yeel yãmb t’a sã n wa yãmb nengẽ bɩ y reeg-a neerã,)+ 11 n paas a Zeezi b sẽn boond me t’a Zistuusã. B yaa neb sẽn kẽ bãongo. Yaa nin-kãensã bal n yaa mam tʋmd-n-taas Wẽnnaam Rĩungã yĩnga, la b belsa maam wʋsgo.* 12 A Epafras sẽn yaa Kirist Zeezi yamba, la sẽn yit yãmb babgẽ wã toonda yãmb a pʋʋsem. Wakat fãa, a pʋʋsda ne a sũur fãa yãmb yĩnga, sẽn na yɩl tɩ y yals kãn-kãe n yɩ neb sẽn bɩ, la y kɩs sɩd zãng ne Wẽnnaam daabã fãa. 13 Bala mam kõta yẽ kaset t’a modgda wʋsg yãmb yĩnga, la sẽn be-b Laodise ne Hiyerapoliisã yĩnga.

14 Logtor a Luk+ d sẽn nong wʋsgã toonda yãmb a pʋʋsem. A Demas+ me toonda yãmb a pʋʋsem. 15 Pʋʋs-y saam-biisã sẽn be Laodise wã n kõ-ma, la y pʋʋs a Nimfa ne tiging ning sẽn tigimd a zakẽ wã me.+ 16 La b sã n wa karem seb-kãngã yãmb sʋk n sa, bɩ y ges tɩ b karm-a+ Laodise nebã tigingẽ wã me, la y ges tɩ b karem sebr ning b sẽn tool Laodise wã me yãmb nengẽ. 17 Sẽn paase, yeel-y-yã a Arsip+ yaa: “Gũus ne tʋʋmd ning fo sẽn deeg Zu-soabã nengẽ wã, n tʋm-a sõma.”

18 Ad maam a Poll pʋʋsem m sẽn gʋls ne m meng nugu.+ Ra yĩm-y mam balgrã+ yell ye. Bɩ Wẽnnaam barkã* zĩnd ne yãmba.