PIPI SEBR B SẼN TOOL TESALONIK RÃMBÃ

1 Maam a Poll ne a Sɩlvẽ*+ la a Tɩmote+ n gʋls seb-kãngã n tool Tesalonik nebã tiging sẽn be Wẽnnaam sẽn yaa Ba wã pʋgẽ, la Zu-soab a Zeezi Kirist pʋgẽ wã:

Bɩ Wẽnnaam barkã* la laafɩ zĩnd ne yãmba.

2 Tõnd sã n wa pʋʋsd Wẽnnaam n gomd yãmb fãa yelle, d pʋʋsd-a-la bark wakat fãa,+ 3 bala tõnd Wẽnnaamã sẽn yaa d Ba me wã taoore, wakat fãa d tẽegda tʋʋmd ning yãmb sẽn tʋmd ne tẽebã, la y nonglmã sẽn kɩt tɩ y tʋmd tʋʋm-toog ningã, n paas y sẽn tõogd toog y sẽn tẽed+ tõnd Zu-soab a Zeezi Kiristã yĩnga. 4 D saam-biis Wẽnnaam sẽn nonge, tõnd miime tɩ yaa Wẽnnaam n yãk yãmba, 5 bala koe-noogã tõnd sẽn moondã pa ta yãmb nengẽ ne goam bal ye. Yɩɩ ne tõogo, ne vʋʋsem sõngã sõngre, la ne kɩs-sɩd wʋsg me, wa yãmb sẽn mi tõnd sẽn wilg tɩ d yaa neb nins buud yãmb sʋk y neer yĩngã. 6 Yãmb lebga tõnd togs-n-taase,+ la Zu-soabã togs-n-taase,+ y sẽn deeg Wẽnnaam gomdã namsg wʋsg pʋgẽ,+ la ne sũ-noog ning vʋʋsem sõngã sẽn kõtã yĩnga, 7 hal n lebg mak-sõng tẽedb nins fãa sẽn be Masedoan la Akayi soolmẽ wã yĩnga.

8 Sɩd-sɩda, a Zeova* koɛɛgã pa yi yãmb nengẽ n ta Masedoan la Akayi bal ye. Yãmb sẽn tẽed Wẽnnaam to-to wã me kibar piuuga zĩig fãa,+ hal tɩ pa le yaa tɩlɛ tɩ d yeel bũmb ye. 9 Bala bãmb mens ket n gomda tõnd sẽn wa yãmb nengẽ pipi wã yelle, la y sẽn bas y bõn-naandsã pʋʋsg to-to n wẽnemd n tees Wẽnnaamã yelle.+ Y maana woto sẽn na yɩl n tʋm wa yembs n kõ Wẽnnaam sẽn vɩ la sẽn yaa sɩd-sɩdã, 10 la sẽn na yɩl n gũ a Bi-riblã sẽn na n yi saasẽ+ n wa wã, soab ning a sẽn vʋʋg n yiis kũ-rãmb sʋkã, rat n yeel t’a Zeezi sẽn fãagd tõnd ne Wẽnnaam sũ-puugrã sẽn watã.+

2 M saam-biisi, sãmbg sẽn kae, yãmb mensã miime tɩ tõnd sẽn wa yãmb nengẽ wã woma biisi.+ 2 Bala yãmb miime tɩ Filip tẽngã,+ tõnd deng n paama toog tɩ b le nams tõndo. Baa ne rẽ, tõnd paama raood* tõnd Wẽnnaamã maasem yĩnga, n moon yãmb Wẽnnaam koe-noogã+ baa ne kɩɩsgã sẽn da yaa wʋsgã.* 3 Bala sagls nins tõnd sẽn kõt yãmbã pa tik ziri zugu, d leb n pa kõt-b ne yam-wẽng bɩ sẽn na yɩl n tudg yãmb ye. 4 La sẽn mik tɩ Wẽnnaam gesame tɩ tõnd zemsame t’a kõ tõnd koe-noogã mooneg tʋʋmdã, tõnd pa gomd n na n noog ninsaalb sũy ye. Yaa sẽn na n noog Wẽnnaam sũuri, soab ning sẽn feesd tõnd sũyã.+

5 Sɩd-sɩda, yãmb miime tɩ tõnd zɩ n belg yãmb ne gom-noodo, wall d maan wa d yaa nin-sõamyã n na n solg d yão-beed ye.+ Wẽnnaam yaa tõnd kaset rẽ wɛɛngẽ! 6 Tõnd pa bao ziir ninsaalb nengẽ, tɩ yaa yãmb nengẽ wall neb a taab nengẽ ye. La tõnd sẽn yaa Kirist tẽn-tʋmdbã, d ra tara sor n tõe n yeel tɩ y yiis ligd n ges tõnd yelle, tɩ rẽ yɩ zɩɩb ne-yã.+ 7 La tõnd talla bʋgsem ne yãmba, wa pag sẽn dɩlgd a kamb la a get b yell ne bʋgsem* to-to wã. 8 Tõnd sẽn nong yãmb wʋsgã yĩnga, pa Wẽnnaam koe-noogã bal la d ra rat n taas yãmb ne d sũy fãa ye. D ra rat n kõo yãmb d mensã* me,+ bala yãmb lebga tõnd nin-nongdse.+

9 M saam-biisi, sãmbg sẽn kae, yãmb tẽra tõnd sẽn da tʋmd wʋsg n pa yɛɛdẽ wã. Tõnd sẽn wa n moond yãmb Wẽnnaam koe-noogã, d tʋma wĩndg la yʋngo, sẽn na yɩl n da wa rogl zɩɩb sẽn yaa zɩsg yãmb zug ye.+ 10 Yãmb yaa kaseto, tɩ Wẽnnaam me yaa kaset tɩ tõnd sẽn zã d mens to-to ne yãmb a tẽedbã wɛɛngẽ, d wilgame tɩ d yaa neb sẽn maand sɩda, nin-tɩrs la neb sẽn pa tar taale. 11 Yãmb mii vẽeneg tɩ tõnd ra sagenda yãmba, n belsd yãmb la d moond yãmb ned kam fãa koɛɛgã n pa basdẽ,+ wa ba+ sẽn maand to-to ne a kamba, 12 sẽn na yɩl tɩ y kell n kẽn wa sẽn noom Wẽnnaam,+ soab ning sẽn boond yãmb a Rĩungã+ la a ziirã+ pʋgẽ wã.

13 Sɩd me, yaa rẽ yĩng me la tõnd sẽn pʋʋsd Wẽnnaam bark n pa basdẽ wã,+ bala yãmb sẽn wa n deeg Wẽnnaam gomdã y sẽn wʋm tõnd nengẽ wã, yãmb pa sak-a wa a yaa ninsaal gomd ye. Yãmb sak-a-la wa a sẽn sɩd yaa bũmb ningã, wa Wẽnnaam gomde, gomd sẽn tʋmd yãmb a tẽedbã pʋsẽ me wã. 14 Bala m saam-biisi, yãmb lebga Wẽnnaam tiging ning sẽn be Zide la sẽn be Kirist Zeezi pʋgẽ wã togs-n-taase, bala yãmb me paama namsg y tẽngã neb+ nusẽ, wa bãmb me sẽn namsd Zʋɩf-rãmbã nusẽ wã. 15 Pʋd n yaa Zʋɩf-rãmbã la sẽn kʋ Zu-soab a Zeezi+ ne no-rɛɛsdbã, la sẽn nams tõndã.+ Sẽn paase, b pa tat Wẽnnaam yam, la b sẽn maandã pa nafd ned baa a yembr ye. 16 Bala b modgdame n dat n gɩdg tõnd tɩ d ra gom ne bu-zẽmsã neb sẽn na yɩl tɩ b paam fãagr ye.+ B sẽn maand woto wã, b paasda b yel-wẽnã wakat fãa. La Wẽnnaam sũ-puugrã yaa n waa b zutu.+

17 La m saam-biisi, b sẽn wa n welg tõnd ne yãmb wakat bilf yĩngã, (tõnd mensã ra pa be ne yãmba, la d sũyã ra bee ne yãmba) tõnd sẽn da rat n le yã yãmb ne d sũy fãa wã, d modga wʋsg sẽn na yɩl n yã yãmb mensã.* 18 Woto yĩnga, tõnd ra rat n waa yãmb nengẽ. Yaa naoor a yiib la maam a Poll sẽn mak n na n wa yãmb nengẽ wã. La a Sʋɩtãan gɩdga tõnd sorã. 19 Ãnd dãmb n yaa tõnd saagre, wall d sũ-noogo, pa rẽ bɩ d kɩdeng maanfo, tõnd Zu-soab a Zeezi taoor a waoongã wakate? Sɩd-sɩda, pa yãmb la?+ 20 Hakɩɩka, yãmb n yaa tõnd ziir la d sũ-noogo.

3 Rẽ n kɩt tɩ tõnd sẽn wa n pa le tõe n gũ hal n wa paam yãmb kibarã, d tagsame tɩ yɩta sõma tɩ d pa Atɛn+ 2 la d tʋm a Tɩmote+ sẽn yaa d saam-biiga, la Wẽnnaam tʋm-tʋmd* sẽn moond Kirist koe-noogã, t’a wa sõng yãmb tɩ y yals kãn-kãe* la a bels yãmb y tẽebã wɛɛngẽ, 3 sẽn na yɩl tɩ to-kãensã ra wa miim* yãmb ned baa a yembr ye. Bala yãmb mensã miime tɩ tõnd pa tõe n põs to-kãens ye.*+ 4 Bala tõnd sẽn wa n be ne yãmbã, d ra pĩnd n togsda yãmb tɩ d na n paama toogo, la wa yãmb sẽn mi wã, yaa bõn-kãng la sẽn maanã.+ 5 Rẽ n so tɩ mam sẽn wa n pa le tõe n gũ wã, mam tʋma a Tɩmote sẽn na yɩl t’a bãng yãmb sẽn kɩs Wẽnnaam sɩd to-to wã,+ bala mam ra yɛɛsdame tɩ tõe tɩ Makdã*+ maka yãmba, la tɩ tõe tɩ tõnd tʋʋm-toogã lebga zaalem.

6 La a Tɩmote yii yãmb nengẽ n nan wa paalem.+ A taasa tõnd koe-nood yãmb kɩs-sɩdã ne y nonglmã wɛɛngẽ, n yeel tɩ yãmb tẽegda tõnd yell wakat fãa ne nonglem, la tɩ y rata ne y sũur fãa n yã tõndo, wa tõnd me sẽn dat n yã yãmbã. 7 M saam-biisi, yaa rẽ n so tɩ tõnd sũ-sãangã la d toogã fãa pʋgẽ, tõnd paama belsg yãmb yĩnga, la yãmb sẽn wilg tɩ y yaa kɩs-sɩd rãmbã yĩnga.+ 8 Bala tõnd le vɩɩme,* sã n mik tɩ y yasa kãn-kãe Zu-soabã pʋgẽ. 9 Sɩd me, tõnd pa tõe n pʋʋs Wẽnnaam bark yãmb yĩng n sa, sũ-noog ning tõnd sẽn paamd tõnd Wẽnnaamã taoor yãmb yĩngã yĩng ye. 10 Wĩndg la yʋngo, tõnd yõkda Wẽnnaam sɛɛg ne d sũy fãa wa d sẽn tõe tɛka, sẽn na yɩl n yã yãmb mensã,* la d kõ-y bũmb ning sẽn paoog yãmb tẽebã.+

11 Masã, bɩ tõnd Wẽnnaamã sẽn yaa d Ba me wã menga, n paas tõnd Zu-soab a Zeezi pak sor n kõ-d tɩ d wa yãmb nengẽ. 12 La bɩ Zu-soabã kɩt tɩ yãmb nong taab wʋsg+ la y nong nebã fãa wʋsgo, wa tõnd sẽn nong yãmbã. 13 Rẽ la a tõogd n keng yãmb sũyã, la a kɩt tɩ y yɩ neb sẽn pa tar taale, la neb sẽn yaa nin-sõamyã tõnd Wẽnnaamã+ sẽn yaa d Ba me wã taoore, tõnd Zu-soab a Zeezi+ waoongã wakate, a sẽn na n wa ne sẽn yaa-b sõamyã wã fãa wã.

4 M saam-biisi, sẽn na n baase, tõnd kõo yãmb noy n wilg yãmb y sẽn segd n kẽn to-to n ta Wẽnnaam yam.+ La sɩd-sɩda, yãmb maanda woto. Masã, tõnd rat n sagla yãmb la d kos-y ne Zu-soab a Zeezi yʋʋr tɩ y kell n maan dẽ tɩ pidi. 2 Bala yãmb mii noy nins tõnd sẽn kõ yãmb ne Zu-soab a Zeezi maasmã.

3 Ad Wẽnnaam daabã: Yaa tɩ yãmb segd n yɩɩ sõamyã,+ n lak y mens ne yoobo.*+ 4 Yãmb ned kam fãa segd n bãnga a sẽn na n tõog a meng yĩngã to-to,+ n zã-a t’a yɩ sõng+ la a tall waoogre. 5 Da yɩ-y wa neb nins sẽn pa mi Wẽnnaamã ye.+ Bala b basame tɩ yoobã tʋlsem soog-ba, hal tɩ pa sekd-b ye.+ 6 Yel-kãngã wɛɛngẽ, ned baa a ye pa segd n maan sẽn pa zems n wẽg a saam-biig ye. Bala yaa a Zeova* n wat ne sɩbgr bõn-kãensã fãa poorẽ wa tõnd sẽn da yeel yãmbã, la d sẽn keoog-y ne d sũy fãa me wã. 7 Bala Wẽnnaam pa bool tõnd tʋʋm-dẽgd yĩng ye. A bool-d-la sõmblem yĩnga.+ 8 Rẽnd ned ning sẽn kɩɩsd sagl-kãensã pa kɩɩsd ninsaal ye. Yaa Wẽnnaam+ sẽn yaa soab ning sẽn kõt yãmb a vʋʋsem sõngã la a kɩɩsda.+

9 La saam-biir nonglmã wɛɛngẽ,+ yãmb pa baood tɩ tõnd gʋls yãmb n yeel bũmb ye. Bala yãmb mens paamame tɩ Wẽnnaam zãmsd yãmb sẽn na yɩl tɩ y nong taaba.+ 10 Sɩd-sɩda, yãmb maanda woto ne saam-biisã fãa sẽn be Masedoan soolmã tõrã. La m saam-biisi, tõnd sagenda yãmb tɩ y kell n maan dẽ hal tɩ pidi. 11 Modg-y ne y sũy fãa n zĩnd bãane,+ la y ra kẽes y toog neb a taab yɛlẽ ye.+ Tʋm-y ne y nusã+ wa tõnd sẽn sagl yãmbã. 12 Woto, yãmb kẽnã na n yɩɩ sõma yɩng rãmbã nifẽ.+ Sẽn paase, bũmb pa na n paoog yãmb ye.

13 La m saam-biisi, sã n yaa neb nins sẽn ki wã* wɛɛngẽ,+ tõnd pa rat tɩ yãmb be zɩɩlem pʋgẽ, n wa maand sũ-sãang wa neb a taabã sẽn pa tar saagrã sẽn maandã ye.+ 14 Bala tõnd sã n tẽed t’a Zeezi kiime n lebs n vʋʋge,+ d tẽedame me tɩ Wẽnnaam na n vʋʋga neb nins sẽn ki* a Zeezi pʋgẽ wã tɩ b naag a Zeezi.+ 15 Ad tõnd sẽn yet yãmb bũmb nins wa sẽn zems a Zeova* goamã: Yaa tɩ tõnd sʋkã neb nins sẽn na n ket n vɩ Zu-soabã waoong wakatã pa na n deng sẽn ki-bã* n dʋ saasẽ ye. 16 Bala Zu-soabã meng na n yii saasẽ n sigd la a kõt noy ne malɛgs naab+ koɛɛga, la a zãad Wẽnnaam tãntãoogo. La neb nins sẽn ki Kirist pʋgẽ wã na n deng n vʋʋgame.+ 17 Rẽ poore, tõnd a neb nins sẽn na n ket n vɩ wã na n naaga sẽn na n vʋʋg-bã, tɩ b zẽk tõnd sawat+ pʋsẽ tɩ d tɩ seg Zu-soabã+ yĩngri. Woto, tõnd na n paa ne Zu-soabã wakat fãa yĩnga.+ 18 Bɩ y ket n belsd taab ne gom-kãensã.

5 La sã n yaa ne wakatã la sasa wã wɛɛngẽ, m saam-biisi, yãmb pa baood tɩ d gʋls yãmb n yeel bũmb ye. 2 Bala yãmb mens mii vẽeneg t’a Zeova* daarã+ wata wa wagdr sẽn wat yʋng to-to wã kɛpɩ.+ 3 Wakat ning b sẽn na n yeele: “Laafɩ la bãane!” Wakat kãnga, sãoong na n ling-b lame n wa b zut zĩig pʋgẽ+ wa rogem toog sẽn paamd pag sẽn tʋt to-to wã, la b pa na n põs a bada. 4 La sã n yaa ne yãmba, m saam-biisi, yãmb pa be lik pʋgẽ, tɩ ra-kãng na n wa ling yãmb wa beoog vẽegr sẽn na n ling wagda ye. 5 Bala yãmb fãa yaa vẽenem kamba,* la wĩndg kamba.*+ Tõnd pa yʋng rẽnd wall lik rẽnd ye.+

6 Woto wã, bɩ d ra gũs wa neb a taabã ye.+ La bɩ d kell n gũ+ la d modg tɩ d yamã ket n vẽenẽ.+ 7 Bala neb nins sẽn gõe wã gõee yʋngo. La neb nins sẽn yũud rãam n tɩgdã yũuda yʋngo.+ 8 La tõnd sẽn yaa wĩndg rẽndã, bɩ d modg tɩ d yamã ket n vẽenẽ, n yer tẽeb la nonglem kut fuugã,* la d fõgen fãagrã saagr wa kut pugla,+ 9 bala Wẽnnaam pa yãk tõnd n na n kɩt t’a sũ-puugrã wa tõnd zut ye. Yaa sẽn na n kɩt tɩ d paam fãagr+ tõnd Zu-soab a Zeezi Kirist maasem yĩnga. 10 A Zeezi kii tõnd yĩnga,+ sẽn na yɩl tɩ d sã n gõe* wall d sã n neẽ me, bɩ d naag-a n vɩ.+ 11 Woto yĩnga, bɩ y ket n kengd taab raoodo,* la y paasd taab tẽeb pãng+ wa yãmb sẽn zoe n maandẽ wã.

12 Masã m saam-biisi, tõnd kota yãmb tɩ y waoog neb nins sẽn tʋmd wʋsg yãmb sʋkã, sẽn lʋɩt yãmb taoor Zu-soabã pʋgẽ la sẽn sagend yãmbã. 13 Wilg-y tɩ y nand-b-la hal wʋsg ne nonglem b tʋʋmdã yĩnga.+ Modg-y tɩ laafɩ kell n zĩnd yãmb ne taab sʋka.+ 14 Sẽn paase, m saam-biisi, tõnd kota yãmb tɩ y keoog* neb nins sẽn vɩ yaarã,+ tɩ y gomd goam sẽn belsd ne sũ-sãang rãmbã,* tɩ y sõng neb nins sẽn ka pãngã, la tɩ y maan sũ-mar ne nebã fãa.+ 15 Gũus-y tɩ yãmb ned baa a ye ra lebs ned wẽng wẽng yĩng ye.+ La bɩ y maand taab neer wakat fãa, la y maand nebã fãa neere.+

16 Kɩdemd-y sũ-noog wakat fãa.+ 17 Pʋʋsd-y wakat fãa.+ 18 Pʋʋsd-y Wẽnnaam bark bũmb fãa yĩnga.+ Yaa bõn-kãens la Wẽnnaam dat tɩ y maane, y sẽn be Kirist Zeezi pʋgẽ wã yĩnga. 19 Ra kiis-y vʋʋsem sõngã bugmã ye.+ 20 Ra paoog-y bãngr-goamã ye.+ 21 Mak-y bũmb fãa n gese,+ la y gãd sẽn yaa sõma wã kãn-kãe. 22 Lak-y y mens ne wẽnem buud fãa.+

23 Bɩ laafɩ Wẽnnaamã meng kɩt tɩ y lebg sõamyã zãnga. La bɩ yam-sõng ning yãmb sẽn yaa d saam-biisã sẽn tarã, n paas y sɩɩgã* la y yĩngã paam koglgo, tɩ tõnd Zu-soab a Zeezi Kirist waoongã wakat+ bɩ b ra tall taale, la b yɩ sõma bũmb fãa pʋgẽ. 24 Soab ning sẽn bool yãmbã yaa sɩd soaba, la sãmbg sẽn kae, a na n maana rẽ.

25 M saam-biisi, ket-y n pʋʋsd-y tõnd yĩnga.+

26 Pʋʋs-y taab ne pʋ-peelem mokre.

27 Mam kota yãmb ne Zu-soabã yʋʋr tɩ y kɩt tɩ b karem seb-kãngã tɩ saam-biisã fãa kelge.

28 Bɩ tõnd Zu-soab a Zeezi Kirist barkã* zĩnd ne yãmba.