YIIB-N-SOAB SEBR B SẼN TOOL TESALONIK RÃMBÃ

1 Maam a Poll ne a Sɩlvẽ* la a Tɩmote+ n gʋls seb-kãngã n tool Tesalonik nebã tigingã sẽn be Wẽnnaam sẽn yaa Ba wã pʋgẽ, la Zu-soab a Zeezi Kirist pʋgẽ wã:

2 Bɩ bark* la laafɩ sẽn yit Wẽnnaam sẽn yaa Ba wã nengẽ, la Zu-soab a Zeezi Kirist nengẽ zĩnd ne yãmba.

3 M saam-biisi, yaa tɩlɛ tɩ tõnd pʋʋsd Wẽnnaam bark wakat fãa yãmb yĩnga. Rẽ segdame, bala yãmb tẽebã pãng paasda wʋsgo, tɩ yãmb ned kam fãa nonglem ne a taabã me paasdẽ.+ 4 Yaa rẽ n so tɩ tõnd pẽgd yãmb+ Wẽnnaam tigimsã sʋka, bala baa yãmb sẽn paamd namsg la y segd zu-loeesã,* y tõogda toogo, la y tar tẽebo.+ 5 Bõn-kãensã fãa yaa kaset tɩ Wẽnnaam kaoo bʋʋdã tɩrga, la rẽ na n kɩtame tɩ b geelg tɩ yãmb zemsa ne Wẽnnaam Rĩungã pʋgẽ kõom, Rĩung ning yĩng yãmb sẽn namsdã.+

6 Wẽnnaam sẽn yaa tɩrlem soabã yĩnga, a na n sɩbga neb nins sẽn kɩt tɩ yãmb namsdẽ wã.+ 7 La yãmb a neb nins b sẽn namsdã, b na n kɩtame tɩ y lagem ne tõnd n paam yolsgo, wakat ning Zu-soab a Zeezi sẽn na n puk+ saasẽ ne a malɛgsã sẽn tar pãngã.+ 8 Yaa wakat ning a sẽn na n puk bug-witim pʋgẽ n sɩbg neb nins sẽn pa mi Wẽnnaam, la neb nins sẽn pa sakd tõnd Zu-soab a Zeezi koe-noogã.+ 9 Tõnd Zu-soabã na n kaoo nin-kãens bʋʋdo. B sɩbgrã na n yɩɩ sãoong wakat fãa yĩnga,+ sẽn na yɩl tɩ Zu-soabã ra le yã bãmba, wall a sõng-b ne a pãn-kãsengã ye. 10 Tõnd Zu-soabã sã n wa wa n na n naag a nin-sõamyã wã n paam ziiri, neb nins fãa sẽn tẽed-a wã na n ges-a-la ne naneb wʋsgo. Yãmb sẽn tẽ bũmb nins tõnd sẽn togs yãmbã yĩnga, yãmb me na n zĩnda nin-kãens sʋka.

11 Yaa rẽ yĩng la tõnd sẽn pʋʋsd Wẽnnaam wakat fãa yãmb yĩnga, n kotẽ tɩ Wẽnnaam geelg-y tɩ y yaa neb sẽn zems ne a boolgã,+ t’a tall a pãngã n maan bõn-sõma nins fãa a sẽn dat n maan yãmbã, la a kɩt tɩ tʋʋm nins yãmb sẽn tʋmd tẽeb yĩngã pidi. 12 Yaa sẽn na yɩl tɩ tõnd Zu-soab a Zeezi yʋʋrã paam pẽgr yãmb pʋsẽ, tɩ yãmb me paam pẽgr yẽ pʋgẽ wa sẽn zems tõnd Wẽnnaamã barkã,* la Zu-soab a Zeezi Kirist barkã.*

2 La m saam-biisi, sã n yaa ne tõnd Zu-soab a Zeezi Kirist waoongã,+ la b sẽn na n tigim tõnd a nengẽ+ wã wɛɛngẽ, tõnd kota yãmb 2 tɩ y ra bas tɩ y yam yuus nana-nana, ned sã n yeel yãmb t’a Zeova* daarã+ taame ye. Baa a sã n yeel yãmb tɩ koɛɛgã yita Wẽnnaam nengẽ,+ wall t’a wʋm-a-la ned a to nengẽ, pa rẽ bɩ a karm-a-la sebr b sẽn yet tɩ tõnd n gʋls pʋgẽ, bɩ y ra maan yɩɩr ye.

3 Ra bas-y tɩ ned baa a ye belg* yãmb ne bũmb baa a yembr ye. Bala ra-kãng pa na n wa tɩ sɩdã kɩɩsg+ pa reng n wa, la tɩ yel-wẽnã rao+ sẽn yaa sãoong biigã pa reng n puk ye.+ 4 A yaa bɛya. Sẽn paase, a zẽkda a meng n yetẽ t’a yɩɩda bũmb ning fãa ninsaalbã sẽn boond tɩ wẽnd wall b sẽn waoogde,* hal n tɩ zĩnd Wẽnnaam doogẽ wã, n wilgd nebã tɩ yẽ mengã yaa wẽnde. 5 Yãmb pa tẽr tɩ mam sẽn wa n ket n be ne yãmbã, mam da wae n togsda yãmb bõn-kãensã sɩda?

6 La masã, yãmb mii ned ning sẽn gɩdgd yel-wẽnã rao t’a ra puk t’a wakatã nan pa ta wã. 7 Sɩd-sɩda, yel-wẽnã rao wẽnemã sẽn yaa yel-soalgdgã zoe n tʋmdame,+ la a wẽnemã na n kell n yɩɩ yel-soalgdga, hal tɩ sẽn gɩdgd-a wã wa pa le beẽ ye. 8 Rẽ poor la yel-wẽnã rao sɩd na n puki, soab ning Zu-soab a Zeezi sẽn na n kʋ ne pãng ning sẽn yit a noorẽ,+ la a sẽn na n kɩt t’a lebg zaalem wakat ning a waoongã sẽn na n lebg vẽenegã.+ 9 La yel-wẽnã raoã sã n wa na n puki, a na n maana rẽ ne Sʋɩtãanã pãnga.+ A na n maana yel-soalem wʋsgo, zirẽ-be-bãna, la bõn-yɛɛsdse,+ 10 la a tũnug ne sɩlem buud fãa n belg nebã.+ Bõn-kãensã na n tudga neb nins sẽn na n sãamã. B sãoongã na n yɩɩ b keoore, b sẽn pa nong sɩdã zãmsgã sẽn da tõe n fãag-bã yĩnga. 11 Yaa rẽ n so tɩ Wẽnnaam bas tɩ b belg-b ne zirẽ-be-zãmsg tɩ b tẽ ziri,+ 12 sẽn na yɩl tɩ b kao b fãa bʋʋd n ning-b taale, b sẽn pa tẽ sɩdã, la b sũur sẽn noom ne tʋʋm-wẽnsã yĩnga.

13 M saam-biis sẽn yaa neb a Zeova* sẽn nonge, yaa tɩlɛ tɩ tõnd pʋʋsd Wẽnnaam bark wakat fãa yãmb yĩnga, bala hal sɩngrẽ wã, Wẽnnaam tũusa yãmb+ sẽn na yɩl tɩ y paam fãagre, n kɩt tɩ y lebg nin-sõamyã+ a vʋʋsem sõngã maasem yĩnga, la yãmb sẽn tẽed sɩdã yĩng me. 14 A tũnuga ne koe-noogã tõnd sẽn moondã n bool yãmb fãag-kãng yĩnga, sẽn na yɩl tɩ y paam tõnd Zu-soab a Zeezi Kirist ziirã.+ 15 Woto wã m saam-biisi, yals-y kãn-kãe,+ la y gãd bũmb nins b sẽn zãms yãmbã kãn-kãe,+ baa zãmsgã sã n tũu ne noor goam wall a tũu ne sebr sẽn yi tõnd nengẽ. 16 La bɩ tõnd Zu-soab a Zeezi Kirist mengã n paas Wẽnnaam sẽn yaa tõnd Ba sẽn nong tõndo,+ la sẽn kõ tõnd belsg sẽn paad wakat sẽn ka sɛta, la saag-sõng+ a barkã* yĩngã 17 bels yãmb sũyã, la a kɩt tɩ y yals kãn-kãe* tʋʋm-sõng la gom-sõng fãa pʋgẽ.

3 Sẽn na n baase, m saam-biisi, ket-y n pʋʋsd-y tõnd yĩnga,+ sẽn na yɩl t’a Zeova* gomdã ket n saagd tao-tao zĩig fãa,+ la a paamd waoogr wa a sẽn paamd yãmb nengẽ wã, 2 la sẽn na yɩl tɩ tõnd paam tɩ b fãag tõnd neb nins sẽn yaa wẽns wʋsgã+ nusẽ, bala pa nebã fãa n tar tẽeb ye.+ 3 La Zu-soabã yaa sɩd soaba. A na n paasa yãmb pãnga, la a kogl yãmb ne wẽng soabã. 4 Sẽn paase, tõnd kɩsa sɩd ne yãmb Zu-soabã pʋgẽ tɩ y tũuda noy nins tõnd sẽn kõ yãmbã, la tɩ y na n kell n tũ-b lame. 5 Bɩ Zu-soabã kell n sõng-y tɩ y nong Wẽnnaam+ la y tõog toog+ Kiristã yĩnga.

6 La m saam-biisi, tõnd yeta yãmb tõnd Zu-soab a Zeezi Kirist yʋʋrã yĩng tɩ y zãag y mens ne saam-biig ning fãa sẽn vɩ yaare,+ n pa vɩ wa sẽn zems bũmb* nins yãmb* sẽn deeg tõnd nengẽ wã.+ 7 Yãmb mensã mii yãmb sẽn segd n dɩk tõnd togs-n-taar+ to-to. Bala tõnd pa maan yaar yãmb sʋka, 8 d leb n pa rɩ ned rɩɩb zaalem* ye.+ La tõnd tʋma wʋsg wĩndg ne yʋng n kaag d neng tʋʋlgo, sẽn na yɩl n da wa rogl zɩɩb sẽn yaa zɩsg yãmb ned baa a ye zug ye.+ 9 Pa tɩ tõnd ra pa tar sor n na n kos yãmb tɩ y sõng tõnd ye.+ La d ra rat n kõo yãmb mak-sõng sẽn na yɩl tɩ y rɩk tõnd togs-n-taare.+ 10 Sɩd-sɩda, tõnd sẽn da be ne yãmbã, d ra wae n kõta yãmb no-kãngã: “Ned ning fãa sẽn pa rat n tʋme, bɩ a ra rɩ me ye.”+ 11 Bala tõnd wʋmame tɩ neb kẽer n be yãmb sʋk n vɩ yaare,+ n pa rat n tʋm baa bilfu, la b lʋɩɩsd b toog yɛl sẽn pa pak-b pʋsẽ.+ 12 Tõnd yeta nin-kãens buudã la d sagend-b Zu-soab a Zeezi Kirist pʋgẽ tɩ b segd n tʋma ne bãane, n dɩ rɩɩb ning bãmb mensã sẽn paamde.+

13 Sã n yaa ne yãmba, m saam-biisi, ra yɛ-y ne sẽn yaa sõma maaneg ye. 14 La ned sã n pa rat n sak tõnd sẽn yet bũmb nins seb-kãngã pʋgẽ wã, bɩ y gũus y meng ne yẽ soabã,* la y ra le maan lagem-n-taar ne-a,+ tɩ yãnd yõk-a. 15 La baasgo, ra ges-yã-a wa bɛ ye. Ket-y n sagend-y-yã-a+ a sẽn yaa y saam-biigã yĩnga.

16 Bɩ laafɩ Zu-soabã meng tũnug ne manesem buud fãa n kõ-y laafɩ wakat fãa.+ Bɩ Zu-soabã zĩnd ne yãmb fãa.

17 Ad maam a Poll pʋʋsem, m sẽn gʋls ne m meng nugu.+ Mam gʋlsda woto m sɛbã fãa pʋsẽ, sẽn na yɩl tɩ yãmb bãng tɩ yaa maam n gʋlse.

18 Bɩ tõnd Zu-soab a Zeezi Kirist barkã* zĩnd ne yãmb fãa.