PIPI SEBR B SẼN TOOL A TƖMOTE

1 Maam a Poll yaa Kirist Zeezi tẽn-tʋmd sẽn tũ ne Wẽnnaam sẽn yaa tõnd Fãagdã noore, la ne Kirist Zeezi sẽn yaa soab ning sẽn kɩt tɩ d tar saagrã noore.+ 2 Maam n gʋls seb-kãngã n tool a Tɩmote*+ sẽn yaa m biig meng-meng+ tẽebã pʋgẽ wã:

Bɩ bark* la nimbãan-zoeer n paas laafɩ sẽn yit Wẽnnaam sẽn yaa Ba wã nengẽ, la Kirist Zeezi sẽn yaa d Zu-soabã nengẽ zĩnd ne foom.

3 Mam da sagla foom tɩ f pa Efɛɛz m sẽn wa n dat n kẽng Masedoannã. Mam le sagenda foom tɩ f maan woto, sẽn na yɩl tɩ f yeel neb kẽer tɩ b ra zãms nebã zãmsg a to, 4 la tɩ b ra kelg soalem+ la yaab-rãmb rot sõadg ye. Bõn-kãens pa wat ne bũmb sẽn tar yõod ye.+ B wata ne no-koɛɛm bala, n pa wat ne baa fʋɩ sẽn yit Wẽnnaam nengẽ n kengd tẽeb ye. 5 Sɩd-sɩda, sagl-kãngã* võor yaa nonglem+ sẽn yit sũur sẽn yaa yɩlemd pʋgẽ, sũur-kaset* sẽn yaa sõma pʋgẽ, la tẽeb+ sẽn pa naag ne pʋ-lik pʋgẽ. 6 Neb kẽer sẽn bas bõn-kãensa wã yĩnga, b wẽnemdame n tees goam sẽn pa tar yõodo.+ 7 B rat n yɩɩ tõogã karen-saam-dãmba,+ la b yaool n pa wʋmd bũmb nins yell b sẽn gomdã võore, la bũmb nins b sẽn zãmsd nebã ne yẽesmã võor ye.

8 La tõnd miime tɩ Tõogã yaa sõma b sã n tũud-a wa sẽn zemse,* 9 n miẽ tɩ tõog pa maan nin-tɩrg yĩng ye. Yaa neb nins sẽn yaa tʋʋm-wẽns-maandbã+ ne tõatbã yĩnga, wẽn-kɩɩsdbã ne yel-wẽn-maandbã yĩnga, sẽn pa-b sɩd rãmbã* ne sẽn paoogd-b bũmb nins sẽn yaa sõamyã wã yĩnga, ba-rãmb kʋʋdbã la ma-rãmb kʋʋdbã yĩnga, la nin-kʋʋdb a taabã, 10 yoaadbã,* rap nins sẽn gãe rapã, neb nins sẽn yõgd b taab n solgdẽ wã, zirẽ-be-nebã, neb nins sẽn pa pidsd b pʋlemsã,* la bũmb a taabã fãa sẽn kɩɩsd zãmsg ning sẽn nafdã* yĩnga.+ 11 Zãms-kãng yita Wẽnnaam sẽn yaa sũ-noog soabã nengẽ, n zems ne koe-noog ning sẽn tar ziirã b sẽn kõ maamã.+

12 Mam pʋʋsda Kirist Zeezi sẽn yaa tõnd Zu-soabã, n yaa soab ning sẽn kõ maam pãngã barka. Bala a gesame tɩ mam yaa sɩd soab n kõ maam tʋʋmde,+ 13 baa mam sẽn da yaa wẽn-tʋʋsa, ned sẽn da namsd a neb la tɩta-nedã.+ Baasgo, a zoee mam nimbãanega, mam sẽn tʋm ne zɩɩlem la ne tẽeb kaalmã yĩnga. 14 La tõnd Zu-soabã barkã* paasa hal wʋsgo, ne tẽeb la ne nonglem ning sẽn be Kirist Zeezi pʋgẽ wã. 15 Ad gomd sẽn yaa sɩda, la sẽn zems tɩ d sak n deeg ne d sũy fãa: Kirist Zeezi waa dũniyã zug n na n fãag yel-wẽn-maandbã.+ Nin-kãens sʋkã, maam la yel-wẽn-maand n yɩɩda.+ 16 Baasgo, mam paamame tɩ b zoe mam nimbãanega, sẽn na yɩl tɩ Kirist Zeezi wilg a sũ-marã fãa ne mam sẽn yaa yel-wẽn-maand n yɩɩd neb a taabã maasem, n kɩt tɩ mam yɩ mamsg neb nins sẽn na n yẽbg b tẽeb a zug n wa paam vɩɩm sẽn ka sɛtã yĩnga.+

17 La bɩ wakat sẽn ka sɛt Rĩmã+ sẽn vɩ wakat fãa,+ la nif sẽn pa tõe n yã, sẽn yaa Wẽnnaam-yɛngã+ paam waoogr la ziir wakat sẽn kõn sa yĩnga. Ãmiina.

18 M biig a Tɩmote, mam kõta foo sagl-kãensã* wa sẽn zems bãngr-goamã b sẽn da togs fo zugã, tɩ ne bãngr-gom-kãens maasem bɩ f kell n zab zab-sõngã,+ 19 la f kell n tall tẽeb ne sũur-kaset sẽn yaa sõma.+ Neb kẽer sẽn bas sũur-kaset sẽn yaa sõma wã yĩnga, b tẽebã sãama wa koom-koglg sẽn sãam koomẽ. 20 A Imene+ ne a Alɛgsãndr naaga nin-kãense. La mam ning-b-la a Sʋɩtãan+ nugẽ, sẽn na yɩl tɩ kiblgã kɩt tɩ b bãng tɩ b pa segd n tʋʋs Wẽnnaam ye.

2 Pipi, mam sagenda nebã fãa tɩ b modg ne se-yõkre, ne pʋʋsgo, ne kosgo, la ne bark pʋʋsg ned buud fãa yĩnga, 2 wala makre, rĩm-dãmbã ne neb nins fãa sẽn tar naamã yĩnga,+ sẽn na yɩl tɩ tõnd tõog n vɩɩmd ne bãan la laafɩ, n sakd Wẽnnaam ne d sũur fãa, la d maand bũmb fãa sõma.+ 3 Woto yaa sõma Wẽnnaam sẽn yaa tõnd Fãagdã nifẽ, n tat a yam.+ 4 A raabã yaa tɩ nebã buud fãa paam fãagre,+ la b paam bãngr hakɩɩk sɩdã zugu. 5 Bala Wẽnnaam a yembr n be,+ la se-yõkd a yembr+ me n be Wẽnnaam ne nebã sʋka:+ Yaa rao a Kirist Zeezi.+ 6 A kõo a meng n yao yaood ning sẽn da segd n yao n fãag ninsaalbã fãa* ne yel-wẽndã.+ Yaa bõn-kãng kaset la b segd n kõ a wakate. 7 Yaa kaset-kãng+ yĩng la b yãk maam tɩ m yaa koe-moond la tẽn-tʋmda,+ rat n yeel tɩ m yaa bu-zẽmsã karen-saamba, n zãmsd-b+ tẽebã la sɩdã wɛɛngẽ. Mam togsda sɩda, mam pa yagd ziri ye.

8 Woto yĩnga, mam datame tɩ zĩig fãa bɩ rapã pʋʋsd Wẽnnaam, n zẽkd nus sẽn yaa yɩlma,*+ tɩ sũ-yikr+ la no-koɛɛm+ kaẽ ye. 9 Woto me, pagbã segd n manegda b mens ne sik-m-meng la gũusgu, n yer fut sẽn zemse.* Pa segd n yɩ ne zut pãneng buud toor-toor la ne sãnem, wall ne kĩndi, bɩ ne fut ligd sẽn yaa toog wʋsg ye.+ 10 Segd n zemsa ne pagb sẽn yet tɩ b tũuda Wẽnnaam sẽn manegd b mens to-to wã,+ rat n yeel tɩ ne tʋʋm-sõma.

11 Pag segd n sĩndame* n kelgd zãmsg ne sik-m-menga.+ 12 Mam pa kõt pag sor t’a zãms raoa, wall a soog rao ye. A segd n kell n sĩndame.*+ 13 Bala yaa a Ãdem la b reng n naane, n yaool n naan a Awa.+ 14 Sẽn paase, pa a Ãdem la b belg ye. Yaa pagã la b belg fasɩ,+ t’a lebg kɩɩsda. 15 Baasgo, a na n paama koglg kambã rogem maasem yĩnga.+ La yaa a* sẽn na n kell n tall tẽeb la nonglem, n yɩ sõng la a maan gũusgu.+

3 Ad gomd sẽn yaa sɩda: Rao sã n modgd n dat n lebg yel-gɛta,+ yaa tʋʋm-sõng la a baooda. 2 Yel-gɛt segd n yɩɩ ned sẽn pa tar taale, pʋg-yɛng sɩda, ned sẽn maand gũusg bũmb fãa pʋgẽ, ned yam sẽn vẽenẽ,+ ned sẽn pa nong zũnd-zãnde, sẽn maand sãamb sãando,+ sẽn mi neb zãmsgo,+ 3 ned sẽn pa rã-yũud-kãaga,+ sẽn pa nen-kɛglem soaba,* sẽn pa dem-deme,+ sẽn pa zab-zabda,+ sẽn pa ligd-noanga,+ 4 ned sẽn zãad a zak sõma,* t’a kambã yaa sakdb la b zãad b mens sõma,+ 5 (bala ned sã n pa mi a sẽn na n zã a zak* to-to, a na n yɩɩ wãn n ges Wẽnnaam tigingã yelle?) 6 pa segd n yɩ ned sẽn nan lebg kiris-ned paalem,+ sẽn na yɩl t’a ra wa wuk a menga, n wa paam taal ning b sẽn ning Sʋɩtãanã* ye. 7 Sẽn paase, a segd n tara kaset-sõng* yɩng rãmbã nifẽ,+ sẽn na yɩl tɩ nebã ra wa paoog-a, la t’a ra wa lʋɩ Sʋɩtãanã* bẽdgẽ ye.

8 Woto me, kãsem-sõngdbã segd n yɩɩ neb sẽn zems ne waoogre, sẽn pa yagd ziri, sẽn pa yũud divẽ* wʋsgo, sẽn pa rat-tɩ-loog rãmb sẽn baood ligd la arzɛgse,+ 9 neb sẽn gãt tẽebã yel-soalgdgã sẽn yaa sõngã kãn-kãe ne sũur-kaset* sẽn yaa yɩlemde.+

10 Sẽn paase, bɩ b reng n mak-b n ges b sã n zemsa ne tʋʋmdã, tɩ sã n mik tɩ rõadg kae bɩ b yaool n lebg kãsem-sõngdba.+

11 Pagbã me segd n yɩɩ neb sẽn zems ne waoogre, sẽn pa tẽn-kãn-neba,+ sẽn maand gũusg bũmb fãa pʋgẽ, la sẽn maand sɩd bũmb fãa pʋgẽ.+

12 Kãsem-sõngd tog n yɩɩ pʋg-yɛng sɩda, n get a kambã ne a zakã yell sõma. 13 Bala rap nins sẽn tʋmd sõma wã paamda yʋ-noogo, la b tõe n gom tẽeb ning sẽn be Kirist Zeezi pʋgẽ wã yell ne bas-m-yam wʋsgo.

14 Mam gʋlsda foo bõn-kãensã baa mam sẽn saagd n na n wa fo nengẽ ka la bilfã, 15 la yaa sẽn na yɩl tɩ m sã n wa kaoosdẽ, bɩ f bãng f sẽn tog n zã f meng to-to Wẽnnaam zakã rãmb sʋka,+ rat n yeel tɩ Wẽnnaam ning sẽn vɩ wã tigingã sẽn yaa sɩdã ra-luk la a tɛɛndã pʋgẽ. 16 Sɩd me, yaa vẽeneg tɩ Wẽnnaam yel-soalgdgã sẽn yaa sõngã yaa kãsenga: ‘A lebga ninsaala.+ Wẽnnaam sẽn wa n na n kɩt t’a le lebg malɛkã, a yeelame t’a yaa tɩrga.+ A kẽnga malɛgsã nengẽ,+ b mooname n gom a yell bu-zẽmsã sʋka, b tẽ-a-la dũniyã pʋgẽ, b reeg-a-la saasẽ ne ziiri.’

4 La Wẽnnaam vʋʋsem sõngã yeta vẽeneg tɩ wakat n wat tɩ neb kẽer na n bas tẽebo, n kelgd goam sẽn pa sɩd la sẽn wõnd yita Wẽnnaam nengẽ,+ la b kelgd zĩn-dãmb zãmsgo. 2 Na n tũu ne pʋ-lik rãmbã sẽn yagd ziri wã sababo.+ Nin-kãens yaa neb sũur-kaset* sẽn diglim tɩ yaa wa b ning-a-la bãnd ne kut sẽn wɩng wʋsgo. 3 Bãmb dãmbã gɩdgda nebã tɩ b ra kẽ kãadem,+ la b yet-b tɩ b zãag b mens ne rɩbd+ Wẽnnaam sẽn naan tɩ neb nins sẽn tar tẽebo,+ la sẽn mi sɩdã sõma wã segd n dɩ+ la b pʋʋs Wẽnnaam barkã. 4 Bala Wẽnnaam sẽn naan fãa yaa sõma,+ tɩ nebã pa segd n zãgs baa fʋɩ,+ sã n mik tɩ b rɩt-a lame la b pʋʋsd Wẽnnaam barka. 5 Bala a lebga sõng Wẽnnaam gomdã maasem yĩnga, la pʋʋsgã maasem yĩnga.

6 Fo sã n kõt saam-biisã sagl-kãensã, fo na n yɩɩ Kirist Zeezi tʋm-tʋmd-sõngo, tʋm-tʋmd b sẽn dɩlg ne tẽebã goam la ne zãms-sõng ning fo sẽn tũ sõma wã goamã.+ 7 La ra kelg soalem nins sẽn paoogd Wẽnnaam,+ wa b rãmb nins pʋg-yãansã sẽn solemdã ye. La bɩ f modg wʋsg* sẽn na yɩl n sak Wẽnnaam. 8 Bala yĩngã wɩsgr* tara yõod bilfu, la Wẽnnaam sakrã tara yõod bũmb fãa pʋgẽ, a sẽn nafd tõnd vɩ-kãngã pʋgẽ, la a na n naf tõnd vɩɩm ning sẽn watã pʋgẽ wã me yĩnga.+ 9 Gom-kãngã yaa sɩda, n zems tɩ d sak-a ne d sũy fãa. 10 Yaa rẽ yĩng la tõnd sẽn tʋmd wʋsg la d modgd d mensã.+ Bala tõnd yẽbga d tẽebã Wẽnnaam sẽn vɩ zugu, soab ning sẽn yaa nebã buud fãa+ Fãagda,+ la sẽn yɩɩde, sẽn maand-b sɩdã Fãagdã.

11 Bɩ f ket n kõt nebã no-kãensã, la f zãmsd-b bõn-kãense. 12 Ra bas tɩ ned baa a ye paoog foom f sẽn yaa bi-bɩɩgã yĩng ye. La bɩ f kõ sẽn maand-b sɩdã mak-sõng no-goamã wɛɛngẽ, yel-manesmã, nonglmã, tẽebã, la sõmblmã* wɛɛngẽ. 13 Kell n wɩng ne Gʋls-sõamyã kareng nebã taoore,+ la f wɩng ne nebã saglg* la b zãmsg hal n tãag m waoongo. 14 Ra paoog kũun ning sẽn be fo pʋgẽ wã ye. Yaa kũun ning b sẽn kõ foo ne bãngr-gomd maasem, wakat ning kãsem-dãmbã sull sẽn tik foom ne b nusã.+ 15 Tags* bõn-kãensã yell neere. Maan-b ne f sũur fãa, tɩ nebã fãa yã vẽeneg tɩ fo bɩtame. 16 Gũus f meng wakat fãa, la f gũus ne f sẽn zãmsd nebã bũmb ningã.+ Wɩng ne bõn-kãensã maanego, bala fo sã n maand woto, f na n fãaga f meng la f fãag neb nins sẽn kelgd foomã.+

5 Ra gom nin-kẽem+ ne toolem ye. La bɩ f sagl-a wa f ba, la f sagl kom-bɩɩsã wa f ba-bi-rapa, 2 pagb nins sẽn kʋʋlã wa f ma-rãmba, pagb nins yʋʋm sẽn pa vẽsgã wa f ba-bi-pogse, la zã f meng sõma ne bãmba.

3 Wilg tɩ f nanda* pʋg-kõap nins sẽn sɩd yaa pʋg-kõapã.*+ 4 La pʋg-kõor sã n tar kamb wall yagense, b segd n deng n gesa b zakã rãmb yell n wilg b wẽn-sakrã.+ B segd n kõo b ba-rãmbã la b ma-rãmbã ne b yaab-rãmbã bũmb nins b sẽn segd n kõ-bã,+ bala rẽ nooma Wẽnnaam.+ 5 Pag sẽn sɩd yaa pʋg-kõor la sẽn ka tar sõangd teega Wẽnnaam,+ n yõkd Wẽnnaam sɛɛg la a pʋʋsd wĩndg la yʋngo.+ 6 La pag sẽn vɩ a mengã tʋlsem* yĩng bal kiime, baa a sẽn ket n vɩ wã. 7 Woto yĩnga, bɩ f kell n kõ-b no-kãensã sẽn na yɩl tɩ ned baa a ye ra tõog n ning-b taal ye. 8 Sɩd-sɩda, ned sã n pa ges a neb yelle, sẽn yɩɩd fãa, a meng zak rãmb yelle, a kɩɩsa tẽebã, la a yaa wẽng n yɩɩd ned sẽn pa tar tẽebo.+

9 Pʋg-kõor sẽn tõe n paam tɩ b gʋls a yʋʋr sebrã zug yaa sẽn ta-a yʋʋm pis-yoobe, la sẽn yɩ-a nin-yɛng paga. 10 Segd n yɩɩ pag nebã sẽn kõt kaset t’a tʋma tʋʋm-sõma,+ wala makre, t’a wuba kamba,+ t’a maana sãamb sãando,+ t’a peka nin-sõamyã wã naoã,+ t’a sõnga sũ-sãang rãmba,+ la t’a tʋma tʋʋm-sõng buud fãa ne a sũur fãa.

11 La bɩ f ra gʋls pʋg-kõap nins yʋʋm sẽn pa vẽsgã yʋy sebrã zug ye. Bala pag ne rao lageng tʋlsmã sã n wa kẽ bãmb ne Kirist tʋʋmdã sʋka, b wat n dat n kẽe kãadem. 12 La b na n paama taale, b sẽn kɩɩs b pĩnd pʋlengã* yĩnga. 13 Sẽn paase, b wat n zãmsa kʋɩɩngo, n gilgd zak-zaka. La pa kʋɩɩng bal la b zãmsd ye. B wat n zãmsa gom-toogo, la b kẽesd b toog neb a taab yɛlẽ,+ n gomd bũmb toor-toor yell b sẽn pa segd n gome. 14 Woto yĩnga, mam datame tɩ pʋg-kõap nins yʋʋm sẽn pa vẽsgã kẽ kãadem,+ n dog kamba,+ n ges zak yelle, la b ra kõ bɛɛbã weer tɩ b wɩd tõnd ye. 15 Sɩd-sɩda, pʋg-kõap kẽer zoe n basa sɩdã n pʋg a Sʋɩtãana. 16 Pag sẽn yaa tẽed sã n tar roagdb sẽn yaa pʋg-kõapa, bɩ a ges b yell sẽn na yɩl tɩ ra yɩ zɩɩb ne tigingã ye. Woto, tigingã tõe n gesa sẽn yaa-b pʋg-kõap sɩd-sɩdã* yelle.+

17 Kãsem-dãmb nins sẽn lʋɩt tigingã taoor sõma wã+ segda ne waoogr wʋsgo,+ sẽn yɩɩd fãa, b rãmb nins sẽn tʋmd wʋsg koɛɛgã mooneg* pʋgẽ, la nebã zãmsg pʋgẽ wã.+ 18 Bala Gʋls-sõamyã yetame: “Loalg sã n wa tʋmd zɛɛgẽ, yãmb pa segd n ning a noorã yʋk ye.”+ B le yeelame: “Tʋm-tʋmd zemsa ne a yaoodo.”+ 19 B sã n dõd nin-kẽem* bɩ f ra tẽ, sã n pa neb a yiib bɩ a tãab n kõ kaset ye.+ 20 Gom+ neb nins sẽn maand yel-wẽnã+ nebã fãa taoore, tɩ yɩ keoogr neb a taabã yĩnga.* 21 Mam yeta foom Wẽnnaam taoore, Kirist Zeezi taoor la malɛg-tũusdsã taoor tɩ f tũ no-kãensã la f ra tũus neba, wall f bak ned n sõng ye.+

22 Ra yɩ yãg-yãg n tik ned baa a ye ne f nus ye.*+ Ra naag neb a taabã b yel-wẽn pʋgẽ ye. Kell n yɩ yɩlemde.

23 Ra le yũ koom ye.* Yũ divẽ bilfu, fo pʋ-zabrã yĩnga, la f sẽn wae n lʋɩt bãasã yĩnga.

24 Neb kẽer yel-wẽn yaa bũmb nebã fãa sẽn mi, tɩ wat ne bʋʋd kaoob zĩig pʋgẽ. La neb sãnda rẽnd wat n lebga vẽenes kaoosg zugẽ.+ 25 Woto me, tʋʋm-sõma wã yaa bũmb nebã fãa sẽn mi,+ la ned pa tõe n kell n solg tʋʋm nins sẽn pa sõma wã ye.+

6 Bɩ sẽn yaa-b yembsã kell n tags tɩ b zu-soben-dãmbã segda ne waoogr wʋsgo,+ sẽn na yɩl tɩ Wẽnnaam yʋʋrã la a zãmsgã ra tol n paam paoogr ye.+ 2 Sẽn paase, sẽn tar-b zu-soben-dãmb sẽn yaa tẽedbã pa segd n paoog-ba, tɩ bala b yaa saam-biis ye. La b segd n maneg n tʋma ne yamleoogo, bala neb nins sẽn dɩt b tʋʋm-sõngã yõodã yaa b tẽed-n-taase, la b saam-bi-nongdse.

Kell n zãms nebã bõn-kãense, la f kõ-b sagl-kãense. 3 Ned sã n zãmsd nebã zãmsg a to, n pa sakd zãmsg ning sẽn nafdã*+ sẽn yaa zãmsg ning sẽn yit tõnd Zu-soab a Zeezi Kirist nengẽ wã, la a pa sakd zãmsg ning sẽn zems ne Wẽnnaam sakrã,+ 4 yẽ soab pida ne wuk-m-menga, n pa wʋmd baa fʋɩ võor ye.+ A nonga kɩɩsg la gom-biis poorẽ no-koɛɛm+ hal tɩ looge. Bõn-kãens wata ne to bũmb tʋlgre, zaba, tẽn-kãnem,* la kɩtdẽ tɩ nebã pa kõt taab sɩd ye. 5 B kɩtdame me tɩ neb nins tagsa sẽn yaa wẽns zãngã,+ n yaa neb sẽn pa mi sɩdã n tagsdẽ tɩ Wẽnnaam sakrã yaa f meng nafr yĩngã+ wẽed no-koɛɛm wakat fãa, bũmb toor-toor sẽn pa zem baa fʋɩ poorẽ. 6 Sɩd-sɩda, Wẽnnaam sakrã nafda ned wʋsgo,+ la yaa a soabã sẽn na n maand sũ-noog ne bũmb ning a sẽn tarã.* 7 Bala tõnd pa zã baa fʋɩ n wa dũniyã pʋgẽ, la d pa tõe n zã bũmb n yi me ye.+ 8 Woto wã, d sã n tar rɩɩb la futu,* d na n maana sũ-noog ne bõn-kãense.+

9 La neb nins sẽn dat n lebg rakãag-rãmb ne b sũy fãa wã lʋɩta makr pʋgẽ, bẽdg+ la ratem wʋsg pʋgẽ sẽn yaa yalemd la sẽn sãamd bãmba, tɩ rẽ wat ne zu-loees la sãoongo.+ 10 Bala ligdã nonglem yaa bõn-wẽns buud fãa yẽgre, la neb kẽer sẽn lʋɩ ligdã nonglem pʋgẽ wã, b lakame n bas tẽebã, n kɩt tɩ tood wʋsg paam-ba.*+

11 La foom a Wẽnnaam neda, zoe bõn-kãensã, la f bao tɩrlem, wẽn-sakre, tẽebo, nonglem, tõog-toog la sũ-bʋgsem.+ 12 Zab tẽebã zab-sõngã. Gãd vɩɩm sẽn ka sɛtã kãn-kãe, bala yaa vɩ-kãng yĩng la b bool foom. Sẽn paase, fo kõo vɩ-kãng kaseto, kaset rãmb wʋsg taoore.

13 Mam yeta foo Wẽnnaam ning sẽn kõt bũmb fãa vɩɩmã taoore, la Kirist Zeezi taoore, a soab ning sẽn kɩs kaset sõma a Põns Pɩlat+ taoorã, 14 tɩ f tũ noyã n da tall rẽok la taale, hal n tãag wakat ning tõnd Zu-soab a Zeezi Kirist+ sẽn na n wilg a pãngã.* 15 A wakatã sã n ta, sũ-noog soabã sẽn yaa a ye bal n yaa Naabã na n wilga rẽ. Yẽ n yaa rĩm-dãmb nins sẽn dɩt naamã Rĩma, la zu-soben-dãmbã Zu-soaba.+ 16 Yẽ a ye bal n pa tõe n ki,+ n be vẽenem ned sẽn pa tõe n kolg pʋgẽ.+ Ned zɩ n yã-a, la ned pa tõe n yã-a me ye.+ Bɩ a paam waoogr la pãng sẽn ka sɛta. Ãmiina.

17 Yeel neb nins sẽn yaa rakãag-rãmb dũni-kãngã* pʋgẽ wã tɩ b ra yɩ wuk-m-mens rãmba, la tɩ b ra teeg arzɛgs nins sẽn satã ye.+ Bɩ b teeg Wẽnnaam sẽn yaa soab ning sẽn kõt tõnd bũmb fãa wʋsg tɩ d maand sũ-noogã.+ 18 Yeel-b tɩ b maan sẽn yaa sõma, tɩ b yɩ arzɛk rãmb tʋʋm-sõma wã wɛɛngẽ, tɩ b yɩ kõtba, n pʋɩt bũmb nins b sẽn tarã.+ 19 Woto, b bĩngda paoong b mens yĩng sẽn yaa yẽbgr sẽn yaa sõma beoog-daar yĩnga,+ sẽn na yɩl n gãd vɩɩm hakɩɩkã kãn-kãe.+

20 Tɩmote, gũ bũmb ning b sẽn gũnug foomã neere,+ n zãag f meng ne gom-vɩɩdã sẽn paoogd Wẽnnaamã, la ne bãng-feedã sẽn wat ne no-koɛɛm ninsã.+ 21 Neb kẽer sẽn wilg tɩ b tara bãng-kãng buudã, b bʋdgame n bas tẽebã.

Bɩ Wẽnnaam barkã* zĩnd ne foom.