YIIB-N-SOAB SEBR B SẼN TOOL A TƖMOTE

1 Maam a Poll yaa Kirist Zeezi tẽn-tʋmd wa sẽn zems Wẽnnaam daabã, sẽn na yɩl tɩ m moon vɩɩm ning Wẽnnaam sẽn pʋlem tɩ d tõe n paam Kirist Zeezi maasem yĩngã.+ 2 Maam n gʋls seb-kãngã n tool m bi-nongr+ a Tɩmote:

Bɩ bark* la nimbãan-zoeer n paas laafɩ sẽn yit Wẽnnaam sẽn yaa Ba wã nengẽ, la Kirist Zeezi sẽn yaa d Zu-soabã nengẽ zĩnd ne foom.

3 Mam pʋʋsda Wẽnnaam barka, Wẽnnaam ning mam sẽn sakd ne m sũur fãa la ne sũur-kaset* sẽn yaa yɩlemd wa m yaab-rãmbã sẽn maanã. Mam tẽegda fo yell m se-yõkr sasa wĩndg la yʋngo, n pa basdẽ ye. 4 Mam sã n wa tẽeg fo nintãmã yelle, mam dat n yãa foo ne m sũur fãa, tɩ m sũurã pid ne sũ-noogo. 5 Mam tẽra fo tẽebã sẽn pa naag ne pʋ-likã yelle,+ tẽeb ning fo yaab-poak a Loyiis ne f ma a Eniis sẽn da reng n tarẽ wã. La mam kɩsa sɩd tɩ fo-me tara tẽeb-kãnga.

6 Yaa woto yĩng la mam sẽn tẽegd foo tɩ f modg tɩ Wẽnnaam kũunã fo sẽn deeg wakat ning mam sẽn tik foo ne m nusã+ ket n wit wa bugmã. 7 Bala vʋʋsem sõngã Wẽnnaam sẽn kõ tõndã pa kɩt tɩ d yaa rabɛɛmb ye.+ La a kõta tõnd pãnga,+ nonglem, la yam-vẽenem. 8 Woto wã, ra zoe tõnd Zu-soabã kasetã kũun yãnde,+ wall mam sẽn be bãens roogẽ a yĩngã yãnd ye. Teeg Wẽnnaam pãngã,+ n sak namsg koe-noogã yĩnga.+ 9 A fãaga tõnd la a bool tõnd ne bool-sõngo,+ la pa tõnd tʋʋmã yĩng ye. Yaa yẽ mengã raabã la a barkã*+ yĩnga. A kõo tõnd a barkã* Kirist Zeezi maasem yĩng hal sẽn kaoos wʋsgo, 10 la masã, a barkã* lebga vẽeneg tõnd Fãagd a Kirist Zeezi+ pukrã maasem yĩnga. Yaa yẽ n kɩt tɩ kũum lebg zaalem,+ la a tũnug ne koe-noogã+ n wilg tõnd d sẽn tõe n maan to-to n paam vɩɩm+ la yĩng sẽn pa põogde.+ 11 Yaa koe-noogã yĩng la b yãk maam tɩ m yaa koe-moonda, tẽn-tʋmd la karen-saamba.+

12 Yaa rẽ yĩng la ma-me sẽn sak nams-kãensa wã.+ La yãnd pa tar maam ye.+ Bala mam mii Soab ning mam sẽn tẽ wã, la m kɩsa sɩd t’a tõe n gũu bũmb ning mam sẽn gũnug-a wã hal n tãag daar-n-kãnga.+ 13 Kell n gãd goam nins sẽn nafdã*+ fo sẽn wʋm mam nengẽ wã ne tẽebo, la ne nonglem sẽn yit Kirist Zeezi pʋgẽ. 14 Gũ bõn-sõma-kãensã b sẽn gũnug foomã neere, ne vʋʋsem sõngã sẽn be tõnd pʋsẽ wã maasem.+

15 Fo mii bõn-kãnga: Rap nins fãa sẽn be Aazi soolmã+ pʋgẽ wã basa maam, baa a Fizɛll ne a Ɛrmozɛn. 16 Bɩ Zu-soabã zoe a Onezifoor+ zakã rãmb nimbãanega, bala a kenga mam daood naoor wʋsgo, n pa zoe mam bãensã yãnd ye. 17 A sẽn wa n be Rommã, a maaga a yĩng n gẽes maam hal n wa yã-ma. 18 Bɩ Zu-soab a Zeova* zoe a nimbãaneg daar-n-kãnga. Fo mii bũmb nins fãa a sẽn maan Efɛɛzã sõma.

2 Woto wã, m biiga,+ bɩ f ket n paamd pãng Wẽnnaam barkã* sẽn be Kirist Zeezi pʋgẽ wã maasem yĩnga. 2 La sã n yaa ne bũmb nins fo sẽn wʋm mam nengẽ tɩ neb wʋsg kõ bõn-kãens kasetã wɛɛngẽ,+ bɩ f rɩk-b n zãms rap sẽn maand sɩda, tɩ bãmb me paam minim sõma n tõog n zãms neb a taaba. 3 Fo sẽn yaa Kirist Zeezi soda-sõngã+ yĩnga, bɩ f sak namsgo.+ 4 Ned kae sẽn na n be sodaar la a kẽesd a toog* vɩ-kãngã leebgã yɛlẽ,* a sẽn dat n ta ned ning sẽn dɩk-a sodaarã yam yĩng ye. 5 La baa zoees* sasa, b pa kõt zoɛt baa a ye maanf tɩ sã n pa mik t’a zoeeme tɩ zems zoeesã noyã ye.+ 6 Ka-koaad ning sẽn tʋmd wʋsgã n segd n yɩ pipi n dɩ a pʋʋgã biisi. 7 Tags bũmb nins mam sẽn yet foomã yell wakat fãa. Zu-soabã na n kɩtame tɩ fo wʋm bũmb fãa võore.*

8 Tẽeg tɩ b vʋʋga a Zeezi Kirist n yiis kũ-rãmb sʋka,+ la t’a ra yaa a Davɩɩd yageng+ wa koe-noog ning mam sẽn moondã sẽn yetã.+ 9 Yaa koe-no-kãng yĩng la mam sẽn namsde, tɩ b pag maam bãens roog wa bi-bɛɛgã.+ Baasgo, b pa balg Wẽnnaam gomdã ye. 10 Yaa rẽ yĩng la mam sẽn ket n tõogd toog bũmb fãa pʋgẽ nin-tũusdsã yĩnga,+ sẽn na yɩl tɩ bãmb me paam fãagr ning sẽn tũud ne Kirist Zeezi wã, la b paam ziir sẽn pa sate. 11 Gom-kãngã yaa sɩda: Yaa vẽeneg tɩ tõnd sã n naag-a n ki, d na n naag-a lame me n vɩɩmde.+ 12 Tõnd sã n kell n tõog toogo, d na n naag-a lame me n yɩ rĩm-dãmb n dɩ naam.+ La tõnd sã n kɩɩs tɩ d pa mi-a, yẽ me na n kɩɩsame t’a pa mi tõnd ye.+ 13 Tõnd sã n pa maan sɩda, a na n kell n maana sɩda, bala a pa tõe n kɩɩs a mengã raab ye.

14 Ket n tẽegd-b bõn-kãensã, la f yet-b* Wẽnnaam taoor tɩ b ra wẽ no-koɛɛm gom-biis poorẽ ye. Rẽ pa tar yõod baa bilfu, bala wãada* neb nins sẽn kelgdã. 15 Maan f sẽn tõe fãa n ta Wẽnnaam yam, n yɩ tʋm-tʋmd sẽn kõn zoe yãnde, la sẽn zãmsd nebã sɩdã koɛɛgã neere.+ 16 La bɩ f zãag f meng ne gom-vɩɩd nins sẽn paoogd Wẽnnaamã.+ Bala rẽ na n waa ne wẽn-kɩɩsg wʋsgo. 17 Neb nins sẽn gomd gom-kãensa wã goamã na n paama pãng wa solenkẽega. A Imene ne a Filɛt bee b sʋka.+ 18 Nin-kãens lak n basa sɩdã, n yetẽ tɩ kũum vʋʋgrã zoe n zĩndame,+ la b sãamd neb kẽer tẽebo. 19 Baa ne rẽ, Wẽnnaam yẽbgrã sẽn tar pãngã yasa kãn-kãe, n tar bãnd sẽn gʋls n yetẽ: “A Zeova* mii sẽn yaa-a a rẽndã,”+ la “Bɩ ned ning fãa b sẽn boond ne a Zeova* yʋʋrã+ bas tʋʋm-wẽnse.”

20 La ro-kãseng pʋgẽ, pa sãnem la wanzuri laas bal n be be ye. Laas sẽn maan ne raad la tãnd me bee be. Kẽer yaa laas sẽn tar n maand bũmb sẽn be waoogre, tɩ sãnda yaa sẽn tar n maand bũmb sẽn pa be waoogre. 21 Woto wã, ned sã n lak a meng ne laas nins sẽn tar n maand bũmb sẽn pa be waoogrã, a na n yɩɩ teoog* b sẽn tar n maand bũmb sẽn be waoogre, teoog sẽn yaa sõngo, sẽn tar yõod ne a soabã, la b sẽn segl tʋʋm-sõma buud fãa yĩnga. 22 Bɩ f zoe yãadmã tʋls-wẽnsã, la f naag neb nins sẽn pʋʋsd Zu-soabã ne sũur sẽn yaa yɩlemdã n bao tɩrlem, tẽebo, nonglem la laafɩ.

23 Sẽn paase, bɩ f ra kẽes f toog no-koɛɛm nins sẽn yaa yalemd la sẽn ka võorã pʋsẽ,+ f sẽn mi tɩ b wata ne zabã yĩnga. 24 Bala Zu-soabã tʋm-tʋmd pa segd n zab ye. A segd n talla bʋgsem ne nebã fãa,+ n mi neb zãmsgo, n tõe a meng wẽng b sẽn maan-a taoore,+ 25 la a remsd kɩɩsdbã ne sũ-bʋgsem.+ Daar ninga, Wẽnnaam na kɩt tɩ b tek yam, n tõog n paam bãngr hakɩɩk sɩdã zugu.+ 26 Rẽ la b yamã na n vẽnege, tɩ b yiis b mens Sʋɩtãanã* bẽdgã pʋgẽ, bala a yõg-b-la vɩɩs sẽn na yɩl tɩ b maan a raabã.+

3 La bɩ f bãng tɩ yaoolem wakatã,+ yɛlã na n yɩɩ kãn-kãe hal tɩ vɩɩmã lebg toogo. 2 Bala nebã na n yɩɩ beed dãmba,* neb sẽn nong ligdi, wuk-m-mens rãmba, waoog-m-mens rãmba, neb sẽn nong tʋya,* ba-rãmb la ma-rãmb kɩɩsdba, sõm-zɩtba, neb sẽn pa maand sɩda, 3 neb sẽn pa tar nonglem, neb sẽn pa baood laafɩ, tẽn-kãn-neba, neb sẽn pa tar yõk-m-menga, nen-kɛglem dãmba, neb sẽn kis sẽn sõmbe, 4 zãmb dãmba, tʋb-pa-wʋmdba, neb sẽn pid ne wuk-m-menga, neb sẽn nong yõ-noogr n pa nong Wẽnnaam ye. 5 B wõnda wẽn-sakdba, la b pa vɩ wa wẽn-sakdb ye.+ Lak f meng ne nin-kãens buudã. 6 Nin-kãens sʋkã, rap n be n maand sɩlem n kẽed zagsẽ, n belgd pagb sẽn ka pãng la sẽn yaa yel-wẽn-maandb tɩ tʋlsem toor-toor so-ba. 7 Pʋg-kãens zãmsda wakat fãa la b nan zɩ n tõog n paam bãngr hakɩɩk sɩdã zug ye.

8 Nin-kãens kɩɩsda sɩdã wa a Zanɛɛs ne a Zãmbrɛɛs sẽn kɩɩs a Moyiiz to-to wã. Neb a woto buudã tagsa wã yaa wẽns zãnga. Sã n yaa tẽebã wɛɛngẽ, b pa tat Wẽnnaam yam ye. 9 La b pa na n zãag zĩiga, bala b yalemdã* na n lebga vẽeneg ne nebã fãa, wa nin-kãensã b yiibã yalemdã sẽn yɩ vẽeneg to-to wã.+ 10 La fo maaga f yĩng n ges mam sẽn zãmsd nebã to-to wã, mam sẽn vɩ to-to wã,+ mam daabã, mam tẽebã, mam sũ-marã, mam nonglmã, la m sẽn tõogd toogã. 11 Fo bãnga namsg ning mam sẽn paam Ãntiyoos+ ne Ikoniyom+ la Listrã.+ Mam tõoga toog nams-kãensã fãa pʋsẽ, la Zu-soabã fãaga maam b fãa pʋsẽ.+ 12 Sɩd-sɩda, neb nins fãa sẽn dat n tũ Kirist Zeezi n vɩɩmd wẽn-sakr pʋgẽ wã me na n paama namsgo.+ 13 La nin-wẽnsã ne bɛlgdbã na n lebgda wẽns n paasdẽ. B na n belga nebã, la neb a taab me na n belg-b lame.+

14 La bɩ f kell n gãd bũmb nins b sẽn zãms foo la b sõng-f tɩ f tẽ wã kãn-kãe,+ fo sẽn mi neb nins sẽn zãms foo bõn-kãensã yĩnga. 15 Tẽeg tɩ hal fo yãadmẽ,+ fo bãnga Gʋls-sõamyã+ sẽn tõe n sõng foo tɩ f yɩ yam soab sẽn na yɩl n paam fãagre, fo sẽn tẽed Kirist Zeezi wã yĩngã.+ 16 Gʋls-sõamyã tõr yaa Wẽnnaam n vẽneg tɩ b gʋlse,+ la a yõodã yaa zãms neda,+ wilg ned a kongre, rems yɛla, kibl ned ne tɩrlem,+ 17 sẽn na yɩl tɩ Wẽnnaam ned paam minim sõma, n segl n sa tʋʋm-sõma buud fãa yĩnga.

4 Mam yeta foom Wẽnnaam taoore, la Kirist Zeezi sẽn segd n kao nin-vɩɩs la kũ-rãmb bʋʋd+ a pukrã+ la a Rĩungã maasem yĩngã taoor yaa:+ 2 Moon koɛɛgã,+ maand rẽ ne yẽesem noog la toog wakate, wilg nebã b kongre,+ keoog-b neere, la f sagl-b ne sũ-mar la zãmsg minim wʋsgo.+ 3 Bala wakat n wat tɩ b pa na n le rat n kelg zãmsg ning sẽn nafdã*+ ye. La b mensã raab yĩnga, b na n baoo karen-saam-dãmb b mens yĩnga, sẽn na yɩl tɩ b salemd b tʋbã.*+ 4 B na n basa sɩdã kelgre, n kelgd soalma. 5 La sã n yaa ne foom, modg tɩ f yamã ket n vẽen bũmb fãa pʋgẽ, tõog toog namsg taoore,+ tʋm koe-moond tʋʋmde,* la f tʋm f tʋʋmdã sõma.+

6 Bala b zoe n pʋdgda maam wa divẽ b sẽn daagd tẽn-kugr zugu,+ la wakat ning mam sẽn na n paam m mengã*+ kolgame. 7 Mam zaba zab-sõngã,+ mam zoee zoeesã n tãag a tɛka,+ mam kell n talla tẽebã. 8 Masã tɛka, b bĩnga maam tɩrlem maanfã,+ maanf ning Zu-soabã sẽn yaa bʋ-kaood sẽn yaa tɩrgã+ sẽn na n kõ maam daar-n-kãng tɩ yɩ keoorã.+ La pa maam bal la a na n kõ ye. Yaa neb nins fãa sẽn nong a pukrã me.

9 Maan f sẽn tõe tɛk fãa n wa mam nengẽ ka la bilfu. 10 Bala a Demas+ basa maam, a sẽn nong dũni-kãnga* wã yĩnga. A loogame n kẽng Tesaloniki, t’a Kersãns kẽng Galasi, t’a Tɩt kẽng Dalmasi. 11 Yaa a Luk bal n be ne maam. Peeg a Mark t’a tũ foo n wa, bala a na n nafa maam Wẽnnaam tʋʋmdã pʋgẽ. 12 La mam tʋma a Tisik+ Efɛɛze. 13 F sã n wa watẽ bɩ f zã kobr ning mam sẽn da bas Torwaas a Karpus nengẽ wã n wa, la f zã seb-pindsã n wa, sẽn yɩɩd fãa, sẽn maan-b ne gãndã.

14 Yõak a Alɛgsãndr maana maam wẽng wʋsgo. A Zeova* na n keo-a-la wa sẽn zems a tʋʋmã.+ 15 Fo-me segd n gũusa f meng ne-a, bala a kɩɩsa tõnd goamã hal tɩ looge.

16 Mam sẽn wa n na n gom pãn-soaadbã taoor pipi n wilg tɩ m pa tar taalã, ned baa a ye pa sõng maam ye. B fãa basa maam. Bɩ Wẽnnaam ra ning-b taal rẽ poorẽ ye. 17 La Zu-soabã zĩnda ne maam, n kõ maam pãng sẽn na yɩl tɩ ne mam maasem bɩ koɛɛgã moon sõma, la tɩ bu-zẽmsã fãa wʋm koɛɛgã.+ A fãaga maam gɩgemdã noorẽ.+ 18 Zu-soabã na n fãaga maam ne tʋʋm-wẽns buud fãa, la a fãag maam n kẽes a saasẽ Rĩungã+ pʋgẽ. Bɩ a paam ziir wakat sẽn kõn sa yĩnga. Ãmiina.

19 Pʋʋs a Priska ne a Akila+ n kõ-ma, la f pʋʋs a Onezifoor+ zakã rãmb me.

20 A Erast+ paa Korẽnte, la m basa a Torfim+ Milɛ, bala a ra pa keem ye. 21 Maan f sẽn tõe fãa n wa tɩ waoodã wakat nan pa ta ye.

A Ebull toonda foom a pʋʋsem. A Pudẽns ne a Linus la a Kolodiya n paas saam-biisã fãa me toonda foom b pʋʋsem.

22 Bɩ Zu-soabã zĩnd ne foom, fo sẽn wilgd tɩ f tara zʋg-sõma wã yĩnga. Bɩ a barkã* zĩnd ne foom.