SEBR B SẼN TOOL A TƖTE

1 Maam a Poll yaa Wẽnnaam yamba, la a Zeezi Kirist tẽn-tʋmd wa sẽn zems tẽeb ning Wẽnnaam nin-tũusdsã sẽn tarã, la wa sẽn zems sɩdã bãngr hakɩɩkã, sɩd ning sẽn zems ne wẽn-sakrã. 2 Bõn-kãens tika vɩɩm sẽn ka sɛtã+ saagr zugu, Wẽnnaam ning sẽn pa tõe n yag ziri+ wã sẽn pʋlem hal daar zãrã. 3 La wakat ning a sẽn yãkã sẽn wa n ta wã, a kɩtame tɩ nebã bãng a gomdã ne koe-mooneg tʋʋmd ning b sẽn kõ maamã+ maasem, wa sẽn zems Wẽnnaam sẽn yaa tõnd Fãagdã noorã. 4 Maam n gʋls seb-kãngã n tool a Tɩt sẽn yaa m biig meng-meng wa sẽn zems tẽeb ning d fãa sẽn tarã:

Bɩ bark* la laafɩ sẽn yit Wẽnnaam sẽn yaa Ba wã nengẽ, la Kirist Zeezi sẽn yaa d Fãagdã nengẽ zĩnd ne foom.

5 Mam basa foo Kɛrɛt sẽn na yɩl tɩ f maneg bũmb nins sẽn pa sõma wã,* la f yãk kãsem-dãmb tẽng-tẽng wa sẽn zems noor ning mam sẽn kõ foomã, 6 sã n mikame tɩ rao bee be n pa tar taale, n yaa pʋg-yɛng sɩda, n tar kamb sẽn yaa tẽedb sẽn pa tar taal b sẽn vɩ vɩ-yook* yĩnga, wall b sẽn yaa tõatb yĩnga.+ 7 Bala kãsem-soab sẽn yaa Wẽnnaam yel-gɛtã yĩnga, a pa segd n yɩ ned sẽn tar taale, tɩta-neda,+ ned sũur sẽn yikd tao-tao,+ rã-yũud-kãaga, nen-kɛglem soaba,* la rat-tɩ-loog soab sẽn baood ligd la arzɛgs ye. 8 A segd n yɩɩ ned sẽn maand sãamb sãando,+ ned sẽn nong sẽn sõmbe, ned yam sẽn vẽenẽ,+ nin-tɩrga, ned sẽn maand sɩda,+ la yõk-m-meng soaba.+ 9 A sẽn zãmsd nebã to-to wã segd n wilgame t’a gãda gomd ning b sẽn tõe n teegã* kãn-kãe.+ Rẽ la a tõogd n keng nebã raood* ne zãmsg ning sẽn nafdã*+ maasem, la a wilg kɩɩsdbã b kongr me.+

10 Bala tõatb wʋsg n be n yaa gom-faad dãmb la bɛlgdba, sẽn yɩɩd fãa neb nins sẽn gãd bãongã kõom dem-demã.+ 11 Yaa tɩlɛ tɩ b mum nin-kãens noyã, bala b sãamda zags tõr tẽeb ne b sẽn zãmsd nebã bũmb toor-toor b sẽn pa segd n zãms-bã. B maanda rẽ b sẽn baood paoong ne zãmbã yĩnga. 12 Bãmb sʋka ned a yembr sẽn yaa b no-rɛɛs yeelame yaa: “Kɛrɛt nebã yagda ziri wakat fãa. B yaa wa we-rũm-toose, la yão-be-neb sẽn yaa kʋɩɩmba.”

13 Kaset-kãng yaa sɩda. Yaa rẽ n kɩt tɩ f tog n ket n zabd-b sõma, sẽn na yɩl tɩ b tẽebã tall pãnga, 14 tɩ b ra kelg Zʋɩf-rãmbã soalmã, la sẽn lak-b n bas sɩdã sẽn kõt noy ninsã ye. 15 Bũmb fãa yaa yɩlemd ne neb nins sẽn yaa yɩlmã.+ La sã n yaa ne neb nins sẽn yaa rẽgd la sẽn pa tar tẽebã, bũmb pa be n yaa yɩlemd ye. Bala b yamã la b sũur-kasetã fãa rẽgmame.+ 16 B yeta nebã taoor tɩ b mii Wẽnnaam, la b tʋʋmã wilgdame tɩ b pa mi Wẽnnaam ye.+ Bala b yaa wẽns wʋsgo, la kɩɩsdba, n pa zems tɩ tʋm tʋʋm-sõng buud baa a yembr ye.

2 La sã n yaa ne foo, bɩ f ket n gomd goam sẽn zems ne zãmsg ning sẽn nafdã.*+ 2 Bɩ nin-kẽembã maand gũusg bũmb fãa pʋgẽ, n yɩ neb sẽn zems ne waoogre, neb yam sẽn vẽenẽ, neb tẽeb sẽn tar pãnga, neb sẽn tar nonglem wʋsgo, la neb sẽn tõogd toogo. 3 Woto me, bɩ pʋg-yãansã yɩ neb sẽn tar yel-manesem sẽn wilgd tɩ b yaa wẽn-zoɛtba, n pa tẽn-kãn-neba, n pa neb sẽn yaa divẽ* yembse, la sẽn zãmsd nebã sẽn yaa sõma, 4 sẽn na yɩl n tõog n sagl* pagb nins yʋʋm sẽn pa vẽsgã tɩ b nong b sɩdbã, n nong b kambã, 5 tɩ b yɩ neb yam sẽn vẽenẽ, sẽn yaa yɩlma, n get b zags yell sõma,* n yɩ pʋg-sõamyã, pagb sẽn sulgd b mens n sakd b sɩdba,+ sẽn na yɩl tɩ ned ra wa sãbs Wẽnnaam goamã ye.

6 Woto me, ket n sagend kom-bɩɩsã tɩ b yɩ neb yam sẽn vẽenẽ,+ 7 la bɩ fo mengã yɩ mak-sõng tʋʋm-sõma wɛɛngẽ ne manesem buud fãa. Zãms nebã bũmb nins sẽn yaa sɩdã ne f sũur fãa,+ 8 n tũnugd ne goam nins sẽn nafdã* ned sẽn pa tõe n wɩdã, sẽn na yɩl tɩ kɩɩsdbã paam yãnde, n pa tar bũmb b sẽn tõe n tik n gom tõnd wẽng ye.+ 9 Bɩ yembsã sulg b mens n sak b zu-soben-dãmbã bũmb fãa pʋgẽ,+ n maand b sẽn tõe fãa n na n noog b sũuri, n pa lemsd-ba, 10 n pa zuud-ba,+ la b wilgdẽ tɩ b yaa neb b sẽn tõe n kɩs sɩd zãnga, n kɩt tɩ Wẽnnaam sẽn yaa tõnd Fãagdã zãmsgã paam waoogr bũmb fãa pʋgẽ.+

11 Bala Wẽnnaam barkã* pukame, n wat ne fãagr nebã buud fãa yĩnga.+ 12 A zãmsda tõnd tɩ d zãag d mens ne wẽn-kɩɩsgo, la ne dũniyã bõn-wẽnsã tʋlgre,+ la tɩ d vɩɩmd ne yam sẽn vẽenẽ, ne tɩrlem la ne wẽn-sakr dũni-kãngã* nebã sʋka,+ 13 n gũud bũmb nins d sẽn saagd n na n wa paam tɩ kõt-d sũ-noogã,+ la d gũud Wẽnnaam sẽn yaa kãsengã ne tõnd Fãagd a Zeezi Kirist pukrã sẽn tar ziirã. 14 Kiristã kõo a meng tõnd yĩng+ n na n fãag* tõnd+ ne tʋʋm-wẽns buud fãa, la a yɩlg tõnd tɩ d yɩ neb sẽn welg toor a meng yĩnga, sẽn tʋmd tʋʋm-sõma ne yẽesem.+

15 Bɩ f ket n gomd bõn-kãensã yelle, n sagend nebã* la f wilgd-b b kongre, f sẽn tar sor n tõe n maan dẽ wã yĩnga.+ Ra bas tɩ ned baa a ye paoog foom ye.

3 Ket n tẽegd-b tɩ b sakd nanambsã ne pãn-soaadbã,+ tɩ b segl n sa tʋʋm-sõng buud fãa yĩnga, 2 tɩ b ra gom ned baa a ye wẽnga, tɩ b ra yɩ zab-zabdba, tɩ b ra yɩ neb sẽn yaa dem-deme,+ la bɩ b yɩ neb sẽn tar bʋgsem wʋsg ne nebã fãa.+ 3 Bala tõnd me ra yaa neb sẽn pa tar yam, kɩɩsdba, neb b sẽn menese, n da yaa tʋlsem toor-toor la yõ-noogrã yembse, neb sẽn da tʋmd tʋʋm-wẽns la sẽn da yaa sũ-ki-neba, neb sẽn da yaa wẽns wʋsgo, la neb sẽn da kis taaba.

4 La Wẽnnaam sẽn yaa tõnd Fãagdã sõmblmã+ ne a sẽn nong ninsaalbã ne nonglem ningã sẽn wa n pukã, 5 a fãaga tõndo, la pa tũ ne tɩrlem tʋʋm d sẽn tʋm ye.+ Tũu ne a mengã nimbãan-zoeerã.+ A fãaga tõnd ne koom soob ning sẽn kɩt tɩ d paam vɩɩmã maasem,+ la ne a sẽn kɩt tɩ d lebg nin-paals vʋʋsem sõngã maasmã yĩnga.+ 6 A pʋdga vʋʋsem sõng kãng tõnd zut wʋsgo, a Zeezi Kirist sẽn yaa tõnd Fãagdã maasem yĩnga,+ 7 sẽn na yɩl tɩ d sẽn paam tɩ b yeel tɩ d yaa tɩrs a barkã* maasem yĩngã poore,+ d tõe n lebg neb sẽn saagd n na n wa paam vɩɩm sẽn ka sɛtã tɩ yɩ d pʋɩɩre.+

8 Gom-kãensã yaa goam d sẽn tõe n teege, la mam datame tɩ f ket n gomd bõn-kãens yell wʋsgo, sẽn na yɩl tɩ neb nins sẽn tẽ Wẽnnaamã tõog n ning tʋʋm-sõma maaneg b yamẽ wakat fãa. Bõn-kãensã yaa sõma n nafd neda.

9 La bɩ f ra kẽes f toog no-koɛɛm sẽn yaa yalemd pʋsẽ, yaab-rãmb rot yɛlẽ, Tõogã poorẽ kɩɩs-taab la a zab pʋsẽ ye. Bala b pa nafd neda, la b yaa bõn-vɩɩd me.+ 10 Ned sã n zãmsd nebã zãmsg sẽn pa sɩd+ tɩ fo sagl-a* naoor a yiib t’a pa kelge,+ bɩ f lak f meng ne-a,+ 11 n miẽ tɩ ned a woto lak n basa so-tɩrgã, t’a maanda yel-wẽna, la t’a ninga taal a meng zugu.

12 Mam sã n wa tʋm a Artemas wall a Tisik+ fo nengẽ, bɩ f maan f sẽn tõe fãa n wa paam maam Nikopoliisi, bala mam yãka yam n na n zĩnd be waoodã wakate. 13 Modg n sõng a Zenaas sẽn yaa ned sẽn mi Tõogã sõma wã, n paas a Apolos sẽn na yɩl tɩ bũmb da paoog-b b so-toakã sasa ye.+ 14 La bɩ tõnd tẽed-n-taasã me zãms tʋʋm-sõma tʋmb wakat fãa, tɩ yell sã n wa rat manegr tao-tao bɩ b sõnge,+ sẽn na yɩl n da yɩ neb sẽn pa womd biis ye.

15 Neb nins fãa sẽn be ne maamã toonda foom b pʋʋsem. Pʋʋs neb nins sẽn be tẽebã pʋgẽ n nong tõnd wʋsgã n kõ-ma.

Bɩ Wẽnnaam barkã* zĩnd ne yãmb fãa.