A ZAK SEBRE

1 Maam a Zak+ sẽn yaa Wẽnnaam yamba, la Zu-soab a Zeezi Kirist yambã n gʋls seb-kãngã n tool buud piig la a yiibã sẽn sãeegã:

Reeg-y m pʋʋsem!

2 M saam-biisi, yãmb sã n wa paamd zu-loees toɛy-toɛy bɩ y kɩdem sũ-noogo,+ 3 y sẽn mi tɩ y tẽebã sẽn paam makr woto wã kɩtdame tɩ y tõogd toogã yĩnga.+ 4 La bɩ tõog-toog tʋm a tʋʋmd n baas tɩ yãmb pid zãnga, n yɩ sõma bũmb fãa pʋgẽ, tɩ baa fʋɩ ra paoog-y ye.+

5 Woto wã, ned sã n be yãmb sʋkã tɩ yam paoog-a bɩ a kell n kos Wẽnnaam+ t’a na n kõ-a lame.+ Bala a kõta nebã fãa ne yamleoog n pa ningd taal ye.+ 6 Bɩ a kell n kos ne tẽebo,+ la a ra maan sãmbs baa bilf ye.+ Bala ned ning sẽn maand sãmbs yaa wa mogrã ko-pemd sobgã sẽn zẽkd t’a lengdẽ wã. 7 Bɩ nin-kãng ra tags t’a na n paama bũmb a Zeova* nengẽ ye. 8 A yaa ned yam sẽn yuusdi,+ la sẽn toeemd a yɛlã wakat fãa.

9 La bɩ saam-biig ning sẽn yaa naong soab kɩdem sũ-noog* b sẽn zẽk-a wã yĩnga,+ 10 tɩ sẽn yaa-a rakãagr kɩdem sũ-noog b sẽn sik-a wã yĩnga.+ Bala a na n menema wa tɩ-puug sẽn be weoogẽ. 11 Wĩntoogã zẽkdame t’a tʋʋlmã wẽed tɩɩgã n kɩt t’a zelgdẽ t’a puugã belg n lʋɩ, t’a neermã menemdẽ. Woto me, rakãagrã na n menema a tʋʋmã pʋgẽ.+

12 Sũ-noog soab la ned ning sẽn tõogd toog zu-loees sasa,+ bala a sẽn lebg ned sẽn tat Wẽnnaam yamã, a na n paama vɩɩm maanfã+ a Zeova* sẽn pʋlem neb nins sẽn nong-a wakat fãa wã.+ 13 Ned sã n wa paam zu-loɛɛg bɩ a ra yeele: “Yaa Wẽnnaam n makd maam.” Bala ned pa tõe n mak Wẽnnaam t’a maan wẽnga, la Wẽnnaam me pa makd ned t’a maan wẽng ye. 14 Ned kam fãa paamda makr a mengã ratem sẽn tusd-a la a belgd-a wã* yĩnga.+ 15 Ratmã sã n wa rɩk pʋga, a rogda yel-wẽnde. La yel-wẽndã sã n maan n sa, a wata ne kũum.+

16 M saam-bi-nongdse, ra belg-y y mens ye. 17 Kũun sẽn yaa sõma buud fãa, la kũun sẽn zems zãng buud fãa yita yĩngri,+ yĩngr vẽenem Ba wã nengẽ n sigda.+ Yẽ pa tekde, la a pa toeemd wa maasem sẽn kẽndã ye.+ 18 Yɩɩ a raabã yĩng la a rog tõnd ne sɩdã gomdã maasem,+ sẽn na yɩl tɩ tõnd lebg a bõn-naandsã dẽenem biisi.+

19 M saam-bi-nongdse, bãng-y bõn-kãngã: Ned buud fãa segd n wɩnga ne kelgre, la a maag ne goama,+ la a maag ne sũ-yikri,+ 20 bala ninsaal sũ-yikr pa wat ne sẽn yaa tɩrg Wẽnnaam nifẽ ye.+ 21 Woto wã, bɩ y bas rẽgd buud fãa la wẽnem buud fãa,+ la y sak ne bʋgsem tɩ b ning Wẽnnaam gomdã sẽn tõe n fãag yãmbã* y sũyã pʋsẽ.

22 Bɩ y yɩ Wẽnnaam gomdã sakdba,+ la y ra yɩ a kɛlgdb bala, n belgd y mens ne tagsa sẽn pa sɩd ye. 23 Bala ned sã n yaa gomdã kɛlgd la a pa a sakda,+ yẽ soab yaa wa ned sẽn get a nengã nen-gɛtg pʋgẽ. 24 A geta a meng la a kẽng n looge. La tao-tao bala a yĩmda a sẽn yaa to-to wã. 25 La ned ning sẽn maagd a yĩng n get tõog ning sẽn zems zãngã+ sẽn yaa lohorem tõogã pʋgẽ, la a ket n get-a lebga gomdã sakda, n pa ned sẽn kelgd n yĩmdẽ ye. La a na n paama sũ-noog bũmb ning a sẽn maandã pʋgẽ.+

26 Ned sã n tagsdẽ t’a yaa wẽn-tũud n yaool n pa tõe a zɩlemde,*+ a belgda a menga, la a sẽn tũud Wẽnnaamã yaa zaalem. 27 Ad wẽn-tũudum* ning sẽn yaa yɩlemde, la sẽn pa tar rẽok tõnd Wẽnnaamã sẽn yaa d Ba me wã nifẽ: Yaa f ges kɩɩbsã+ la pʋg-kõapã+ yell b toogã pʋgẽ,+ la f kell n da bas tɩ dũniyã rẽgm-f ye.+

2 M saam-biisi, yãmb sẽn bakd neb n sõngdẽ wã, yãmb gãta tẽeb ning yãmb sẽn tar ne tõnd Zu-soab a Zeezi Kirist sẽn tar ziirã sɩda?+ 2 Bala ned sẽn pid sãnem nugbĩns la a yeelg fu-neer sã n wa yãmb tigsgẽ, tɩ naong soab sẽn yeelg fu-rẽgd me wa, 3 yãmb waoogda ned ning sẽn yeelg fu-neerã, n yeel-a: “Wa zĩnd zĩ-kãngã sẽn yaa sõma wã,” la y yeel naong soabã: “Kell n yals yĩngri,” pa rẽ bɩ, “wa zĩnd mam nao-roagendgã tẽngr ka” bɩ?+ 4 Sã n yaa woto, yãmb pa zẽkd nin-yɛngã n yɩɩd a to wã,+ la yãmb pa lebg bʋ-kaoodb sẽn dɩkd no-sɩɩr sẽn yaa wẽns sɩda?+

5 M saam-bi-nongdse, kelg-y-yã. Wẽnnaam pa yãk neb nins sẽn yaa naong rãmb dũniyã nifẽ wã sẽn na yɩl tɩ b yɩ arzɛk rãmb tẽebã wɛɛngẽ,+ la neb sẽn na n paam Rĩungã tɩ yɩ b pʋɩɩre, Rĩung ning a sẽn pʋlem neb nins sẽn nong-a wã sɩda?+ 6 La yãmb paoogda naong rãmbã. Pa arzɛk rãmbã n namsd yãmb+ la b tar yãmb n kẽnd bʋʋd zĩisẽ wã la? 7 Bãmb pa paoogd yʋ-sõng ning Wẽnnaam sẽn kõ yãmbã sɩda? 8 Yãmb sã n sakd naam tõogã wa Gʋls-sõamyã sẽn yeel tɩ “fo segd n nonga f to wa f mengã,”+ y maanda neere. 9 La yãmb sã n ket n bakd neb n sõngdẽ,+ yãmb maanda yel-wẽnde, tɩ tõogã wilgdẽ tɩ y yaa kɩɩsdba, n ningd-y taale.+

10 Ned sã n sakd Tõogã fãa la a kɩɩs a noor a yembre, a lebga Tõogã tõr kɩɩsda.+ 11 Bala soab ning sẽn yeel tɩ “fo pa segd n yo”+ wã yeelame me tɩ “fo pa segd n kʋ”+ ye. La fo sã n pa yo n yaool n kʋ, fo lebga tõogã kɩɩsda. 12 B sẽn na n tik tõog ning sẽn yaa neb sẽn tar lohorem dẽndã* n kao yãmb bʋʋdã yĩnga, bɩ y kell n mao tɩ y goamã la y manesmã zems ne tõogã.+ 13 Bala ned ning sẽn pa tar nimbãan-zoeere, b na n kaoo a bʋʋd n pa zoe a nimbãaneg ye.+ Nimbãan-zoeer tõogda bʋʋdo.

14 M saam-biisi, ned sã n yeel t’a tara tẽeb t’a tẽebã yaool n pa naag ne tʋʋma, a yõod bee yɛ?+ Tẽeb-kãng tõe n fãag-a lame sɩda?+ 15 Saam-bi-raoog ning wall saam-bi-poak ning sã n pa tar fuug* la a pa tõe n paam dɩɩb tɩ sek-a daar fãa, 16 tɩ yãmb nin-yɛng yeel-a yaa: “Kẽng ne laafɩ. Bɩ f paam fut la rɩɩb daar fãa,” la y yaool n pa kõ-a bũmb ning a sẽn segd n paam n tõog n vɩɩmdã, a yõodã bee yɛ?+ 17 Woto me, tẽeb sã n pa lagem ne tʋʋma, a yaa kɩɩnga.+

18 Baasgo, nina na n yeelame: “Fo tara tẽebo, la mam tara tʋʋma. Wilg maam fo tẽebã sẽn pa lagem ne tʋʋmã, tɩ mam na n tũnuga ne m tʋʋmã n wilg foom m tẽebã.” 19 Fo tẽedame tɩ Wẽnnaam-yɛng n be. Bɩ bõe? Fo maana neere. La zĩn-dãmbã me tẽedame la b rigd rabeem.+ 20 Foom a zɩta, fo rat n bãngame tɩ tẽeb sã n pa lagem ne tʋʋma, a pa tar yõod bɩ? 21 Pa tõnd ba a Abrahaam tʋʋmã yĩng la b sẽn yeel t’a yaa tɩrga, a sẽn dɩk a biig a Izaak n kõ tẽn-kugrã zugã sɩda?+ 22 Fo neeme t’a tẽebã ra lagma ne a tʋʋmã, la t’a tʋʋmã kɩtame t’a tẽebã zems zãnga,+ 23 tɩ Gʋls-sõamyã sẽn yeelã pidsi: “A Abrahaam tẽe a Zeova,* la b geelga a tẽebã wa tɩrlem yẽ yĩnga.”+ B wa n bool-a lame t’a Zeova* zoa.+

24 Yãmb neeme tɩ yaa tʋʋm la b tikd n yeel tɩ ned yaa tɩrga, la pa tẽeb bal ye. 25 Yɩɩ woto me ne pʋg-yoodr a Rahaabe. B pa yeel t’a yaa tɩrg a tʋʋmã yĩnga, a sẽn deeg tẽn-gũusdbã* neere, la a kɩt tɩ b tũ sor a to n loogã sɩda?+ 26 Sɩd-sɩda, yĩngã sã n pa lagem ne sɩɩga,* a yaa kɩɩnga.+ Tẽeb me sã n pa lagem ne tʋʋma, a yaa kɩɩnga.+

3 M saam-biisi, yãmb neb wʋsg pa segd n lebg karen-saam-dãmba, y sẽn mi tɩ b na n kaoo tõnd bʋʋdã ne toolem* n yɩɩdã yĩnga.+ 2 Bala tõnd fãa tudgda* naoor wʋsgo.+ Ned sã n pa tudgd ne a no-goama, a soab yaa ned sẽn zems zãnga, n tõe n ning a yĩngã tõr salbre. 3 Tõnd sã n ningd wed-moos noy salba sẽn na yɩl tɩ b sak tõndo, d tõogda b yĩngã tõr me, n kɩtdẽ tɩ b maand tõnd sẽn date. 4 Ges-y koom-kogendã me: Baa b sẽn yaa bɛd wʋsg tɩ yaa sob-kãsems n tusd-bã, b wẽnd-b-la ne wẽnemdg sẽn yaa bilf fĩ-fĩi, tɩ b kẽngd zĩis nins neb nins sẽn wẽnd-bã sẽn date.

5 Woto me, zɩlemd yaa yĩngã will sẽn yaa bilfu, la a wukda a meng wʋsgo. Ges-y bugum bilf sẽn tõe n kɩt tɩ we-kãseng rɩ bugum to-to wã! 6 Zɩlemd yaa bugum me.+ A yaa bũmb toɛy-toɛy sẽn ka tɩrs yẽgr tõnd yĩngã wil sʋka. Bala a rẽgemda yĩngã tõre,+ n ningd ned vɩɩm tõr bugmẽ, la a bugmã yita Zeyɛnne.* 7 Bala ninsaalbã tõe n kɩtame tɩ we-rũms buud fãa, bõn-yɩgdɩ, bõn-vuuds la mogrã pʋgẽ bõn-naands buud fãa sak bãmba, la b sɩd tõogame me. 8 La ned baa a ye pa tõe a zɩlemd ye. Ned pa tõe n wõr-a n tõog ye. A yaa wẽnga, n pid ne zẽnem sẽn kʋʋde.+ 9 Yaa ne yẽ la tõnd pẽgd d Ba a Zeova,* leb n yaa ne yẽ la tõnd kãabd ninsaalbã b sẽn naan “Wẽnnaam wõnegã” wẽnga.+ 10 Bark la kãab-wẽng yita no-yɛng pʋgẽ.

M saam-biisi, pa zems tɩ yɛlã yɩ woto ye.+ 11 Ko-noog ne ko-toog bundame n yit ko-nif a yembr pʋgẽ sɩda? 12 M saam-biisi, kankang pa tõe n wom oliiv biis ye. Viyn tɩɩg me pa tõe n wom kankam ye. Bɩ bõe?+ Yamsem ko-nif me pa tõe n yiis ko-noog ye.

13 Ãnda n be yãmb sʋk n tar yam la bãngre? Bɩ a tall manesem-sõngo, tɩ wilg t’a maanda bũmb fãa ne bʋgsem ning yam sẽn wat ne wã. 14 La sũ-kiir+ ne no-koɛɛm+ sã n be yãmb sũyã pʋsẽ, bɩ y ra wuk y mens+ n yagd ziri n kɩɩsd sɩdã ye. 15 Rẽ pa yam ning sẽn yit yĩngrã ye. A yaa dũniyã rẽnda,+ neb nins yĩngã tʋlsem sẽn so wã rẽnda, la zĩn-dãmbã rẽnda. 16 Bala zĩig ning fãa sũ-kiir ne no-koɛɛm sẽn be, zũnd-zãnd ne tʋʋm-wẽns buud fãa me na n zĩnda be.+

17 La yam ning sẽn yit yĩngrã rengd n kɩtame tɩ ned yɩ yɩlemde,+ tɩ rẽ poor bɩ a kɩt t’a yɩ ned sẽn baood laafɩ,+ sẽn maand bũmb fãa ne yam,+ sẽn sakd nana, sẽn pid ne nimbãan-zoeer la sẽn womd bi-sõma,+ sẽn pa bakd neda,+ la sẽn pa tar zãmb ye.+ 18 Sẽn paase, b bʋta tɩrlem bilã laafɩ pʋgẽ+ neb nins sẽn baood laafɩ wã yĩnga.*+

4 Bõe n wat ne zabã la mo-yõsã yãmb sʋka? Pa yãmb yĩngã tʋlsem toɛy-toɛyã sẽn zabd taab yãmb pʋsẽ* wã n wat ne rẽ sɩda?+ 2 Yãmb datame, la y pa paamd ye. Yãmb kʋʋdame la y tʋlgd to bũmb n pa basdẽ, la y pa tõe n paam ye. Yãmb zabda taab la y tar mo-yõs wakat fãa.+ Yãmb pa tare, y sẽn pa kotã yĩnga. 3 Yãmb sã n kos me, y pa paamd ye. Bala yãmb kota ne raab sẽn yaa wẽnga, sẽn na yɩl n tall bũmb ning y sẽn kotã n pids y yĩngã tʋlsem.

4 Yãmb a yoaadba,* yãmb pa mi tɩ zood ne dũniyã yaa beem ne Wẽnnaam la? Woto wã, ned ning fãa sẽn dat n lebg dũniyã zoa lebgda Wẽnnaam bɛya.+ 5 Bɩ yãmb tagsdame tɩ yaa zaalem la Gʋls-sõamyã sẽn yeele: “Wakat fãa, yam ning sẽn yãmb tõnd sũyã tʋlgda bũmb wʋsgã”+ la? 6 La Wẽnnaam barkã* a sẽn kõtã yaa kãseng n yɩɩda. Rẽ n so tɩ Gʋls-sõamyã yeele: “Wẽnnaam kɩɩsda waoog-m-mens rãmbã,+ la a kõta sik-m-mens rãmbã a barkã.”*+

7 Woto yĩnga, sulg-y y mens n sak Wẽnnaam,+ la y kɩɩs Sʋɩtãanã,*+ t’a na n zoe n basa yãmba.+ 8 Bɩ y kolg Wẽnnaam, tɩ yẽ me na n kolga yãmba.+ Yãmb a yel-wẽn-maandba,+ nudg-y y nusi. La yãmb a neb nins yam sẽn yuusdi, yɩlg-y y sũyã.+ 9 Yãmb segd n sãama y sũy wʋsgo, la y yãbe.+ Bɩ y laadã lebg yãbre, tɩ y sũ-noogã lebg sũ-sãanga. 10 Sik-y y mens a Zeova* taoore,+ la a na zẽk yãmba.+

11 M saam-biisi, bɩ y ra le gom taab wẽng ye.+ Ned ning fãa sẽn gomd a saam-biig wẽnga, wall sẽn kaood a saam-biig bʋʋd gomda tõogã wẽng la a kaood tõogã bʋʋdo. La fo sã n kaood tõogã bʋʋdo, fo pa ned sẽn sakd tõogã ye. Fo yaa bʋ-kaooda. 12 Tõod-lugundã la Bʋ-kaoodã+ yaa a yembr tãa. Yaa soab ning sẽn tõe n fãag la sẽn tõe n sãamã.+ La foo la ãnda n kaood f to bʋʋdo?+

13 Kelg-y-yã, yãmb a neb nins sẽn yete: “Rũndã wall beoogo, tõnd na n toga sor n kẽng tẽn-kãngã pʋgẽ. D na n zĩnda be yʋʋmde, n leeb n paam yõodo.”+ 14 Yãmb yaool n pa mi y vɩɩmã sẽn na n yɩ a soab beoog ye.+ Yãmb yaa wulg sẽn pukd wakat bilf yĩnga, la a wẽneg n meneme.+ 15 La yãmb segd n yeelame yaa: “A Zeova* sã n data,+ d na n vɩɩmdame, n maan woto wall woto.” 16 Yãmb pẽgda y mens y wuk-m-mengã sẽn yaa wʋsgã pʋgẽ. Wuk-m-meng a woto yaa wẽnga. 17 Ned sã n mi a sẽn tõe n maan sẽn yaa tɩrg to-to la a yaool n pa maand rẽ, yaa yel-wẽnde.+

5 Yãmb a rakãag-rãmbã, kelg-y-yã. Bɩ y yãb la y wiis sũ-sãams nins sẽn na n wa yãmb zutã yĩnga.+ 2 Yãmb arzɛgsã põogame, tɩ mogd* rɩ yãmb futã me.+ 3 Yãmb sãnemã ne y wanzuri wã kẽe tẽngempiisim. B tẽngempiismã na n yɩɩ kaset sẽn wilgd yãmb kongrã. B na n dɩɩ yãmb yĩn-nemsã. Bũmb nins yãmb sẽn bao n bĩngã na n yɩɩ wa bugum yaoolem wakatã.+ 4 Ade! Tʋm-tʋmdb nins sẽn tigs yãmb pʋtã koodã kelemdame, bala yãmb pa yao bãmb b yaoodã ye. La tigsdbã sẽn kelemd n dat sõngrã kelems lʋɩɩ tãb-biis naab a Zeova* tʋbrẽ.+ 5 Yãmb vɩɩmda naar la yõ-noogr vɩɩm tẽngã zugu. Yãmb dɩɩme n nobe, kʋʋbã daar yĩnga.+ 6 Yãmb ninga nin-tɩrg taale. Yãmb kʋ-a lame. A* pa kɩɩsd yãmb sɩda?

7 Woto wã, m saam-biisi, bɩ y maan sũ-mar n tãag Zu-soabã+ waoongã. Ka-koaad gũuda tẽngã bõn-koaadlã bi-sõma wã, n maand sũ-mar rẽ yĩng hal n tãag pipi saagã la yaoolem saagã waoongo.+ 8 Bɩ yãmb me maan sũ-mare.+ Keng-y y sũyã, bala Zu-soabã waoongã kolgame.+

9 M saam-biisi, bɩ y ra yẽgemd* ne taaba, sẽn na yɩl tɩ b ra wa kao y bʋʋd ye.+ Ade! Bʋ-kaoodã yasa rignoorẽ wã. 10 M saam-biisi, bɩ y rɩk no-rɛɛsdb nins sẽn gom a Zeova* yʋʋr+ yĩngã togs-n-taare, namsgã sakr+ la sũ-marã+ maaneg wɛɛngẽ. 11 Tõnd yetame tɩ neb nins sẽn tõog toogã+ yaa sũ-noog rãmba.* Yãmb wʋma a Zoob sẽn tõog toogã kibare,+ la y yã a Zeova* sẽn kɩt t’a yɛlã baas to-to wã.+ Rẽ kɩtame tɩ y bãng t’a Zeova* tara nonglem wʋsgo, la t’a yaa nimbãan-zoɛta.+

12 Sẽn yɩɩd fãa, m saam-biisi, ra le wẽen-y ne saasã, wall ne tẽngã, pa rẽ bɩ ne bũmb a to ye. La bɩ yãmb “n-yẽe” yɩ n-yẽe, tɩ y “ayo” yɩ ayo,+ sẽn na yɩl tɩ Wẽnnaam ra wa kao y bʋʋd ye.

13 Ned bee yãmb sʋkã n tar zu-loees tɩ namsd-a bɩ? Bɩ a wɩng ne pʋʋsgo.+ Ned bee yãmb sʋkã t’a sũur noomẽ bɩ? Bɩ a yɩɩl yɩɩn-sõamyã. 14 Ned bee yãmb sʋkã n ka laafɩ bɩ? Bɩ a bool tigingã kãsem-dãmbã,+ la bɩ b pʋʋs a yĩnga, la b sõog-a kaam+ a Zeova* yʋʋr yĩnga. 15 Pʋʋsgã b sẽn pʋʋs ne tẽebã na n kɩtame tɩ bãadã* paam laafɩ, t’a Zeova* me kɩt t’a yiki. Sẽn paase, a sã n da maana yel-wẽna, a na n paama sugri.

16 Woto yĩnga, bɩ y vẽnegd y yel-wẽnã n togsd taaba,+ la y pʋʋsd taab yĩnga, sẽn na yɩl n paam laafɩ. Nin-tɩrg se-yõkr tara pãng wʋsgo, n sɩd tõe n sõng neda.+ 17 A Eli ra yaa ninsaal wa tõndo, la a sẽn pʋʋs ne a sũur fãa n kos tɩ saag ra ni wã, saagã maana yʋʋm a tãab la kiis a yoob n pa tol n ni soolmã pʋgẽ ye.+ 18 Rẽ poore, a le pʋʋsame, la saagã yii yĩngr n ni tɩ tẽngã bõn-koaadlã wom biisi.+

19 M saam-biisi, b sã n belg yãmb sʋkã ned t’a lak n bas sɩdã, tɩ ned a to sõng-a t’a lebg n wa, 20 bɩ y bãng tɩ ned ning sẽn kɩt tɩ yel-wẽn-maand bas sor ning a sẽn da tudg n dɩkã+ na n fãag-a-la* ne kũum, la a lud yel-wẽn wʋsgo.+