A PƖYƐƐR PIPI SEBRE

1 Maam a Pɩyɛɛr sẽn yaa a Zeezi Kirist tẽn-tʋmdã+ n gʋls seb-kãngã, n tool neb nins sẽn sãeeg* n be Põ, Galasi, Kapadose,+ Aazi la Bitini n yaa neb b sẽn tũus 2 wa sẽn zems Wẽnnaam sẽn yaa Ba wã+ sẽn pĩnd n bãngã. Wẽnnaam kɩtame tɩ b lebg sõamyã ne vʋʋsem sõngã maasem,+ sẽn na yɩl tɩ b yɩ sakdba, la neb sẽn paam tɩ b mes-b ne a Zeezi Kirist zɩɩmã:+

Bɩ Wẽnnaam barkã* la laafɩ zĩnd yãmb zut wʋsgo.

3 Bɩ tõnd Zu-soab a Zeezi Kirist Wẽnnaamã sẽn yaa a Ba me wã paam pẽgre, bala a nimbãan-zoeerã sẽn yaa kãsengã yĩnga, a kõo tõnd rogem-paalg+ sẽn na yɩl tɩ d paam saagr sẽn vɩ,+ a Zeezi Kirist sẽn vʋʋg n yi kũ-rãmb sʋkã+ maasem yĩnga, 4 la sẽn na yɩl tɩ d paam pʋɩɩr sẽn pa põogde, sẽn pa rẽgemd la sẽn pa tõe n sãame.+ B bĩnga yãmb pʋɩ-kãng saasẽ.+ 5 Tẽebã maasem yĩnga, Wẽnnaam kogenda yãmb ne a pãngã sẽn na yɩl tɩ y wa paam fãagre. Fãag-kãng seglame n sa n na n vẽneg yaoolem wakatã. 6 Bõn-kãng yĩnga, yãmb kɩdemda sũ-noog wʋsgo, baa yãmb sẽn paamd zu-loees toɛy-toɛy wakat bilf pʋgẽ wã.+ La yãmb segd n paama zu-loe-kãense, 7 tɩ yãmb tẽebã sẽn paam makr+ woto wã kɩt tɩ y paam pẽgre, waoogr la ziir a Zeezi Kirist pukrã wakate.+ Tẽeb sẽn paam makr tara yõod wʋsg n yɩɩd sãnem sẽn sãamdã, baa b sẽn makd sãnem* ne bugmã. 8 Baa yãmb sẽn zɩ n yã Kiristã, yãmb nong-a lame. Baa yãmb sẽn nan pa ne-a wã, yãmb baas n tẽed-a lame, la y kɩdemd sũ-noog wʋsg ne sũ-noog sẽn pa tõe n bãng n bilg la sẽn tar ziiri, 9 yãmb sẽn kɩs sɩd tɩ y tẽebã na n waa ne yãmb fãagrã* yĩnga.+

10 No-rɛɛsdbã sẽn togs bãngr-goam Wẽnnaam barkã* a sẽn da bĩng yãmbã wɛɛngẽ wã maaga b yĩns n bao, la b vaees sõma fãag-kãng wɛɛngẽ.+ 11 B ra vaeesdame n pa basdẽ n dat n bãng bũmb nins sẽn na n maane, la bũmb nins vʋʋsem sõngã sẽn da be bãmb pʋsẽ n wilgd bãmb Kiristã+ zugã sẽn na n maan wakat ninga, bala vʋʋsem sõngã ra pĩnd n wilgd-b-la namsg nins sẽn da gũud Kiristã,+ la ziir ning Kiristã sẽn da na n paam rẽ poorã. 12 Wẽnnaam kɩtame tɩ b bãng tɩ b ra pa tʋmd b mens yĩng ye. Ra yaa yãmb yĩnga. B bãngame tɩ bãmb sẽn da moond bũmb ningã, yaa koɛɛg ning sẽn moon-b yãmb koe-noogã sẽn togs yãmb ne vʋʋsem sõngã sẽn yit saasẽ wã pãngã.+ Baa malɛgsã meng rat n bãnga bõn-kãensã ne b sũy fãa.

13 Woto yĩnga, bɩ y segl y mens sẽn na yɩl n tʋm wʋsgo.+ Modg-y tɩ y yamã ket n vẽen sõma.+ Kɩt-y tɩ y saagrã zĩnd ne Wẽnnaam barkã* b sẽn na n tall n wa kõ yãmb a Zeezi Kirist pukrã wakatã. 14 Yãmb sẽn yaa kom-sakdsã yĩnga, ra le maan-y* wa sẽn zems tʋlsem nins y sẽn da tar y zɩɩlmã wakatã ye. 15 Y segd n lebga sõamyã y yel-manesem fãa pʋgẽ+ wa Sõng soabã sẽn bool yãmbã, 16 bala b gʋlsame: “Yãmb segd n yɩɩ sõamyã, bala mam yaa sõngo.”+

17 Yãmb sã n pʋʋsd n kot Ba wã sẽn kaood bʋʋd wa sẽn zems ned kam fãa tʋʋmd n pa bakdẽ wã,+ bɩ y zã y mens ne rabeem+ wakat ning yãmb sẽn yaa sãamb dũni-kãngã pʋgẽ wã. 18 Bala yãmb miime tɩ pa ne bõn-sãamds wala wanzuri bɩ sãnem la b fãag*+ yãmb ne manesem ning sẽn pa tar yõodã y yaab-rãmbã sẽn zãms yãmbã ye. 19 La yɩɩ ne zɩɩm sẽn tar yõod wʋsgo,+ wa pe-bil sẽn pa tar zang la rẽok zɩɩm,+ rat n yeel tɩ ne Kiristã zɩɩmã.+ 20 Yaa sɩd tɩ Wẽnnaam yãk-a-la sẽn deng dũniyã yẽbgre,+ la yaa wakatã saabẽ la Wẽnnaam kɩt t’a puk yãmb yĩnga. 21 Yẽ maasem yĩnga, yãmb tẽeda Wẽnnaam+ sẽn yaa soab ning sẽn vʋʋg-a n yiis kũ-rãmb sʋkã,+ la sẽn kõ-a ziir+ sẽn na yɩl tɩ yãmb tẽebã la y saagrã zĩnd Wẽnnaam zugã.

22 La masã yãmb sẽn yɩlg y mense,* y sẽn sakd sɩdã tɩ kɩt tɩ y tar saam-biir nonglem sẽn pa naag ne pʋ-likã+ yĩnga, bɩ y nong taab wʋsg ne nonglem sẽn yit sũurẽ.+ 23 Bala yãmb paama rogem-paalga,+ la pa ne bõn-buud sẽn sãamd ye. Yɩɩ ne bõn-buud sẽn pa sãamde,+ Wẽnnaam ning sẽn vɩ la sẽn paad wakat fãa wã gomdã maasem yĩnga.+ 24 Bala “ninsaalbã* fãa yaa wa moodo, la b ziirã fãa yaa wa puud sẽn be pʋʋg pʋgẽ. Moodã kʋɩtame, tɩ puudã sʋʋgdẽ, 25 la a Zeova* gomdã paada wakat fãa.”+ Yaa ‘gom-kãng’ la koe-noogã b sẽn moon yãmbã.+

2 Woto wã, bɩ y yiis wẽnem buud fãa,+ zãmbo, pʋ-lika, sũ-kiir la munaafɩglem buud fãa yãmb pʋsẽ. 2 Bɩ y tʋlg Wẽnnaam gomdã bĩisim sẽn ka pul bũmbã* wa kom-peelse,+ sẽn na yɩl tɩ y tõog n bɩ n paam fãagr rẽ maasem yĩnga,+ 3 sã n mik tɩ yãmb lembame n bãng tɩ Zu-soabã yaa sõmblem soaba.

4 Yãmb sẽn wa soab ning sẽn yaa kug-vɩɩgã nengẽ, kugr ninsaalbã sẽn zãgse,+ la Wẽnnaam sẽn yãk t’a tar yõod wʋsg a nifẽ wã,+ 5 yãmb mensã sẽn yaa wa kug-vɩɩsã, y yaa roog b sẽn met ne Wẽnnaam vʋʋsem sõngã maasem,+ sẽn na yɩl tɩ y yɩ maan-kʋʋdb sẽn welg toor Wẽnnaam yĩnga, la sẽn na yɩl tɩ y kõ maand sẽn zems ne vʋʋsem sõngã,+ la sẽn tat Wẽnnaam yam a Zeezi Kirist maasem yĩnga.+ 6 Bala b yeela Gʋls-sõamyã pʋgẽ yaa: “Ade! Mam dɩgenda kugr m sẽn yãk Siyõ, yẽbgr pãng kugr sẽn tar yõod wʋsgo. Ned ning sẽn tẽed kug-kãng pa na n tol n paam yãnd ye.”+

7 La yaa ne yãmb la a yaa kugr sẽn tar yõod wʋsgo, yãmb sẽn yaa tẽedbã yĩnga. La sã n yaa ne neb nins sẽn pa tẽedã, Gʋls-sõamyã yeelame: “Kugr ning tãn-metbã sẽn zãgsã+ n lebg roogã pãng kugrã,”*+ 8 la “kug-lakdg n paas pĩig sẽn kɩtd tɩ neb lʋɩtẽ.”+ B lʋɩtame, b sẽn yaa gomdã kɩɩsdbã yĩnga. Yaa baasg a woto me n gũud nin-kãens buudã. 9 La yãmb yaa “buud b sẽn yãke, maan-kʋʋdb sẽn yaa rĩm-dãmba, buud sẽn yaa sõngo,+ la buud sẽn welg toor n yaa Wẽnnaam dẽnda,+ tɩ y segd n moon a sõmblmã zĩig fãa.”+ Yẽ n yaa Soab ning sẽn bool yãmb n yiis lik pʋgẽ n kẽes a vẽenem-kãsengã pʋgẽ wã.+ 10 Bala pĩndã yãmb da pa buud ye. La masã, yãmb yaa buud Wẽnnaam sẽn so.+ Pĩndã b ra pa zoet yãmb nimbãaneg ye. La masã, yãmb paamame tɩ b zoe y nimbãanega.+

11 M nin-nongdse, yãmb sẽn yaa sãamb la neb sẽn pa na n kaoos dũniyã zugã yĩnga,+ mam sagenda yãmb tɩ y kell n zãag y mens ne yĩngã ratem+ sẽn zabd ne yãmbã.*+ 12 Kell-y n tall-y yel-manesem sẽn yaa sõma dũniyã neb sʋka,+ sẽn na yɩl tɩ b sã n wa rõt yãmb tɩ y yaa tʋʋm-wẽns-maandba, bɩ b tõe n yã y tʋʋm-sõamyã wã,+ tɩ rẽ kɩt tɩ b waoog Wẽnnaam daar ning a sẽn na n wa kao bʋʋdã.

13 Zu-soabã yĩnga, bɩ y sak naam buud fãa ninsaalbã sẽn lugli.+ Sã n yaa rĩm+ bɩ y sak-a a sẽn yɩɩd yãmbã yĩnga, 14 wall sã n yaa guvɛrneer-dãmb bɩ y sak-ba, rĩmã sẽn tʋm-b tɩ b sɩbg tʋʋm-wẽns-maandbã, la b pẽg sẽn maand-b sõma wã yĩnga.+ 15 Bala Wẽnnaam daabã yaa y maan sẽn yaa sõma, n kɩt tɩ yam-koees rãmbã sẽn gomd yãmb wẽng zɩɩlem pʋgẽ wã sĩndi.*+ 16 Yɩ-y neb sẽn tar lohorem,+ la ra kɩt-y tɩ y lohormã yɩ peend sẽn lut wẽng ye.+ Tũnug-y ne y lohormã n wilg tɩ y yaa Wẽnnaam yembse.+ 17 Waoog-y nebã buud fãa.+ Nong-y saam-biisã fãa.+ Zoe-y Wẽnnaam.+ Waoog-y rĩmã.+

18 Bɩ tʋm-tʋmdbã sulg b mens n sak b zu-soben-dãmbã, la b waoogd-b wʋsgo.+ La pa zu-soben-dãmb nins sẽn yaa nin-sõma la sẽn pa dem-demã bal ye. B tog n saka sẽn yaa-b nin-toosã me. 19 Bala ned sã n tõogd toog zu-loees* pʋsẽ, la a sakd namsg a sẽn pa segd ne a sẽn dat n tall sũur-kaset* sẽn yaa yɩlemd Wẽnnaam taoorã yĩnga, yaa bõn-sõngo.+ 20 B sã n pãbd yãmb y sẽn maand yel-wẽn yĩng tɩ y tõogd toogo, seka pẽgr sɩda?+ La b sã n namsd yãmb y sẽn maand neer yĩng tɩ y tõogd toogo, rẽ yaa bũmb sẽn tat Wẽnnaam yam.+

21 Sɩd-sɩda, yaa rẽ yĩng la b bool yãmba, bala Kirist meng namsa yãmb yĩng+ n bas mamsg sẽn na yɩl tɩ y tũ a naoã neere.+ 22 A pa tol n maan yel-wẽnde,+ la b pa wʋm zãmb goam a noorẽ me ye.+ 23 B sẽn wa n tʋʋd-a wã,*+ a pa tʋʋs* n lebs ye.+ A sẽn wa n namsdẽ wã,+ a pa zab neb nins sẽn namsd-a wã ye. A basa yellã ne soab ning sẽn kaood bʋʋd tɩrgã.+ 24 Yẽ mengã zɩɩ tõnd yel-wẽnã+ a yĩngã pʋgẽ ra-lukã* zugu,+ sẽn na yɩl tɩ d ki yel-wẽnã wɛɛngẽ, la d vɩɩmd tɩrlem yĩnga. “A sãmpoagã maasem yĩnga, y paama laafɩ.”+ 25 Bala yãmb da yaa wa piis sẽn meneme,+ la masã yãmb lebg n waa y sɩɩsã* pe-kɩɩm+ la b gũudã nengẽ.

3 Woto me, bɩ yãmb a pagbã sulg y mens n sak y sɩdbã,+ sẽn na yɩl tɩ sẽn pa sakd-b Wẽnnaam gomdã tõe n lebg sakdb tɩ pa tũ ne goama, b pagbã yel-manesem yĩnga,+ 2 b sẽn ne yãmb yel-manesmã sẽn yaa sõngã,*+ ne y sẽn waoogd-b sõma wã yĩnga. 3 Bɩ y nagmã ra yɩ bũmb nins nin sẽn ne wala zut pãneng la sãnem fan-teed ningri,+ wall fu-neeb yeelgr ye. 4 La bɩ y neermã yɩ bũmb ning sẽn be sũurẽ wã n yaa nagem teed sẽn pa sãamde, sẽn yaa laafɩ la bʋgsem yamã.+ Bõn-kãens tara yõod wʋsg Wẽnnaam nifẽ. 5 Bala yaa woto la pĩnd wẽndẽ pʋg-sõamyã nins sẽn da tẽed Wẽnnaamã ra manegd b mense, n sakd b sɩdbã 6 wa a Saara sẽn da sakd a Abrahaam n boond-a tɩ zu-soabã.+ La yãmb sã n kell n maan sẽn yaa sõma la y pa bas tɩ rabeem tõog-yã,+ y lebga yẽ kamba.

7 Bɩ yãmb a pʋg-sɩdbã me kell n zĩnd ne y pagbã wa sẽn zems yãmb sẽn mi-b sõma wã.* Pagbã sẽn yaa wa laas sẽn pa tar pãng wʋsgã yĩng bɩ y waoog-ba,+ bãmb sẽn na n naag yãmb+ n paam vɩɩmã sẽn yaa kũun d sẽn pa segd ne wã yĩnga, sẽn na yɩl tɩ bũmb ra gɩdg yãmb pʋʋsgã ye.

8 Sẽn na n baase, bɩ y fãa tall yam a yembre,+ n kʋmd taaba, n tar saam-biir nonglem, n zoet taab nimbãaneg+ la y tar sik-m-menga.+ 9 Bɩ y ra lebs wẽng wẽng yĩnga,+ wall tʋʋr tʋʋr yĩng ye.+ Y segd n ningda barka,+ bala yaa rẽ yĩng la b bool yãmb sẽn na yɩl tɩ y paam barka.

10 Bala “ned ning fãa sẽn nong vɩɩmã la sẽn dat n vɩɩmd ne sũ-noog segd n gũusame t’a zɩlemd ra gom wẽnga,+ la t’a no-bɩmsã ra gom belgr goam ye. 11 Bɩ a bas sẽn yaa wẽnga,+ la a maan sẽn yaa sõma.+ Bɩ a bao laafɩ, la a mao wakat fãa tɩ laafɩ zĩndi.+ 12 Bala a Zeova* nin bee nin-tɩrsã zutu, t’a tʋbã kelgd b pʋʋsgã.*+ La a Zeova* zabda ne sẽn maand-b wẽngã.”+

13 Sɩd me, yãmb sã n lebg neb sẽn tar yẽesem sẽn yaa sõma maaneg wɛɛngẽ, ãnda n na n maan yãmb wẽnga?+ 14 La baa yãmb sã n wa namsd tɩrlmã yĩnga, yãmb yaa sũ-noog rãmba.+ Baasgo, ra zoe-y bũmb ning neb a taabã sẽn zoetã,* la y ra maan yɩɩr me ye.+ 15 Bɩ y sak n deeg y sũyã pʋsẽ tɩ Kiristã yaa Zu-soaba, la t’a yaa sõngo. Segl-y y mens wakat fãa tɩ ned sã n sok yãmb y sẽn tẽed bũmb ningã võor bɩ y tõog n leok-a. La y segd n maana rẽ ne bʋgsem+ la ne waoogr wʋsgo.

16 Kell-y n tall-y sũur-kaset* sẽn yaa sõma,+ tɩ b sã n wa gomd yãmb wẽng fãa, bɩ sẽn gomd-b yãmb wẽngã paam yãnde,+ yãmb sẽn yaa Kirist karen-biis n tar yel-manesem-sõngã yĩnga.+ 17 Bala sã n zemsa Wẽnnaam daab tɩ y nams y sẽn maand neer yĩnga,+ sãoo y sẽn na n namsd y sẽn maand wẽng yĩnga.+ 18 Bala Kirist kii vugr wakat fãa yĩng yel-wẽnã yĩnga,+ sẽn na yɩl n tall yãmb n ta Wẽnnaam nengẽ.+ A yɩɩ nin-tɩrg n ki neb sẽn pa tɩrs yĩnga.+ Nebã sẽn wa n na n kʋ-a wã t’a yaa ninsaala,+ la Wẽnnaam vʋʋg-a lame t’a yaa malɛka.+ 19 La rẽ poore, a kẽngame n tɩ moon* malɛgs nins sẽn be bãens roogẽ wã.+ 20 Yaa malɛgs nins sẽn lebg kɩɩsdb wakat ning Wẽnnaam sẽn wa n maand sũ-mar a Nowe wakatẽ wã,+ b sẽn wa n kaad koglgã.+ Yaa kogl-kãng pʋgẽ la b rɩk neb sõor bilf tɩ b pasg koomã n põse,+ rat n yeel tɩ neb* a nii.

21 Koomã lisg sẽn mamsd rẽ wã fãagda yãmb masã a Zeezi Kirist vʋʋgrã maasem yĩnga. Lisgã pa yĩngã rẽgd yiisg yĩng ye. Yaa y sẽn kot Wẽnnaam sũur-kaset sẽn yaa sõma.+ 22 Kiristã bee Wẽnnaam nug-rɩtgo,+ bala a kẽnga saasẽ, la Wẽnnaam kɩtame tɩ malɛgsã ne pãn-soaadbã la pãens rãmbã sakd-a.+

4 Kiristã sẽn nams yĩngã pʋgẽ wã,+ bɩ yãmb me keng y mens n tall a yamã buudu. Bala ned sẽn nams a yĩngã pʋgẽ basa yel-wẽna,+ 2 sẽn na yɩl t’a sẽn ket n vɩ wã, bɩ ra le yɩ ninsaalbã tʋlsem yĩnga,+ la yɩ Wẽnnaam daabã yĩnga.+ 3 Bala wakat sẽn loogã yãmb maana dũniyã nebã raabo, la masã sekame.+ Yãmb da naaga b nin-yoolem* tʋʋmã pʋgẽ, b tʋʋm-wẽnsã ratem, b rã-tɩgrã, b reem sẽn naag ne tʋʋm-yoodã,* b sẽn yũud rãam n wagsd taabã, la b bõn-naands pʋʋsgã sẽn yaa bũmb sẽn kɩɩsd tõogã pʋgẽ.+ 4 B pa wʋmd yãmb sẽn pa le naagd bãmb b tʋʋm-yoodã pʋgẽ wã võor ye. Rẽ n so tɩ b gomd yãmb wẽnga.+ 5 La soab ning sẽn segl n sa n na n bʋ nin-vɩɩs la kũ-rãmbã na n kaoo nin-kãens bʋʋd wa sẽn zems b tʋʋmã.+ 6 Sɩd-sɩda, yaa rẽ yĩng la b sẽn moon kũ-rãmbã* me koe-noogã,+ sẽn na yɩl tɩ baa b sã n kaoo nin-kãens bʋʋd yĩn-nemsã pʋgẽ tɩ zems ninsaalb tagsgo, Wẽnnaam nifẽ, b na tõog n vɩɩmd vʋʋsem sõngã maasem yĩnga.

7 La bũmb fãa saab kolgame. Woto yĩnga, bɩ y yɩ neb yam sẽn vẽenẽ,+ la y yɩ gũusdb n pʋʋsd wakat fãa. 8 Sẽn yɩɩda, bɩ y nong taab wʋsgo, bala nonglem luta yel-wẽn wʋsgo.+ 9 Maan-y taab sãand la y ra yẽgem ye.+ 10 Yãmb ned kam fãa sẽn deeg kũunã, bɩ y tall-a n sõng taaba, n yɩ Wẽnnaam barkã* sẽn pukd ne manesem toor-toorã yel-gɛtb sẽn yaa sõma.+ 11 Ned sã n tar tõog n tõe n gome, bɩ a togs Wẽnnaam koeese. Ned sã n sõngd neb a taaba, bɩ a teeg pãng ning Wẽnnaam sẽn kõtã+ n sõnge, sẽn na yɩl tɩ Wẽnnaam paam pẽgr+ bũmb fãa pʋgẽ a Zeezi Kirist maasem yĩnga. Wẽnnaam n so ziir la pãng wakat sẽn kõn sa yĩnga. Ãmiina.

12 M nin-nongdse, ra bas-y tɩ namsg toor-toorã y sẽn paamd tɩ wõnd bugmã ling-yã,+ wa bõn-sãang n paamd-y ye. 13 La bɩ y kɩdemd sũ-noog+ y sẽn paamd pʋɩɩr Kiristã namsgã pʋgẽ wã yĩnga,+ sẽn na yɩl t’a ziirã pukr wakat me bɩ y kɩdem la y maan sũ-noog wʋsgo.+ 14 Yãmb sã n paamda yaalg* Kirist yʋʋrã yĩnga, yãmb yaa sũ-noog rãmba.+ Bala vʋʋsem sõngã sẽn tar ziirã sẽn yaa Wẽnnaam vʋʋsem sõngã bee yãmb zutu.

15 Baasgo, bɩ yãmb ned baa a yembr ra paam namsg a sẽn yaa nin-kʋʋda, wagdre, tʋʋm-wẽns-maand wall ned sẽn kẽed neb a taab yɛlẽ yĩng ye.+ 16 La ned sã n namsd a sẽn yaa kiris-nedã yĩnga, bɩ a ra zoe yãnd ye.+ Bɩ a kell n vɩɩmd wa sẽn zems yʋ-kãnga, la a pẽgd Wẽnnaam. 17 Bala masã yaa wakat ning b sẽn yãk n na n sɩng bʋʋdã kaoob ne Wẽnnaam zakã rãmbã.+ Bʋʋdã sã n na n deng n sɩnga ne tõndo,+ neb nins sẽn pa sakd Wẽnnaam koe-noogã baasg na n yɩɩ bõe?+ 18 “La nin-tɩrg sã n segd n modga wʋsg n yaool n paam fãagre, bõe n na n paam wẽn-kɩɩsd la yel-wẽn-maanda?”+ 19 Woto wã, bɩ neb nins sẽn namsd wa sẽn zems Wẽnnaam daabã ket n teegd Naand sẽn yaa sɩd soabã, la b maand sẽn yaa sõma.+

5 Rẽ n so tɩ ma-me sẽn yaa kãsem-soab la ned sẽn maan kaset ne namsg nins Kiristã sẽn paamã, la m yaa pʋɩt-n-taag ne ziir ning sẽn na n pukã,+ mam yet* kãsem-dãmbã sẽn be yãmb sʋkã yaa: 2 Kɩɩm-y Wẽnnaam bãgrã+ a sẽn gũnug yãmbã, n get a yell neere.* La pa segd n yɩ ne modgr ye. Tog n yɩɩ ne yamleoog Wẽnnaam taoore.+ Pa tog n yɩ y sẽn dat n paam ligd la arzɛgs yĩng ye.+ Tog n yɩɩ ne y sũur fãa. 3 Y pa tog n soog neb nins sẽn yaa Wẽnnaam dẽndã ne pãng ye.+ Yɩ-y mamsg bãgrã yĩnga.+ 4 Woto, pe-kɩɩm-kãsengã+ sã n wa puki, yãmb na n paama ziir maanfã sẽn pa tõe n sãamã.+

5 Woto me, yãmb a kom-bɩɩsã, bɩ y sulg y mens n sak rap nins yʋʋm sẽn vẽsgã.*+ La bɩ yãmb ned kam fãa sik a meng* a taabã taoore, bala Wẽnnaam kɩɩsda waoog-m-mens rãmbã, la a kõta sik-m-mens rãmbã a barkã.*+

6 Woto yĩnga, bɩ y sik y mens Wẽnnaam sẽn yaa kãseng la sẽn tar pãngã taoore,* sẽn na yɩl tɩ wakat sã n ta bɩ a zẽk yãmba.+ 7 Sik-y y yɩɩrã* fãa n bas ne-a,+ bala a geta yãmb yelle.+ 8 Modg-y tɩ y yamã ket n vẽenẽ, la y yɩ gũusdba.+ Yãmb bɛyã sẽn yaa Sʋɩtãanã* gõoda wa gɩgemd sẽn kelemde, n baood ned n na n wãbe.*+ 9 La bɩ y kɩɩs-a,+ n kell n tall y tẽebã kãn-kãe, y sẽn mi tɩ y saam-biisã fãa sẽn be dũniyã zugã me paamda namsg a woto buudã yĩnga.+ 10 La yãmb sã n nams wakat bilf poore, Wẽnnaam sẽn so bark* buud fãa wã, n yaa soab ning sẽn bool yãmb a ziir sẽn ka sɛtã+ pʋgẽ Kirist maasem yĩngã na n baasa yãmb zãmsgã.* A na n kɩtame tɩ y yals kãn-kãe.+ A na n kõo yãmb pãnga.+ A na n kɩtame tɩ y kɩ yẽg sõma. 11 Bɩ a soog pãn-kãseng wakat fãa. Ãmiina.

12 Yaa ne a Sɩlvẽ*+ mam sẽn get t’a yaa saam-biig sẽn maand sɩdã maasem la mam gʋls yãmb seb-koɛɛga, sẽn na yɩl n keng y raood la m wilg-y ne m sũur fãa tɩ Wẽnnaam barkã* yaa bark meng-menga. Kell-y n gãd-y bark-kãng kãn-kãe. 13 Pag* ning sẽn be Babilon n yaa nin-tũusdg wa yãmbã toonda yãmb a pʋʋsem. A Mark+ sẽn yaa m biigã me toonda yãmb a pʋʋsem. 14 Mok-y taab ne nonglem.

Bɩ laafɩ zĩnd ne yãmb fãa sẽn be Kirist pʋgẽ wã.