A PƖYƐƐR SEBR A YIIB-N-SOABA

1 Maam a Sɩmo-Pɩyɛɛr sẽn yaa a Zeezi Kirist yamb la a tẽn-tʋmdã n gʋls seb-kãngã, n tool neb nins sẽn paam tẽeb sẽn tar yõod wʋsg wa tõnd tẽebã, tõnd Wẽnnaamã tɩrlmã la tõnd Fãagd a Zeezi Kirist tɩrlmã maasem yĩngã:

2 Bɩ y sẽn paam bãngr hakɩɩk Wẽnnaam zug la a Zeezi sẽn yaa tõnd Zu-soabã zugã kɩt tɩ Wẽnnaam barkã* la laafɩ zĩnd yãmb zut wʋsgo. 3 Bala Wẽnnaam pãngã kõo tõnd bũmb nins fãa sẽn sõngd tɩ d vɩ la d sakd Wẽnnaamã, d sẽn paam bãngr hakɩɩk soab ning sẽn bool tõnd+ ne a ziirã la a sõmblmã zugã maasem yĩnga. 4 Bõn-kãensã maasem yĩnga, a kõo tõnd pʋlems sẽn tar yõod wʋsg la sẽn yaa kãsemse,+ tɩ ne bõn-kãens maasem bɩ d tõe n paam Wẽnnaam ziirã buudu,+ bala d põsa wẽngã* sẽn be dũniyã pʋgẽ tɩ yaa tʋls-wẽnsã n wat ne wã.

5 Woto yĩng me, bɩ y mao y pãng tɛk+ tɩ y tẽebã naag ne sõmblem,+ tɩ y sõmblmã naag ne bãngre,+ 6 tɩ y bãngrã naag ne yõk-m-menga,+ tɩ y yõk-m-mengã naag ne tõog-toogo, tɩ y tõog-toogã naag ne wẽn-sakre,+ 7 tɩ y wẽn-sakrã naag ne saam-biir nonglem, tɩ y saam-biir nonglmã naag ne nebã fãa nonglem.+ 8 Bala bõn-kãensã sã n be yãmb pʋsẽ n ket n paasdẽ, b na n kɩtame tɩ y ra yɩ neb sẽn pa tʋmde, wall sẽn pa womd biis+ bãngr hakɩɩkã y sẽn paam tõnd Zu-soab a Zeezi Kirist zugã wɛɛngẽ ye.

9 Bala ned ning fãa sẽn pa tar bõn-kãensã yaa zoanga, n mum a nin n pa get vẽenemã ye.*+ A lebga ned sẽn yĩm tɩ b yɩlg-a lame n yiis yel-wẽn+ nins a sẽn da maan hal daar zãrã. 10 Woto wã, m saam-biisi, sẽn mik tɩ Wẽnnaam boola yãmb+ la a yãk yãmbã, bɩ y modg y pãng tɛk sẽn na yɩl n kɩs sɩd tɩ y ket n zemsa ne rẽ. Yãmb sã n kell n maan bõn-kãense, y pa na n bas tẽebã a bada.+ 11 Sɩd-sɩda, yaa woto la y na n wa paam n kẽ tõnd Zu-soab la d Fãagd a Zeezi Kirist+ Rĩungã sẽn ka sɛtã+ pʋgẽ ne ziiri.

12 Yaa rẽ yĩng la mam sẽn dat n tẽegd yãmb bõn-kãens wakat fãa wã, baa yãmb sẽn mi-b la y kɩ yẽg sõma sɩdã pʋgẽ, sɩd ning sẽn be yãmb pʋsẽ wã. 13 La mam tagsdame tɩ m sã n ket n be fu-ro-kãngã* pʋgẽ fãa,+ zemsame tɩ mam ket n tẽegd yãmb bõn-kãense,+ 14 n miẽ tɩ b na n siiga mam fu-roogã ka la bilf wa tõnd Zu-soab a Zeezi Kirist sẽn kɩt tɩ m bãng vẽenegã.+ 15 Mam na n modga m pãng tɛk wakat fãa, sẽn na yɩl tɩ m loogrã poor bɩ y tõog n tẽegd* bõn-kãens yell y toore.

16 Pa yɩ soalem b sẽn tags n naan la d tũnug ne n kɩt tɩ yãmb bãng tõnd Zu-soab a Zeezi Kirist pãngã la a waoongã ye. La yaa tɩ tõnd maana kaset ne a ziirã.+ 17 Bala a reega waoogr ne ziir Wẽnnaam sẽn yaa Ba wã nengẽ, wakat ning Wẽnnaam sẽn yaa ziir soabã sẽn gom ne-a n yeele: “Yãoã yaa mam Bi-ribla, mam sẽn nong a soabã. A taa mam yam.”+ 18 Yɩɩ tõnd sẽn wa n be ne-a tãn-sõngã zugã la d wʋm gom-kãensã sẽn yi saasẽ.

19 Yaa rẽ yĩng la tõnd sẽn maneg n kɩs sɩd tɩ bãngr-goamã na n pidsame wã. Tagsd-y bõn-kãens yell neere. Yãmb sũyã pʋsẽ, bãngr-goamã segd n yɩɩ wa fɩtl+ sẽn yãgd zĩig sẽn yaa lik pʋgẽ. Kell-y n maan-y woto hal tɩ zĩigã wa yẽege, la tɩ tõd-beoog ãdg+ puki. 20 Sẽn yɩɩd fãa, yãmb miime tɩ Gʋls-sõamyã bãngr-gomd baa a ye pa yit ninsaal tagsgẽ ye. 21 Bala zɩ n tũ ne ninsaal raab tɩ bãngr-gomd wa ye.+ La yaa neb n togs Wẽnnaam koees wa sẽn zems vʋʋsem sõngã sẽn vẽneg-bã.+

2 La zirẽ-be-no-rɛɛsdb zĩnda nin-buiidã sʋka, wa zirẽ-be-karen-saam-dãmb me sẽn na n zĩnd yãmb sʋkã.+ Nin-kãens na n soos n waa ne welsg sẽn na n sãam yãmb tẽebã. B na n kɩɩsame meng tɩ b pa mi b soaalã sẽn da bãmbã,+ n kɩt tɩ sãoong wa b zut tao-tao. 2 Sẽn paase, neb wʋsg na n tʋma nin-yoolem*+ tʋʋm wa bãmba. Bãmb yĩnga, nebã na n goma sɩdã sorã wẽnga.+ 3 B na n tũnuga ne sɩlem goam me n wẽg yãmb ne rat-tɩ-looge. La b bʋʋdã sẽn kao hal daar zãrã+ pidsgã pa wat maas-maas ye. B sãoongã waoong pa na n vaal ye.+

4 Sɩd me, Wẽnnaam pa bas n pa sɩbg malɛgs nins sẽn maan yel-wẽnã ye.+ A lob-b-la Tartaarã* pʋgẽ,+ n sog-b ne bãens* lik bida pʋgẽ, n bĩng-b bʋʋdã kaoob yĩnga.+ 5 Sẽn paase, a pa bas n pa sɩbg dũni sẽn zĩnd pĩndã me ye.+ La a kogla a Nowe sẽn yɩ tɩrlem koe-moondã+ ne neb a yopoe,+ wakat ning a sẽn kɩt tɩ sa-kãseng ni wẽn-kɩɩsdb dũni zugã.+ 6 La a sẽn sãam Sodom ne Gomoor tẽnsã tɩ b lebg tompɛglmã, a ning-b-la taal+ tɩ yɩ keoogr* sẽn wilgd wẽn-kɩɩsdbã bũmb nins sẽn watã.+ 7 La a fãaga nin-tɩrg a Lot+ sẽn da sãamd a sũur wʋsg yel-wẽn-maandbã nin-yoolem* tʋʋmã yĩngã. 8 Bala daar ne a to fãa, nin-tɩr-kãngã sẽn da be yel-wẽn-maandbã sʋk n ne b tʋʋm-wẽnsã la a wʋmd tʋʋm-kãens kibarã, ra namsd-a-la wʋsgo. 9 Dẽnd a Zeova* mii a sẽn na n maan to-to n fãag wẽn-sakdbã yel-pakr pʋgẽ,+ la a bĩng nin-wẽnsã n wa sãam-b bʋʋdã kaoob daare,+ 10 sẽn yɩɩd fãa, neb nins sẽn baood n dẽgem b taabã yĩnsã,*+ la sẽn paoogd sẽn tar-b zu-sobendã.*+

B sẽn yaa neb sẽn pa zoet yell la tʋb-pa-wʋmdbã, b pa yɛɛsd ne gom neb nins sẽn tar ziirã wẽng ye. 11 La baa malɛgsã sẽn tar pãng la tõog n yɩɩdã, b sẽn waoogd a Zeova* wã yĩnga,+ b pa ningd sẽn tar-b ziirã tall ne paoogr goam ye. 12 La nin-kãensã yaa wa rũms sẽn pa tagsde, la sẽn maand wa sẽn zems yam ning b sẽn dog ne wã, la sẽn naan yõk n kʋ yĩng balã. B gomda bũmb nins b sẽn pa mi wã wẽnga.+ Bãmb na n paama sãoong b mens tʋʋm-wẽnsã pʋsẽ. 13 B na n paama sɩbgr tɩ yɩ b tʋʋm-wẽnsã keoore.

B getame tɩ b sã n pidsd b yĩngã tʋls-wẽns+ baa wĩntoog menga, yaa bũmb sẽn be yamleoogo. Yãmb sʋkã, b yaa neb sẽn yaa rẽgd la sẽn tar zamse, n maand sũ-noog ne b zãmsgã sẽn belgd nebã, la b naagd yãmb n dɩt n tɩgda.+ 14 B ninã pida ne yoobo.+ B pa tõe n bas yel-wẽnd maaneg ye. B belgda neb* nins yam sẽn yuusdã. B sũyã zãmsa rat-tɩ-looge. B yaa neb* b sẽn kãab wẽnga. 15 B sẽn bas so-tɩrgã yĩnga, b menemame. B rɩka a Beoor biig a Balaam sorã.+ A ra nonga tʋʋm-wẽns yaoodo,+ 16 la b zab-a-la a sẽn kɩɩs sẽn yaa tɩrgã yĩnga.+ Rũng b sẽn tar n zɩt zɩɩb sẽn yaa bõn-muk n gom ne ninsaal koɛɛga, n gɩdg no-rɛɛsã a gãeen-tʋʋmã pʋgẽ.+

17 Nin-kãens yaa bul-koeems la sawat sob-kãseng sẽn peege. B bĩnga lik bida bãmb yĩnga.+ 18 B gomda wuk-m-meng goam sẽn yaa gom-vɩɩdo. B sẽn nekd yĩngã tʋlsem+ la b tʋmd nin-yoolem* tʋʋmã, b belgda neb nins sẽn nan paam b mens n yi sẽn vɩ-b tudgr pʋgẽ wã sʋkã.+ 19 B pʋlemda neb nins b sẽn belgdã lohorem, la bãmb mensã yaa wẽngã yembse.+ Bala ned ning fãa a to sẽn tõog yaa ned ning sẽn tõog yẽ wã yamba.*+ 20 Sɩd-sɩda, b sã n põs dũniyã rẽgdã+ b sẽn paam bãngr hakɩɩk Zu-soab la Fãagd a Zeezi Kirist zugã yĩnga, tɩ rẽ poor tɩ b le kẽes b toog bõn-kãens pʋsẽ tɩ b tõog-ba, b yaoolem yɛlã lebga wẽns n yɩɩd pipi wã.+ 21 B sã n da pa paam bãngr hakɩɩk tɩrlmã sor wɛɛngẽ n são b sẽn paam-a tɩ rẽ poor tɩ b wẽnemd n bas tõog sẽn yaa sõngã b sẽn da reegã.+ 22 Bũmb ning sẽn paam-bã wilgdame tɩ yel-bũndã sẽn yeelã yaa sɩda. A yeelame: “Baagã lebg n tɩ rɩɩ a wʋbdã, la kuku-yãangã b sẽn so koomã lebg n tɩ bilma bɛgdẽ wã.+”

3 M nin-nongdse, seb-kãngã yaa sebr a yiib-n-soab mam sẽn gʋls yãmba. La mam tẽegda yãmb bũmb toor-toor sẽn na n sõng-y tɩ y tags neere,+ wa mam sẽn maan to-to m pipi sebrã pʋgẽ wã. 2 Yaa tɩ y pa segd n yĩm goam nins no-rɛɛs-sõamyã wã sẽn togs hal pĩndã, n paas Zu-soabã sẽn yaa Fãagdã tõogã tẽn-tʋmdbã* sẽn togs yãmbã ye. 3 Sẽn yɩɩd fãa, bãng-y tɩ yaoolem wakatã, nin-yaandb n na n wa ne b yaalg goama, n maand wa sẽn zems b mensã ratem,+ 4 la b yetẽ: “A sẽn pʋlem t’a na n waame wã, a bɛɛ?+ Bala tõnd yaab-rãmbã sẽn ki wã tɛk n tãag rũndã, bũmbã fãa ket n yaa wa b sẽn da yaa to-to hal naanegã sɩngrẽ wã bal kɛpɩ.”+

5 Bala b yãka yam n pa rat n tẽeg tɩ saas n da be pĩnda, la tɩ ne Wẽnnaam gomdã maasem, tẽngã puka koom zug n be koomã sʋka,+ 6 la tɩ wakat kãng dũniyã paama sãoong ne bõn-kãens maasem, sasa ning koomã sẽn lim-a wã ye.+ 7 La ne gom-kãng maasem me, saasã ne tẽng ning sẽn be masã wã bĩnga bugum yĩnga. B bĩng-b lame n na n tãag wẽn-kɩɩsdbã bʋʋdã kaoob la b sãoongã daare.+

8 Baasgo, m nin-nongdse, ra yĩm-y t’a Zeova* nifẽ, daar a yembr yaa wa yʋʋm tusri, tɩ yʋʋm tusr yaa wa daar a yembr ye.+ 9 A Zeova* pa maas ne a pʋlengã pidsg+ wa neb kẽer sẽn tagsdã ye. A maanda sũ-mar ne yãmba, bala a pa rat tɩ ned baa a ye sãam ye. A ratame tɩ nebã fãa tek yam n kos sugri.+ 10 La a Zeova* daarã+ na n waa wa wagdre.+ Baraare, saasã na n looga+ ne bʋr-kãsenga, la saasã ne tẽngã bũmb toor-toorã sẽn wɩng wʋsgã na n yẽnegame, tɩ tẽngã ne tʋʋm nins sẽn be a pʋgẽ wã rɩ bugum.*+

11 Sẽn mik tɩ bõn-kãensã fãa segd n yẽnega woto wã, bɩ y tagsd y sẽn segd n yɩ neb nins buudã yelle. Yãmb segd n yɩɩ neb sẽn tar yel-manesem sẽn yaa sõngo, la y tʋmd wẽn-sakr tʋʋma, 12 n gũud a Zeova* daarã waoong+ la y ningd rẽ y yamẽ.* Yaa daar-n-kãng la saasã sẽn na n sãam+ ne bugum, tɩ tʋʋlmã sẽn tar pãngã kɩt tɩ bũmb toor-toorã yẽnegã. 13 La tõnd gũuda sa-paals la tẽn-paalg wa sẽn zems Wẽnnaam sẽn pʋlmã,+ tɩ tɩrlem na n zĩnd b pʋsẽ.+

14 Woto yĩnga, m nin-nongdse, yãmb sẽn gũud bõn-kãensa wã, bɩ y modg ne y pãng tɛk sẽn na yɩl tɩ Wẽnnaam wa mik tɩ y yaa neb sẽn pa tar rẽok wall zanga, la sẽn tar zood sõma ne-a.+ 15 Sẽn paase, geelg-y tõnd Zu-soabã sũ-marã wa bũmb sẽn wat ne fãagre, wa tõnd saam-bi-nongr a Poll me sẽn tik yam ning b sẽn kõ-a wã n gʋls yãmb+ 16 n gom bõn-kãens yellã. A maanda woto a sɛbã fãa pʋsẽ, la bũmb nins sẽn be be wã kẽer võor wʋmb yaa toogo, tɩ zɩtbã* ne neb nins yam sẽn yuusdã golemd bõn-kãense, wa b sẽn maand to-to ne Gʋls-sõamyã babs a taabã b mens sãoong yĩngã.

17 Woto wã, m nin-nongdse, yãmb sẽn pĩnd n bãng bõn-kãensa wã, bɩ y gũus tɩ yel-wẽn-maandbã tudgrã ra wa kɩt tɩ y naag nin-kãens n meneme, n yi yẽbgr ning zug y sẽn vigl kãn-kãe wã n lʋɩ ye.+ 18 La bɩ y ket n bɩt tõnd Zu-soab la d Fãagd a Zeezi Kirist barkã* la a bãngrã pʋgẽ. Bɩ a paam ziir masã la wakat fãa yĩnga. Ãmiina.