A ZÃ SEBR A TÃAB-N-SOABA

1 Maam a nin-kẽemã* n gʋls seb-kãngã n tool m nin-nongr a Gayus m sẽn sɩd nongã.

2 M nin-nongre, mam pʋʋsdame n kotẽ tɩ f paam laafɩ, la tɩ bũmb fãa pʋgẽ bɩ f* yɛlã kell n yɩ sõma wa b sẽn yaa sõma rũndã-rũndã wã. 3 Bala saam-biis kẽer sẽn wa wã, b kõo kaset fo sẽn gãd sɩdã to-to wã wɛɛngẽ, fo sẽn ket n kẽnd sɩdã pʋgẽ to-to wã wɛɛngẽ.+ Woto kɩtame tɩ mam kɩdem sũ-noog wʋsgo. 4 Bũmb ka be sẽn kõt maam sũ-no-kãseng n yɩɩd mam sẽn na n wʋm tɩ mam kambã ket n kẽnda sɩdã pʋgẽ ye.+

5 M nin-nongre, fo wilgame tɩ f yaa sɩd soab ne bũmb nins fo sẽn maan saam-biisã yĩnga, baa fo sẽn pa mi-b sõma wã.+ 6 B kõo fo nonglmã kaset tigingã taoore. M bõosd-f lame tɩ f modg tɩ f sẽn na n kuils-b to-to wã ta Wẽnnaam yam.+ 7 Bala yaa Wẽnnaam yʋʋrã yĩng la b yi-yã, n pa reegd baa fʋɩ+ dũniyã neb nusẽ ye. 8 Rẽnd tõnd segd n maana nin-kãens buudã sãando,+ sẽn na yɩl tɩ d lebg tʋmd-n-taas sɩdã pʋgẽ.+

9 Mam gʋlsa bũmb n tool tigingã, la a Diyoterfɛs sẽn tʋll n yɩ taoor soab bãmb sʋkã+ pa reegd baa fʋɩ sẽn yit tõnd nengẽ ne waoogr ye.+ 10 Yaa rẽ n so tɩ mam sã n wa, mam na n vẽnega tʋʋm nins a sẽn tʋmde, n yelgd gom-wẽns tõnd zutã+ tɩ nebã bãnge. La rẽ pa sek-a ye. A zãgsdame t’a kõn deeg saam-biisã+ ne waoogr ye. La neb nins sẽn dat n deeg-bã, a maoodame n na n gɩdg-ba, la a rat n yiis-b tigingã pʋgẽ.

11 M nin-nongre, da rɩk ned sẽn maand wẽng togs-n-taar ye. Rɩk sẽn maand-a sẽn yaa sõma togs-n-taare.+ Ned ning sẽn maand sẽn yaa sõma yita Wẽnnaam nengẽ.+ Ned ning sẽn maand wẽng pa mi* Wẽnnaam ye.+ 12 Saam-biisã fãa ne sɩdã meng pẽgda a Demetiryus wʋsgo. Sɩd-sɩda, tõnd me kõta kaset yẽ zugu, la fo miime tɩ kaset ning tõnd sẽn kõtã yaa sɩda.

13 Mam da tara bũmb wʋsg n na n gʋls foo, la m pa rat n kell n gʋls foo ne gʋls-moog la gʋls-koom ye. 14 Mam saagdame tɩ m na n yãa foo ka la bilfu, tɩ d gom ne taab neng ne nenga.

Bɩ laafɩ zĩnd ne foom.

D zo-rãmb* nins sẽn be ka wã toonda foom b pʋʋsem. Pʋʋs d zo-rãmb nins sẽn be be wã yembr-yembr n kõ-ma.