Sak 37

A Zezi kɩtame tɩ pʋg-kõor sũ-sãanga sa

AZEZI sẽn sãoog sodaas naabã sõgen poore, a looga Nayin, sẽn da zãr ne Kapɛrnawom sẽn zems kɩlometr 30 wã. A Zezi karen-biisã n paas kʋʋn-kãseng n da tũud-a. Ra wõnda b sẽn da wa n kolgd Nayinnã tɩ ra yaa zaabr wẽnde. Be, b sega neb sẽn tʋk rao sẽn yaa bi-bɩɩg sẽn ki, n yit tẽngã n na n tɩ solge.

Ad ra yaa yel-beed menga! Bala bi-bɩɩgã ma ra yaa pʋg-kõore, la yaa yẽ bal n da ya a bi-yende. Pagã sɩd sẽn da ki wã, a ra tõe n paama belsg a biriblã yĩnga. Yẽ n da ya a fãa-fãa: a saagr woo, a sẽn tʋll a sũurẽ woo, a magbã fãa ra tɩ loee ne a biigã sẽn da na n yɩ a soabã. La masã ned ra ka le be sẽn tõe n kõt-a belsg ye. Tẽngã neb sẽn da wa n yãagd-a n debd yaoogẽ wã, t’a sũ-sãangã sɩd ra yaa kãsenga.

A Zezi sẽn yã pagã sũ-sãangã sẽn yaa wʋsgã, yẽ mengã sũur sãamame. Rẽ n so t’a yeel-a ne bʋgsem la ne manesem sẽn kõt bas-m-yam woto: “Ra yãb ye.” A Zezi manesmã kɩtame tɩ kʋʋngã gũm n na n gese. Dẽ a Zezi sẽn kolg n sɩɩs pãndarã b sẽn da tʋk ne kũumã, tʋkdbã yalsa sɩɩ. Neba fãa ra togd n sokda b mens bũmb nins a sẽn da rat n maanã.

Yaa sɩd tɩ neb nins sẽn da tũud a Zezi wã zoe n yãame t’a sãooga neb wʋsg ne yel-solemde. La wõnda b ra nan pa yã-a t’a vʋʋg kũum ye. La rẽ yĩnga a sɩd tõe n maana bũmb a woto bɩ? A Zezi yeela kũuma: “Bi-bɩɩga, mam yeta foom tɩ f yiki!” Tɩ bi-bɩɩgã yik n zĩndi! A sɩnga goama, t’a Zezi rɩk-a n kõ a ma.

Neba sẽn yã tɩ bi-bɩɩgã sɩd vʋʋgame wã, b yeelame: “Wẽnnaam no-rɛɛs kãseng puka tõnd sʋka.” Tɩ neb a taab yetẽ: “Wẽnnaam waa bãmb neba nengẽ.” Tao-tao bala yel-solem kãngã kɩbar saaga Zide fãa la tẽnsã sẽn gũbgã fãa.

A Zã ra ket n bee bãens-roogẽ. La a ra ratame n bãng a Zezi tʋʋmã wɛɛngẽ n paase. A Zã karen-biisã tɩ togs-a-la yel-solem kãensã. La bõe la a Zã maan-yã? Luk 7:11-18.

▪ A Zezi sẽn da wa n kolgd Nayinnã bõe la a yã-yã?

▪ A Zezi manesem yɩɩ wãn-wãn bũmb ning a sẽn yã wã taoore, la bõe la a maan-yã?

▪ Neba manesem yɩɩ wãn-wãn a Zezi sẽn maan yel-solemdã?