Sak 84

Kirist karen-biig sẽn segd n maanega

A ZEZI ra keta Fariziẽ kãsengã yiri. La wõnda nin-kãngã yaa Sãnedrẽ wã ned a yembre. A Zezi sẽn yi be poore, a ra ket n teesda Zerizalɛm. Neb kʋʋng n da tũud-a. Bõe n da be nin-kãensã yamẽ wã? Bõe la ned segd n maan n tõog n lebg Kirist karen-biig hakɩka?

Sorã zugu, a Zezi wẽnemd n goma ne kʋʋngã, tõe t’a sãama b sũy meng a sẽn yeel-b tɩ: “Ned sã n wat mam nengẽ, a sã n pa kis a ba, n pa kis a ma, a paga, a kamba, a ba-biisi, la a tãopa la hal ba a meng vɩɩm, a pa tõe n yɩ m karen-biig ye.”—Sebr Sõngo.

A Zezi rat n yeelame tɩ bõe? Ka wã, a Zezi ka yet t’a karen-biisã segd n sɩd kisga b roagdb ye. Ayo, kisg-bã võor rat n yeelame tɩ b segd n nonga a Zezi n yɩɩd bãmba. B ra yeelame t’a Zezi yaab a Zakoob “kisga” a Lea la a ra nong a Rasɛlle. Woto rat n yeelame t’a ra nonga a Rasɛll n yɩɩd a kẽem a Lea.

Tẽeg-y t’a Zezi ra yeelame me tɩ karen-biig segd n kisga “a meng vɩɩm.” Ka me, a Zezi ra rat n yeelame tɩ karen-biig hakɩk tog n nonga yẽ n yɩɩd a meng vɩɩm. Woto, a ra wilgda vẽeneg tɩ lebg yẽ karen-biig pa reem yell ye. Ka bũmb f sẽn na n yik n zagem f zug bal n maan ye.

Ned sã n dat n yɩ a Zezi karen-biiga, a na n paama toogo, la namsg a tẽebã yĩnga. Rẽ la a Zezi sẽn togs woto wã: “Ned ninga fãa sẽn ka rɩkd a kũum [da-luk] n tũ maam, a ka tõe n yɩ mam karen-biig ye.” Woto, Kirist karen-biig hakɩk tog n saka paoogr ning a Zezi sẽn paamã, baa sã n yaa tɩlae t’a ki Wẽnnaam bɛɛbã nusẽ, wala sẽn da na n yɩ to-to ne a Zezi rẽ poor bilfã.

Woto yĩnga, tõog n lebg Kiristã karen-biig yaa bũmb kʋʋngã sẽn tũud a Zezi wã sẽn segd n tags neer n yaool n maane. A Zezi tũnuga ne makr n wilg rẽ vẽenega. A yeelame: “Tɩ bõe, ãnda n be yãmb sʋka n dat n me roogo, n ka reng n zĩnd n tags a ligd yelle n bãng a sã n tara sẽn sek tɩ me n sɛ, tɩ daar ninga, yẽ sã n yẽbg roogã n yaool n ka tõog n me n sɛ, neba sã n yã yẽ, b na n sɩngame n yaal-a n yeele: Dao kãngã sɩngame n me roogo, la a ka tõog n me n baas ye.”

Dẽ, a Zezi wilga kʋʋngã sẽn da pʋgd-a wã tɩ nand tɩ b lebg a karen-biisi, b segd n deng n kɩsa sɩd sõma tɩ b na n tõog n tʋka zɩɩb ning rẽ sẽn baood tɩ b tʋkã. Rẽ yaa wala rao sẽn dat n me roog sẽn dengd n kɩs sɩd t’a tara ligd tɩ sek n na n baas tʋʋmdã la a yaool n sɩngã. A Zezi leb n paasa makr a to sẽn yet woto:

“Walla rĩm bʋg n dat n kẽng n tɩ zab ne rĩm a to n ka reng n zĩnd n tags n gese yẽ sã n tõe n tall neb tus piig n tɩ tõog ned ninga sẽn wat ne neb tus pisi n na n zab ne yẽ wã? Yẽ sã n mik t’a ka tõe, rĩm a to wã sẽn ket n be yɩɩga, yẽ na tʋm neb a nengẽ n bao laafɩ.”

Rẽ poore, a Zezi wilga makr toɛy-toɛyã võor n yeel tɩ: “Woto yĩng me, yãmb ned ninga fãa sẽn ka basd a sẽn tar fãa, a ka tõe n yɩ mam karen-biig ye.” Woto yaa bũmb kʋʋngã sẽn da pʋgd yẽ wã, la ned ning fãa sẽn zãmsd n dat n bãng Kiristã sẽn segd n sak n maane. B sã n dat n yɩ a Zezi karen-biisi, b segd n basa bũmb nins b sẽn tara fãa, la b sak kũum meng rẽ yĩnga. Y sakame n na n maan dẽ bɩ?

A Zezi paasame: “Yamsem yaa bõn-sõngo.” A Zezi yeela a Tãng zug Zãmsgã pʋgẽ t’a karen-biisã yaa “dũniyã yamsem,” sẽn dat n yeel tɩ b kogenda neba vɩɩm, wa yamsem meng sẽn tõe n sõng tɩ rɩɩb ra sãamã. A Zezi yeela woto n baase: “La yamsem noom sã n yi, a na n leb n yãa noom yɛ? Yẽ ka sõma tẽng yĩnga walla birg yĩng me ye, la b na n lob-a-la yɩnga. Sẽn tar-a tʋb sẽn wʋmd bɩ a wʋm.”

Woto a Zezi ra yetame tɩ baa neb nins sẽn sɩng n ya a karen-biis sẽn kaoos bilfã ka tog n koms raood ye. Ka rẽ, b na n lebga neb sẽn ka tar yõod ne dũni kãngã neba, sẽn zems ne yaalgo. B leb n ka na n tall yõod ne Wẽnnaam ye, b na n yɩɩ yãnd n kõ-a. Dẽ, wala yamsem sẽn sãbge, bɩ sẽn dẽgem, b na n lob-b-la yɩnga, n-ye, b na n sãam-b lame. Luk 14:25-35; Sɩngre 29:30-33; Matɩe 5:13.

▪ B sẽn yet tɩ “kisg” f roagdb bɩ f mengã võor yaa bõe?

▪ Mak-bʋs a yiib la a Zezi kõ-yã, la b võor yaa bõe?

▪ A sẽn wa n na n baasã, a Zezi ra rat n yeelame tɩ bõe a sẽn gom yamsmã yellã?