Sak 117

A Zezi yɩɩr kãsengã Gɛtsemane zẽedẽ wã

A ZEZI sẽn pʋʋs n sa wã, yẽ ne a tʋm-tʋmdb 11 wã yɩɩlame n pẽg a Zeova. B yii zugẽ doogẽ wã n sigi, n tũ yʋngã pems-maasgã n lebg n pasg Sedrõ Longã n teesd Betani sẽnẽ. La sorã zugu b tek n yalsa Gɛtsemane zẽedẽ wã, sẽn yaa zĩig b sẽn da nong n yalsdẽ wã. Zẽed kãng ra bee oliiv tɩɩs tãngã zugu, bɩ sẽn ka zãr ne be. Naoor wʋsgo, a Zezi ne a karen-biisa ra sega taab oliiv tɩɩsã sʋk be.

Tõeeme tɩ yaa zẽedã noor la a Zezi bas a tʋm-tʋmdb a nii wã, n yeel-ba: “Zĩnd-y ka tɩ m zãag bilf n tɩ pʋʋse.” Rẽ poore, a peega a tʋm-tʋmdb a tãabo (a Pɩɛɛre, a Zak, ne a Zã) n zãag taoor bilf zẽedã pʋgẽ. A Zezi sũurã sɩngame n sãamdẽ t’a maand yɩɩr wʋsgo. A yeel-b lame: “Sũ-sãoong n tar maam hal t’a rat n yɩ kũum. Bɩ y pa ka n gũ ne maam.”

A Zezi kẽnga taoor bilfu, n wõgemd n fõgen a nengã tẽnga, n sɩng n pʋʋsd ne a sũur fãa n yetẽ: “M Ba, a sã n tõe, bɩ y kɩt tɩ bõn-yũudl kãnga loog n bas maam. La baasgo, ka sẽn zems mam daab ye, la sẽn zems yãmb daabo.” A ra rat n yeelame tɩ bõe? Bõe yĩng tɩ ‘sũ-sãoong tar-a hal tɩ rat n yɩ kũum’? A toeema yam masã n ka le rat n ki n kõ rondã bɩ?

Abada! A Zezi ra pa kot n na n põs kũum ye. Baa vugr menga a Pɩɛɛr sẽn da sagl-a t’a gil maoong kũumã, ka yɩ a noog baa bilfu. La a ra bee yɩɩr kãseng pʋgẽ, bala a ra zoeta a sẽn da na n ki to-to wã, wala nin-wẽng meng-mengã, na n wa sãam a Ba wã yʋʋre. Masã a ra miimi tɩ lɛɛr a wãn pʋgẽ, b na n ka-a-la ra-luk zug wala nin-wẽng meng-menga, sẽn dat n yeel tɩ wẽn-tʋʋsa! Yaa rẽ n da namsd-a wʋsgã.

A Zezi pʋʋsame n kaoose, la a lebg n tɩ mik tɩ tʋm-tʋmdb a tãabã gõeeme. A yeela a Pɩɛɛr yaa: “Yãmb ka tõe n gũ ne maam lɛɛr a ye bala? Bɩ yãmb gũ la y pʋʋse n da wa kẽ makr ye.” La a Zezi sak n deegame tɩ b ra bee yɩɩr pʋgẽ, la tɩ zĩigã me ra zʋʋgame, n yeele: “Ninsaal sũur data la a pãng paooda.”—Sebr Sõngo.

Rẽ poore a Zezi leb n kẽngame n tɩ kos naoor a yiib-n-soab tɩ Wẽnnaam kɩt tɩ “bõn-yũudl kãnga,” sẽn dat n yeel tɩ pʋɩɩre, bɩ raab ning a Zeova sẽn yãk yẽ yĩngã loog n bas-a. A lebg n waame n le mik tɩ tʋm-tʋmdb a tãabã gõeyã, wakat ning b sẽn da segd n pʋʋsdẽ sẽn na yɩl n da lʋɩ kʋɩɩbg pʋgẽ wã. A Zezi sẽn gom ne-bã, b ra ka mi b sẽn na n leok to-to ye.

Sẽn na n baase, a Zezi zãaga zĩig naoor a tãab-n-soaba, sẽn zems kugr lobr zãrem, n yĩgimd n pʋʋs ne kelems la nintãm n yeele: “M Ba, yãmb sã n data, bɩ y yiis bõn-yũudl kãngã mam taoore.” A Zezi sẽn da na n ki wa bi-bɛɛg tɩ rẽ sãam a Ba wã yʋʋrã ra namsd-a-la wʋsgo. Paam taal tɩ f yaa wẽn-tʋʋsã ra yaa yell sẽn yɩɩd-a!

Baasg zãnga, a Zezi kell n pʋʋsame: “Ka mam yam ye, [yaa] yãmb yam bala.” A Zezi sakame n na n maan a Ba wã raabo. A sẽn yeel woto, malɛk sẽn yi saasẽ n puk n gom n keng a raoodo. Tõeeme tɩ malɛkã ra yeta a Zezi t’a Ba wã sũur yaa noog ne-a.

La ad sɩd yaa zɩɩb meng n da zao a Zezi zugu! Yẽ mengã ne ãdem-biisã vɩɩm sẽn-kõn-sa ra bee ne a sẽn na n kell n yɩ wẽn-sakda. A yɩɩrã ra yaa kãsenga. Dẽ a Zezi kell n pʋʋsa a Zeova ne pẽdgr n paase, hal t’a tʋʋlgã ra lebg wa zɩɩm n tosd tẽnga. Sebr a yembr (Journal de l’Association des médecins américains) wilgame tɩ “baa yell a woto sẽn yaa bũmb sẽn ka wɛ n maandẽ wã, tʋʋlg sẽn yaa zɩɩm . . . tõe n yii ned yĩngẽ, a sã n be yɩɩr sẽn yaa kãseng pʋgẽ.”

Rẽ poore, a Zezi lebga naoor a tãab-n-soab n kẽng a tʋm-tʋmdbã nengẽ, n tɩ mik tɩ b leb n gõeeme. Sũ-sãangã yĩngã, b ra yaame. A Zezi zẽka a koɛɛg n yeel woto: “Yãmb gõee masã n vʋʋsdẽ la? A sekame. Wakat taame. Gese, b zãmba Ninsaal Biiga n kõ yel-wẽna rãmba. Yik-y tɩ d kẽnge. Gese, ned ninga sẽn zãmbd maamã kolgdame.”

A sẽn da gomd bal la a Zida Iskariot sẽn kolg ne neb kʋʋng sẽn zãad bug-vɩlens ne fɩtl dãmb la zab-teedo. Matɩe 26:30, 36-47; 16:21-23; Mark 14:26, 32-43; Luk 22:39-47; Zã 18:1-3; Hebre dãmba 5:7.

▪ B sẽn yi zugẽ doogẽ wã poore, yɛ la a Zezi tall a tʋm-tʋmdbã n kẽnge, la bõe la a tɩ maan be?

▪ A Zezi sẽn da wa n pʋʋsdẽ wã, bõe la tʋm-tʋmdbã ra maanda?

▪ Bõe yĩng t’a Zezi ra be yɩɩr sẽn yaa kãseng pʋgẽ, la bõe la a kos a Ba wã?

▪ A Zezi tʋʋlgã sẽn da lebg wa zɩɩm n tosdẽ wã wilgda bõe?