Zĩn-dãmbã nonga yõy yãgsgo
A Sʋɩtãan ne zĩn-dãmbã sɩng n nonga nen-kɛglmã, n dat wakat fãa n maand wẽnga. Pĩnd wẽndẽ wã, a Sʋɩtãan kʋʋ wẽn-sakd a Zoob rũmsã fãa, la a tʋm-tʋmdba. Rẽ poore, a kʋʋ a kambã. B ra yaa bãmb piiga. B ra tigma taab roog pʋgẽ, t’a kɩt tɩ “sob-kãseng” fugi, tɩ roogã lʋɩ n kʋ-b fãa. Sẽn paase, a kɩtame tɩ bã-kɛgeng yõk a Zoob. Yaa “nod-toos sẽn sɩng a na-sɩlpamã n tall n tɩ tãag a zugã.”—Zoob 1:7-19; 2:7.
A Zezi wakatẽ wã, zĩn-dãmbã ra maaname tɩ neb lebg mugs la zoense. (Matɩe 9:32, 33; 12:22) B namsa rao a ye, hal t’a ra pogend a meng ne kuga. (Mark 5:5) B kẽe bi-ribl a ye n kɩt t’a kelemdẽ, la b mi n lub-a tẽnga, n kɩt t’a virs hal tɩ “zab-a wʋsgo.”—Luk 9:42.
Pĩndã, zĩn-dãmbã maaname tɩ neb lebg bãad rãmba, la b kɩt tɩ kẽer lʋɩt tẽng n virsdẽ
Rũndã-rũndã, a Sʋɩtãan ne zĩn-dãmbã yãgsda yõy n yɩɩd pĩndã. Sɩd me, b sẽn dig-b saasẽ wã tɛka, b wẽnemã maneg n yãngame. Dũniyã gill zugu, kibayã d sẽn mi n wʋmdẽ wã wilgda b wẽnemã sẽn ta zĩig ninga. B lobda neb kẽer bãase, n namsd sãnda yʋng-yʋng tɩ b pa tõe n gũs wall b zãmsd zãms-yoodo. B modgda neb kẽer n kẽed ne-ba. B kɩtdame me tɩ sãnda lebgd gãeemse, nin-kʋʋdba, wall b yãgsd b mens yõyã.
Rũndã-rũndã, zĩn-dãmbã kɩtame tɩ kẽer lebg nen-kɛglem dãmba. B namsda sãnda yʋng-yʋngo, tɩ b zãmsd zãms-yoodo
A Lintina sẽn vɩ Surinammã yeelame tɩ zĩn n kʋ yẽ zakã neb 16, la a nams yẽ mengã yʋʋm 18. Zĩnã mi n pãb-a lame bɩ n kɩt t’a bẽ, pa rẽ bɩ a kɩt t’a lebg wa zu-kaoolg soaba. A sẽn yã woto wã kɩtame t’a yeel tɩ zĩn-dãmbã sã n kẽ neda, t’a “soab pa rat n sak n maan b sẽn datã, b sẽn nong yaa b nams-a, hal tɩ tũ ne a yõore.”
La a Zeova tõe n kogla sẽn tũud-b yẽ wã t’a Sʋɩtãan ra tõog n maan-b wẽng ye.—Yelbũna 18:10.