Dũni kãngã rebda yɛ?
Dũniyã gill zugu, yaa zu-loees la yel-beed la d nong n wʋmdẽ! Rẽ võor yaa bõe?
BÃANÃ: Bõmb rãmb la b maand tɩ pusd raas pʋsẽ. Karen-saam dãmb ne karen-biis la b tãood bug-raad lekoll dãmbẽ. Kamb la b zuud n zoet ne, b roagdbã sã n vẽsg bilf bala. B fãada pagb la neb sẽn kʋʋl wĩntoogo.
TŨUDMÃ: Tũudmã teenda zabã. Nebã ningda tũudmã taoor dãmb taale, b sẽn sõng n kʋ neb buudã zab pʋsẽ wã yĩnga. Tũudma taoor dãmb tʋmda raglem tʋʋm ne kom-bɩɩse, tɩ egiliizã solgdẽ. Neb wʋsg ye pa rebd pʋʋsgo, tɩ b koos wẽnd-doto.
TẼNGÃ: Kãg la b vargd ligd baoob yĩnga. Tɩɩs wʋsg la naong rãmbã keed n tugend bugum. Ko-bunds la nebã rẽgem tɩ b ye pa tõe n yũ ye. Luzin dãmbã rẽgd la zĩm yẽeb tʋʋm-te-paalã halkda zĩmã. Pemsmã rẽgmame tɩ vʋʋsgã lebg toogo.
BAO N KÕ NOORÃ: Afirik nen-taoor tẽnsã, b sã n fãoog nebã fãa paoong n pʋɩ tɩ zemse, ned fãa sẽn paamd yʋʋmd pʋgẽ pa zem baa fʋɩ ye. Taoor dãmbã rat-tɩ-loog lubda sosiete rãmbã, tɩ neb tusa tʋʋm sãamdẽ. Zãmb n dɩ wã kɩtame tɩ neb sẽn tʋm b vɩɩm tõr la bal ligd yɩ bõne.
KOMÃ: Dũniyã gill zugu, neb milyõ 800 la kom tar wakat fãa.
ZABÃ: Yʋʋm kob-gĩnd 20 soabã pʋgẽ, zabã kʋʋ sẽn yɩɩd neb milyõ 100. Nikleɛɛr zab-teed n be sẽn sek n tõe n sãam ãdem-biisã fãa naoor wʋsgo. Tẽng-n-biis ne taab zab beeme. Terorismã piuugda dũniyã gill zugu.
BÃ-LONGDS LA BÃAS A TAABA: Yʋʋmd 1918 tɛka, Ɛspayn fõosrã kʋʋ neb milyõ 21. SƖDA wã lebga “bã-loangdg ning sẽn kʋʋda neb n yɩɩd ãdem-biisã zãmaan fãa wã pʋgẽ.” Bãag ning b sẽn boond tɩ kãnsɛɛrã la sũurã bãas wata ne sũ-sãams dũniyã gill zugu.
Ra ges-y kɩbayã yembr-yembr bal ye. B yaa yɛl sẽn wa yaar bɩ? Bɩ b bee bãnd sẽn tɩ loe ne yɛl sẽn pak dũniyã gill la b sɩd tar võore?
[Zĩ-gũbri/Foto, seb-neng a 5]
Nebã yell sɩd paka Wẽnnaam bɩ?
Neb wʋsg n be tɩ yel-beed bɩ bõn sã n paam-ba, b rat n bãnga Wẽnnaam sẽn pa gɩdg yel-kãensã wã võore.
Nebã yell sɩd paka Wẽnnaam. A wilgda tõnd sore, la a yolsd tõnd masã menga. (Matɩe 11:28-30; 2 Tɩmote 3:16, 17) A maana bũmb n na n kɩt tɩ nen-kɛglmã, bãasã la kũumã sa wakat fãa yĩnga. A seglsã wilgdame tɩ pa tẽn-yɛng neb yell bal la a get ye, la yaa neb sẽn yit tẽnsã fãa, la buudã fãa la neb sẽn gomd goam toɛy-toɛya fãa yelle.—Tʋʋma 10:34, 35.
Wẽnnaam daabã pidsg yell sɩd paka tõnd bɩ? Yãmb mii saasã la tẽngã Naand sẽn ya a soab bɩ? A yʋʋr la a bõe? A raabã yaa bõe? Sogs-kãensã leoor bee Biiblã pʋgẽ. Beenẽ, a wilgda tõnd a sẽn maand bũmb ning n na n kɩt tɩ nen-kɛglmã ne bãasã la kũumã sa. Sẽn na yɩl n dɩ rẽ nafa, bõe la d segd n maane? D segd n bao n bãnga Wẽnnaam sẽn ya a soaba, la a raabã. D sã n pa tẽed Wẽnnaam, d pa tõe n dɩ a seglsã nafa ye. (Zã 3:16; Hebre dãmba 11:6) Leb n yaa tɩlae tɩ d sak a noyã. (1 Zã 5:3) Yãmb sɩd datame n sak Wẽnnaam noyã bɩ?
Sẽn na yɩl n bãng bũmb ning sẽn kɩt tɩ Wẽnnaam bas rũndã-rũndã yɛlã tɩ beẽ wã, d segd n wʋma yell a ye võor sẽn tar yõod wʋsgo. Biiblã wilgda a võore. B wilga yel-kãng sẽn ya a soab seb-kãngã pʋgẽ, seb-neng 15 pʋgẽ.