Yɛ la y vɩɩmã tar-y n debda?
• Neb wʋsg fõr n kẽe daar fãa vɩɩmã yɛlẽ n pa tagsd b sẽn debd zĩig ningã yell ye.
• Biiblã wilgda tõnd yel-kãsems nins sẽn watã. A leb n keoogda tõnd tɩ toeeng kãseng n wat ninsaalbã sigls pʋsẽ dũniyã gill zugu. Tõnd sã n dat n dɩ rẽ nafa la d zãag d mens ne yel-beedo, d segd n maana bũmb tao-tao.
• Neb kẽer n be n mi Biiblã sẽn yet bũmb ningã, n modgd n na n tũ-a, n yaool n basdẽ tɩ vɩɩmã yɩɩr kɩt tɩ b kẽed moogo.
• Yãmb sũurã nooma ne y vɩɩmã sẽn tar-y n debd zĩig ningã bɩ? Yãmb sã n wa geend n na n maan yɛlã, y geta bõn-kãens sẽn na n wom biis nins y vɩɩmã bõn-datɩ pʋgẽ kaoosg poorã bɩ?
[Zĩ-gũbri/Foto rãmba, seb-neng a 9]
Bõe n tar yõod n yɩɩd ne yãmba?
Yãmb magda bũmb nins sẽn pʋgdã yõod wãn to? Wilg-y b yõodã pʋgd-pʋgdg yãmb vɩɩmã pʋgẽ.
Bãmb wʋsg tara yõod vɩɩmã pʋgẽ, la y sã n segd n yãke, yaa bõe n wat pipi? yiib-n-soab zĩigẽ? n tar n debda.
․․․ Reemã/pemsem kokrã
․․․ Mam nug-tʋʋmdã
․․․ Mam yĩnsã laafɩ
․․․ Mam mengã sũ-noogo
․․․ Mam kẽed-n-taagã
․․․ Mam doagdbã
․․․ Mam kambã
․․․ Ro-neere, la fu-neeba
․․․ Bao n loog neb a taabã
․․․ Wẽnnaamã balengo
[Zĩ-gũbri, seb-neng 10, 11]
Yãmb sẽn yãk yam n na n maan bũmb ninsã na n wa kõ-y-la sũ-noog y vɩɩmã pʋgẽ bɩ?
GES-Y SOGS-KÃENSÃ
REEMÃ/PEMSEM KOKRÃ: Mam sẽn yãk yam n na n deem reem ninsã sõngd-m lame tɩ m vʋʋs bɩ? Ba a sã n noome, a tõe n wa sãamã m yĩnsã laafɩ bɩ n koms-m bɩ? Yaa “reem” buud sẽn na n noog m yĩnsã lɛɛr a wãn bala, la sẽn tõe n wa sãam m sũurã n kaoos bɩ? Baa reem ning mam sẽn datã sã n pa wẽnga, a rɩkda mam sẽkã wʋsg hal n deegd bũmb nins sẽn tar yõod n yɩɩdã zĩig bɩ?
MAM NUG-TƲƲMDÃ: A sõngda maam tɩ m paam m noor dɩɩb bɩ, bɩ m lebga a yamba? M dɩkda sẽk la modgr wʋsg a pʋgẽ hali t’a sãamd mam yĩnsã laafɩ bɩ? Bʋg la m nong n yɩɩda, tʋm lɛɛr dãmb n paas bɩ, bɩ n dɩk sẽk n zĩnd ne m kẽed-n-taagã bɩ m kambã? Mam tʋʋmdã taoor soab sã n kotẽ tɩ m maan tʋʋmd sẽn sãamd m sũur-kasetã bɩ sẽn lebsd tẽebã yɛl kɛɛng naoor wʋsgo, m na n kell n maana tʋʋm-kãng tɩ b ra wa yiis-m tʋʋm bɩ?
MAM YĨNSÃ LAAFƖ: Mam geta m laafɩ wã yell wakat fãa bɩ? Yaa rẽ yell la m sõsd n pa satẽ bɩ? Mam sẽn get m yĩnsã laafɩ yell to-to wã wilgdame tɩ m tagsda m zakã neb yell bɩ?
MAM MENGÃ SŨ-NOOGO: Yaa rẽ n pak maam n yɩɩd bɩ? Mam lebsda m kẽed-n-taagã bɩ m zakã neb sũ-noog kɛɛng bɩ? Mam sẽn baood-a to-to wã wilgdame tɩ m yaa sɩd Wẽnnaamã balemd bɩ?
MAM KẼED-N-TAAGÃ: Mam geta m kẽed-n-taagã wa m tũud-n-taaga, m sã n wa rat bal bɩ? Mam waoogda m kẽed-n-taagã, n get-a wala ned sẽn segd ne waoogr bɩ? Mam sẽn tẽed Wẽnnaamã tara pãn-tusdg mam sẽn get m kẽed-n-taagã to-to wã zug bɩ?
MAM DOAGDBÃ: Mam yʋʋmã sã n nan pa ta tɩ m tõe n sek m menga, m sakda m doagdbã, n leokd-b ne waoogre, n tʋmd tʋʋm nins b sẽn bobl-ma, n wat yir lɛɛr ning b sẽn yãkã, n lakd m meng ne tũud-n-taas la yel-manesem b sẽn yeel maam tɩ m zãag m meng ne bɩ? Mam sã n yaa kãsma, m kelgda m roagdbã ne waoogre, n sõngd-b wa sẽn zemse, raab sã n wa beẽ bɩ? Mam sẽn tar manesem ning ne-bã yaa Wẽnnaam Gomdã sagls sakr yĩng bɩ, bɩ yaa mam mengã nafr yĩng bala?
MAM KAMBÃ: Mam getame tɩ m segd n zãmsa m kambã vɩɩm manesem noy sẽn yaa sõma, bɩ m gũudame tɩ b zãms-b yel-kãens lekollẽ wã? Mam dɩkda sẽk n be ne m kambã, bɩ m tagsdame tɩ yaa reem-teedo, televiziõ wã bɩ ordinatɛɛrã n segd n belg-ba? Wakat fãa mam kibinda m kambã, b sã n pa tũ Wẽnnaam noyã, bɩ yaa m sũur sẽn wat n yik bal la m maand rẽ?
RO-NEERE, LA FU-NEEBA: Bũmb ning sẽn kɩt tɩ mam manegd m mengã la bũmb nins m sẽn so wã, yaa sẽn na yɩl n dɩ yʋʋr m taabã taoor bɩ? Yaa m zakã rãmb neer yĩng bɩ? Yaa m sẽn yaa Wẽnnaam balemdã yĩng bɩ?
BAO N LOOG NEB A TAABÃ: M tagsdame tɩ tara yõod tɩ m maan yɛla tɩ yɩ sõma bɩ? Mam maoodame n dat n loog m taabã bɩ? Ned sã n maan bũmb tɩ yaa sõma n yɩɩd maam, sũ-kiir n tar-m bɩ?
WẼNNAAMÃ BALENGO: Ne maam, paam n ta Wẽnnaam yam n tar yõod n yɩɩd m sẽn na n ta m kẽed-n-taagã, m kambã, m roagdbã la m tʋʋmdã taoor soab yam bɩ? M datame n lebs Wẽnnaam tʋʋmdã poorẽ, sẽn na yɩl n kell n maneg m vɩɩmã bɩ?
GES-Y BIIBLÃ SAGLS NEERE
Wẽnnaam bee zĩ-bʋg yãmb vɩɩmã pʋgẽ?
Koɛɛg Soaba 12:13: “Zoe Wẽnnaam la f sak bãmb tõodo. Tɩ bõe, ninsaal fãa tog n maana woto.”
SOK-Y Y MENGA: Mam vɩɩmã wilgdame tɩ m geta yɛlã woto bɩ? Yaa Wẽnnaam noyã sakr n wilgd maam m sẽn segd n tʋm m tʋʋmã to-to zakã pʋgẽ, nug-tʋʋmã zĩigẽ bɩ lekollẽ wã bɩ? Bɩ bõn-kãensã wall vɩɩmã zu-loees n wilgd m sã n na n yãka sẽk bɩ m pa na n yãk sẽk Wẽnnaam yĩnga?
Zems-n-taar bʋg buud la y tar ne Wẽnnaam?
Yelbũna 3:5, 6: “Teeg Zusoaba ne f sũur fãa la f ra teeg f meng bãngr ye. Fo sẽn maand bũmb ninga fãa, bɩ f tẽeg Zusoaba yelle, la b na n demsa fo sorã.”
Matɩe 4:10: “Waoog Zusoaba [a Zeova] fo Wẽnnaam, la f sak bãmb bala.”
SOK-Y Y MENGA: Mam tagsda woto ne Wẽnnaam bɩ? Mam daar fãa tʋʋma, n paas mam sẽn maood to-to ne yɛlã wilgdame tɩ m teega Wẽnnaam la m sakd-a bɩ?
Sã n yaa ne yãmba, Biiblã kareng la a zãmsg yõod taa zĩ-bʋgo?
Zã 17:3: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn ka to la a Zezi Kirist yãmb sẽn tʋm a soabã.”
SOK-Y Y MENGA: Sẽk ning mam sẽn dɩkd n karemd Wẽnnaam Gomdã la m tagsd a zug sõma to-to wã wilgdame tɩ m sɩd tẽed-a lame bɩ?
Sã n yaa ne yãmba, kiris-neb tigissã kẽnd yõod taa zĩ-bʋgo?
Hebre dãmba 10:24, 25: ‘Bɩ tõnd tẽeg taab yelle la d yik taab ratem tɩ maan nonglem la tʋʋm sõama. Bɩ d da bas taab tiging ye, tõnd sẽn yã tɩ daar kolgdame wã yĩnga.’
Yɩɩl Sõamyã 122:1: “Mam maana sũ-noogo b sẽn yeel maam: ‘Tɩ d kẽng Zusoaba roogẽ.’ ”
SOK-Y Y MENGA: Mam vɩɩmã manesem wilgdame tɩ m tara mi-beoog ne Wẽnnaam Gomdã sor-wilgr bɩ? Kiuug sẽn loogã, kiris-neb tigissã la m pa kẽnge, m sẽn bas bũmb a to tɩ reeg rẽ zĩigã yĩng bɩ?
Yãmb moonda neb a taabã ne yẽesem tɩ b bãng Wẽnnaam la a raabã bɩ?
Matɩe 24:14: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”
Matɩe 28:19, 20: “Bɩ y kẽng n maan neba buud fãa tɩ b yɩ mam karen-biisi . . . La y zãms bãmb tɩ b sak bũmb nins fãa mam sẽn da togs yãmbã.”
Yɩɩl Sõamyã 96:2: “Bɩ y yɩɩl Zusoaba yĩnga n waoog bãmb yʋʋre. Bɩ y moon bãmb fãagr koɛɛga daar fãa.”
SOK-Y Y MENGA: Tʋʋm-kãngã sɩd bee zĩig ning sẽn segd ne-a wã mam vɩɩmã pʋgẽ bɩ? Mam sẽn kẽesd m meng a pʋgẽ to-to wã wilgdame tɩ m kɩsa sɩd tɩ wakat ning pʋgẽ d sẽn vɩyã pa reem yell bɩ?