“Wok wala Libã sɛdr tɩɩga”

LIBÃ tãensã sẽn be rasãndã zutu, tɩɩs n yit be tɩ b boond-b tɩ Arz Ar-rab, sẽn dat n yeel tɩ “Soaala sɛdr tɩɩse.” Tɩ-kãsems kãensã sẽn tar vã-kẽes wakat fãa wã, sẽn da yi tãensã zut n lud-bã, b goma b yell Biiblã pʋgẽ naoor 70. B sẽn gom a yell Biiblã pʋgẽ yɩɩda tɩɩg a to buud fãa.

Sẽn na yɩl n bilg Libã sɛdr tɩɩsã sẽn yaa parwẽnã, Biiblã tũnugda ne gom-biis wala “sõma” la “kãsenga.” (A Salomo Yɩɩllã 5:15, NW; Ezekɩɛll 17:23, NW) Sɛdr tɩɩg bedrmã la a raadã kaoosg kɩtame t’a yʋʋrã yi sã n yaa ne rot meeb la koom-kogend kaab la teed maaneg wɛɛngẽ me. Raadã yũug la a sẽn yaa moomd-moomdã bee yamleoog ne nebã, la a sẽn tar sũm wʋsgã kɩtdame t’a pa põogdẽ, la bõn-vɩɩl bõoneg pa sãamd-b ye. Tɩɩsã yaa wogd wʋsg la b yaa bɛda, tɩ b woglmã tat metr 37 tɩ b seesã gilg-n-sog woglem tat metr 12, la b yẽgã suda tẽng wʋsg n yaa kɛgemse. Pa lingr la rũndã-rũndã tɩɩs-nanambsã bilgd-b wala “dũni wã pʋgẽ tɩɩg sẽn tar ziir n yɩɩd tɩɩsã sʋk” ye!

Bãngr-gomd pʋgẽ, Biiblã gʋlsd a Ezekɩɛll maka Mesi wã ne sɛdr tɩɩg willi, Wẽnnaam meng sẽn sende. (Ezekɩɛll 17:22) Sɩd-sɩda, Hebre gom-biig sẽn yaa “sɛdrã” yita gom-yẽgrẽ võor sẽn yaa “yɩ kãn-kãe” pʋgẽ. Rũndã-rũndã, Mesi a Zezi Kirista karen-biisã me segd n “yalsa kãn-kãe tẽebã pʋgẽ, . . . n bɩ n tall pãnga,” wala sɛdr tɩ-wok sẽn yas kãn-kãe. (1 Korẽnt dãmba 16:13, NW) Wãn-wãn la b tõe n maan woto? B sẽn na n kɩɩsd pãn-tusds sẽn pa kiris-ned rẽnda, la d tõogd toog burkĩndlmã sor zug la Wẽnnaam baleng pʋgẽ kãn-kãe. B bilga b rãmb nins sẽn maand woto wã Biiblã pʋgẽ wala “nin-tɩrs . . . [sẽn] bɩt n lebgd wogd wala Libã sɛdr tɩɩga.”—Yɩɩl Sõamyã 92:12, The New English Bible.