Rĩungã Koe-moondb Togsdame

B moonda ‘nana la toog pʋgẽ’

ZABRÃ sẽn varg Bosni-Ɛrzegovin wakatã, neb tusa paama nams-toaaga. Makr kãnga wakate, a Zeova Kaset rãmbã maana b sẽn tõe fãa sẽn na yɩl n kõ nebã raoolg la saagre. Sẽn pʋgdã yaa kaset soab sẽn tʋm Sarazevo lɛtr a sẽn gʋls kɩbay sẽn tũusi.

“Vɩɩmã yaa toog ka, la nebã sakda Biiblã sɩdã sõma. Tẽnga pʋgẽ Kaset rãmbã kõta mak-sõng tõog-toogã wɛɛngẽ. B tarmã laogã wɛɛngẽ paooda wʋsgo, la b tara yam-tagsg sẽn yaa sõma wʋsgo. Kom-bɩɩs nins sẽn be tigengã pʋgẽ fãa la bal bee wakat fãa ministɛɛrã pʋgẽ. Koe-moondb paalsã paamda raoolg ne yẽesem kãnga yĩnga, la yaa bũmb sẽn wɛ ne bãmb tɩ b rɩk lɛɛr 60 bɩ sẽn yɩɩd woto n kẽes ministɛɛrã pʋgẽ tao-tao bala b pipi moonegã kiuug pʋgẽ tɛka.

“Zak ne zak moonegã sẽn yãk a toogo, tõnd maka manesem a taab sẽn na yɩl n taas nebã koe-noogã. Wala makre, d sẽn kẽng galʋ-tẽngã yaadẽ n taas nebã Biiblã sɛbã woma biis sõma.

“B kõo kaset me logto-yiy pʋsẽ. Sarazevo logtor-yir sũur-bãasã zĩigẽ, logto-kãsmã reega yʋʋmd 1996 Réveillez-vous! wã yʋʋm-sar kiuug rasem a 8 rẽnda, t’a poorã gom-zu-raoog yaa: ‘Sũur-bãaga (Crise cardiaque): Bõe la b tõe n maane?’ A kosame tɩ b paas a taab t’a tõog n pʋɩ logtoɛɛmb a taabã. B ra kõo Kaset rãmbã sor wakat kãnga tɩ b kẽ n ges bãad rãmba fãa sẽn be yẽ tʋʋmã zĩigẽ wã. Woto, sẽn yɩɩd lɛɛr a yembr bilf pʋgẽ, sẽn yɩɩd periodik rãmb 100 la b ra pʋɩ bãad ne a to gãagẽ. Bãad rãmb wʋsg yeelame tɩ ra yaa pipi la woto ned sẽn wa n ges bãmb logtor-yirã n kõ raoolg la saagre.

“Sasa a to, b tɩ gesa kambã bãas zĩigẽ ne periodik rãmb gom-zut sẽn zems ne kambã. Logto-poak sẽn yaa b taoor soabã me reega Mam Biibl kɩbay sebrã a wãn b sɛb karengã roog yĩnga. Masã ma rãmb nins sẽn wat n get b kambã logtor-yirã karemda Biiblã kɩbay ne-b daar fãa. B rɩka segls me sẽn na yɩl n tɩ ges logtor kãnga a zakẽ.

“Sarazevo pʋgẽ wã O.T.A.N. (Organisation du traité de l’Atlantique Nord) sodaas tusa sẽn yit tẽns toɛ-toɛy n be be. Bãmb me paama kaset kũun sõma. Wakat ninga, d moonda sodaas saar saar n tũnugd ne Une bonne nouvelle pour toutes les nations seb-bilã n paas Gũusg Gasgã la Réveillez-vous! wã periodik rãmb buud-goam toɛ-toɛy pʋsẽ. Sẽn yɩɩd periodik rãmb 200 la b ra pʋɩ Itali sodaasã gãag zĩisẽ. Sẽn yaa lingrã, yaa tɩ Itali sodaas wʋsg yeelame tɩ bãmb nan zɩ n gom ne a Zeova Kaset rãmb abada. Dẽ, tõnd paam n sõsa ne-b Sarazevo pʋgẽ.

“Daar a yembre, b ra yalsa sodaas saar sorã kɩrengã. Mam kogsa saarã ne m maasem tɩɩga, la sodaag n yi. Mam wilga yẽ Gũusg Gasgã t’a poorẽ gom-zu-raoogã yaa: ‘Laafɩ Koe-taasdba: B yaa ãnd dãmba?’ Sodaagã gesa maam n sʋke: ‘Yãmb pa a Zeova Kaset soab wɛ, bɩ bõe?’ A sẽn bãng tɩ m yaa rẽ wã poore, a leokame, ‘Mam pa tẽed ye, yãmb bee ka me la? Zĩig n be tẽnga zug ka Kaset rãmbã sẽn kaẽ bɩ?’ ”

Tʋm-tʋmd a Poll saglame: “Bɩ f moon Wẽnnaam koɛɛgã, la f nang pãng wakat fãa, naana wala toog pʋgẽ.” (2 Tɩmotɩ 4:2) Wala b tẽed-n-taasã sẽn be dũni wã gill zugã, a Zeova Kaset rãmbã sẽn be Sarazevo wã maanda woto, baa b na kẽng bãad gãag ne a to la sodaas saar ne a toẽ!