Zu-soben-dãmbã pẽgda Kaset rãmbã

Kadigs sẽn yaa Ɛspayn batayo sik-zĩig galʋ-tẽng sẽn yaa kɩlometr 500 Madrid goabg la nen-taoor babgã. A meerã sẽn yaa a Dona Teofila Martineez kõo a Zeova Kaset rãmbã palak (foto wã sẽn be yĩngrã). A karemda woto: “Kadigs mɛɛri wã n n kõ a Zeova Kaset rãmbã n na n wilg b nanebo, b lagem-n-tʋma la b modgrã galʋ-tẽngã yĩnga.” Bõe la Kaset rãmbã maan n paam waoogr kãngã?

Yaa mi-beoog kũun Kaset rãmbã sẽn da paam tʋʋmd ning b sẽn maan n toeem galʋ-tẽngã ɛstaad minisipall babg a ye tɩ lebg paalgã yĩnga. Kaset rãmb kobs tʋma ne yamleoog wɩkɛn dãmb wʋsg sẽn na yɩl n sõng n lebs n maneg Karãnza ball-tãoog ɛstaadã tẽngr rotã we-kɛɛng-zĩisi. Masã, b rãmb nins fãa sẽn tʋmd ne ɛstaadã paamda koomã, tuyo rãmbã manegr la tẽngã sẽn lebg n manegã nafa.

Sasa a wãn pʋgẽ, a Zeova Kaset rãmbã talla zems-n-taar sẽn be yamleoogo ne Kadigs galʋ-tẽngã. Yʋʋmd fãa, ne sõmblem, galʋ-tẽngã mɛɛri kõta sor tɩ Kaset rãmbã paamd Karãnza ɛstaadã b yʋʋmd-yʋʋmd bab-sak tigis-kãsengã yĩnga. Woto yĩnga, Kaset rãmbã sũur yaa noog tɩ b maan b sẽn tõe sẽn na yɩl n sõng n maneg ɛstaadã t’a pa n kell n yɩ yɩlemde.

Baasg zãnga, b sẽn mii n paamd segb n pids yĩngã tʋʋmã sẽn yãk a toogo, a Zeova Kaset rãmbã kaagda galʋ-tẽngã yags wakat fãa sẽn na yɩl n sõng nin-buiidã neng a to pʋgẽ. B moonda Wẽnnaam Rĩungã ‘koe-noogo’. Sɩda, b pa kẽesd b mens b zãma sʋk moonegã pʋgẽ sẽn na yɩl n paam ninsaalb waoogr ye. Yaa a Zezi noorã sakr yĩng la b moond “soolem koe-noog kãngã” la b “maan[d] buudã fãa neb tɩ b yɩ karem-biisi.” (Matɩe 24:14; 28:19, NW) Ne woto maanego, a Zeova Kaset rãmbã saagd n na n sõgena nebã b sẽn zãmsd nin-buiidã tɩ b kẽn ‘tɩrlem sorã zugã.’—Yelbũna 12:28.