Rĩungã Koe-moondb Togsdame
“Wẽnnaam tõee bũmb fãa”
GOM-KÃENSÃ sẽn be Matɩe 19:26 pʋgẽ wã pidsa pʋg-poll zug Venezuela. A sẽn zãms a Zeova teegr zãng-zãng poore, a ra paam n tõoga yel-kãsenga. Ad a sẽn yete:
“Mam yaab poakã ra yaa nin-sõng la ned sẽn tar nonglem wʋsgo. Zu-bʋko, a kii mam sẽn da waa n tar yʋʋm 16. A kũumã sẽn zab maam pa woto tɛk ye. Mam da kell n zarbame, hali n pa rat n yi roogẽ wã n deem samandẽ wã ye. Mam waa n baasame n bak n vɩ m yembr zãntãa la bala.
“M da pa rebd lekolle, m da pa tʋmde. M do-gãagẽ wã bal la m da be. M sẽn da yaa m yembr n ka zoa ba a ye wã, m namsa ne yam-ka-m-meng sẽn pa yɩ reem yell ye. M da geta m mengã wa ned sẽn ka yõodo, n da rat n ki tɩ fãa kell n sa. M da sʋkda m meng woto wakat fãa: ‘M vɩɩmã yõod yaa bõe?’
“Mam ma wã ra minim n deegda Gũusg Gasgã la Réveillez-vous! wã pʋg-poll sẽn yaa Kaset soab yʋʋr sẽn boond t’a Gisela nengẽ. Daar a yembre m ma yã a Gisela sẽn da loogd tõnd yira noor t’a kos-a t’a wa sõng-ma. A Gisela sakame n mak n gese, la mam tõdgame n pa rat n yã-a ye. Rẽ pa kɩt t’a Gisela bas tɩ lʋɩ ye. A gʋlsa maam lɛtr n yeel-m t’a ra ratame tɩ m yɩ a zoa, la tɩ ned sẽn yɩɩd yẽ zĩig sẽn zãr n da rat n yɩ mam zoa me. A yeelame tɩ nin-kãng soabã ra yaa a Zeova Wẽnnaam.
“Rẽ sɩd kẽe mam sũurã sõma tɩ m leok-a n gʋls-a. D gʋlsa taab n maan kiis a tãabo. Yaa a Gisela raoolgã la a pẽdgrã yĩng n kɩt tɩ mam wa baas n paam daood n seg-a. Tõnd sẽn seg taab pipi wã, a Gisela zãmsa Biiblã ne maam, n tũnug ne Y Tõe n Vɩɩnda Wakat Sẽn-kõn-sa Tẽng zug Arzãnẽ sebrã. Zãmsgã poore, a yeela maam tɩ m wa tigisgẽ Rĩungã Roogẽ. Linga maam. Mam da maana yʋʋm a naas n pa yi roogẽ wã ye, tɩ yi n kẽn sorã zug ra kõt maam dabeem.
“A Gisela ra tara sũmar wʋsg ne maam. A yeel-m lame tɩ m da yaees baa bilf t’a na n yãag-m-la tigisgẽ wã. M baas n sakame. D sẽn waa n ta Rĩungã Roogẽ wã, m sɩngame n digd tɩ m tʋʋlgã kaoogdẽ. M da pa tõe n pʋʋs ned ba a yembr ye. Baasg zãnga, m sakame n na n ket n debd tigissã, la a Gisela waa n peega maam semen fãa.
“Sẽn na yɩl n sõng maam tɩ m tõog m dabeemã, a Gisela ra tallda maam pĩnd n kẽng tigissẽ wã. Tõnd da bee rig-noorẽ wã n pʋʋsd watbã yembr-yembre. Woto, ra yaa ned a ye bɩ neb a yiib bal la m da segd vugr yelle, la pa neb sull vugr yell ye. M sã n wa tagsdẽ tɩ m ye pa tõe, a Gisela ra sõdgda Matɩe 19:26 sẽn yet tɩ: ‘Ned ka tõe bõn-kãens ye, la Wẽnnaam tõee bũmb fãa’ wã.
“Baa ne sẽn da pa nana wã, m da waa n baas n tõe n kẽnga neb sẽn tigisẽ wʋsg n yɩɩd woto bab-sak-sull tigis-kãsengẽ. Ad sɩd yɩɩ zĩ-loangdg kãseng meng ne maam! Yʋʋmd 1995, bõn-bɩʋʋng kiuugã, mam maana raood tʋʋmd n tɩ gom ne kẽem dãmbã n yeel-b tɩ m dat n kẽesa m meng koe-noogã mooneg pʋgẽ zak-zaka. Kiis a yoob loogr poore, yʋʋmd 1996, tʋʋl-nif kiuugã, m da reega koom lisg n wilg tɩ m dɩka m meng n kõ a Zeova.
“Ned sẽn sʋk maam sẽn pa kaoos tɩ yaa wãn-wãn la mam paam daood n maan woto, m leokame: ‘Mam sẽn tʋll n ta a Zeova yamã ra yaa kãseng n yɩɩd m dabeemã.’ Baa ne yam-ka-m-mengã sẽn paamd-m wakat-wakatã, mam sẽn yaa wakat fãa so-pakdã paasa mam sũ-noogã. M sã n ges sẽn loogã, rẽnda m sak a Gisela sẽn yeelã. Masã m tara Zoa sẽn tagsd m yelle la sẽn ‘kõt maam pãngã.’”—Filip rãmba 4:13.
[Picture on page 29]
“Mam sẽn tʋll n ta a Zeova yamã ra yaa kãseng n yɩɩd m dabeemã”