“Pʋg-neer sɩd sẽn tar sũ-noogo”

WAKAT-WAKATE, neb kẽer yetame t’a Zeova Kaset rãmbã wãada kãadem. Baasg zãnga, kãadem wʋsg sẽn tõoge, tɩ kẽed-n-taag a yembr bal yaa a Zeova Kaset soabã wilgdame tɩ woto pa sɩd lɛ-lɛ ye. Biiblã sagls tũub zak pʋgẽ vɩɩmã pʋgẽ kɩtdame tɩ kãadem wʋsg tar sũ-noogo, wala lɛtr ning sẽn pʋgdã b sẽn yiis Fãrens zʋrnall pʋgẽ wã sẽn wilgdã.

“Sẽn na maan yʋʋm 28 la bal masã, mam pagã sẽn yaa pʋg-neer sẽn yaa a Zeova Kaset soabã, m yɩɩ sɩd sẽn tar sũ-noogo. A wuba mam kamb a nu wã, t’a yiib ra pa yẽ meng kamb ye. A gesa b yell la a nong b fãa tɩ welgr pa zĩnd ye. M sẽn yaa ãnterpiriiz sẽn tar tʋm-tʋmdb 45 taoor soabã, m tõe n kɩsa sɩd t’a sõnga wʋsg n kɩt tɩ m tõog m nug-tʋʋmdã pʋgẽ. Yaa rẽ n so tɩ m sẽn yã sõsg m daasenkam zʋrnallã pʋgẽ sẽn wilgd t’a Zeova Kaset rãmbã yaa yell n kõ Lot-et-Garonne babgã nebã, m dɩka sard n na n kõ-y kaset sẽn tar pãng yellã zugu.”

Lɛt-kãng pʋgẽ b yeta woto me: “B pa yũud sɩgaare, b pa yũud rãam n suuda. Rẽ yaa yell n kõ ned bɩ? B yaa kiris-neb sẽn yaa sugr dãmba, sẽn pa modgd ned ba a yembr t’a tũ noy nins b sẽn tũudã ye. Sẽn yaa lebende, b yaa mak-sõma zĩis wʋsg pʋsẽ. . . . Tɩ b rɩɩ ligd bɩ b koosda dorgã, b pa be a pʋgẽ ye. B pa maand rakõt pʋleng ye, la bɩ y sɩd bãng woto, b vɩɩ wa neb a taabã. . . .

“Tõe tɩ y sʋk-m woto: Bõe yĩng tɩ fo mengã pa a Zeova Kaset soaba? Yaa b sẽn baood tɩ f tall kiris-neb tẽebã la f tũ vɩɩm manesem noy sẽn pa vigsd neb wʋsg sẽn pa sakd n tũ wã yĩnga.”