B “Zoee [Sɩd] Wẽnnaam[ã]”

ISRAƐLL nebã sẽn da be yembdẽ Eziptã, Hebre pʋg-roagsdb a Sifra la a Pua ra bee yel-gĩtem pʋgẽ. Sẽn na yɩl n yals sãambã fɩɩgr sẽn da yaa wʋsgã, a Faraõ kõo pʋg-kãensã noor woto: “Yãmb sã n dogsd Hebre pagbã, yãmb sã n yã tɩ b rogda raopa, bɩ y kʋ-ba.”—Yikri 1:15, 16.

A Sipra la a Pua “zoee [sɩd] Wẽnnaam[ã],” rẽ n so tɩ b tall raood n “ka maan wa Faraõ sẽn yeel bãmba ye.” Sẽn yaa lebende, b basa komdibli wã tɩ b vɩɩmde, baa ne sard dɩkr vẽeneg woto sẽn da tõe n wa ne yell n kõ-bã. A Zeova “ninga pʋg-roagsdba zut barka,” n keo-ba, b sẽn tʋm n fãag yõyã yĩnga.—Yikri 1:17-21.

Kɩba-kãngã wilgda vẽeneg t’a Zeova nonga neb nins sẽn sõgend-a wã. A Zeova ra tõe n gesa a Sifra la a Pua sẽn maan bũmb ningã wala sõmblem tʋʋmd ne neb bala, baa ne b sẽn tall raoodã. Sẽn paas menga, pag ba a yembr sẽn mi a neng pa na n sak n kʋ kamb ye! Baasg zãnga, a Zeova pa yĩmd tɩ ninsaalb kẽer maana tʋʋm beed b sẽn zoe ninsaal yĩng ye. A ra miimi tɩ pʋg-roagsdb kãensã ra pa rat n wilg sõmblem ne neb a taabã bal ye, la ra yaa wẽn-zoeer la wẽn-sakr yĩng me la sẽn kɩt tɩ b maan woto wã.

Ad d sɩd tõe n talla mi-beoog ne Wẽnnaam sẽn pa yĩmd d kɩs-sɩd tʋʋmã! Sɩda, tõeeme tɩ tõnd ned ba a yembr pa seg tẽeb makr ning sẽn paam a Sifra la a Pua wã ye. Baasg zãnga, d sã n dɩk sard kãn-kãe n na n maan sẽn yaa tɩrga, yaa lekollẽ wã, d tʋʋmã zĩigẽ bɩ sẽn yaa zĩig ning fãa, a Zeova pa get d kɩs-sɩd nonglmã wa bũmb sẽn segd bal ye. Sẽn yaa lebende, “bãmb yaa neb nins sẽn baood bãmba roanda.” (Hebre dãmba 11:6) N-yẽe, “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga, yãmb sẽn sõng bãmb neba n ket n sõngdẽ wã ye.”—Hebre dãmba 6:10.