D kɩls tʋʋmã ne pemsem kokrã tɩ zemse

PEMSEM kokr yaa fu-neere, la a ningr wakat fãa pa na n pids ratem ye.” Ne gom-kãensã, gʋlsd yʋʋr b sẽn pa togs bilgda pemsem kokrã yõod wa sẽn zemse. Baasg zãnga, a wilgdame tɩ b segd n kɩls-a lame t’a zems ne tʋʋm sẽn womd biisi.

Biiblã gʋlsd a yembr vʋʋsmã sẽn vẽnege, a Salomo me goma yel-kãngã yelle. Rĩm kãngã sẽn yaa yam soabã wilgame tɩ d segd n laka d mens ne maan-tɩ-loog a yiibu. Pipi a yeelame: “Yalem mobgda a menga n wãbd a meng nemdo.” (Koɛɛg Soaba 4:5) N-yẽe, kʋɩɩng tõe n kẽesa ned naong pʋgẽ. Rẽ tõe n sãama kʋɩɩm yĩnsã laafɩ bɩ n yãk a yõorã menga. Sẽn yaa lebende, neb n be tɩ bũmb kae sẽn tar yõod n dok tʋʋmã ye. A Salomo bilga b nang-pãngã sẽn ka vʋʋsgã wala “zaalem la a wẽnda ned sẽn digd sobgo.”—Koɛɛg Soaba 4:4.

A Salomo bee bʋʋm a sẽn sagl tɩ d tall kɩls tɩ zemsã: “Nug a ye sẽn tar vʋʋsgo n são a yiib sẽn namsd zaalem.” (Koɛɛg Soaba 4:6) Ned segd n ‘maana sũ-noog ne a tʋʋm-toogo,’ sẽn dat n yeel t’a segda wakat-wakat n dɩk sẽk n dɩ a sẽn paama yõodo. (Koɛɛg Soaba 2:24) La yɛl a taab n segd n be vɩɩmã pʋgẽ n zʋʋg nug-tʋʋmdã. Zemsame tɩ tõnd rɩk sẽk n ges d zakã rãmb yelle. A Salomo wilga vẽeneg tɩ pipi zɩɩb sẽn zao tõnd zut pa d nug-tʋʋmdã ye, la yaa Wẽnnaam sõgenego. (Koɛɛg Soaba 12:13) Yãmb bee neb nins sẽn tar tagsg sẽn kɩls tɩ zems tʋʋmã wɛɛngẽ wã sʋk bɩ?