D tõog kambã wubr zu-loeese

KAMB wubr rũndã-rũndã, sẽn yɩɩd fãa kamb nins sẽn be b bi-bɩɩlmã zugã wubr yaa tʋʋm toog meng n kõ roagdbã. The Gazette b sẽn yiisd Montreal sẽn be Kanada tẽngã wilgdame tɩ rãama yũub la dorgã rɩkr yaa yɛl “kom-bɩɩsã sẽn nong n maandẽ.” Seb-kãng wilgda vẽeneg tɩ roagdbã tara “zɩɩb sẽn yaa gũus [b] kom-bɩɩsã manesem toeengo.”

Bõe sẽn tõe n wilg tɩ kom-bɩɩsã tara zu-loees a woto la roagdba segd n bao n bãnge? Amerik Akademi ning sẽn get kambã la kom-bɩɩsã sũ-sãams yellã wilga bãn sẽn pukd yĩngẽ wã, yĩn-sidgẽ wã la kambã vɩɩm ne neb a taabã pʋgẽ. Yaams sẽn kaoosdã, zʋgã toeengo, rɩk sẽk tɩ loog n be f roogẽ n ka yita, tak-n-tɩ-m-takã, la maan yɛl sẽn kɩɩsd tõogã bee rẽ sʋka.

Wãn-wãn la roagdbã tõe n kogl b kambã ne yɛl maan-n-ges sẽn yaa wẽns woto la ne yel-kãens bi-wẽnsã? A Dr. Jeffrey L. Derevensky, sẽn yit McGill Univɛrsite n wã tẽedame tɩ f sã n yẽsd ne kambã ne pʋ-peelem la f zãmsd-b tɩ b waoog nebã biig wubr wakate, tõe n yõbga zu-loeesã kaoosg zugẽ. The Gazette paasdame tɩ baa kom-bɩɩsã sẽn nong n tʋll soog-m-meng n yɩɩdã, b ket n data “b roagdbã sor-wilgri, b sõngre, b siglg la b nonglem.” Gom-kãensã yaa yembr ne Biiblã yel-bũn-kãngã sẽn yet woto wã: “Zãms biig a manesem sẽn tog n yɩ to-to. La a sã n lebg nin-kẽema, a ka na n bas-b ye.” (Yelbũna 22:6) Wẽnnaam sagenda roagdbã tɩ b yɩ mak-sõma, tũud-n-taase, yẽsdba, la karen-saam dãmba.—Tõodo 6:6, 7.