Daar zalle: Y na n zĩnda be bɩ?

DAAR b sẽn pa yĩmd sẽn zĩnd yʋʋm 3 500 sẽn looge, Wẽnnaam a Zeova kɩtame tɩ Israɛll nebã sẽn da be yembdẽ Eziptã yir fãa kʋ pe-bil bɩ boɛɛg n sĩin a zɩɩmã rotã kʋɩlems ra-lugs zut la kʋɩlemsã zutẽ. Baraar yʋngã menga, Wẽnnaam malɛkã zʋʋga rot nins zut b sẽn da ning bãnd woto wã, la a kʋʋ Ezipt nebã fãa zak fãa pipi komdibli. Yɩɩ woto la Israɛll nebã paam b mense. Yel-kãngã tẽegr kibsã yĩnga, Zʋɩf rãmbã maana Pakã.

A Zezi Kirist sẽn maan a yaoolem Pakã ne a tʋm-tʋmdbã n sa poore, a lugla rɩɩb sẽn da na n tẽeg a kũumã sẽn yaa maoong kũumã. A rɩka bur sẽn ka rabɩll n kõ a tʋm-tʋmdbã n yeele: “Bɩ y reeg n dɩ, yõ wã yaa [makda, NW ] mam yĩnga.” Rẽ poore a rɩka divẽ, n yeele: “Bɩ yãmb fãa yũ. Tɩ bõe, yõ wã yaa [makda, NW ] mam zɩɩm sẽn yaa kãab paalg zɩɩm sẽn daag neb wʋsg yel-wẽna sugr yĩnga.” A Zezi yeelame me: “Ket-y n maand woto n tẽegd mam yelle.” (Matɩe 26:26-28; Luk 22:19, 20, NW ) Woto, a Zezi kõo a karen-biisã noor tɩ b ket n maand a kũumã tẽegr kãngã.

Rõandã, a Zezi kũumã tẽegr tɩ zemsa ne tʋʋl-nif kiuug rasem 19, arb daare, wĩndgã lʋɩɩs poore. A Zeova Kaset rãmbã sẽn be dũniyã gill zugã na n tigma yʋʋn-kãng sẽn yaa zallã sasa n maan Tẽegr kãngã wa a Zezi sẽn yeelã. D boond-y-la ne sũ-noog wʋsg tɩ y wa lagem tõndo, n gese. Sʋk-y a Zeova Kaset rãmb nins sẽn be yãmb sakẽ wã n bãng tigisgã wakat la a zĩigã takɩ.