D kell n yɩ burkĩmb a Zeova taoore

BAA ne burkĩndlem sẽn yaa bũmb sẽn pa wɛ rũndã-rũndã wã, a yaa zʋg-sõng sẽn zẽngd sɩd Wẽnnaam a Zeova sõgen dãmbã. Ned sẽn yaa burkĩn kelld n yalsa kãn-kãe makrã pʋsẽ, la b pa vigsdi, baa sã n wa kaoosdẽ. Ges-y Rĩm sõng a Ezekɩas makrã. “Zida ka tol n paam dĩm sẽn deng yẽnda bɩ sẽn pʋgl yẽnda n wẽnd yẽ ye,” woto la Biiblã yeta. Bõe n kɩt t’a Ezekɩas ra pa wõnd a taabã? A “tũu Zusoabã [a Zeova, NW ],” baa ne a sẽn da vɩ ziri wẽnnaam a Molɛk balemdbã sʋkã. N-yẽe, a Ezekɩas “ka tol n bʋdg n bas [a Zeova] ye. La yẽ saka tõod[ã].”—2 Rĩm dãmba 18:1-6.

Tʋm-tʋmd a Poll me ra yaa ned sẽn kell n yɩ burkĩn a Zeova taoore. A ministɛɛrã kɩbar sẽn be kiris-neb gerɛk Gʋlsgã pʋgẽ wã kõta kaset sẽn wilgd vẽeneg t’a Poll sõgena Wẽnnaam ne a sɩɩgã fãa n pa vaal ye. A tẽng zug vɩɩmã saab sẽnese, a Poll ra tõe n yeela woto a mengã wɛɛngẽ: “Mam zaba zabr sõama, mam zoee zoees n tõoge, mam talla tẽebo.”—2 Tɩmote 4:7.

Ad sɩd yaa burkĩndlem mak-sõma meng la a Ezekɩas la a Poll kõ-do! Bɩ d rɩk togs-n-taar ne b tẽebã n kell n pa burkĩmb d Wẽnnaam Kãseng a Zeova taoore.—Hebre dãmba 13:7.