Bõe yĩng tɩ d segd n kõ sugri?

“BÃNGDBÃ sɩnga vaeesg sẽn zoe n wilg tɩ sugrã kũun tõe n paasa yĩn-sidg pãng tɩ tall nafre, la a tõe n paasa yĩnsã laafɩ me,” woto la Kanada kɩbay sebr sẽn yaa The Toronto Star yeel-yã. La Porfesɛɛr a Carl Thoresen sẽn yit Stanford Univɛrsite sẽn be Etazĩni wã sẽn lʋɩ vaeesg taoor sẽn tɩ loe ne Stanford Tʋʋmd sẽn tɩ loe ne Sugr kũunã wilgame tɩ “yaa neb sõor fĩ-fĩi bal n wʋmd sugr kũun sẽn dat n yɛɛlga, la a sẽn pukd to-to.”

B getame tɩ sugr hakɩkã yaa kiris-nedemdã nen-kãseng a yembre. The Toronto Star wilga a võor n yeel tɩ yaa “f sẽn na n miẽ tɩ b beeg-f lame, tɩ f bas sũ-yikr fãa sẽn tũ ne rẽ n wa, tɩ f wa baas n tall ninbãan-zoeer la nonglem meng ne bɛɛgdã.” D segdame n bãng t’a yaa toor ne f sẽn na n sak beegre, n bas tɩ b maan-a, n yĩm-a bɩ f sẽn na n yeel tɩ beegr pa zĩnd ye. A leb n pa rat n yeel tɩ f leb n ning f meng namsg zĩigẽ ye. Vaeesgã wilgame tɩ bũmb ning sẽn wat ne sugr hakɩkã yaa “f sẽn na n bas sũ-yikr la tags-wẽns tɩ looge.”

Vaeesdbã yetame tɩ b segdame n maan vaeesg neer n paas n bãng sugr kũunã sẽn tar nafa nins yĩnsã laafɩ wɛɛngẽ. La b wilgdame tɩ yam bãanã wɛɛngẽ nafa n be, tɩ b paas “t’a boogda sũ-sãamsã, yɩɩrã la yam-ka-m-mengã.”

Bʋʋm sẽn yaa sõma a yembr sẽn kɩt tɩ d segd n kõ sugr bee Efɛɛz rãmba 4:32 sẽn yet woto wã: “Bɩ yãmb maan taab neere, la paam sũ-bʋgsem, la kõ taab sugri [ne yamleoog, NW ] wa Wẽnnaam sẽn kõ yãmb sugr Kirist yĩngã.” [Yaa tõnd n ning italikã.] Sugrã kũun la yɛl a taabã wɛɛngẽ, b sagenda tõnd tɩ d yɩ Wẽnnaam togs-n-taase.—Efɛɛz rãmba 5:1.

D sã n zãgs tɩ d kõn kõ neb a taabã sugr tɩ d yaool n tar sor n na n tall ninbãan-zoeere, tõe n sãama tõnd mengã zems-n-taar ne Wẽnnaam. A Zeova gũudame tɩ tõnd kõ taab sugri. Rẽ, d tõe n pʋʋsame t’a kõ-d sugri.—Matɩe 6:14; Mark 11:25; 1 Zã 4:11.