Wãn-wãn la yam sẽn yit Wẽnnaam nengẽ wã pukda?

“BPAOOGDA naong soab yam n ka kelgd yẽ goam ye.” Yaa ne gom-kãensã la Rĩm a Salomo sẽn tar yamã baas kɩbar sẽn wilgd nin-talg sẽn tar yam sẽn sõng n fãag galʋ-tẽng tõr ne sãoongã. La zu-bʋko, “ned ka le tẽeg naong soaba yell ye.”—Koɛɛg Soaba 9:14-16.

Ninsaalbã nong n paoogda neb nins sẽn yaa talsã, baa nin-tals kãens sã n tʋma tʋʋm sẽn zems pẽgre. Yɩɩ woto me ne a Zezi. A Ezai togsa bãngr-gomd a zug woto: “Neba paoog-b lame n bas-ba. Bãmb da yaa ned sẽn tar sũ-sãoongo la sẽn da minim toogo.” (Ezai 53:3) Kẽer da paoogda a Zezi, a sẽn da pa tar naam la ziir wa yẽ wakatẽ taoor dãmbã yĩng bala. La a yaool n da tara yam sẽn da yɩɩd ninsaal buud fãa sẽn yaa yel-wẽn-maand zĩig sẽn zãre. A Zezi ba-yirẽ nebã pʋd n zãgsame tɩ b kõn sak n deeg tɩ “ra-wãada biig” tõe n talla yam woto la a maan yel-soalem woto ye. La woto ra yaool n yaa tudg-kãsenga, bala kɩbarã kẽnga taoor n yeel t’a Zezi “ka maan bõn-bãn wʋsg zĩ-kãng ye, neba sẽn ka tẽeba yĩnga.” Ad sɩd yɩɩ bõn ne nin-kãensã!—Matɩe 13:54-58.

Bɩ d ra tol n maan tudgr woto buud ye. “La yam soab tʋʋma n wilgd t’a tara yam,” woto la a Zezi yeel-yã. Neb nins sẽn tʋmd Wẽnnaam tʋʋmdã n taasd yĩngr yamã yaa toore, pa ne b sẽn tar zĩig bɩ naam ning nebã sʋkã ye, la yaa “bi-sõma” nins b sẽn tarã, b tẽebã la b tʋʋmã sẽn tik Biiblã zugã.—Matɩe 7:18-20; 11:19.