Dũni gill laafɩ wã: Wãn to?

DŨNI gill laafɩ wã na n waa ka la bilf bɩ? Neb wʋsg n sɩng n tags woto, la masã b maanda sãmb-sãmbe. Sã n yaa ne kɩbay sẽn gomd yel-tood nins sẽn wat beoog-daarã b sẽn yiis Afirik di Siid kɩbay sebrẽ wã (Daily Mail & Guardian), “b sẽn da reng n togs tɩ tẽn-tẽns yɛl siglg paalg n watã yaa yʋʋm 10 sẽn loog bala, la masã b pa saagd tɩ tõe n yɩɩme ye.”

Gʋlsdbã tagsda saagr yam ning sẽn da be yʋʋm a wãn bal sẽn loogã zugu. Rẽ tɩ zab-mugrã saa paalem, tɩ dũni gill pãn-soaadbã kɩɩs-taabã ra pa leb n beẽ ye. Sẽn da wõnd yaa wakat paalgã sɩngrã, neb wʋsg ra saagdame tɩ ãdem-biisã ra na n sɩngame masã n tõog n mao sõma ne naongã, bãasã la yɛl nins sẽn tɩ loe ne bõn-vɩɩlɩ wã vɩɩm zĩigã. “Masã, wõnda reng-n-togess kãensã yaa vɩ-noog sẽn wat mams zaala,” woto la kɩbarã yeel-yã. “Zab-paals n yikd babsẽ d sẽn da pa mi sõma ye; dũni wã gill zugu naongã ket n tara paasgo. Tẽns a yiib n paam nikleɛɛr zab-teedã paalem. ONU wã yʋ-noog booga wʋsgo, a sẽn pa tõe n fʋsg kall ãdem-biisã zu-loees taoorã yĩnga. Nebã sẽn da nong n mamsd vɩ-noog waoongã, masã b mamsda vɩ-toog waoongo.”

Biiblã zãmsdb mikdame tɩ ninsaal modgrã, ba a sẽn yaa sõma to-to, a pa tol n tõog zãng ye. Bõe yĩnga? Bala wala Biiblã sẽn yetã, “dũniyã fãa bee wẽng soaba nugẽ.” (1 Zã 5:19) Dũniyã sẽn be a Sʋɩtãan nugẽ wã sasa, a pa tõe n lebg Arzãn ning Wẽnnaam sẽn da rat t’a yɩ wã ye.

Baa ne rẽ fãa, d tara yẽbgr n na n tall saagre. Wẽnnaam a Zeova kãabame t’a na n waa ne laafɩ dũniyã gill zugu. A pa na n maneg maneg yɛl siglg kãngã n wa ne laafɩ kãng ye, la ya a sẽn na n wa ne “tẽng paalga” tɩrlem ‘sẽn na n zĩnd a pʋgẽ wã.’ (2 Pɩɛɛr 3:13) N-yẽe, ne Wẽnnaam Rĩungã maasem, b na n toeema tõnd tẽngã t’a lebg wa yir sẽn yaa laafɩ la sũ-noog zĩiga. Beenẽ, vɩɩmã la tʋʋma na n kõo ãdem-bi-sakdbã fãa sũ-noog wakat fãa. Sẽn paase, Wẽnnaam kãabame t’a na n “yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye.” Kãab-kãensã pa yẽbg ninsaalbã sẽn deng n togs sẽn ka bas-m-yamã zug ye. Sẽn yaa lebende, b yẽbga Naandã Gomd sẽn pa lʋɩt vɩʋʋgẽ wã, sẽn pa tõe n yag ziri wã zugu.—Wilgri 21:4; Tɩt 1:2.