Tõnd fãa ratame tɩ b pẽg-do

DAARÃ yɩɩ bi-puglã noogo. La baa ne b sẽn da segd n kibl-a wakat-wakatã, a talla manesem sẽn yɩ sõma baraare. Baasgo baraar yʋng b sẽn gãneg biigã a gõeem sasa, a ma wã wʋmame t’a kʋmdẽ. La a sẽn sʋk-a n na n bãng bũmb ning sẽn tar-a wã, ne nintãm, biiga ra fẽgsdame la a sʋkd woto: “Rũndã mam pa yɩ bi-sõng-laa?”

Sʋk kãngã zaba a ma wã wʋsgo. Wakat fãa a ra yɩta tao-tao n dems a bi-puglã. La baraare, raarã tõr fãa, ne a bipuglã sẽn mao t’a manesma yɩ sõma wã, a ma wã kell n maana yam-kaalg n pa tol n pẽg-a baa bilf ye.

Pa kompugli wã yen-yen bal n dat pẽgr la raoolg ye. Tõnd fãa rata woto, wa d sẽn dat saglg la kiblgã.

B sã n pẽg tõnd sõma d sũurã pa noom wʋsg sɩda? Tõnd ratame tɩ ned pẽg-do, tɩ ned tags d yelle. Pẽgr kõta tõnd bas-m-yam tɩ d sẽn modg n maan bũmb ningã pa zaalem ye, la rẽ tusd-d lame tɩ d rat n maan woto nindaar yasa. Pa lingr tɩ ned sã n pẽg tõnd ne pʋ-peelem, bɩ d nong n dat n pẽneg a soab a sẽn keng d raoodã yĩng ye.—Yelbũna 15:23.

A Zezi Kirist ra miime tɩ neb a taabã pẽgr tara yõodo. A talã rãmba kɩbar pʋgẽ, zu-soabã (sẽn makd a Zezi mengã) pẽga a tʋm-tʋmd-sõms a yiibã ned kam fãa sõma hal wʋsg n yeele: ‘Yaa neere, tʋm-tʋmd sõng sẽn maand sɩda!’ Ad woto sɩd noogd sũuri! Baa ne b tõogã la tʋʋmdã yõod sẽn pa yɩ ye wã b pẽgrã ra zema taaba.—Matɩe 25:19-23.

Be neere. D tẽeg bi-pugla ma yelle. D pa segd n gũ tɩ neb a taaba wa ningd nintãm tɩ d yaool n pẽg-b ye. Sẽn yaa lebend ne rẽ, d tõe n baoa soay wakat fãa n pẽg-ba. Sɩda, sor sã n kõ fãa, bɩ d pẽg neb a taabã ne pʋ-peelem.