“M paama bũmb nins fãa m sẽn da ratã”

SIGLG ning sẽn get-a dũniyã fãa laafɩ yellã (Organisation Mondiale de la Santé) sẽn yiis geelg kɩbar a ye wilgame tɩ sẽn yɩɩd neb milyõ 120 la yam-ka-m-mengã namsd dũniyã gill zugu. Yʋʋmd fãa neb milyõ a ye n kʋʋd b mense, la neb milyõ 10 n digd 20 makdame n na n kʋ-b mense. Bõe n tõe n sõng yam-ka-m-meng rãmbã? Logtor yir tɩbsg tõe n sõng n booga b namsgã tɩ kolg weoogo, la pɛlg kengr tara yõod hal wʋsg n yɩɩda. Sẽn paase, neb kẽer sẽn vɩ ne yel-kãngã pʋs n paama sagls sẽn yit a Zeova Kaset rãmbã sɛb sẽn tik Biiblã zugã pʋsẽ, tɩ yɩ sõngr hal wʋsg n kõ-ba, wala lɛt-kãngã sẽn yit Fãrensã sẽn wilgdã.

“Sẽn nan pa kaoose, mam da pa ne m sẽn da ket n vɩ wã yõod ye. Mam pʋʋsame n kos Wẽnnaam t’a bas tɩ m ki. Ra yaa wa m da zoe n kiime menga. Sẽn na yɩl n paam sõngre, m pʋʋsa a Zeova hal wʋsgo. Mam dɩka sard me n na n karem Annuaire des Témoins de Jéhovah 2002 wã, n karm-a zãng rasem a tãab pʋgẽ. Hakɩka, woto sɩd yɩɩ raoolg hal wʋsg n kõ maam, la a kenga m tẽebã me.

“Mam maana vaeesg Gũusg Gasgã ne Réveillez-vous ! wã pʋgẽ, la ad sɩd yɩɩ lingr ne maam wʋsgo! Sẽn na maan yʋʋm 15 woto mam sẽn sɩng n karemd seb-kãensã, m da zɩ n gũus n ges tɩ pɛlg kengr sẽn tar pãng woto la b kõt ye. B pida ne nonglem sẽn yaa bũmb sẽn pa wae tõnd wakatã pʋgẽ. Mam paama m sẽn da ratã fãa.”

Biiblã yeelame: “[A Zeova] pẽnegda neb nins sũy sẽn sãamã, la bãmb fãagda sũ-pa-noom dãmbã.” (Yɩɩl Sõamyã 34:19) Sãmbg sẽn ka be, ‘neb nins fãa sũy sẽn sãamã,’ bɩ “sũ-pa-noom dãmbã” tõe n paama pɛlg kengr la saagr beoog daar yĩng Biiblã pʋgẽ. A Zeova Kaset rãmba pʋɩta sɛb sẽn tik Biiblã zugu, sẽn na yɩl n kõ neb nins sẽn dat-b sõngr sẽn yit seb-kãngã Wẽnnaam sẽn vẽneg tɩ b gʋls t’a yaa belsg yẽgrã pʋgẽ.