Lɛtr b sẽn gʋls a Nowe

“M NIN-NONGR a Nowe, mam karma fo kɩbarã naoor wʋsg Biiblã pʋgẽ, la fo sẽn maan to-to n ka koom koglg tɩ foo ne f zakã rãmb kẽ n põs sãoong sa-kãsengã.”

Yaa ne gom-kãensã la yʋʋm 15 bi-pugl yʋʋr sẽn boond t’a Minnamaria sɩng a lɛtre, a sẽn da wa n naag yʋʋm 14 n digd 21 karen-biis n maand gʋlsg wags-taaba. Yaa Fẽlãnd tẽngã biru ning sẽn get lɛtr dãmbã toolg yelle, Fẽlãnd buudã gomd karen-saam dãmb sulli (Fédération des enseignants de finnois langue maternelle), la Fẽlãnd siglg ning sẽn get tẽngã buud goam sɛb yellã (la Société de littérature finnoise) n sigl wags-taabã. B ra baoodame tɩ sẽn na n wags-b taabã tik sebr zug n gʋls lɛtre. B ra tõe n gʋlsa lɛtrã ned ning sẽn gʋls-a sebrã, wall sebrã pʋgẽ kɩbayã ned a ye. Karen-saam dãmba tũusa b karen-biisã lɛta sẽn yɩɩd bãmb 1 400 n tool sull ning b sẽn yãk t’a na n vaees tʋʋmdã n wilg sẽn paam-bã. Rẽ poore, sul-kãng yãka lɛtr ning sẽn yaa sõma n yɩɩd b fãa wã, n ye yãk lɛta piig nins sẽn pʋgd pipi soabã, n yaool n yãk lɛta piig sẽn yaa sõma n pʋgd sull a yiib-n-soabã. A Minnamaria sũur yɩɩ noog hal wʋsg a sẽn paam t’a lɛtrã zĩnd lɛta piig nins sẽn wa tãab-n-soab zĩigẽ wã.

Bõe yĩng tɩ bi-bɩɩg a Minnamaria gʋls a lɛtrã a Nowe sẽn yɩ ned sẽn zĩnd yʋʋm 5 000 sẽn loogã? A leokame: “Biiblã n yɩ pipi bũmb sẽn wa mam yamẽ. Mam mii Biiblã sẽn gomd neb nins yellã hal sõma masã. M karma kɩbay wʋsg b wɛɛngẽ tɩ kɩt tɩ mam yamẽ wã, yaa wala nin-kãensã ket n vɩɩme. Mam yãka yam n gʋls a Nowe, bala a vɩɩmã talla yamleoog wʋsg la a yaa toor fasɩ ne mam vɩɩmã.”

A Minnamaria lɛtrã a sẽn gʋls a Nowe wã baasda ne gom-kãensã: “Fo tẽebã la f sakrã ket n yaa mak-sõng n kõ tõndo. Fo sẽn vɩɩmd to-to wã raoonda neb nins fãa sẽn karemd Biiblã tɩ b vɩɩmd b tẽebã.”

Lɛt-kãngã Biiblã karemd sẽn yaa bi-bɩɩg sẽn gʋlsã yaa mak-sõng sẽn wilgd tɩ Biiblã sɩd “vɩɩme la a tara pãnga.”—Hebre dãmba 4:12.