Yãmb wõnda Lagani Auna bɩ?

TẼN-BIL a ye sẽn pẽ Port Moresby sẽn yaa Papouasie-Nouvelle-Guinée na-tẽngẽ wã, koe-moondb a yi n da tɩ moon koɛɛgã n lebgdẽ. A ye n da yaa nin-kẽem t’a to wã yaa bi-bɩɩga. Sora zugu, b yãa tɩɩg sẽn da yaa neer wʋsgo. Tɩ sẽn yaa a kãsma yeel tɩ: “Ah, lagani auna!” La a bas n wẽnemd n ges bi-bɩɩgã n yeel woto: “A yʋʋrã rat n yeelame tɩ ‘yʋʋmd-yʋʋmd tɩɩga.’ Tɩ-kãnga ka wõnd Papouasie-Nouvelle-Guinée tɩɩs wʋsg ye. Sɩpaolg fãa, a vãadã sʋʋgdame, t’a wõnd wa a kiime. Baasgo, sẽoogã sã n wa ta, a vʋʋgdame, t’a vãada le tob n ning puud sõma, n ye lebg neer yɛsa.”

Bõe la tɩ-kãnga b sẽn boond tɩ lagani auna bɩ filãmboayã wã tõe n zãms tõndo? Mitb kẽer yetame tɩ b sã n na n sõd dũniyã tɩ-neebã pʋdg-pʋdga, tɩ-kãnga na n zĩnda pipi rãmb a nu wã sʋka. Hal baa ne a vãadã la a puudã sẽn sʋʋgd sɩpaolgã, tɩɩgã meng fõogda koom sẽn sek a na kell n pa n pa ki ye. A yẽga tara pãnga, b tõe n kẽe hal tẽnga pʋgẽ-pʋgẽ n tɩ vila kug-kẽeng menga. A yẽgã sẽn maand woto wã yĩnga, seb-bɛda pa tõe-a ye. Koɛɛg-koɛɛga, tɩɩga tõogd n yalsda kãn-kãe n pa lʋɩt warã la seb-bɛdã meng sasa ye.

Wala tɩ-kãnga, tõnd me tõe n wa sega yel-tood sẽn makd tõnd tẽebã. Sã n wa yaa woto, bõe n na n sõng tõnd tɩ d yals kãn-kãe? Wala lagani auna wã, tõnd me segd n deng n yũu vɩɩm koomã sẽn be Wẽnnaam Gomda pʋgẽ wã sõma n bĩngi. Tõnd le segdame me n gãd a Zeova sẽn yaa ‘tõnd kugrã,’ la a siglgã sõma. (2 Sãmwɛll 22:3) Sɩd-sɩda, lagani auna wã tẽegda tõnd tɩ baa toodã sẽn sẽbgd tõnd to-to fãa, d tõe n kell n talla d tẽebã kãn-kãe. La yaa tõnd sẽn na n dɩ tẽebã rɩɩbã a Zeova sẽn kõt-dã sõma. D sã n maand woto fãa, d na n wa paama bũmb nins a Zeova sẽn kãabã, tɩ vɩɩm sẽn ka sɛtã be rẽ sʋka.—Hebre dãmba 6:12; Wilgri 21:4.