Sogsg sẽn dat leokre

“Ned sã n bãng a sẽn tõe n maan to-to n ges a meng la a zak rãmb yelle, n paam te-​sõma nebã wʋsg sẽn pa tõe n paame, wala makre kilmatizɛɛr la radio sẽn tõe n ningd CD rãmb n kelgd mizik rãmb sõma, a sẽn baood masã yaa bãng vɩɩmã võore. Bõe yĩng tɩ d maand woto tɩ yaool n pa tar yõodo?”​—A David Myers, Etazĩni porfesɛɛre

YÃMB na n leoka porfesɛɛr kãngã sokrã tɩ bõe? Kẽer yẽ tõe n tagsame tɩ pa tar yõod tɩ f nams f meng n bao leoorã ye. La tõnd sã n tagsdẽ tɩ sok-​kãngã pa tar yõodo, yaa wa tõnd sẽn na n kẽnd tɩ kug-​bõoneg kẽ tõnd neoodã wã pʋgẽ tɩ d ket n kẽnd bal wa bũmb ka be ye. D na n kẽname yaa sɩda, la kẽnã yɩta toogo.

Yãmb sã n zoe n soka y meng vɩɩmã yõod sẽn yaa a soaba, bɩ y bãng tɩ yãmb pa y yembr n sokd woto ye. Siglg a ye neb n vaees n yã tɩ tẽns wʋsg pʋsẽ, neb nins sẽn baood n na n bãng vɩɩmã võorã sõor tara paasgo.

Yãmb sã n dat n sɩd paam tɩ y yamã gãand bãane, y segd n bãnga sogs-​kãsems a tãab leoore.

Tõnd yita yɛ?

Vɩɩmã võor yaa bõe?

Ninsaal beoog na n yɩɩ wãna?

Yɛ la y tõe n sɩd paam sogs-​kãensã sẽn tar yõodã leoore? Sõss nins sẽn pʋgdã na n basa ninsaalbã tagsa wã kɛɛng la b wilg Biiblã sẽn yaa Wẽnnaam Gomdã sẽn kõt leoor ninga. Bɩ y lak y Biiblã n karem y toor n bãng a sẽn yet bũmb ninga.