Wẽnnaam kãaba yãmb arzɛk bɩ?
‘Wẽnnaam datame tɩ y yɩ ra-kãagre, n paam mobila wʋsgo, tʋʋmd sẽn kõt-y ligdi. Yãmb we n tẽ-a la y kõ-a y ligdã y sẽn tõe tɛka.’
BERZILL zʋrnall a ye wilgame tɩ yaa woto la beenẽ tũudum kẽer taoor dãmb yet b nebã. La neb wʋsg sɩd tẽeda gom-kãensã. Etazĩni zʋrnall a yembr (Time) dãmb sogsa neb kẽer sẽn yet tɩ b yaa kiris-neba, n na n bãng b tagsg yel-kãngã zugu. Sẽn na ta neb 61 koabg zug yeelame tɩ Wẽnnaam sɩd ratame tɩ nebã yɩ arzɛgs rãmba. Neb 31 koabg zug yeelame tɩ f sã n sɩd kõt Wẽnnaam f ligdi, a na n ning-f-la bark tɩ f paam ligd wʋsg n paase.
Tagsa a woto buudã tara piuugri. Sẽn yɩɩd fãa, Ameriklatin tẽnsã pʋsẽ. Wala makre Berzilli. La nebã wʋsg sɩd kẽeda tũudum kãensã sẽn yet tɩ b sã n wa bãmb nengẽ, Wẽnnaam na n kɩtame tɩ b lebg arzɛgs rãmbã. La rẽ yĩngã Wẽnnaam sɩd kãaba nebã tɩ b sã n tũ yẽ, a na n kɩtame tɩ b lebg ra-kãag-rãmb bɩ? Rẽ yĩnga, pĩnd wẽndẽ wẽn-tũudbã fãa ra yaa rakã-rãmb bɩ?
Yaa sɩd tɩ Biiblã babg ning b sẽn da gʋls ne hebre wã pʋgẽ, kibay wʋsg wilgdame tɩ neb kẽer Wẽnnaam sẽn ning bark paama arzɛka. Wala makre, Tõod 8:18 wã pʋgẽ, b yeela woto: “Bɩ y tẽeg Zusoab a Wẽnnaam yelle; bala, yaa bãmb n kõ yãmb pãng tɩ y paam arzɛka.” Gom-kãensã ra wilgda Israɛll nebã tɩ b sã n kell n sak Wẽnnaam, a na n kɩtame tɩ b yɩ buud sẽn tar arzɛka.
La rẽ yĩnga, yaa wẽn-tũud fãa n da na n yɩ arzɛk soab bɩ? Wẽn-sakd a Zoob ra talla arzɛgse, la baa a Sʋɩtãan sẽn wa n kɩt t’a paoongã sɛ wã, a Zeova wa n le kɩtame t’a paam arzɛk “naoor a yiib n yɩɩd pĩndã.” (Zoob 1:3; 42:10) A Abrahaam me yɩɩ rakãagre. Sɩngr 13:2 wã yeelame t’a “ra tara rũms ne wanzuri la sãnem wʋsgo.” Tẽns a naas rĩm dãmb n da wa n naag taab n yõk a Abrahaam kẽem biig a Lote, la a Abrahaam “yikame n peeg a tʋm-tʋmdb nins sẽn dog yẽ zakẽ wã, la b sõor taa kobs-tã la piig la a nii,” tɩ b tɩ zab n fãag a Lote. (Sɩngre 14:14) A sẽn tõog n paam rap 318 tɩ b na n tɩ zabã, wilgdame t’a zakã neb tog n da waooga hal wʋsgo. A sẽn da tõe n zã kʋʋng a woto wã wilgdame t’a ra tara ligd la rũms wʋsgo.
Pĩnd wẽndẽ wẽn-sakdb wʋsg sɩd yɩɩ arzɛk rãmba. Wala makre, a Abrahaam, a Izaak, a Zakoob, a Davɩɩd la a Salomo. La woto rat n yeelame tɩ Wẽnnaam kɩtdame tɩ ned sẽn tũud-a fãa yɩ arzɛk soab bɩ? Bɩ ned sã n pa arzɛk soaba, rat n yeelame tɩ Wẽnnaam pa ning-a barka? Sõsg ning sẽn pʋgdã na n leoka sogs-kãensã.