Bõe rabeem n tar neb wʋsgo?

Rao a yembr yeela woto: “Y pa baood n yɩ wẽn-tũud n yaool n sak n tẽ tɩ dũniyã na n wa sãamame ye.” A STEPHEN O’LEARY, PORFESƐƐR SẼN BE KALIFORNI DISIID INIVERSITE WÃ PƲGẼ.a

YÃMB tẽeda raoã goamã bɩ? Sõs-kãngã la a yiibã sẽn na n pʋglã pʋgẽ, d na n wilga bʋʋm toor-toor sẽn kɩt tɩ beoog daarã rabeem tar nebã. La d na n wilga bũmb ning me sẽn kɩt tɩ y segd n tẽ tɩ wakat buud fãa, neb n na n kell n zĩnd tẽngã zugã. Yaa sɩd tɩ kibay nins sẽn pʋgdã pa kengd raood ye. La bʋʋm toor-toor beeme n wilgdẽ tɩ y segd n tẽeme tɩ manegr n wate.

Zab-te-toosã sõorã seka rabeem. Yʋʋmd 2007 soabã pʋgẽ, zʋrnall a ye (Bulletin of the Atomic Scientists) yeela woto: “B sẽn lob bõmb atomik rãmbã Irosima la Nagazaki wã tɛka, nebã maneg n yɛɛsda yel-beed ning b sẽn tõe n le wa maan ne zab-te-kãens buudã.” Bõe yĩng tɩ sek rabeem? Zʋrnallã paasame tɩ yʋʋmd 2007 soabã pʋgẽ, zab-te-toos sẽn ket sõor taa bãmb 27 000, la tɩ b sʋkã, bãmb 2 000 n be, “tɩ b sã n dat tɩ b pus minit a wãn pʋgẽ bal bɩ yaa faag-faaga.” Baa yaa zab-te-kãens buudã sõor bilf bal la b pus-yã, rẽ sẽn na n wa ne yel-beed ningã pa tõe n bãng n bilg ye!

La rẽ yĩnga yʋʋmd 2007 soabã tɛka, zab-te-toosã sẽn kẽesd nebã rabeem ningã boogame bɩ? Sebr siglg a ye (SIPRI)bc sẽn yiis yʋʋmd 2009 soabã pʋgẽ yeela woto: “Dũniyã tẽns a nu nins sẽn tar zab-te-toos n yɩɩdã, rat n yeel tɩ Etazĩni, Fãrense, Risi, Roayom Ini la Sɩn zoe n tara zab-teed a taab sẽn maneg n yaa wẽns wʋsgo, wall b wilgame tɩ b na n bao b buudu.” La sebrã paasame tɩ pa tẽn-kãensã bal n tar zab-te-toos ye. Vaeesdbã sõdga tẽns wa Ẽnde, Pakistã la Israɛlle, n yeel tɩ tẽn-kãensã a ye fãa tara sẽn na ta bõmb dãmb 60 n digd 80 woto. B yeelame me tɩ bõmb dãmb b sẽn zoe n maan tɩ rɩga, tɩ b tõe n tʋm ne-b zabr wakat taa bãmb 8 392!

Tẽn-gãongã la pemsmã rẽgengã tõe n wa waa ne yel-beedo. Sebr ning yell d sẽn gom zugẽ wã (Bulletin of the Atomic Scientists) pʋgẽ, b yeelame me tɩ “pemsmã la tẽn-gãongã sãoong sẽn tõe n wa ne yel-beed ningã wẽnem zema zab-te-toosã sẽn tõe n wa ne a soabã.” Bãngdb yʋy sẽn yi, wala makre, kãmbirdz inivɛrsite wã porfesɛɛr dãmb a Stephen Hawking n paas a Sir Martin Rees me yeela woto. Nin-kãensã b yiibã tagsdame tɩ nebã tõe n wa tʋma ne teknolozi wã teedã kẽer tɩ nare, wall tɩ b sẽn sãamd tẽn-gãongã la pemsmã tõe n wa waa ne zu-loe-kãsems tẽngã zugu, pa rẽ bɩ tolg n menes dũniyã neb fãa.

B sẽn yet tɩ yel-beed n na n paam dũniyã yɛɛsda neb milyõ rãmba. Y sã n kẽ ẽntɛrnetã pʋgẽ, n gʋls tɩ “dũniyã saabo,” wall “yʋʋmd 2012,” y na n paama kibay wʋsg sẽn yet tɩ dũniyã na n saa yʋʋmd 2012 soabã pʋgẽ. Bõe yĩng tɩ b yet woto? Maya rãmbã kalãndirie (l’étonnant calendrier maya ou le compte-long) wã sata yʋʋmd 2012 soabã. Neb wʋsg tagsdame tɩ woto wilgdame tɩ dũniyã na n saa yʋʋm kãnga, tɩ kẽesd-b rabeem wʋsgo.

Tũudum wʋsg neb tẽedame tɩ Biiblã sẽn yeel tɩ dũniyã na n saame wã, yaa tẽn-gãongã fãa la b na n sãame. Sã n yaa ne bãmba, nin-tɩrsã na n kẽnga saasẽ n bas nin-wẽnsã tẽngã zug tɩ b naag-b fãa ne tẽngã n sãame, wall b lob-b bug-tẽnga.

La rẽ yĩnga Biiblã yetame tɩ b na n sãama tẽn-gãongã bɩ tɩ b na n menes-a lame bɩ? Tʋm-tʋmd a Zã sagl-d-la woto: “Maan-y gũusg ne neb kẽere, bãng-y b yamã sã n sɩd yaa vʋʋsem sõng rẽnda.” (1 Zã 4:1, Sebr Sõngo) Pa segd tɩ y tẽed nebã goam woto bal ye. Rẽndame tɩ y lak Biiblã y toor n bao n bãng a sẽn sɩd yet dũniyã saab zugã. Tõe tɩ y sẽn na n yã bũmb ningã na n ling-y lame.

[Tẽngr not rãmbã]

[Fotã soaadba, seb-neng a 4]

Champignon atomique : photo U.S. National Archives ; photos d’ouragan : photo OMS/Ligue de la Croix-Rouge et U.S. National Archives