Dũniyã saab rabeem pa le tar-b ye

YƲƲMD 1980 soabã sẽn wa n kolgdẽ wã, rao yʋʋr sẽn boond t’a Gary ne a pag a Karen ra kɩsa sɩd tɩ dũniyã saab ta n saame. Woto kɩtame tɩ b yik n kẽng b tẽngã kɩrenga, n na n tɩ vɩɩmd be. B yãka yam n na n maand bũmb nins fãa sẽn yaa tɩlae ne-bã b toore, sẽn na yɩl n da le ra baa fʋɩ ye. B ra tagsdame tɩ rẽ la b na n põse.

Sẽn na yɩl n paam bãngr ning sẽn na sõng-bã, b raa sɛb buud toor-toore, la b zãms bũmb wʋsg maanego, la b bao sagls neb wʋsg nengẽ. B maana zẽedo, la b sel tɩ-bõoneg toor-toor sẽn womd biisi. B baoa bõn-buud la tʋʋm teed wʋsg n bĩngi. B zãmsa koobo, la kood bĩngri. Pag a ye sẽn yaa b zoa wilg-b-la b sẽn tõe n kʋ rũnga, n sɩɩg-a la b pas a nemdã n maneg n bĩng to-to tɩ pa sãam ye. A Karen bao n bãnga tɩɩs bugs toor-toor vãado, b biis la b yẽg sẽn yaa rɩɩb tɩ b tõe n dɩ, kood sã n wa kaẽ. A Gary zãmsa esãens maaneg ne kamaana. A mee roog sẽn tar bũmba fãa, n ning fuur sẽn tugend ne raad pʋgẽ wã, sẽn na yɩl tɩ waoodã sasa bɩ roogã wɩngdẽ.

A Karen yeela woto: “Mam sẽn da ne dũniyã yɛl sẽn yaa to-to wakat kãngã, m da tagsdame tɩ pa na n kaoos la a sa ye.” A Gary me yeela woto: “Wala wakat kãng kom-bɩɩs a taaba, ma-me ra naaga sula, n zabd bu-welsgã la Viɛtnam zabrã poorẽ, la d zabd wẽgbã buud toor-toorã me poorẽ. La pa yã n kaoos la m mik tɩ rẽ fãa yaa faoor ye. Mam da getame tɩ yɛlã sã n kell n tall woto, ãdem-biisã na n wẽneg n menesa taab dũniyã zugu.”

A Gary paasa woto: “Daar a ye yʋng mam sẽn da wa n zĩ vɩʋʋgo, m yikame n dɩk Biiblã n sɩng Matɩe sebrã karengo, n tãag Wilgr sebrã. Rẽ poore, maana yʋnd a naas tɩ mam tar bab-kãensã kareng bilf-bilfu, hal n le wa sa-ba. Yʋng a naas-n-soabã vẽkembeoogo, mam yeela a Karen woto: ‘Tõnd vɩɩ yaoolem dayã sasa. Ka la bilfu, Wẽnnaam na n sãama dũniyã. Rẽnda d modg n bãng neb nins sẽn dat n wa põsã.’ ” Woto kɩtame t’a Gary ne a Karen sɩng tũudmã sul toor-toorã kaagre, n baood tũudum ning neb sẽn segend b mens n na n wa paam n põsã.

Pa yã n kaoos la a Zeova Kaset rãmb wa b zakẽ wã n na n moon-b koɛɛgã ye. B sak n sɩnga Biiblã zãmsgo. A Karen yeela woto: “Mam sũur da nooma hal wʋsgo. Bala, b ra bilgda maam Biiblã goamã võor sõma. M da sɩng n dat n bãnga sɩdã dũniyã saabã wɛɛngẽ, la b sõng-m lame tɩ m yaa n wʋm a võore. M bãngame tɩ manegr n wate. La sẽn yɩɩd fãa, m sɩnga Wẽnnaam sẽn yaa m saasẽ Ba la yĩngr la tẽng Naandã bãngre, hal n lebgd a zoa.”

Ad a Gary sẽn yeele: “Rẽ tɛka, mam bãnga m vɩɩmã yõodo. M sẽn sɩng Biiblã zãmsgã, ra noom-m lame hal tɩ kɩt tɩ m da pa le tõe n bas ye. Mam karma Biiblã bãngr-goamã, la m fees n bãng bũmb ning sẽn wilgd tɩ b sɩd pidsdame wã, tɩ kɩt tɩ m maneg n kɩs sɩd tɩ ka la bilfu, Wẽnnaam na n sãama dũniyã. Mam yeela m meng woto: ‘Nebã segd n segla b mens vɩɩm ning Wẽnnaam sẽn dat tɩ d wa vɩɩmdã yĩnga, la pa sãoongã sẽn watã yĩng ye.’ ” Biiblã zãmsg sõnga a Gary ne a Karen tɩ b sẽn da tagsd to-to beoog daarã zugã toeeme. Dũniyã saab rabeem pa le tar-b ye. Masã, b kɩsa sɩd tɩ Wẽnnaam na n menesa zu-loees nins sẽn namsd nebã, n kɩt tɩ tẽngã lebg arzãna, wa a sẽn da rat hal sɩngrẽ wã.

Sẽn na maan yʋʋm 25 woto masã, bõe la a Gary ne a Karen maanda? Ad a Karen sẽn yeele: “M ket n maanda m sẽn tõe fãa, tɩ m sẽn nong a Zeova to-to wã la m tẽebã pãng paasdẽ. M maoodame me n sõngd m taabã sẽn na yɩl tɩ b maan woto. Maam ne a Gary nooma ne taab sõma, n sõngd taaba, la d teend taab Wẽnnaam tũudmã pʋgẽ. D modgdame n sigind d yɛlã sõma n pa baood bõn-bɛda, n tõogd n paamd sẽk n get d taabã yell la d sõngd-ba.”

A Gary paasa woto: “Mam pʋʋsda Wẽnnaam wakat fãa n kotẽ t’a Rĩungã wa yols neb milyõ rãmba. Mam moonda nebã koe-noogã, m pʋʋsdẽ tɩ baa yaa nin-yend sak n tẽ Biiblã goamã n bãng tɩ manegr n wate. Hal sẽn yɩɩd yʋʋm 25 woto masã, a Zeova leokda mam pʋʋs-kãngã. Maam ne a Karen tẽeda ne d sũur fãa tɩ ka la bilfu, a Zeova na n toeema yɛl wʋsg tẽngã zugu, la dũniyã saab rabeem pa le tar-d ye.”—Matɩe 6:9, 10; 2 Pɩɛɛr 3:11, 12.

[Foto, seb-neng a 9]

A Gary ne a Karen sõngda b taabã tɩ b bãngdẽ tɩ Biiblã wilgdame tɩ manegr n wate