2 Tõnd yell pa pak Wẽnnaam ye—Yaa sɩd bɩ?

Tõe tɩ y wʋma b sẽn yet tɩ: “Ninsaalbã yell sã n da pakẽ Wẽnnaam, woto t’a kɩtame tɩ wẽnemã la namsgã meneme. La baa a sã n geta dũniyã gill yelle, ned kam fãa yell pa pak-a ye.”

Biiblã sẽn yete: Pa Wẽnnaam a Zeova n kɩt tɩ wẽnemã beẽ ye. (Zak 1:13) A tõeeme n kɩt tɩ wẽnemã sa, la a sẽn bas tɩ dũni-wẽn-kãngã ketẽ wã yaa sẽn na yɩl n welg no-koeemd ning sẽn zĩnd a Ãdem ne a Hawa naanegã poor bilfã. Wẽnnaam na n wa kɩtame tɩ kɩɩsgã bi-wẽnsã neb nins sẽn pa rat a naamã sẽn wa ne wã fãa meneme, tɩ ãdem-biisã paam b mense.—Sɩngre 3:1-6; Ezai 65:17.a

Wẽnnaam geta dũniyã gill yelle, la tõnd ned kam fãa yell me pak-a-la wʋsgo. Matɩe 10:29-31 wã wilgdame t’a mii baa yel-bõones tõnd zugu, tõnd mengã sẽn pa mi ye. Be, b yeta woto: “B ka koosd yirs a yiib sou bɩ? La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobdã fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.”

Sɩdã bãngr sẽn na n sõng yãmb to-to: D pa nong n dat n be ne nin-toose, bɩ neb toor sẽn kae ne neb a taabã ye. Dẽnd b sẽn yet tɩ nebã yell ka pak Wẽnnaam, tɩ rẽ kɩt tɩ neb wʋsg pa rat n bao n bãng-a wã, tɩ kẽer me pʋʋsd-a b sẽn wat n neẽ bal tɩ sẽn maand kae wã pa lingr ye. Y sã n bãng tɩ tõnd ned kam fãa yell paka Wẽnnaam a Zeova, tõe n kɩtame tɩ y rat n bãng-a, la y paam n yɩ a zoa.

Wala makre, tõe tɩ y pʋʋsa Wẽnnaam n kos bũmbu, la y pa mi a sã n kelgame, bɩ a sã n na n leok-y lame ye. Biiblã wilgda tõnd vẽeneg tɩ Wẽnnaam “wʋmda pʋʋsgo,” la tɩ sẽn yaa wakat ning fãa, a kelgda neb nins sẽn pʋʋsd-a ne b sũy fãa wã.—Yɩɩl Sõamyã 65:3.

Wẽnnaam yeta yãmb tɩ y ‘bas y yɩɩrã fãa ne bãmba; tɩ bõe, bãmb mengã geta yãmb yelle.’ (1 Pɩɛɛr 5:7) Baa yaa zu-loe-kãsems sasa, d tõe n teeg-a lame t’a sõng-do, bala a Gomdã yeta woto: “Zu-soabã pẽnegda neb nins sũy sẽn sãamã, la bãmb fãagda sũ-pa-noom dãmbã.”—Yɩɩl Sõamyã 34:19.

[Tẽngr note]

[Goam sẽn tar pãnga, seb-neng a 5]

Tõnd yell sã n pa pakẽ Wẽnnaam, bõe yĩng t’a yet tɩ d bas d yɩɩrã fãa ne-a?