Karemdbã sogsgo . . .
Segdame tɩ roagdbã wilgd b kambã raoolmã la poglmã yɛl sõma bɩ?
▪ Roagdb wʋsg maanda b sẽn tõe fãa n kogend b kambã ne bãase. La roagdbã segd n maana b sẽn tõe fãa me n sõng b kambã tɩ b gill manesem wẽnse. Wala makre, b segd n gomda raoolmã la poglmã yell ne b kambã, n sõng-b tɩ b bãng yɛl kẽer pag ne rao lagengã wɛɛngẽ. (Yelbũna 5:3-23) Woto yaa bũmb sẽn tar yõod wʋsgo. Bala, wakat fãa, sɛbã pʋsẽ, televiziõ wã la ẽntɛrnetã pʋgẽ, kambã yãta yoob yɛl vẽeneg-vẽenega.
Pag a ye sẽn yaa karen-saamb t’a yʋʋr boondẽ t’a Diane Levin yeela woto: “Pa b sẽn gomd pag ne rao lagengã yell ne kambã la yellã ye. Bee ne b sẽn yet-b bũmb ningã, kambã yʋʋmã, la sẽn yaa ned ning n gomd rẽ yell ne-bã. Naoor wʋsgo, yaa piblisite rãmbã sẽn bilgd pag ne rao lagengã to-to wã, la nebã wʋsg tagsgã sẽn pa zemsã la kambã rɩkda.”
Tags-kɛg pag ne rao lagengã wɛɛngẽ wã piuuga zĩig fãa. Roagdbã segd n sõnga b kambã tɩ b ra tall tags-kãens ye. (Yelbũna 5:1; Efɛɛz rãmba 6:4) Segdame tɩ kambã bãng b yĩnsã will toor-toorã sõma, la b bãng n zã-b sõma, la b bãng b sẽn tõe n kogl b mens ne nin-yoodã to-to. Nand tɩ bi-pugl wa lebg paga, a segd n bãnga a yĩngã sẽn na n toeem to-to wã, la a wʋm a pekrã a sẽn na n wa yãtẽ wã võore. Bi-ribl me segd n deng n bãngame t’a sã n wa lebgd raoa, a tõe n mi n wa gãand n zãmsame n yik n mik t’a raglmã yiime. Roagdbã segd n wilga kambã b yĩnsã will toor-toorã yʋy tɩ b ket n yaa yãase. B segd n modg n wilg-b-la b yĩnsã will nins b sẽn pa segd n bas tɩ ned yã wall a sɩɩsã, la b yeel-b tɩ neb sã n gomd wil-kãensã yell n deemdẽ, b pa segd n kelg ye. Kambã sã n wa bɩtẽ, yaa roagdbã n segd n bãng n yãk wakat ning b sẽn na n wilg-b pag sẽn dɩkd pʋg to-to wã.a
Wakat bʋg la roagdbã segd n sɩng n wilg b kambã yel-kãensã? Pĩnd-pĩnda. Bi-pugl ning yãta a pekr t’a nan tar yʋʋm 10 bɩ sẽn pa ta rẽ menga. Bi-ribl me raglem tõe n sɩnga yiib t’a nan tar yʋʋm 11 bɩ 12. Kambã sã n pa mi bũmb ning sẽn kɩt tɩ yaa woto wã, tõe n sãama b sũuri. Roagdbã segd n sõnga b kambã tɩ b bãng tɩ biig fãa bɩʋʋng wakate, a toeemda woto, la pa yell ye. Leb n yaa sasa roagdbã sẽn segd n sõng b kambã tɩ b bãng Biiblã sẽn yet pag ne rao lagengã zugã, la rẽ tũub yõodo. Woto yaa bũmb b sẽn pa nong n wilgd kambã lekoll dãmbẽ wã ye.—Yelbũna 6:27-35.
[Tẽngr note]
a Roagdbã sã n ges sɛb nins d sẽn wilg tẽngrã, a Zeova Kaset rãmbã sẽn yiisã, b na n paama sagls sẽn na n sõng-ba: “Zak pʋgẽ sũ-noogã kʋɩlen-biiga” sak a 8 sull a 4-11, la seb-neng 90-94; “Kell-y n pa-y Wẽnnaam nonglmã pʋgẽ” sak a 9 sull a 9-12, la seb-neng 100-102, ne seb-neng 218-219; Les jeunes s’interrogent — Réponses pratiques volume 2 sak a 6, “ Qu’arrive-t-il à mon corps ? ” ; Yʋʋmd 2010 yʋʋm-sar kiuugã pipi daar Gũusg Gasgã neng 12-14, sõsg ning sẽn yaa, “Saglse, zak rãmb sũ-noog yĩnga: Sõsd-y ne y kambã pag ne rao lagengã wɛɛngẽ.”