Kẽer goam pidsame, la wʋsg rẽnd pa pids ye

Yãmb nongẽ lame n bãng y vɩɩmã sẽn na n yɩ to-to beoog bɩ? Wʋsg rata rẽ. Neb wʋsg togsa yɛl sẽn wate. Kẽer goam pidsame, la sãnda rẽnd pa pids ye. Ad makr a wãna:

• SIÃNSÃ BÃNGDB tara masĩn-dãmb sẽn sõngd-b tɩ b magd n togsd bũmb kẽer sẽn wate. Wala makre, b tõe n wilga pemsmã la tẽngã rẽgeng sẽn na n wa ne yɛl ninsã, wall b wilg saagã sã n na n nii yãmb babgẽ wã. B yiisda ligd wʋsg rẽ fãa yĩnga.

• BÃNGDB A TAAB n tikd leebgã la politikã yɛl sẽn yaa to-to wã, n magd n wilgd toeeng nins sẽn wate. Wala makre, a Warren Buffett yaa dũniyã ra-kãag-bedr a ye. A mi a sẽn na n kẽes a ligdã bũmb ning pʋgẽ tɩ rog wʋsgo. Woto kɩtame tɩ neb wʋsg boond-a tɩ baga. A Nate Silver tikda nin-buiidã sõore, b sẽn nong la b sẽn pa nonge, n geend n wilgd bũmb kẽer sẽn na n maan Etazĩni, wala politikã la filim-dãmbã wɛɛngẽ.

• PĨND WẼNDẼ SƐB kẽer la neb get wa bãngr-goam sɛba. Wala makre, a Michel de Notredame gʋlsa sɛb yʋʋmd 1500 sẽnes tɩ b võorã wʋmb yaa toogo. La neb n yet t’a goam kẽer pidsda rũndã-rũndã. Sãnda gesa maya-rãmbã kalãndirie sẽn magd yɛlã to-to wã, n da tẽed tɩ dũniyã na n saa yʋʋmd 2012 yʋʋm-sar kiuug rasem 21.

• TŨUDMÃ TAOOR DÃMB mi n yetame tɩ yel-beed n wat dũniyã zugu, sẽn na yɩl tɩ nebã yɛɛs n maan bãmb daabã. Wala makre, a Harold Camping ne a karen-biisã ra moonda zĩig fãa tɩ tẽngã na n sãama yʋʋmd 2011. La tẽngã ket n beeme.

• BAG-BƲGDBÃ yetame tɩ b tõe n bãnga sẽn wat beoogo. A Edgar Cayce ne a Jeane Dixon fãa togsa goam tɩ pidsi. La goam wʋsg me la b togs tɩ pa pids ye. Wala makre, a Dixon ra yetame tɩ dũni gill zabr a tãab-n-soabã na n sɩnga yʋʋmd 1958. A Cayce ra yetame tɩ Niuyork na n sirg n kẽe mogrã yʋʋmd 1975 soabã sẽnese.

La woto rat n yeelame tɩ d pa tol n tõe n bãng sẽn wat beoog bɩ? Tara yõod tɩ d bao sok-kãngã leoore. Bala, d sã n tõog n bãng sẽn wat beoogo, d bãngda d sẽn na n maaneg rũndã-rũndã.