SEBRÃ GOM-ZUG SÕSGÃ | WẼNNAAM RĨUNGÃ SẼN TÕE N NAF YÃMB TO-TO

Wẽnnaam Rĩungã tõe n nafa yãmba

Sõss nins sẽn loogã sõnga yãmb tɩ y bãng tɩ Wẽnnaam Rĩungã tara yõod wʋsg ne a Zeova Kaset rãmbã. Tõe tɩ y sũur yaa noogo, y sẽn bãng bũmb kẽer Wẽnnaam Rĩungã sẽn na n maan ka la bilfã. Tõe me tɩ y sokda y meng Wẽnnaam sẽn pʋlmã fãa sã n na n sɩd pidsame.

Rẽ pa wẽng ye. Bala y pa tog n yãg n tẽ y sẽn wʋm fãa ye. Mi n yaa tɩlae tɩ y maan vaeesgo. (Yelbũna 14:15) Yaa woto la Beere nebã maan-yã.a B sẽn wʋm Rĩungã koe-noogã pipi wã, b sak n deegame. La b pa tẽ zĩig pʋgẽ, goamã sẽn da noom-b yĩng ye. B maaga b yĩng n vaees Gʋlsg Sõamyã sẽn na yɩl n “bãng bũmb nins b sẽn yet bãmbã sã n yaa tɩrga.” (Tʋʋma 17:11) B maka koe-noogã b sẽn wʋmã ne bũmb nins Gʋlsg Sõamyã sẽn yetã. Rẽ kɩtame tɩ b kɩs sɩd tɩ koe-noogã b sẽn kelgã zemsa kɛpɩ ne Wẽnnaam Gomdã sẽn yetã.

A Zeova Kaset rãmbã sagenda yãmb me tɩ y mogd n maan woto. Tõnd zãmsda nebã Biiblã zaalem. Biiblã zãmsgã na n sõng-y lame tɩ y mak a Zeova Kaset rãmbã sẽn yet bũmb nins Wẽnnaam Rĩungã wɛɛngẽ wã ne Biiblã sẽn yetã.

Y na n paam n bãnga Wẽnnaam Rĩungã sõma. La pa rẽ bal ye. Biiblã zãmsgã na n sõng-y lame tɩ y paam sogsg kẽer leoore. Yaa sogsg neb wʋsg sẽn sokd b mense. Wala makre:

Maana wãn tɩ ninsaal wa beẽ?
D vɩɩmã võor yaa bõe?
Bõe yĩng tɩ Wẽnnaam bas tɩ namsgã beẽ?
Ned kũum poore, bõe n maande?
Tẽngã na n wa sãama fasɩ bɩ?
Bõe n wat ne sũ-noog zak pʋgẽ?

Sẽn yɩɩda, Biiblã zãmsg na n sõng-y lame tɩ y paam Wẽnnaam zoodo. (Zak 4:8) Rẽ, y na n bãnga Wẽnnaam Rĩungã sẽn tõe n naf yãmb to-to masã, la wakat sẽn kõn sa. A Zezi meng yeela woto: ‘Vɩɩm sẽn ka sɛtã yaa woto, tɩ bãmb na bãng yãmb sẽn yaa sɩd Wẽnnaam sẽn ka to, la a Zezi Kirist yãmb sẽn tʋm a soabã.’—Zã 17:3.

A Zeova Kaset rãmbã tõe n talla seb-kãngã n sõng-y tɩ y wʋm Biiblã goam võor sõma.

Y sã n dat tɩ b wa zãms-y Biiblã bɩ y kos a Zeova Kaset soaba. Zĩig n be tõnd sɩtã www.jw.org pʋgẽ me, tɩ y tõe n gʋls n kos tɩ b wa zãms-y Biiblã. (KOS-Y TƖ B WA ZÃMS-Y BIIBLÃ ZAALEM)

a Beere ra bee Masedoan soolmẽ wã.

Bũmb ning sẽn kɩt t’a nong Wẽnnaam Rĩungã

A Folake yaa bi-pugl sẽn tar yʋʋm piiga. Sẽn nan pa kaoose, b yeela yẽ ne a karen-bi-taasã tɩ ned fãa gʋlse, n togs bũmb ning a sẽn nong n yɩɩd a vɩɩmã pʋgẽ. A Folake yãka yam n na n togs bũmb ning sẽn kɩt t’a nong n gomd Wẽnnaam Rĩungã yell ne nebã.

A yeelame tɩ Wẽnnaam Rĩungã yaa goosneema sẽn sɩd be, la tɩ d pa tõe n yã-a, baa d sã n ning linɛte.

A Folake sẽn gʋlsã pʋgẽ, a togsa bũmb nins a sẽn dat ne a sũur fãa tɩ Wẽnnaam Rĩungã wa maane. A goma yɛl nins Rĩungã sẽn na n wa kɩt tɩ sa wã yelle, n yeel woto: “M sã n yã neb sẽn gãe yɩnga, b sẽn pa tar zagsã yĩnga, la m wʋmd b sẽn yet tɩ tẽns kẽer pʋsẽ, komã kʋʋda kamba, sãamda m sũur hal wʋsgo. La m sã n karem Ezai 65:21 wã, m sũurã lebgda noogo.” Sɩd me, vɛrse-kãng pʋgẽ b wilgame tɩ Wẽnnaam Rĩungã sã n wa so tẽngã, nebã “na n mee zags n zĩnd b pʋsẽ. Bãmb na n sela tɩɩs n dɩ b biisã.”

A Folake paasame t’a gũuda wakat ninga Rĩungã sẽn na n kɩt tɩ bãasã buud fãa sa. A goma Wilgr 21:4 yelle. Be b yetame tɩ Wẽnnaam ‘na n yẽesa nintãmã fãa t’a ra le zĩnd nebã ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye.’ A Folake baasame n yeel tɩ bũmb ning sẽn noom yẽ n yɩɩd yaa moon koɛɛgã n gom a Zeova ne a Rĩungã yelle. Hakɩka, bi-kãngã nonga Wẽnnaam Rĩungã ne a sũur fãa!