SOGSG BIIBLÃ SẼN LEOKDE

Tõe n wa lebga goosneema yɛng n so dũniyã gill bɩ?

Sã n yaa goosneema yɛng n so dũniyã gilli, y pa tagsd tɩ na n nafa ãdem-biisã sɩda? Rũndã-rũndã, neb wʋsg yaa naong rãmb n namsdẽ, tɩ kẽer tar arzɛgs wʋsgo. La sã n yaa naab ne a poorẽ dãmb sẽn yaa nimbãan-zoɛtb n dɩt naam dũniyã gill zugu, b tõogd n sõnga ned kam fãa t’a paam sẽn yaa tɩlae ne-a wã. Yãmb tagsdame tɩ ninsaalbã tõe n lugla goosneema a woto buud bɩ?—Karm-y Yelbũn 20:24.

Ninsaalbã sẽn be tẽngã zug tɛka, b nanambsã zɩ n tõog n ges b nin-buiidã yell sõma ye. Sẽn yɩɩd fãa sẽn yaa-b naong rãmbã. Nanambs kẽer yaa nin-toose. (Koɛɛg Soaba 4:1; 8:9) La Wẽnnaam Sẽn-tõe-fãa wã pʋlmame t’a na n kɩtame tɩ goosneema yɛng ledg nanambsã fãa zĩigẽ. Goosneema kãng naabã na n gesa a nin-buiidã yell neere.—Karm-y Ezai 11:4; Daniɛll 2:44.

Bõe la Wẽnnaam Rĩungã na n maane?

Wẽnnaam a Zeova yãka rĩm-sõng t’a na n soog dũniyã gilli: Yaa a Biig a Zezi. (Luk 1:31-33) A Zezi sẽn wa n be tẽngã zugã, a ra nonga nebã sõngre. A sã n wa sɩng a naamã rɩɩb tẽngã zugu, a na n kɩtame tɩ buud toor-toorã neb zems taaba, la a kɩt tɩ b paam b mens ne b zu-loeesã fãa.—Karm-y Yɩɩl Sõamyã 72:8, 12-14.

Nebã fãa na n saka a Zezi naamã bɩ? Ayo. La a Zeova maanda sũ-mare. (2 Pɩɛɛr 3:9) A basa weer tɩ nebã tõe n wilg tɩ b ratame t’a Zezi yɩ b naaba. La ka la bilfu, a Zezi na n menesa nin-wẽnsã tẽngã zugu, la a kɩt tɩ laafɩ la bãan zĩnd dũniyã gill zugu.—Karm-y Miise 4:3, 4.