Yãmb ra miime bɩ?

Rẽ yĩnga, a Moyiiz tõogã sɩd ra sõngdame tɩ b welgd yɛlã pĩnd wẽndẽ Israyɛll nebã sʋk bɩ?

N-YE, wakat ninga. Ad makr a ye. Tõod 24:14, 15 yetame: “Fo saam-biig bɩ sãan sẽn yaa naong soaba, bɩ nimbãan ned sã n tʋmd fo nengẽ n baood ligdi, bɩ f ra nams-a ye. . . . Sã n ka woto, yẽnda tõe n dɩka foom n bas ne Sẽn-Ka-Saabo, tɩ lebg yel-wẽnd fo yĩnga.”

Kibar a ye pʋgẽ la b wilg tɩ yell a woto buud n maan yʋʋm 600 sẽnese, sẽn deng a Zeezi rogmã. Yaa sa-pɛɛg zug la b gʋls kibarã sẽn yaa kosgã. Asdood tẽngẽ wã la b buk sa-pɛɛgã. Tog n yaa ka-koaad n kɩt tɩ b gʋlse. Wõnd yaa a sẽn pa tõog n kõ kood wʋsg wa b sẽn da sar t’a segd n kõome wã yĩnga. B yeelame: “Yãmb tʋm-tʋmdã [sẽn kot-a wã] sẽn wa n tigs koodã a sẽn kẽebã n sa wã, rasem a wãn poor bala, a Shobay biig a Hoshayahu wa n deega y tʋm-tʋmdã fuugu. . . . M tʋmd-n-taasã fãa sẽn da naag n tigsd koodã ne wĩnto-sʋkã tõe n kõo kaseto, . . . tɩ m sẽn yetã yaa sɩda. M pa tar taal baa-baa. . . . Guvɛrneerã sã n tagsdame tɩ pa be ne yẽ t’a ges tɩ b lebs y tʋm-tʋmdã a fuugã, bɩ a we n sõng-a nimbãan-zoeer yĩnga! Y tʋm-tʋmdã sã n pa paam a fuugã, y pa segd n sĩnd ye.”

Kʋdemd yel-mit a Simon Schama yeelame tɩ kibarã pa wilgd bal tɩ ka-koaadã rata ne a sũur fãa tɩ b lebs-a a fuugã ye. A yeelame tɩ “wilgdame me tɩ sẽn kot-a wã ra tog n mii noy nins sẽn be Maan-kʋʋr sebrã ne Tõod sebrã pʋgẽ n wilgdẽ tɩ b pa segd n nams naong rãmbã, la noy a taab sẽn be Biiblã pʋgẽ.”