Yãmb sogsgã leoore

◼ D sã n yaa rao n moond ne paga, wall d seg pag sẽn dat n bãng Biiblã n paase, d segd n gũusa ne bõe?

D bee bʋʋm d sẽn dat tɩ d saam-biisã la d saam-bi-pogsã tall manesem sẽn zems ne Wẽnnaam noyã. Baasg zãnga, d vɩɩ dũni sẽn yaa yaar la sẽn yaa rẽgd pʋgẽ, tɩ nebã manesem pa sõma ye. Baa ne d sẽn tõe n tall tagsg sẽn zemsã, d segd n gũusa wakat fãa n da wa paam taale, bɩ n da wa maan sẽn pa zems ye. Woto baoodame tɩ d sã n wa moond koɛɛgã bɩ d maan gũusg wʋsgo.

Koe-noogã mooneg pʋgẽ, d mi n sõsda ne pagba, bɩ ne rapa, tɩ b kelgd sõma tɩ wõnd b nonga sɩdã. D sã n yaa rao n moond d yembr n tɩ seg paga, bɩ d sã n yaa pag n moond d yembr n tɩ seg raoa, tɩ yaa yẽ a ye bal n be zakã pʋgẽ, d segd n moona a soabã zakã noor n da kẽ pʋgẽ ye. A sã n wilg t’a rat n bãng n paasame, d tõe n baoa koe-moond a to t’a yãag-d tɩ d lebg n tɩ kaag a soabã, pa rẽ bɩ d kẽng wakat ning zakã neb kẽer sẽn be yiri. Sã n mik tɩ woto pa tõe, yaa yam tʋʋmd tɩ d bao koe-moond sẽn yaa pag t’a tɩ kaagd-a, a soabã sã n yaa paga. La a sã n yaa rao me, d segd n baoa koe-moond sẽn yaa raoa. D sã n dat n zãms Biiblã ne ned me segd n yɩɩ woto.—Mat. 10:16.

D segd n maana gũusgu, d sã n wa yãkd ned t’a na n tũ-d n moon koɛɛgã. Baa ne pag ne rao sẽn tõe n tũ taab n moon wakat kẽerã, koe-moondbã sã n yaa wʋsg n moond ne taab la b tõe n maan woto tɩ yaa sõma n yɩɩda. Naoor wʋsgo, pa yam tʋʋmd tɩ d rɩkd sẽk n moond d yembr ne ned sẽn pa d paga, bɩ sẽn pa d sɩd ye. Woto yĩnga, saam-biig ning sẽn na n kɩt tɩ nebã tũ taab n moonã segd n tagsa sõma, a sã n wa yãkd koe-moondbã tɩ b moon ne taaba, baa kom-bɩɩsã me.

D sã n tagsd sõma wakat fãa, na n sõng-d lame tɩ d ra maan bũmb n wa lub ned wall d meng ye.—2 Kor. 6:3.

Ne gom-kãensã, b sagenda tõnd tɩ d maan gũusg wʋsgo, d sã n yaa saam-biig n tũud saam-bi-poak bɩ d sã n yaa saam-bi-poak n tũud saam-biig n moond koɛɛgã. Bʋʋm wʋsg yĩng n kɩt tɩ d fãa segd n tags sõma yel-kãngã zugu. La woto pa rat n yeel tɩ tigims sull yel-gɛtbã, bɩ saam-biis a taabã pa tar sor n na n moon ne saam-bi-pogsã ye. Rat n wilgame bal tɩ pa yam tʋʋmd tɩ saam-biig yãk sãam-bi-poak sẽn pa a roagd bɩ sẽn pa a pag tɩ yaa yẽ a ye bal la a rɩkd sẽk wakat fãa n moond ne ye.