D rata Rĩung Rot n paase
D sã n ges dũniyã gill pʋʋgo, noogda d sũy tɩ d neẽ t’a Zeova tẽng zug siglgã paamda fɩɩgr sẽn yaa kãsenga. Rɩẽ koe-moondb sõor sẽn sãd sẽn yaa 998 la b paam Burkĩna Faso, tɩ neb 79 reeg lisgu. Ne fɩɩgr a woto, ka lingr tɩ d rat Rĩung Rot n paas ye. Sẽn na yɩl n sõng n pids ratem sẽn paasd a woto, Sosiete wã lugla Rĩung Rot meeb biru, la a kõ sor-wilgr noy tɩ zems ne sẽn segdã, sẽn na yɩl tɩ Rĩung Rotã meeb yɩ sõma n paase. Yãmb tigingã rata Rĩung Roog bɩ? Sã n yaa woto, yel-bʋs la y tog n maane?
Bao-y zĩig sẽn zemse: Pipi bũmb y sẽn na n maan yaa y bao zĩ-metem sẽn zemse. Tẽngã metb tʋʋmd sull segd n tagsa sʋgsg nins sẽn pʋgdã zut neere: 1) Zĩigã yalmame tɩ sek roog sẽn zems ne tigingã raab meeb bɩ? 2) A bee tigingã teritoaar sʋk tɩ b tõe n kẽng zĩigẽ wã nana-nana bɩ? 3) A bee zĩig ning koom sẽn ka nong n dɩkdẽ teed n loogdẽ, la a zãr ne ott tãnsiõ kuurã bug-wĩy bɩ? 4) Sam la lampo rãmb b sẽn ka yao n be zĩigã zug tɩ tigingã sã n da-a bɩ a segd n deeg n yao bɩ? 5) B yãka bab-kãng tɩ yaa tũudum rot meeb zĩig bɩ? B sã n tũu so-kãensã n sa fãa, b tõe n kosa Rĩung Rot meeb biru t’a wa mag zĩigã yõod n gese.
Yɛl a taab sẽn tar yõodo: B sã n yã tɩ zĩigã zemsame, Rĩung Rot meeb biru wã na n kõo meeb pãlã rãmb ne seb-vã-nens a 9 sebr sẽn tar sʋgsgo, n paas meebã ligd gɛɛla, la no-sɩɩr tẽngã metb sull la tigingã sẽn segd n wilg b sakr ne. B segd n pidsa seb-kãensã n kɩs filiallã sẽn na yɩl tɩ b sake. Rẽ poore b na n daa zĩigã n gʋls tẽngã Asosiasiõ lagem-n-taar yʋʋr sɛbã zutu. B tõe n paama sɛb nins sẽn yaa tɩlae ne rẽ wã ne filiallã. Rẽ poore tigingã segd n tɩ kɩsa tẽngã pãn-soaadb Rĩungã Roog pãlã n paam sor meebã yĩnga. Rĩung Rot metb sullã na n siglame la b geelg meebã wakate, la b togs tigingã zɩɩb nins sẽn zao a zugu.
Lagem-n-tʋm yaa tɩlae: Wala tõnd sẽn tar lagem-n-taar moonegã tʋʋmd pʋgẽ wã, tog n yɩɩ woto me d Rĩungã Roog meeb pʋgẽ. D sã n tʋmd ne taab nonglem la sũ-noog pʋgẽ, sõngda tõnd tɩ d ta a Zeova yam la d paam a barka. Bala sɩda, “Zusoaba sã n ka met roogo, tãn-metba tʋmda zaalem bala.”—Yɩɩl 127:1.