Zu-noog kom-bõonegã sẽn tõe n paame
1 Ne yamleoogo, neb wʋsg sẽn yaa roagdb masã tẽegda zu-noog a yembr b sẽn da tar b sẽn da yaa kamb n bɩt sɩdã pʋgẽ wã yelle. Zu-no-kãng da yaa Periodik rãmb pʋɩɩb tʋʋmdã daare. Yɩɩ yʋʋmd 1949 wã la b sigl tʋʋm-kãngã tigimsã fãa pʋsẽ. Daar a yembr semena pʋgẽ, ned kam fãa ra segd n modgame n pʋɩ Gũusg Gasgã la Réveillez-vous! wã soayã zutu, zak-zaka, butik-butika, la ne manesem a taaba. Sẽn yɩɩd fãa koe-moondb nins sẽn yaa bõoneg n yɩɩdã ra gũudame n na n kẽes b mens tʋʋm-kãngã pʋgẽ, bala rẽ ra kõt-b-la sor tɩ b tõe n lagem ne kãsembã n maan tʋʋm-yɛng tigingã pʋgẽ. Yãmb sẽn da wa n yaa biigã, yɩɩ woto ne yãmb me bɩ?
2 Kẽes-y y kambã tʋʋmdã pʋgẽ: Kom-bõoneg sẽn nan ka tõe n tik Gʋlsg Sõamyã zug n sɩng sõasg ne neb zagsẽ wã baas n tõe n kãaba periodik rãmba. Rẽ baoodame bal tɩ f zãms wilgr sẽn yaa nana sẽn tar gom-koees a wãn bala. Tõeeme tɩ gom-koɛɛg togsg periodikã poor fot zug bal seke. Neb wʋsg sakda zʋrno rãmbã tõnd kambã nengẽ tao-tao, n nong n pẽgd kom-kãensã pʋ-peelmã la b manesem sõma wã. Kambã sã n paam sõngr bilf bala, tʋʋm-kãngã yaa tʋʋmd b sẽn tõe n maan sõma, tɩ rẽ yaa sõngr sẽn tar yõod wʋsg sẽn na yɩl tɩ Rĩungã koɛɛg paam yelgre. Yaa vẽeneg tɩ kambã sã n bɩt n paasdẽ, b roagdbã na n tʋll n sõng-b lame tɩ b ket n paasd b kasetã kũun tõodo.
3 A Manuel sɩngame n moond zak-zak a sẽn da wa n tar yʋʋm a tãabo. A roagdbã sõng-a lame t’a zãms wilg-koees ne zugu. A tũ-b lame n moond ne yẽesem, n basd periodik rãmba, seb-biya, la seb-vãad wʋsg ne neba. A leb n kõo kaset sẽn ka yãk wakate. Vugri a roagdbã tall-a lame n kẽng pemsem kokr park pʋgẽ. A yãka yam a toor n na n bas seb-vãad kẽer ne neb a taabã sẽn da be be wã. Baa a sẽn ket n nan yaa yãagã, a Manuel yẽesmã ministɛɛrã pʋgẽ kengda a roagdbã la tigingã tõr neb raood hal wʋsgo.—Yel. 22:6.
4 B yãka sibr fãa tɩ yaa “Periodik rãmb pʋɩɩb raar” Calendrier des Témoins de Jéhovah 2000 pʋgẽ. Roagdba, d sagend-y lame tɩ y lebg n wilg ratem paalg ne tʋʋm-kãngã, n sõngd y kambã tɩ b kẽesd b mens zu-noog tʋʋm-kãngã pʋgẽ wa b sẽn tõe tɛk n ka vaandẽ ye.