Paam-y sũ-noog baleng tʋʋmdã pʋgẽ

¹ B lebg n waa “ne sũ-noogo.” Kɩbarã sẽn be Biiblã pʋgẽ wã wilgda karen-biis 70 wã yĩn-sids sẽn yɩ to-to b sẽn gilg zĩis wʋsg n moone, la b lebg n wa togs a Zezi yɛlã sẽn yɩ to-to wã. B paama sũ-noog b sẽn maan Wẽnnaam daabã yĩnga. (Luk 10:17) Bõe n tõe n sõng-y tɩ y paam sũ-noog a woto baleng tʋʋmdã pʋgẽ?

² Yam-sõng tallgo: A Zeova kõ-y-la zu-noog tɩ y kɩt tɩ nebã bãng a raab-kãsengã. Ne yãmb moonegã maasem y tõe n sõnga neb tɩ b paam b mens ne dũni kãngã tʋʋm-wẽns la ziri tũudmã yembdo. Y tõe n kãaba nebã saagr ning sẽn yaa vɩɩmd dũni sẽn ka tar zab nins sẽn gũbg tõnd rũndã-rũndã wã. Yãmb wee n tags sũ-noog ning a Zeova sẽn na n tallã, y sã n tõog n bʋd sɩdã bõn-buud tɩ wom biis sũ-sõng pʋgẽ wã. Tall-y yam-sõng y sã n wa pʋʋsd n kot tɩ Wẽnnaam vʋʋsem sõngã kɩt tɩ y tall a sũ-noogã bil wakat ning y sẽn ket n kẽngd taoor ne y ministɛɛrã ne y sũur fãa wã.

³ Zãmsg sẽn zemse: B tõe n maka zãmsg wakatã a Zezi sẽn dɩk ne karen-biis 70 wã ne rũndã-rũndã Tʋʋmd tigisga. A ra kõ-b-la zãmsg sẽn na yɩl tɩ b tõog n pids b ministɛɛrã ne manesem sẽn womd biisi. (Luk 10:1-16) Rũndã-rũndã Tʋʋmdã tigisg zãmsda yãmb y sẽn na n maan to-to n sɩng goam ne neda, y sẽn tõe n sɩng sõasg to-to, la y sẽn na n maan to-to n sɩng la y maan yirẽ Biibl zãmsg ne neba. Y sã n modg la y paas y moonegã tõod sõmblem, y na n yãame tɩ y ka na n le wa tagsd wʋsg tɩ yaa wa y ka zems bɩ y ka tõe tʋʋmdã ye. Y bas-m-yamã la y sũ-noogã na n kɩtame tɩ y ka tags woto ye.

⁴ Yals-y y yamã sẽn watã zugu: Baa ne namsgã a sẽn yã wã, a Zezi paama sũ-noog a baleng tʋʋmdã pʋgẽ. Bõe yĩnga? Ya a sẽn da yals a yamã bark la zu-nood nins sẽn be taoorã n gũud-a wã zug yĩngã. (Heb. 12:2) Yãmb me tõe n maana woto, n yals y yamã a Zeova yʋʋrã la bark nins sẽn wat Wẽnnaam dũni paalgã pʋgẽ wã zutu. Dẽ y ministɛɛrã na n kõ-y-la sũ-noog la a tall võor n paase.

⁵ Rũndã, zu-noog sẽn yaa kãseng le ka be n yɩɩd y sẽn na n maan baleng tʋʋmd n kõ a Zeova ye. Rẽ n so tɩ y tõe n yeele: “Mam Wẽnnaam, mam dat n maana yãmb daabo.”—Yɩɩl 40:9.